ཏཱ་ལའི་བླ་མའི་གཞིས་སྒར།

རྭ་རྒྱ་དཔལ་ལྡན།

གངས་ར་ནས་ཡར་སོང་ན་རྒྱ་གར་བྱང་ཕྱོགས་ཀྱི་གངས་རི་དང་འདབས་འབྲེལ་དུ་ཡོད་པའི་རྡ་རམ་ས་ལ་ཟེར་བའི་རྫོང་མཁར་ཆུང་ཆུང་དེར་ཐུག རྫོང་མཁར་གྱི་རི་ངོར་འཐེན་པའི་ལམ་ཕྲན་ཆུང་ཆུང་བརྒྱུད་ནས་ཡར་སོང་ན་མེག་ལོར་སྒན་འཇུ་རེད། སྤྱི་ལེ་དྲུག་དང་ཚེག་གཉིས་ཅན་གྱི་ལམ་ཕྲན་འདི་ཧི་མ་ཅལ་མངའ་སྡེ་གཞུང་ནས་ལོ་ངོ་གསུམ་ལ་བཟོས་པའི་ཏཱ་ལའི་བླ་མ་ཕེབས་ལམ་པོ་ཏཱ་ལ་ལམ་ཟེར་བ་རེད། མིང་དེ་ཡང་ཏཱ་ལའི་བླ་མ་མཆོག་དགུང་གྲངས་བརྒྱད་ཅུར་ཕེབས་པའི་འཚམས་རྟགས་ཀྱི་ལེགས་སྐྱེས་སུ་མངའ་སྡེ་བློན་ཆེན་མཆོག་གིས་དངོས་སུ་ཕུལ་བ་རེད། ཡིན་ཡང་ལམ་ཕྲན་འདི་ད་དུང་འབར་འབུར་དོང་དོང་མང་ལ། བདེ་གཟར་མི་མཉམ་པ། དུས་ཚིགས་རེ་རེའི་ནང་རྫོང་མཁཪ་བཙོག་ཆུ་ཤོར་བའི་དྲི་ངན་འཐུལ་བ། ལམ་འགའ་རེ་ནས་ཞིག འགའ་རེ་ནས་ཆད། འགའ་རེ་ནས་བཙོག་ཆུ་བར་མེད་རྒྱུ་བ་ནི་རྡ་རམ་ས་ལའི་དུས་བཞིའི་འགྱུར་ལྡོག་ཅི་ལ་མིན། མངའ་སྡེ་ཞིག་གིས་རྫོང་མཁར་ཆུང་ཆུང་འདིའི་ལམ་ཁ་ཙམ་ཞིག་ལོ་གསུམ་ལ་བཟོས་པར་བལྟས་ན་རྒྱ་གར་ཟེར་བ་རྒྱལ་ཁབ་འདིར་རེ་བ་རྩ་བ་ནས་ཆད་ཡོད། ཏཱ་ལའི་བླ་མ་ཟེར་བའི་འཛམ་གླིང་ལ་ཞི་བདེ་དང་སྐྱེས་འགྲོའི་བདེ་སྐྱིད་སྐྲུན་མཁན་གྱི་དུས་རབས་ཉེར་གཅིག་པའི་སྟོན་པ་སངས་རྒྱས་གཉིས་པ་བཞུགས་པའི་རྫོང་མཁར་ལ་ད་དུང་ལམ་ཁ་འདི་ལྟ་བུ་ལས་མེད་པ་ནི་ཅི་འདྲའི་ཆ་མི་མཚུངས་པ་ཞིག་གོ ཕྱི་རྒྱལ་བ་སུ་ཞིག་ས་འདིར་སླེབས་ན་ཡ་མི་མཚར་རམ།

