གངས་དཀར་སེམས།
མིག་སྔར་ངས་ལས་ཀ་མི་འདྲ་བ་གཉིས་བྱེད་ཀྱི་ཡོད།
གཅིག་ནི་དབང་པོ་སྐྱོན་ཅན་ལ་རོགས་པ་བྱེད་རྒྱུ་དང་། གཞན་དེ་ནི་སྨན་ཁང་དུ་གཙང་སྦྲ་བཟོ་མཁན་ཡིན། ཡང་ཉེ་དུས་ཀྱི་ཉིན་ཤས་རིང་སྨན་ཁང་དུ་སྤྱི་བཏང་བའི་ནད་པའི་རིགས་རྟག་དཔྱད་བྱེད་སའི་ཁང་མིག་ནང་གིི་ནད་པ་རྣམས་ཡ་མར་འཐེན་འདྲུད་འཁོར་ལོ་དང་ཉལ་ཁྲིར་དབོར་འདྲེན་བྱེད་མཁན་ཡང་བྱས་དང་བྱེད་མུས་ཡིན།
ཉིན་ཞིག་ང་སྡེ་ཚན་འགན་འཛིན་ནས་སྨན་ཁང་འདིའི་ཏོག་དབྱིབས་ནད་པའང་ཉར་ཡོད་པའི་སར་གཙང་བཟོ་ཆེད་དུ་བཏང་བྱུང་། ཐོག་མའི་སྐབས་ལྟ་བུ་ཡིན་ང་གཞན་དང་མཉམ་དུ་ནད་ཁང་དེའི་གྲལ་ཐེངས་གཉིས་ཙམ་འགོ་འཁྲིད་གཉིས་དང་ལས་རོགས་གཅིག་བཅས་ངེད་བཞིས་གཙང་མ་བཟོས་མྱོང་བའམ་ཟབ་སྦྱོང་ལྟ་བུའང་སྤྲད་མྱོང་ཡོད། སྤྱིར་ན་དེ་སྔོན་དེའི་གྲལ་གྱི་གཙང་མ་བཟོ་མཁན་ཆེད་འཛུགས་སྡེ་ཚན་ཡོད་པ་དང་། དམིགས་བསལ་ཏོག་དབྱིབས་ནད་པ་བཞག་ས་ཐོག་བརྩེགས་ཁེར་བཙུགས་གཅིག་ནང་སྨན་པ་དང་སྨན་ཞབས། གཙང་བཟོ་བ་བཅས་ཆེད་འཛུགས་བྱས་པ་དང་། ལས་བྱེད་དེ་དག་གི་ཁོར་ཡུག་དཔེར་ན་ལས་སའི་ཁོར་ཡུག་དང་ཟས་ཁང་། གསང་སྤྱོད་བཅས་ཆེད་དུ་དམིགས་བཙུགས་བྱས་ཡོད་པ་ལས། གཞན་ཉེན་ཟོན་ཕྱིར་འབྲེལ་མེད་དོན་མེད་ཀྱི་ལས་བྱེད་དང་ནད་པར་ཐུག་མཁན་རིགས་གཞན་སུའང་གོང་གི་ས་ཁོངས་དེར་འགྲོ་མི་ཆོག་པ་ཟུར་བཀག་བྱས་ཡོད།
སྐབས་དེར་ཏོག་དབྱིབས་ནད་ཁང་གཙང་བཟོ་བྱེད་རྒྱུ་དེའང་ཁོར་ཡུག་དང་གཙང་བཟོ་བྱེད་སྟངས་ཀྱི་གོ་རིམ་ལྟར་མང་ཆེར་གཅིག་མཚུངས་ཡིན་ཡང་། གཙང་བཟོ་བྱེད་སའི་ཡོ་བྱེད་དག་རྦད་དེ་མི་འདྲ་བ་རེད། དཔེར་ན་དེ་སྔོན་ང་ཚོས་གཙང་རས་དམར་པོ་དང་གནམ་སྔོན་པོའི་མཚོན་མདོག་ཅན་གཉིས་རྡོག་ཕྱིས་ལ་བེད་སྤྱོད་ཀྱི་ཡོད་ཀྱང་། ད་ཐེངས་ངེས་པར་དུ་རས་མཚོན་མདོག་སེར་པོ་སྤྱོད་དགོས། གཙང་རས་དང་རྡོག་ཕྱིས་རྒྱག་ས་དབྱུགས་པ་སེར་པོ། གཙང་བཟོ་བྱེད་སའི་རྫས་ཆུ་མི་འདྲ་བ་དེ་དག་སྤྱོད་དགོས་ཤིང་། ལུས་ལ་ཏོག་དབྱིབས་ནད་འགོག་གི་གྱོན་ཆས་སམ་སྒྲིག་ཆས་མགོ་ནས་ཞྭ་དང་ལག་ཤུབས། ལུས་ལ་འགྱིག་གོས་དང་མིག་ཤེལ་བཅས་ཆ་ཚང་བ། (PPE) ངེས་པར་དུ་གྱོན་དགོས།
དེའང་ཐོག་མར་སྒྲིག་ཆས་ཆ་ཚང་བཞག་པའི་སྒྲོག་རྩེའི་མདུན་ནས་ལག་པ་གཉིས་རྫས་ཆུས་ལེགས་པར་གཙང་མ་བཟོས་རྗེས་སྒྲིག་ཆས་རེ་རེ་བཞིན་གྱོན་དགོས། གྱོན་སྟངས་གོ་རིམ་ནི་དང་པོ་དེ་སྔོན་ནས་ཁ་ཤུབས་བརྒྱབས་ཡོད་པ་དེ་ཕུད་རྗེས་ཁ་ཤུབས་དམིགས་བསལ་བ་གཞན་གྱོན་རྒྱུ་དེ་རེད། ཁ་ཤུབས་ལ་རྒྱབ་ནས་འཐེན་སའམ་བསྡམ་ས་སྐུད་པ་གཉིས་ཡོད་པ་གོང་དེ་ཅོ་ཐོག་ནས་སྡོམ་རྒྱུ་དང་གཤམ་གྱི་སྐུད་པ་དེ་འོག་གི་ལྟག་རྒྱབ་ཏུ་བསྡམས་ཏེ་དབུགས་ཕྱི་ལ་རྩ་འགོག་གང་ཐུབ་དགོས། དབུགས་ཕྱི་ལ་ཤོར་མིན་རྟག་སའང་འགྱིག་ཁུག་གཞན་ཡོད་པས་དེ་ཁ་རས་ཕྱི་ལ་གྱོན་ནས་དབུགས་ཤོར་མིན་ལེགས་པར་རྟག་དགོས། ཁ་ཤུབས་ནི་སྒྲིག་ཆས་གཞན་ཡོངས་ལས་དམིགས་བསལ་བ་ཡོད་དོ་ཅོག་གི་གཙོ་བོའམ་གལ་ཆེན་དེ་ཡིན་པས་ངེས་པར་དུ་ལེགས་པར་རྟག་དཔྱད་ཡང་ཡང་དགོས། དེ་ནས་གྱོན་གོས་སམ་སྤང་གདན་ལྟ་བུའི་འགྱིག་གོས་དེ་གྱོན་དུས་མགོ་ནས་མར་གྱོན་རྗེས་ལག་གཉིས་འགྱིག་གི་ཕུ་དུང་ནང་བརྒྱུས་རྗེས་མཛུབ་རྩེའི་ཕྱོགས་མཐེ་བོང་རྒྱུ་ས་ཁུང་དེར་བརྒྱུས་དགོས། གོས་དེར་སྐེ་རག་གཉིས་རང་ཆས་སུ་ཡོད་པ་དེ་རྒྱབ་ཕྱོགས་སུ་དམ་པོ་བསྡམས་དགོས། དེ་རྗེས་འགྱིག་གི་ལག་ཤུབས་གྱོན་རྒྱུ་དེ་རེད། ཁག་གཅིག་གིས་ལག་ཤུགས་ཉིས་བརྩེགས་གྱོན་མཁན་འདུག་ན་དེ་རང་མོས་ཡིན་རྒྱུ་རེད། ངས་མཇུག་ཏུ་འགྱིག་ཞྭ་གྱོན་རྒྱུ་དང་འགྱིག་གི་མིག་ཤེལ་མཁྲིགས་པོ་དེ་གྱོན་རྒྱུ་གཉིས་མཐའ་མར་བྱེད་ཀྱི་ཡོད།
