ཏོག་དབྱིབས་ནད་ཡམས་ལས་ཐར་ཐབས་ཀྱི་སྲུང་བྱ།

འབྲོང་རྒན།
 
ཏོག་དབྱིབས་ནད་ཡམས་འདི་དངོས་གནས་ཞེད་སྣང་ཚ་བོ་འདུག འཛམ་གླིང་ཧྲིལ་བོའི་ཚེ་སྲོག་ནད་ཡམས་འདིས་ཁྱེར་ཐལ། ནད་པའི་གྲངས་ཀ་ཉིན་རེ་ནས་ཉིན་རེར་འཕར་འགྲོ་གིན་འདུག མི་དམངས་རྣམས་ཀྱིས་ད་ལྟ་ག་རེ་བྱེད་དགོས་མིན་མ་ཤེས། སེམས་པ་འཁྲུགས། རེ་བ་ཟད། དངངས་སྐྲག་ནང་ལུས་འདུག

སྲིད་དོན་པ་ཚོས་ཕན་ཚུན་ལ་ཡ་ལ་འཛུགས་རེ་བྱེད་གིན་ཡོད། སྲིད་འཛིན་ཁྲོམ་ཕུའུ་ལ་ཁ་དན་ཚིག་ལ་མི་གནས་མཁན་ཞེས་ཚང་མས་སྐྱོན་འཛུགས་བྱེད། ནེའུ་ཡོག་མངའ་སྡེའི་བློན་ཆེན་གྱིས་ཨ་མེ་རི་ཀས་ཁ་བཏུམ་བཟོ་བཞིན་མེད་པ་ཁ་སང་མ་གཏོགས་ཤེས་མི་འདུག ནད་ཡམས་འདི་ལ་ཇི་ལྟར་རྒོལ་ལན་བསློག་རྒྱུར་སུ་ལའང་ཐབས་ཤེས་དང་ནུས་པ་མི་འདུག
ཚོང་པ་ཁ་ཤས་ཀྱིས་ནད་ཡམས་ཀྱི་དམག་འཁྲུག་འདི་ལས་ཕྱུག་འགྱུར་གྱི་གོ་སྐབས་འཚོལ་བཞིན་ཡོད། ཁོང་ཚོས་བཟའ་ཆས་དང་ཁ་བཏུམ་གྱི་གོང་ཚད་སྤར། ཁ་སང་ 3M ཚོང་ལྷན་གྱིས་སྐར་བདུན་གྱི་ཁ་བཏུམ་སྒོར་བདུན་བྱས་ཏེ་རྒྱལ་ཁབ་གཞན་ན་བཙོང་བཞིན་ཡོད། ད་དུང་ཁ་ཤས་ཀྱིས་ཚན་རིག་དང་གཏན་ཚིགས་ཀྱི་རྒྱབ་ལྗོངས་ཡོད་མེད་གང་ལྟར་ཡང་། ཉ་ཉོག་མཉམ་བསྲེས་ཀྱི་གཏམ་གླེང་དང་རྩོམ་ཡིག་སྤེལ་བཞིན་ཡོད།

ནམ་རྒྱུན་བྱམས་སེམས་དང་བརྩེ་བས་ཕྱུག་པའི་མི་ཁ་ཤས་ཀྱིས། རང་ནུས་ཅི་ལྕོགས་ཀྱིས་སྤྱི་ཚོགས་ཞབས་ཞུ་སྒྲུབ་བཞིན་འདུག སྨན་པ་དང་སྨན་ཞབས་པ་ཚོས་གང་ནུས་ཅི་ལྕོགས་ཀྱིས་ནད་པའི་ཚེ་སྲོག་སྐྱོབ་ཐབས་བྱེད་གིན་ཡོད། འདི་ནི་དངོས་ནས་བཤད་ན་ང་ཚོའི་རེ་བ་ཆུང་ཆུང་ཞིག་ཡིན།
དངོས་ནས་བཤད་ན། ཐེངས་འདིའི་ནད་ཡམས་ལས་མཐར་ཐུབ་ནི་ང་ཚོ་མི་རེ་ངོ་རེ་ལ་རག་ལས་ཡོད། དེ་བཞིན་ཏུ་ནད་ཡམས་འདི་སྔོན་འགོག་བྱེད་སྤྱད་ཀྱི་ཐབས་ཤེས་ཡག་ཤོས་ནི། མི་ཚོགས་ལ་འབྲེལ་འདྲིས་མི་བྱེད་རྒྱུ་དེ་རེད། དེ་ནི་ནད་ཡམས་འདི་འགོག་སྤྱད་ཀྱི་སྨན་ཡག་ཤོས་དེའང་རེད། འདི་ང་ཚོས་སྒྲུབ་མི་ཐུབ་པ་ཞིག་གཏན་ནས་མིན། དེ་བས་ནང་ལ་འཛུལ། མི་ལ་འབྲེལ་འདྲིས་མ་བྱས་ན་ཁྱེད་ལ་ནད་ཡམས་འདི་མི་འགོ་བ་རེད་འདུག གལ་སྲིད་ཁྱེད་རང་ཕྱི་ལ་འགྲོ་དགོས་བྱུང་ན། ཁ་བཏུམ་དང་། ལག་འབོབ་གྱོན་རྒྱུ་དེ་གལ་ཆེ་ལ། ཕྱིར་ནང་ལ་ལོག་སྐབས་ཀྱང་། ཁྱེད་རང་ཐལ་རྡུལ་འཚུབ་པའི་རླུང་ནག་ཞིག་གི་ནང་དུ་ཕྱིན་ཏེ་ཕྱིར་ནང་ལ་ལོག་པ་ནང་བཞིན། ཕྱི་ལྭ་དེ་བརྗེ། གདོང་དང་ལག་པ་ཡག་པོ་འཁྲུད་དགོས། འདི་ནི་རང་གི་བསྲུང་བྱ་གལ་ཆེན་དེ་རེད།

གལ་སྲིད་ཁྱེད་ལ་ནད་ཡམས་འགོས་བའི་ནདརྟགས་མངོན་ཚེ། གང་མགྱོགས་སྨན་ཁང་དུ་སོང་ནས་རྟགས་དཔྱད་བྱེད་དགོས།
ནད་ཡམས་འདི་ལ་རང་གི་དངོས་ཐད་ཀྱི་སྨན་འདི་ཞེས་པ་ཞིག་མེད་མོད། དེང་སང་ཕྱི་ལུགས་ཀྱི་སྨན་ལ། གཤམ་གྱི་སྨན་འདི་གཉིས་བཀོལ་སྤྱོད་གཏོང་བ་ཆེས་མང་བ་ཡིན། hydroxychloroquine (HCQ) and chloroquine (CQ) སྨན་འདི་གཉིས་དང་མཉམ་དུ་འཚོ་བཅུད་ཀྱི་སྨན། Vitamin C, Vitamin D3 and zinc བཅས་བཏང་ན་ཕན་ཞིང་། སྨན་འདི་དག་བསྟེན་ཞོར་དུ་དབུགས་འབྱིན་གྱི་རྔུབ་སྦུག་བཀོལ་ན་ནད་བཅོས་རམ་འདེགས་བྱེད་ཐུབ་ཚོད་འདུག

ནད་ཡམས་འདི་ལ་བོད་སྨན་གང་དག་བསྟེན་ན་དགེ་མཚན་ཆེ་ཞེ་ན། མང་སྦྱོར་དང་། ལོ་གྱོན་མ། འཕྲུལ་ཐང་བཅས་བཏང་ན་ཕན་ཐོགས་ཡོད་པར་འདོད། དེ་བཞིན་ད་དུང་ལུས་སེམས་ཀྱི་སྦྱོང་བརྡར་དང་འཚོ་བཅུད་ལ་དོ་སྣང་བྱས་ན་དེ་བས་ཕན། འདི་དང་མཉམ་དུ་ནམ་རྒྱུན་ནས་ཤིང་མངར་དང་ལྒ་སྐྱ་མཉམ་བསྲེས་ཀྱི་ཇ་འཐུང་ན་ཕན་ཐོགས་ཡོད།

