དམེ་ཤུལ་འཇིགས་མེད་འོད་ལྡན།
བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་དང་བཅས་བའི་ཆོས་ཚོགས་ཐེངས་བཅུ་གཅིག་པའི་ཐོག་བོད་དང་བོད་མིར་འབྲེལ་ཆགས་ཀྱི་འཇིག་རྟེན་སྐྱེ་འགྲོ་ཡོངས་ལ་སྤྱི་ནོར་༧གོང་ས་སྐྱབས་མགོན་ཏཱ་ལའི་བླ་མའི་ཡང་སྲིད་སྐོར་གྱི་བཀའ་ཡིག་ཡོངས་ཁྱབ་ཏུ་བསྒྲགས་པའི་རྗེས་སུ་རྒྱ་ནག་དབུས་གཞུང་གིས་ཡ་ང་ངོ་ཚ་མེད་པའི་སྲིད་བྱུས་གཏན་འབེབས་ཀྱིས་རྒྱལ་སྤྱིའི་མང་ཚོགས་དང་བོད་བརྒྱུད་ནང་བསྟན་རྗེས་འཇུག་པ་རྣམས་མགོ་སྐོར་བསླུ་བྲིད་བྱ་རྒྱུའི་བྱུས་ངན་བསྒྲགས་གཏམ་རིམ་པར་སྤེལ་ཏེ་ཏཱ་ལའི་བླ་མའི་ཡང་སྲིད་ཁོ་བ་ཚོས་ཆབ་སྲིད་ལག་ཆ་རུ་བེད་སྤྱོད་གཏོང་འདོད་གྱི་ཧམ་སེམས་བཅངས་ཡོད་པ་མཐོང་ཆོས་སུ་གྲུབ་ཡོད། དེའི་ཕྱིར། འུ་ཅག་བོད་མི་ས་ཡ་དྲུག་དང་ནང་བསྟན་ཆོས་ལུགས་ཀྱི་རྗེས་འཇུག་པ་ཡོངས་ཀྱི་འཕྲད་ཕུགས་རྒྱངས་གསུམ་གང་ལ་བལྟས་ཀྱང་སྐྱབས་མགོན་ཏཱ་ལའི་བླ་མའི་ཡང་སྲིད་སྐོར་ལ་རྒྱ་ནག་དབུས་གཞུང་གིས་ཐེ་བྱུས་བྱེད་མི་འཇུག་རྒྱུ་ནི་འུ་ཅག་བོད་པ་ཚང་གི་འགན་འཁྲི་རེད།
འགན་འཁྲི་འདི་ཇི་ལྟར་བསྒྲུབ་ན་ད་བཟོད་སྒྲུབ་ཐུབ་བམ་ཟེར་ན། དེ་ནི་རྒྱལ་སྤྱིའི་མང་ཚོགས་ནང་སངས་རྒྱས་ཆོས་ལུགས་ལ་དད་མོས་བྱེད་པའི་ཚོགས་སྡེ་ཁག་དང་བོད་ཀྱི་བཀའ་ཤག་སྲིད་གཞུང་གཉིས་ལ་རག་ལས་བ་རེད།
གང་གིས་ཞེ་ན། གོང་ས་སྐྱབས་མགོན་ཏཱ་ལའི་བླ་མ་མཆོག་གིས་ནང་པ་སངས་རྒྱས་ཀྱི་ ཆོས་འདི་ལ་ནང་ཆོས་ཀྱི་ཉམས་ལེན་གྱི་སྡེ་ཚན་གཅིག་དང་། ལྟ་གྲུབ་ཀྱི་སྡེ་ཚན་གཅིག ཚན་རིག་གི་སྡེ་ཚན་གཅིག་བཅས་སྡེ་ཚན་ཆེན་པོ་གསུམ་དུ་བགར་ནས་འཇིག་རྟེན་སྐྱེ་འགྲོ་ཡོངས་ལ་ངོ་སྤྲོད་ཀྱི་མཛད་འཕྲིན་སྐྱོང་བཞིན་པའི་གོ་སྐབས་དམ་འཛིན་གྱིས་རྒྱལ་སྤྱིའི་ནང་སངས་རྒྱས་ཆོས་ལུགས་ལ་དད་མོས་བྱེད་པའི་ཚོགས་སྡེ་ཁག་མཛའ་མཐུན་མཉམ་སྡེབས་ཀྱིས་སྤྱི་ནོར་༧