རེད་དེ་ཏཱ་ལའི་བླ་མ་མཆོག་རི་ཁ་འདི་ནས་གྲོགས་མེད་ཁེར་རྐྱང་གིས་ངང་ལོ་ངོ་ལྔ་བཅུ་བརྒལ་བར་བཞུགས། དེའི་རིང་འཛམ་གླིང་ལ་དཔར་བའི་ཞབས་རྗེས་རེ་རེ་ན་གསེར་འོད་ལམ་ལམ་འཕྲོས་པའི་འཛམ་གླིང་ཞི་བདེ་དང་། འགྲོ་བའི་ཀུན་ཕན་བྱམས་བརྩེའི་རིན་ཐང་དེ་དག རྒྱུད་ཆེ་བའི་རི་བོ་ཧི་མ་ལ་ཡིས་ཀྱང་འགྲན་ག་ལ་ཐུབ། རྒྱུན་རིང་བའི་ཆུ་བོ་གངྒས་ཀྱང་འགྲན་མི་ཐུབ་དེ་ག་ལ་ཐུབ། འོད་ཀྱང་ཁ་ཁུ་སིམ་མེར་རི་ཁ་འདི་ནི་འཛམ་གླིང་གི་གྲུ་ཁ་གཞན་ཞིག་ནས་ནག་མེད་ངང་ཁེར་རྐྱང་དུ་འཇོག་པར་བསམ་པའི་སྦྱོར་རྩུབ་ལས་ཡོངས་སུ་ཐར་ཏེ། འཛམ་གླིང་གི་གླིང་གཞན་ནས་གཞན་དུ་འོད་ཟེར་འཕྲོས། འོད་ཟེར་དེ་ཧི་མ་ལ་ཡི་རི་རྒྱུད་ཀྱིས་འགོག་མ་ཐུབ་ལ། རྒྱ་གར་བའི་རི་ཆུ་ནགས་གསུམ་གྱིས་བཅོད་མ་ཐུབ། གླིང་ཕྲན་གཞན་ནས་གཞན་དུ་འཕྲོས། འཕྲོ་བ་དེས་འགོག་པར་བསམ་པའི་སྦྱོར་ངན་ལས་གོ་ལྡོག་པར་བྱས། ཁེར་རྐྱང་དུ་ལྷགས་པར་བསམ་པའི་ཏཱ་ལའི་བླ་མ་མཆོག་བླ་ནས་བླ་རུ་བཀུར་ཞིང་། འཛམ་གླིང་གི་དབུ་ཁྲིད་པར་གྱུར་བ་དེས་རྒྱ་གར་ནག་མཚོན་པའི་རི་བོ་ཧི་མ་ཁེར་རྐྱང་དུ་གྱུར། རི་བོ་ཧི་མ་ལ་ཡ་ཁེར་རྐྱང་དུ་ལྷགས་པ་དེ་ནི་གཞན་གང་ཡང་མ་ཡིན་དེ། དེ་ནི་དཀྱིལ་ཤར་ཨེ་ཤི་ཡ་ཁེར་རྐྱང་དུ་ལྷགས་སོ། །

ཏཱ་ལའི་བླ་ཁེར་རྐྱང་ཟུར་འཇོག་བྱེད་པ་དེ་རྒྱུ་མཚན་གང་ཡང་མེད་པ་ཅི་ལ་ཡིན། མིན་ནོ། དཔེར་ན་ཉིས་སྟོང་བཅོ་བརྒྱད་ལོར་རྒྱ་གར་ནག་གཉིས་ཀྱིས་ས་རྩོད་ཆུ་རྩོད་ཀྱི་མེ་ལྕེ་འབྲོག་ལམ་ནས་མཆེད། འཛམ་གླིང་གི་གསར་ཁང་གང་མང་ནས་རྒྱ་གར་ནག་གི་གནས་སྟངས་དེར་མིག་གཅེར་ནས་བལྟས། དུས་ཚོད་དེ་ཏག་ཏག་ལ་རྒྱ་གར་བ་ག་གེ་མོ་ནས་གསར་ཁང་དུ་བཤད་པར། རྒྱ་གར་བ་དུང་ཕྱུར་བཅུ་གསུམ་གྱིས་བོད་ཀྱི་གནས་ཚུལ་བོད་རང་དབང་མི་གླེང་བའི་ངེས་པ་མེད་ཟེར། གསར་ཁང་དུ་བཤད་པའི་སྐད་ཆ་དེས་རྒྱ་ནག་ལ་འགྲམ་ལྕག་ཚ་བེར་བ་ཞིག་ཡིན།