ནད་ཡམས་འདི་ད་དུང་ལུས་ལ་ན་ཚ་གཞན་ཡོད་མཁན་དང་། གཟུགས་སྟོབས་ཞན་པ། ཡང་ན་གཟུགས་པོའི་མེ་དྲོད་ཞན་མཁན་གྱི་མི་ལ་ལྷག་ཏུ་ལྡང་བཞིན་ཡོད་ན། ཟ་མ་ཚ་བོ་དང་དུག་ལོག་དྲོན་པོ་གྱོན་རྒྱུ་དེ་བས་གལ་ཆེ། ཟ་འཐུང་རན་པར་སྤྱོད་པ་དེ་ནི་མིའི་གཟུགས་པོ་ལ་ཕན་ཞིང་། རབ་ཡིན་ན་ནང་པ་སངས་རྒྱས་པའི་ཆོས་ཀྱི་སྙིང་པོ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བུ་ལྟ་བུ་རང་བློས་ལྕོགས་ཚོགས་ཀྱིས་བློ་སྦྱོང་དང་། དེ་མ་ནུས་ན་རང་གི་ནུས་ཚོད་ཀྱིས་ཉམས་ལེན་གང་ཞིག་བྱས་ཀྱང་དེས་ཁྱེད་ཀྱི་སེམས་ལ་ཕན། དེ་གཉིས་ནི་ཁྱེད་ཀྱིས་སྒྲུབ་མི་ཐུབ་པ་ཞིག་གང་ནས་ཡིན། ང་ཚོ་བོད་པ་ཚོ་རྒན་གཞོན་མེད་པར་ནང་པའི་ཆོས་ལ་དོ་སྣང་གང་འཚམ་ཡོད་ཅིང་། ད་ནི་དེ་དག་རང་རྒྱུད་ལ་སྦྱོར་བའི་དུས་ལ་བབས་ཡོད། ནན་ཏན་དུ་བཤད་རྒྱུ་ཞིག་ལ། མི་ཚོགས་ལ་འབྲེལ་འདྲིས་མི་བྱེད་པར་རང་ཉིད་ཁེར་རྐྱང་དུ་སྡོད་རྒྱུ་ནི་སྨན་གྱི་མཆོག་ཏུ་གྱུར་བ་དེ་རེད་ལ། བྱེད་ཐབས་འདི་དངོས་གནས་བཤད་ན་སྒྲུབ་མི་ཐུབ་པ་ཞིག་རྩ་བ་ནས་མིན་ལ། རང་ཉིད་ནད་ཡམས་འདི་ལས་ཐར་ཐབས་ཀྱི་བསྲུང་བྱ་ཡག་ཤོས་ཡིན་པའང་གསལ་བོ་རེད།

ཁ་སང་། ཨ་མེ་རི་ཀའི་འཇོན་ཧ་ཀན་སློབ་གླེང་གིས་བཤད་པ་ལྟར་ན་ནད་ཡམས་ཀྱི་བརྒྱ་ཆ་བཞི་དེང་སང་དྲག་བསྐྱེད་དུ་འགྲོ་བཞིན་འདུག་ཟེར།
ནད་ཡམས་འདི་རིགས་མང་ཆེ་བ་ཞིག་དགུན་ཁར་ཡོང་གིན་ཡོད་པ་དང་། གནམ་གཤིས་ལ་དྲོད་སླེབས་རྗེས་ཡལ་འགྲོ་བའི་ལོ་རྒྱུས་ཡོད། ད་ཐེངས་ཀྱི་ནད་ཡམས་འདིའང་ན་ནིང་སྤྱི་ཟླ་བཅུ་གཉིས་པའི་ནང་འགོ་བཙུགས་ཤིང་། ད་ནི་དཔྱིད་ཀའི་དུས་ལ་བབས་ཤིང་གནམ་གཤིས་ཡང་ཉིན་རེ་ནས་ཉིན་རེར་དྲོ་རུ་འགྲོ་བཞིན་ཡོད་པས། ག་ལེར་ནད་ཡམས་འདི་ཡལ་འགྲོ་གི་རེད་བསམ།