སྒྲིག་ཆས་ཚང་མ་གྱོན་རྗེས་མདུན་གྱི་ཤེལ་སྒོའི་ནང་སྐྱར་དུ་ལེགས་པར་རྟག་དགོས། གཙོ་ཆེ་ཤོས་ནི་ཁ་རས་དམ་པོ་བསྡམས་རྒྱུ་དེ་རེད་སྙམ།
སྒོ་ནས་ཡར་འཛུལ་མ་ཐག་ལམ་སེང་ཕྱིར་འཁོར་ནས་ཕྱི་སྒོ་དེ་རྒྱག་དགོས། ཐོག་མར་ཁང་པའི་ནང་གཙང་བཟོ་འགོ་མ་བརྩམས་པའི་སྔོན་ལ་སོ་སོའི་ཡོ་བྱེད་བླུགས་སའི་འཐེན་འདྲུད་འཁོར་ལོའི་ནང་དངོས་རྫས་དགོས་མཁོའི་རིགས་ཐ་དག་ལ་ཞིབ་བཤེར་ལེགས་པར་བྱས་ཏེ་དགོས་མཁོའི་རིགས་དཔེར་ན་རྫས་ཆུ་ཁག་ཅིག་དང་རྡོག་ཕྱིས་མི་འདྲ་བ་གཉིས། ཤོག་བུ་དང་གྱང་ཐོག་བསྐལ་བའི་ལག་འཁྲུའི་གཤེར་ཁུའི་རིགས་དང་དེའི་གློག་རྫས་རྫོགས་མིན་སོགས་དང་། ཡང་ན་ཚང་འཛོམས་ཡོད་མེད་ལ་རྟག་རྗེས་གཞི་ནས་འགོ་བཙུགས་དགོས། དེའང་ཐོག་ནས་འོག་དང་གཡས་ནས་གཡོན། ཡིག་ཚང་ནས་ཡན་ལག་བཅས་གོ་རིམ་དེ་ལྟར་བརྒྱུད་ན་ས་ཁོངས་ཡོངས་སུ་གཙང་བཟོ་ཐུབ་པའི་དགེ་མཚན་ཆེ་བ་ལས། མཚམས་རེར་ལས་བྱེད་ལ་ལས་སོ་སོའི་འདོད་མོས་སམ་དགོས་མཁོར་གཙོ་བཟུང་དགོས་དུས་ཡོད་ཀྱང་། ལས་མཇུག་བསྡུ་སྐབས་ས་ཆ་འགའ་རེར་ལྟ་རྒྱུ་བརྗེད་སྲིད་པས་གོང་མཚུངས་ལྟར་གོ་རིམ་བརྒྱུད་ནས་ཞིབ་ཚགས་བྱས་ཚེ་ས་ཆ་དང་ཁུག་ཀྱོག་ས་བཅས་ལའང་བརྗེད་དོགས་མེད་སྙམ། འོན་ཀྱང་ང་ཚོའི་རྒྱུན་གཏན་དུ་གཙང་མ་བཟོ་སྟངས་ལྟར་ན་སྨན་པ་དང་སྨན་ཞབས་ཀྱི་ཡིག་ཚང་དང་སྣེ་ལེན་བྱེད་སའི་ཁོར་ཡུག་ཐོག་མར་ཚར་སོང་ན་དེ་ནས་སྨན་ཞམས་ཚོའི་ཐབ་ཚང་ཆུང་ཆུང་། མཇུག་ཏུ་ནད་ཁང་རེ་རེ་བརྒྱུད་བཞག་ནའང་གོ་རིམ་ལ་འཕྲུལ་དོགས་མེད་པ་ལྟ་བུ་ཡིན།
ད་ནི་གཙང་མོ་འགོ་བརྩམས་དགོས། ཐོག་མར་སྨན་ཞབས་ཚོའི་ཡིག་ཚང་ངམ་འབྲེལ་གཏུག་བྱེད་ས་བཟོ་དུས། སྒྲོག་རྩེའི་སྒང་གི་ཅ་དངོས་དག་རེ་རེ་བཞིན་ཕར་ཚུར་བཞག་བཞིན་སྒྲོག་རྩེའི་ཁྱོན་ཡོངས་ཕྱི་བརྡར་གྱིས་གཙང་མ་བཟོ་དགོས། སྤྱིར་ན་སྒྲོག་རྩེ་གཙང་བཟོ་བྱེད་ས་ཕྱི་རས་སམ་ཤོག་བུ་རློན་པ་ཁུག་མ་ཆུང་རིགས་ནང་ཡོད་པ་དེ་དག་སྤྱོད་ཀྱི