ཡིན་ཡང་ཏཱ་ལས་བླ་མ་དེ་ལྟར་ཁེར་རྐྱང་ཟུར་འཇོག་པའི་གོ་རིམ་ཁྲོད་རྒྱ་གར་བ་དུར་ཕྱུར་བཅུ་གསུམ་ཙམ་འཛམ་གླིང་གི་གྲུ་ཁ་ཞིག་ནས་ཁེར་རྐྱང་ཟུར་སྡོད་བྱས་པ་རེད། ངས་རྒྱ་གར་བ་དུར་ཕྱུར་བཅུ་གསུམ་ཙམ་ཁེར་རྐྱང་ཟུར་སྡོད་ཟེར་བ་དེ་ནི། རྒྱ་གར་བ་དུར་ཕྱུར་བཅུ་གསུམ་གྱི་ཏཱ་ལའི་བླ་མ་མཆོག་གི་གསུང་གི་བྱིན་རླབས་མ་ཐོས། སྐུ་ཡི་འོད་མདངས་མ་རིག ཐུགས་ཀྱི་བྱམས་བརྩེ་མ་ཚོར། བཀའ་དྲིན་བསམ་ཤེས་མ་ཐུབ་ཟེར་བ་ཡིན། ཏཱ་ལའི་བླ་མ་མཆོག་གིས་དུས་རྒྱུན་བློ་སེམས་རབ་ཏུ་བརྟན་པའི་སྒོ་ནས་ཆོས་ལུགས་མཐུན་སྒྲིལ་དང་། རྒྱ་གར་གྱི་གནའ་རབས་ཆོས་དང་རིག་གཞུང་བསྐྱར་གསོའི་ཆེད་བླ་མེད་ཀྱིས་མཛད་རྒྱུས་དེ་དག་གི་རིན་ཐང་ཏིལ་འབྲུ་ཙམ་རྟོགས་མེད་ལ། དེ་ལས་ཀྱང་ཏཱ་ལའི་བླ་མས་ཆོས་ལུགས་མཐུན་སྒྲིལ་གྱི་རྒྱ་གར་གནའ་རབས་ཀྱི་ཡ་རབས་སྤྱོད་བཟང་གིས་འཛམ་གླིང་ལ་སྔར་ལས་ལྷག་པའི་དཔེ་གསར་གྱི་སྒོ་མོ་འབྱེད་པ་མ་ཚོར། རྒྱ་གར་བ་ཕྱི་ཚུལ་གྱིས་བལྟས་ན་ཞི་བདེ་བབ་ཕེབས་ཀྱི་འཚོ་བ་དང་། ཆོས་ལུགས་མཐུན་འབྲེལ་ཆེ་པ། དམངས་ཕན་སྤྱི་སེམས་ཆེ་འདོགས་ཁ་ཞིག་ཡོད་ཀྱང་དོན་དངོས་ཆོས་ལུགས་འགལ་འདུ་དང་། ཕྱོགས་ཁག་འཐེན་ཁྱེར་གྱིས་གནས་བབ་དེ་ཉེ་སྔོན་པལ་བ་མ་ Pulwama ནས་དྲག་སྤྱོད་པས་ཉེས་མེད་དམག་མི་ཞེ་གཅིག་དུས་གཅིག་ལ་བསད་པ་དང་། ལོ་འགའི་སྔོན་མང་བྷེ་ནས་ཏ་ཇུ་གསོལ་མགྲོན་ཁང་ལ་དྲག་སྤྱོད་བྱས་པ་ལྟ་བུ་ནི་དཔེ་མཚོན་ཙམ་མིན་ནམ། ཕྱི་ཟླ་ ༢ པའི་ཚེས་ ༡༤ ཉིན་དམར་གསོད་དོན་རྐྱེན་བྱུང་བ་དང་རྒྱ་གར་བས་ལས་དོན་ཅི་བྱེ་དམག་མི་ལ་དབང་སྤྲད་པ་ཡིན་ཟེར་ནས་གསལ་བསྒྲགས་བྱས། དེའི་ནང་དོན་ནི་རྒྱལ་དོན་གྱི་ཆེད་དུ་དམག་རྒྱག་རྒྱུ་དབང་ཚད་སྤྲད་པ་ཡིན་ཟེར་བ་མིན་ནམ། ཡིན་ཡང་ཉིན་འགའི་རྗེས་སུ་རྒྱ་གར་གྱི་ཐད་འཕུར་གནམ་གྲུ་གཉིས་པ་ཀི་སི་ཐན་ནས་ནག་མེད་བཏང་བ་དང་། ཁ་ལོ་བ་གཅིག་གསོན་བཟུང་བྱས་པ་དེས་རྒྱ་གར་གྱི་གཏམ་ལ་ཨ་ལན་གསལ་བོ་ཞིག་འཕྲོད་པ་ཡིན་ནམ། ཉིན་དེ་ནས་བཟུང་འདས་དོན་དེ་རྒྱ་གར་བ་སུ་ཞིག་གིས་དྲན་མི་ཐུབ་པར་གྱུར།