གོང་ས་ཏཱ་ལའི་བླ་མ་མཆོག་ས་སྟེང་རྒྱལ་བསྟན་ཡོངས་ཀྱི་མངའ་བདག་སྤྱི་ཁྱབ་དབུ་ཁྲིད་དུ་ཁས་ལེན་བྱེད་རྒྱུ་ནི་གནད་གཅིག་རེད། བོད་གཞུང་བཀའ་ཤག་དང་ལྷག་པར་དུ་ཆོས་རིགས་ལས་ཁུངས་ཀྱི་ངོས་ནས་ཐུགས་ཁུར་ཆེ་བཞེས་ཀྱིས་རྒྱལ་སྤྱིའི་ནང་པའི་ཚོགས་སྡེ་ཁག་དང་འབྲེལ་འདྲིས་ཀྱིས་བགྲོ་གླེང་གནང་ཏེ་༧གོང་ས་ཏཱ་ལའི་བླ་མ་མཆོག་ས་སྟེང་རྒྱལ་བསྟན་ཡོངས་ཀྱི་མངའ་བདག་སྤྱི་ཁྱབ་དབུ་ཁྲིད་དུ་ཁས་ལེན་བྱས་པའི་རྒྱལ་སྤྱིའི་ཁྲིམས་མཐུན་ཡིག་ཆ་འཇོག་གནང་མཛད་རྒྱུ་ནི་གནད་གཉིས་བ་རེད། གལ་སྲིད་ཏཱ་ལའི་བླ་མ་མཆོག་ས་སྟེང་རྒྱལ་བསྟན་ཡོངས་ཀྱི་དབུ་འཁྲིད་དུ་བསྐོ་འཇོག་ཐུབ་པ་ཡིན་ན། རྒྱ་ནག་ལྟ་བུའི་རྒྱལ་ཁབ་བྱེ་བྲག་པ་ཅིག་དང་ལུང་ཚན་བྱེ་བྲག་པ་སུ་ཞིག་གིས་ཐེ་བྱུས་བྱེད་མི་ཐུབ་པ་ཡེ་ཤུ་བླ་ཆེན་ལྟ་བུའི་གསལ་བཤད་བྱས་ཡོད་པ་རེད། འོན་ཀྱང་ང་ཚོས་བྱེད་ཐབས་འདི་བསྒྲུབ་མ་ཐུབ་པ་ཡིན་ན་གོང་ས་མཆོག་གིས་ངོས་ནས་ཀྱང་བྱེད་ཕྱོགས་དེ་དག་ལམ་སྟོན་གསལ་བཀོད་ཀྱི་ཡིག་འཇོག་བྱ་རྒྱུ་ཡིན་ཞེས་གསལ་བོར་གསུང་ཡོད་ན་ཡང་རྒྱ་ནག་སྲིད་གཞུང་ནས་རྩིས་མེད་རྡོག་བསྒྲིལ་བཏང་སྟེ་རང་འདོད་ལྟར་ཏཱ་ལའི་བླ་མའི་ཡང་སྲིད་རྩད་གཅོད་ཚོགས་ཆུང ཆེད་འཛུགས་ཀྱིས་་རྒྱལ་བའི་ཡང་སྲིད་ཁྲི་འདོན་མཛད་དེ་ཆབ་སྲིད་ལག་ཆ་རུ་བེད་སྤྱོད་བྱེད་རྒྱུ་ནི་ད་ལྟའི་པན་ཆེན་བླ་མའི་ཡང་སྲིད་ཀྱིས་ང་ཚོར་ར་སྤྲོད་བྱས་ཡོད་པ་རེད། དེས་ན་འུ་ཅག་བོད་མི་ས་ཡ་དྲུག་དང་རྒྱལ་སྤྱིའི་ནང་པའི་ཚོགས་སྡེ་ཁག་སྟོབས་ཤུགས་གཅིག་བསྒྲིལ་གྱིས་སྤྱི་ནོར་༧གོང་ས་སྐྱབས་མགོན་ཏཱ་ལའི་བླ་མའི་ཡང་སྲིད་ཆོས་ལུགས་ཀྱི་དབུ་འཁྲིད་བྱེད་འཇུག་རྒྱུ་འམ་ཆབ་སྲིད་ཀྱི་ལག་ཆར་བེད་སྤྱོད་གཏོང་འཇུག་མིན་གྱི་འདམས་ཀ་བྱེད་རྒྱུ་ནི་འུ་ཅག་གི་འགན་འཁྲི་རེད།
ཁུག་རྟ་ཁྱེད་ཚོས་རང་ཁ་གསོ་ཐབས་ཁོ་ནས་ཆེད་དུ་ཏྰ་ལས་བེད་སྤྱོད་ལས་བོད་ཡུལ་རང་གནས་སུ་རྒྱ་ནག་གཞུང་གི་ངོས་འཛིན་བྱས་ན་མི་དགའ་འམ།
གནམ་འགོ་སངས་རྒྱས་ཆོས་ལུགས་པ་ཡོངས་ཀྱི་དབུ་ཁྲིད་དོན་གྱིས་ཆགས་ཚར་ཡོད། འོན་ཀྱང་ཁྲིམས་དོན་ཡིག་ཆ་ལྟ་བུ་ཞིག་ཀྱང་ཡག་པོ་རེད། ཡིན་ཡང་དེ་ནི་ང་ཚོའི་ཆོས་ཚོགས་དང་ཆོས་དད་པ་ཡོངས་ཀྱིས་དམིགས་བསལ་ཚོགས་ཆེན་བསྐོང་ཚོགས་གནང་ནས་གྲོས་ཆོད་འཇོག་དགོས་པ་ཞིག་རེད། དེ་ལ་རྒྱལ་ཁབ་གཞན་དག་གིས་ཀྱང་རྒྱབ་སྐྱོར་འཚོལ་འོས།
བདག་གི་བསམ་ཚུལ་ལ་༸གོང་ས་མཆོག་འཛམ་གླིང་གི་ཡིད་བཞིན་ནོར་བུ་ཆགས་ཚར་བ་དང་ལྷག་པར་ནང་པའི་དབུ་ཁྲིད་ཅིག་ཀྱང་རང་བཞིན་གཊྱིས་ཆགས་ཚར་བས་ཁོང་གིས་ཅི་གསུངས་ལས་ལྷག་ཅིག་གི་ནུས་པ་ཐོན་དཀའ་སྙམ།
གལ་ཏེ་རྒྱ་གཞུང་ཡང་རྦད་དེ་བླུན་རྨོངས་རང་མིན་ན་ད་ནི་ཡང་བསྐྱར་ཡང་སྲིད་བེད་སྤྱོད་ཀྱིས་བོད་མིའི་མགོ་གནོན་ཐབས་བྱེད་མི་སྲིད་དེ། དེས་ཁོ་རང་ཚོར་ཕན་གནོད་གང་ཆེ་གསལ་བོ་མཐོང་གིན་ཡོད།
དེས་ན་ང་ཚོའི་སྐབས་སུ་བབས་པའི་རེ་བ་ཆེ་ཤོས་དེ་ཡིད་བཞིན་ནོར་བུ་ཐེ་ཝན་དང་ཞང་ཀང་དེ་བཞིན་ཕྱི་སྡོད་རྒྱ་རིགས་མང་པོར་གསུང་ཆོས་གནང་ནས་རིམ་པས་རྒྱ་ནག་ནང་ནས་གདན་འདྲེན་ཞུ་མཁན་གང་མང་ཡོང་རྒྱུ་དེ་རེད།
ང་ཚོའི་རེ་བ་ཆེ་ཤོས་དེ་༸གོང་ས་མཆོག་གི་ཡང་སྲིད་དེ་རྒྱ་ལག་ཏུ་མ་ཤོར་བ་ཞིག་དང་། རྒྱའི་བེད་སྤྱོད་འོག་མ་འགྲོ་བ་ཞིག་ལ་བསམ་བློ་གཏོང་རྒྱུ་དེ་གལ་ཆེན་པོ་རེད།
ཉིད་ཀྱིས་གསུང་པ་ལ་བདེན་པ་ཆེན་པོ་འདུག འོན་ཀྱང་། ཉེ་སྔོན་ཆོས་བརྒྱུད་ཚོགས་འདུའི་སྟེང་༸གོང་ས་མཆོག་གིས་བཀའ་ལུང་གཏན་ཚིགས་ཆེན་མོ་ཕེབས་ཡོད་པས་ད་དུང་ཅུང་སྒུག་དགོས་པ་འདྲ
༸གོང་མཆོག་དགུང་གྲངས་༡༡༣བཞུགས་པའི་དབང་དུ་བྱས་ན། ད་དུང་དགུང་གྲངས་༣༧ལྷག་བཞུག་བགྱིད་རེད། དེས་ན་སྤྱི་ལོ་༢༠༤༨ལོ་ལ་ཁེལ་བས་དེ་དུས། རྒྱ་ནག་དམངས་གཙོ་ཆགས་ཟིན་པར་ངེས་པས་དེ་དང་མཐུན་པ་སོམས་ཤིག །
རྒྱ་ནག་དམངས་གཙོར་ཆགས་ཀྱང་། རྒྱ་མིའི་དབང་བསྒྱུར་གྱི་འདོད་པ་ཁུང་ཙིའི་བསྟན་བཅོས་དང་བག་ཆགས་ཡོངས་སུ་མ་ཉམས་པར་དུ་གནས་རྒྱུ་རེད། དེའི་རྐྱེན་གྱིས་དེ་དང་མཐུན་པར་སོམས་ཤིག ཡིད་མི་ཆེས་ན་བྱིས་པ་ལོ་གཉིས་ཅན་ཞིག་ལ་མི་བཅོ་བརྒྱད་ཀྱིས་ཡ་མེད་བཏང་སྟེ་རླངས་འཁོར་གྱིས་གཟས་ནས་གཅུར་བར་ལྟོས་དང་།
བཀུར་འོས་སྤྱི་འཐུས་དང་རྩོམ་པ་པོ་རྒན་པ་ཆབ་བྲག་ལྷ་མོ་སྐྱབས་ལགས་ཕེབས་ནས་དགོངས་ཚུལ་གསུང་བར་
སྙིང་ནས་གུས་བརྩི་ཞུ། ཁྱོད་ཀྱིས་གོང་ས་མཆོག་གནམ་འོག་གི་སངས་རྒྱས་ཆོས་ལུགས་ཀྱི་དབུ་ཁྲིད་ཆགས་ཚར་བ་རེད་ཞེས་བ་དེ་བོད་པ་ཞིག་གིས་གོང་ས་མཆོག་ལ་དད་སྟོབས་ཀྱིས་དྲངས་བའི་བསམ་ཚུལ་ཞིག་ལས་རྒྱྱུ་འབྲས་བློ་མིག་གྱིས་ཕྱུགས་པའི་
བསམ་ཚུལ་ཞིག་ཏུ་ངེས་ལེན་བྱེད་ཐབས་བྲལ་སོང་ལགས། ད་ལྟའི་ཆར་ཁོང་ཉིད་འཛམ་གླིང་གི་ཡུལ་གྲུ་གང་སར་ཕེབས་སྐྱོད་བྱེད་པ་དེ་བོད་ཀྱི་བླ་སྤྲུལ་དགེ་བཤེས་སོགས་ཀྱི་ཆོས་ཚོགས་རྣམས་དང་ནང་པའི་ཐེག་ཆེན་རྗེས་འབྲང་བའི་ཡུལ་གྲུ་འགའ་ཤས་ཤིག་ཏུ་ཆིབས་བསྒྱུར་བསྐྱངས་བ་དང་ཡང་ན་སློབ་གྲྭ་ཁག་ཏུ་བསྐྱོད་ཀྱི་ཡོད་པ་རེད། སློབ་གྲྭ་ཁག་དང་ཆོས་ཚོགས་སོགས་སུ་ཆིབས་བསྒྱུར་མཛད་པ་དེ་གཙོ་བོ་མཁས་དབང་གི་ངོ་བོ་དང་བོད་ཀྱི་བླ་ན་མེད་པའི་དབུ་ཁྲིད་ཀྱི་ངོ་བོའི་ཐོག་ཕེབས་ཀྱི་ཡོད་པ་ལས་ནང་པའི་དབུ་ཁྲིད་ཀྱི་ངོས་ནས་ཕེབས་ཀྱི་མེད་པ་གསལ་བོ་རེད། ངའི་བསམ་ཚུལ་ཡིན་ན་ཐེག་པ་ཆེན་ཆུང་མཐུན་མོང་གི་ཐོག་ནས་ནང་པའི་དབུ་ཁྲིད་དུ་
མཉམ་འབྲེལ་རྒྱལ་ཚོགས་ཀྱི་ངོས་ལེན་ཡོད་པའི་ཁྲིམས་མཐུན་ཡིག་ཆ་འཇོག་གནང་མཛད་རྒྱུ་དེ་ཡིན།
ཞོར་དུ་པད་མ་མིང་ཅན་དེའི་རྩོམ་ཡིག་ཞིབ་ཀློག་བྱེད་རྒྱུ་ཕར་ཤོག་ཐ་ན་རྩོམ་པ་པོ་སུ་ཡིན་ལ་མ་བལྟས་བར་འོད་ཚོད་ཀྱིས་མཆན་བུ་བཀོད་པ་དེ་སྨྱུག་འཛིན་པ་ཞིག་ལ་མཚོན་ན་མ་མཐའི་འགན་འཁྲིའི་འདུ་ཤེས་ཀྱང་མེད་གི།