་ཡོད་པ་ལས་སོ་སོའི་འཁྱེར་ཡོད་པའི་རྫས་ཆུ་གཞན་སྤྱོད་སྲོལ་ཆེར་མེད། དེ་ནས་སྒྲོག་རྩེའི་འོག་ཏུ་བརློན་ཕྱིས་རྒྱག་རྗེས་སྤྱི་བཏང་བའི་གད་སྙིགས་སྒམ་གྱི་ནང་གི་འགྱིག་ཁུག་དང་བཅས་པ་གསར་རྙིང་བརྗེ་ལེན་བརྒྱབས་དགོས། ཚར་རྗེས་གཅིག་མཚུངས་ཀྱི་གོ་རིམ་བཞིན་ཐབ་ཚང་དང་གསང་སྤྱོད་གཙང་མ་བཟོ་རྒྱུ་རེད། དེའང་གཟབ་དགོས་པ་གཅིག་ནི། ཐབ་ཚང་ནང་ལའང་ཤོག་ཁུག་རློན་པ་དེ་དག་སྤྱོད་ཆོག་ཀྱང་ཁོར་ཡུག་གཞན་དཔེར་ན་ཉལ་ཁྲིའམ་གསང་སྤྱོད་གཙང་བཟོའི་རྫས་ཆུའི་རིགས་རྩ་བ་ནས་སྤྱོད་མི་རུང་། གང་ཡིན་ཟེར་ན། སྤྱིར་ན་རྫས་ཆུའི་རིགས་ཐ་དག་དུག་སེལ་བྱེད་ཡིན་རུང་། དེའི་ནུས་ཤུགས་ངར་ཆེ་ཆུང་ཡོད་སྟབས་ག་དུས་ཡིན་ཡང་བཙོག་པ་ཕྲ་རག་གཙོས་པའི་གནས་སྟངས་ལ་བརྟེན་ནས་དུག་སེལ་རྫས་ཆུའང་དེ་མཚུངས་སྤྱོད་དགོས་པས་རེད། ལ་ལས་སྨན་ཞབས་མ་ཚོས་རྒྱུན་དུ་རྒས་ཁོག་དང་ཡང་ན་ནད་པར་གཟུགས་པོ་འཁྲུ་རོགས་བྱེད་དུས་སམ་ཆབ་གསང་ཚར་རྗེས་རྐུབ་གཙང་མ་བཟོ་བྱེད་ཀྱི་རླན་བཤེར་ཅན་གྱི་རས་དང་ཤོག་བུའི་རིགས་སོགས་སྤུས་ཀ་སྣ་ཚོགས་ཅན་གྱི་གཙང་རས་ལེབ་མོ་དེས་ཐབ་ཚང་གི་མདུན་ཅོག་གཙང་མ་བཟོ་མཁན་ཡོད་བཟོ་འདུག་པ་ནི་གད་མོའི་གནས་ལས་ཅི། འོན་ཀྱང་ཤོག་བུ་དེའི་རིགས་ཀྱིས་ཉལ་གདན་གཙང་མ་བཟོས་ན་སྐྱོན་ཆེར་མེད། དོན་དངོས་ཐོག་གཙང་ཤོག་ལྟ་བུའི་རླན་རས་དེ་ཐོག་མར་སྤྱོད་དུས་གསང་སྤྱོད་འཁྲུ་ཁང་། ཐབ་ཚང་མདུན་ཅོག་གང་དུ་སྤྱོད་ཀྱང་གཙང་མ་རང་ཡིན་པས་ནོར་འཛོལ་ཆེར་མེད་བསམ་སྲིད་མོད། འོན་ཀྱང་དེས་དུག་སེལ་གྱི་ནུས་པ་ཆེ་ཆུང་ལ་བརྟེན་ནས་ནོར་འཆུག་འགྲོ་གི་ཡོད་པའི་བཟོ་ལྟ་འདུག