དེ་དག་གི་ཐད་རྒྱ་གར་བས་ཕན་ཚུན་ལ་དགྲ་གཤེད་ཀྱི་འདུ་ཤེས་ཅི་ཙམ་ཆེ་ཡང་། ཕྱི་ཚུལ་ནས་རང་གི་དགྲ་བོར་ལག་པ་འཇུ་བ་དེས་ལོ་རྒྱུས་ལ་ནག་བསུབ་དང་། དྲང་བདེན་ལ་འཁྱོགས་བརྗོད་ཅི་ལ་མིན། རྒྱ་གར་ནག་གཉིས་ཀྱིས་རེ་ངན་ཞིག་ཡོད་པ་དེ་ནི་ལོ་རྒྱུས་རང་ལ་ཕྱིར་ལྟ་མི་བྱེད་པར་མ་འོངས་པའི་ཁེ་ཕན་ཅུང་ཙམ་ཞིག་ལ་རེ་བ་ལས་མདུན་ལ་གཏད་པའི་དཀའ་ཁག་དེ་དག་ལ་མིག་བཙུམས་པ་རེད།

ཡིན་ཡང་ཏཱ་ལའི་བླ་མ་མཆོག་གིས་མ་འོངས་སྔོན་གཟིགས་ཀྱིས་རྒྱ་གར་ནག་དང་བོད་པ་ཙམ་པ་ཡིན་པར་དུས་རབས་གཉེར་གཅིག་པའི་དཀའ་ཁག་ལ་གདོང་གཏད་པས། དུས་རབས་གསར་པ་འདིའི་གཞོན་སྐྱེས་ཚོར་རེ་བ་བཟང་ས་ནས་བྱེད་བཞིན། མ་འོངས་པའི་འཛམ་གླིང་འདི་ནི་ལོ་རྒྱུས་དེབ་ཐེར་ནང་བྲིས་པའི་རྒྱལ་དོན་ཕྱོགས་སུ་ཆད་པའི་རང་རྒྱལ་གཞན་ཕམ་གྱི་སྲིད་ཇུས་ནག་པོ་དེ་མ་ཡིན་པར། དུས་རབས་ཉེར་གཅིག་པའི་ཆོས་པ་རྣམ་དག རྒྱལ་དོན་སྲིད་ཞུ་རྣལ་མ། ཆོས་ལུགས་ཆ་མཐུན་ཁ་ཞེ་མེད་པ། དཔལ་འབྱོར་དབུལ་ཕྱུགས་མཉམ་པ། འཁོར་ཡུག་བདག་གཅེས་བྱེད་པ། སྐྱེ་འགྲོའི་བདེ་སྐྱིད་ཉག་གཅིག་ལ་འབད་པའི་འཇིག་རྟེན་ཀུན་ཁྱབ་ཀྱི་བསམ་བློ་དང་ལྟ་གྲུབ་ཀྱིས་སྐྱོང་བསམ་དེའོ།།

23.05.2019 ཉིན།