(ངས་དེ་སྔོན་དྲ་ཐོག་ཏུ་ཨ་རིར་ཡོད་པའི་རིགས་མཐུན་ཕོ་སར་གཅིག་གིས་གསང་སྤྱོད་ཀྱི་གཅིན་རྫའི་ནང་ཕོར་པ་འཁྲུ་སའི་རྫས་ཆུའམ་གཤེར་ཁུ་མང་པོ་བླུགས་ནས་གསང་སྤྱོད་འཁྲུ་བཞིན་ཕྱི་རྒྱལ་དུ་ཡོད་པའི་བོད་པ་ཚོ་དཀའ་ལས་ཆེ་མདོག་ཡིན་ཁུལ་འདྲ་བཤད་སོང་བ་མཐོང་པར་དགོད་མོ་ཤོར་སོང་། འོན་ཀྱང་དེའང་ཆ་རྐྱེན་ཆ་ཚང་མེད་སྐབས་གཙང་མ་བཟོ་སྟངས་ཤིག་ཡིན་སྲིད་པ་ནི་ཞོར་འཕྲོས་ཙམ་ཡིན། )
ནད་པའི་ཉལ་ཆས་རིགས་དེ་སྔོན་ནས་སྨན་ཞམས་མས་བཤུས་ཚར་བ་དེར་རྫས་ཆུས་གཙང་མ་བཟོས་རྗེས་དབྱུག་པའི་རྡོག་ཕྱིས་རྩེ་ལ་རས་བསྐལ་ཏེ་ཐོག་དང་གཅིག དེ་མིན་འཁྲུ་ཁང་གི་གྱང་ངོས་བཞི་ཡོངས་རྫོགས་གཙང་ཕྱིས་རྒྱག་རྗེས་སླར་ཡང་ཉལ་ཆས་རིགས་བསྐྱར་དུ་ལེགས་པར་བཅས་འདུག་མིན་རྟག་དགོས། འོན་ཀྱང་དེང་སང་ཉལ་ཆས་བཅའ་རྒྱུ་དེ་ནད་ཁང་དམིགས་བསལ་བ་འདིར་སྨན་ཞབས་ཚོས་ཆེད་འཛུགས་ཀྱིས་བཅའ་དགོས་པ་བཟོས་འདུག་པས་ང་ཚོས་དེ་བཟོ་དགོས་ཀྱི་མི་འདུག ཉལ་ཆས་བཅའ་སྟངས་ནི་ཐོག་མར་ཉལ་གདམ་ཐུམ་རྒྱག་ས་རས་དང་དེ་རྗེས་ནང་འཇམ་ལྟ་བུའི་རས་ཀྱིས་ཉལ་ཁྲི་ཐུམ་རྒྱག་དགོས། ཉལ་མགོའི་ཤུགས་བརྗེ་རྒྱུ་བཅས་ཡིན། དེ་མིན་ཉལ་གཟན་བཅའ་མཁན་དང་དེ་གང་ལ་བཞག་པ་རིགས་གཉིས་ཡོད། ཕྲུ་གུའམ་བྱིས་པའི་བདེ་ཚན་དུ་ངེས་པར་དུ་ཉལ་གཟན་བཅའ་དགོས་ཤིང་ཕྲུ་གུ་ཆུང་རིགས་ཀྱི་ཉལ་ཁྲིའི་སྤྱི་བཏང་ལས་ཆུང་བ་ཡིན་ཡང་བཅའ་སྟངས་ནི་གཅིག་མཚུངས་ཡིན། དེ་ནས་སྒེའུ་ཁུང་གི་ཤེལ་སྒོ་ཕྱོགས་སུའང་དུས་མཚུངས་གཙང་མ་ཕྱིས་ཚར་བ་དང་། ཁང་མིག་ཡོངས་ཀྱི་ས་ལ་རྡོག་ཕྱིས་ལེགས་པར་ཟིན་དགོས།
མཐར་ནད་ཁང་ནས་བསྡུས་པའི་གད་སྙིགས་རིགས་ལ་འགྱིག་ཤོག་སེར་པོའི་ནང་དམ་དུ་བསྡམས་རྗེས་དེ་མཚུངས་མཚོན་མདོག་གི་འགྱིག་གི་གད་སྒམ་ཆེ་བའི་ནང་བླུགས་དགོས་པ་དང་། ནད་ཁང་ནས་བསྡུས་པའི་ཉལ་ཆས་རིགས་ཐོག་མར་འགྱིག་ཤོག་ཁུག་མ་དམར་པོའི་ནང་དམ་དུ་བསྡམས་ནས་སླར་ཡང་ཉལ་ཆས་རིགས་བསྡུ་གསོག་རྒྱག་སའི་རས་ཁུག་ནང་བསྡམས་དགོས། དེ་དག་ཡོངས་རྫོགས་ཚར་སོང་ན། གད་སྙིགས་སེར་པོའི་གད་སྒམ་ནང་བླུགས་རྒྱུ་དང་དམར་པོའམ་ཉལ་ཆས་བཤུས་ཚར་བ་རྣམས་འདྲུད་འཐེན་འཁོར་ལོར་བླུགས་དགོས། སེར་པོའི་ཁ་ཆོད་བརྒྱབས་ནས་དེ་དག་ཆེད་དུ་དམིགས་འཛུགས་བྱས་ཡོད་པའི་ས་ཁོངས་སོ་སོར་བསྐྱེལ་ནས་བཞག་དགོས། དེར་ལས་བྱེད་མི་འདྲ་གཞན་ཡོང་ནས་དུས་ཐོག་གད་སྒམ་དང་རས་ཁུག་རྣམས་དབོར་འདྲེན་བྱེད་ཀྱི་ཡོད་པ་རེད།
གཙང་མ་དེ་དག་ལེགས་པར་ཚར་རྗེས་ནད་ཁང་ཕྱི་སྒོའི་འགྲམ་དུ་ཐོག་མར་ལག་ཤུབས་དང་ཕྱི་གོས་གཉིས་ཕྱི་ནང་ལོག་ནས་ཕུད་པ་དུས་མཚུངས་ལག་པ་གཙང་ཆུས་ཐེངས་འགར་འཁྲུས་རྗེས་མགོ་ནས་ཞྭ་དང་མིག་ཤེལ། དེ་ནས་འགྱིག་གོས་བཅས་རིམ་པར་ཕུད་དེ་སྒོ་ཁ་ནས་གསར་དུ་ཁ་རས་གསར་པ་དང་མིག་ཤེལ་གསར་པ་གྱོན་ཏེ་ཕྱིར་དོན་དགོས། ཤེལ་སྒོའི་རིགས་དེར་རླན་རས་ཀྱིས་གཙང་མ་བཟོས་ནས་སླར་སྤྱོད་ཆོག་པ་དགོས་ལ་མང་པོས་དེ་གད་སྙིགས་ནང་བརྗེ་ཐེངས་རེར་གཡུག་ཐེངས་རེའང་བྱེད་ཀྱི་འདུག་པས་སྐྱོན་ཆེར་མེད་སྙམ། དེ་ལྟར་གཙང་བཟོའི་གོ་རིམ་ཉིན་གཅིག་རྫོགས་མཚམས་སུ་ངེས་པར་དུ་འཁྲུས་ཁང་དུ་གཟུགས་པོ་འཁྲུས་ཏེ་སྒྲིག་ཆས་གཙང་མ་གྱོན་ནས་ཕྱིར་སྨན་ཁང་ནས་དོན་དགོས།
གོང་གསལ་ནི་ཏོག་དབྱིབས་ནད་ཁང་གཙང་མ་བཟོ་སྟངས་ཀྱི་གོ་རིམ་དེ་འདྲ་རེད།
དེང་སང་གཙང་བཟོ་བའི་གྲལ་དུ་ཁ་གཅིག་གིས་གཅིག་གཅིག་གཉིས་གཉིས་གསུམ་གསུམ་གྱི་རྒྱུ་མཚན་མང་པོ་བགྲང་ནས་ཏོག་དབྱིབས་ནད་ཁང་གཙང་བཟོ་འདོད་མེད་པའི་བཤད་ཀྱི་ཡོད་པར་བརྟེན། དེ་གང་ཐུབ་ཀྱིས་བྱེད་མི་དགོས་པར་ནང་མི་ཕྲུ་གུ་བཅས་ལའང་གནོད་མིན་གྱི་སེམས་འཚབ་ཡོད་ལུགས་བཤད་ཀྱི་ཡོད་བཟོ་འདུག་པ་དེར་བསམ་གཞིགས་ཐུབ་དགོས་པའང་རེད་དྲན། དོན་དངོས་ཐོག་ངའང་མ་ཤི་སྔོན་ཕ་མ་སྤུན་མཆེད་ལ་ཐུག་རྒྱུ་དགོས་འདུན་ཆེ་བས་སྤྱི་མཚུངས་ལྟར་ཤི་རྒྱུ་ལ་ཧ་ཅང་སྐྲག་མཁན་ཞིག་ཡིན་མོད། འོན་ཀྱང་ད་ལྟའི་ཆར་ཨོ་གླིང་རྒྱལ་ཁབ་འདིར་ཕྱི་རྒྱལ་བཙན་འཛུལ་བའི་རྐྱེན་གྱི་དམག་འཐབ་ལ་རྒོལ་དགོས་པ་མེད་ལ་སྤྱི་མཚུངས་ལྟར་དཔལ་འབྱོར་མཁོ་སྒྲུབ་དང་། ལས་འཚོལ་སོགས་ཀྱི་དཀའ་ངལ་གཅིག་མཚུངས་ཡོད་ཀྱང་སྤྱི་ཡོངས་ནས་སྔར་བཞིན་ཞི་བདེ་བག་ཕེབས་ཀྱི་ཁོར་ཡུག་རང་སྲོལ་ཡིན། དེ་བས་འཛམ་གླིང་སྤྱིའི་གོད་ཆགས་འོག་ཏོག་དབྱིབས་ནད་གཞི་དང་ནད་གསར་དེའི་རྐྱེན་གྱིས་ཚང་མ་བློ་འཚབ་དགོས་པ་གཙོ་བོ་ཡིན། ངས་ག་དུས་ཡིན་ཡང་ཕྱི་མི་སུ་འདྲ་ཞིག་དང་ཐུག་ན་གོ་སྐབས་བསྐྲུན་པའམ་དེ་རག་དུས་སེམས་ནས་དོར་མི་ཕུད་པའི་བོད་ཀྱི་གནས་སྟངས་སྐོར་བཤད་ཨེ་ཐུབ་ལྟ་གི་ཡོད་ལ། ད་བར་ལོ་ལྔའི་ནང་མི་གྲངས་ཉིས་བརྒྱ་ལྷག་ཙམ་ལ་དེ་འགྲེལ་བཤད་ཐུབ་པ་བྱུང་འདུག དེ་བཞིན་འདི་ནས་ཀྱང་གོང་རིམ་གྱིས་ས་གནས་གང་དུ་བཏང་ན་མིན་བཤད་བརྩིས་མེད་ལ་སོ་སོའི་གང་འཇོན་གྱིས་ཧུར་ཐག་འབད་ཐག་བྱེད་པར་གཙོ་བོ་བྱེད་ཀྱི་ཡོད། དེའང་དཀའ་ཁག་ཆེན་པོ་མིན་པར་ཚོར་ནས། ཉུང་མཐའ་ན་བླ་མ་བཟང་པོ་རྒྱལ་བ་རིན་པོ་ཆེའི་མཚན་ཐོག་ནས་བོད་རིགས་ཀྱི་མིང་འཛད་མི་དགོས་པ་བསམ་པ་ལས་ང་རང་ཡག་གྲགས་ནས་མིན། དེར་བརྟེན། ལས་རོགས་འགས་ངས་ལས་དེ་མི་བྱེད་པའི་རྒྱུ་མཚན་སྣ་ཚོགས་དག་བགྲང་ཡོང་དུས་ངས་གལ་ཡོད་མ་རེད། ལས་ཀ་དེ་ངས་བྱ་ཆོག སེམས་འཁུར་མ་བྱེད་སོགས་སེམས་གསོ་ལྟ་བུ་བཤད་ཀྱི་ཡོད། དུས་མཚུངས་སེམས་གི་གཏིང་རུམ་ཞིག་ཏུ་འོ་རེད། ཚང་མ་ཤི་རྒྱུ་ལ་སྐྲག་ནས་ཕྱི་འཐེན་བྱེད་དེ་འདུག་དུས་ཤི་དགོས་མཁན་དེ་ང་རེད་བསམ་ནས་ཕན་པའི་རེ་བ་ཉག་ཅིག་གིས་སོ་སོར་སེམས་ཤུགས་སམ་ནང་པ་ཆུང་ངུ་ཞིག་གི་སེམས་བསྐྱེད་དེ་འདྲ་བྱེད་བཞིན་པའི་ཁུལ་ཡིན་དོ།
སྨྲས་པ།
སྐྱེ་རྒ་ན་འཆིས་ལས་དབང་ཆེས་བཙན་པའི།།
སྡུག་གི་འཁོར་ལོ་འཛད་ཐབས་མེད་ན་ཡང་།།
བདག་གིས་བསགས་པའི་དགེ་བ་ཕྲ་མོ་ཡིས།།
སེམས་ཅན་སྡུག་ལས་གྲོལ་བའི་རྒྱུར་གྱུར་ཅིག།།།
དགེའོ།