ཏཱ་ལའི་བླ་མ་སྐུ་རྐྱང་དུ་འཇོག་འདོད་ཨེ་རེད།

ནམ་མཁའ།

རྒྱ་ནག་གཞུང་གིས་བཙན་བྱོལ་བོད་མི་ཚོ་བསླུ་བྲིད་ཐེངས་གཉིས་པ་དེ་བྱེད་འདོད་བྱུང་ཡོད། དུས་རབས་ཉི་ཤུའི་ལོ་རབས་བརྒྱད་བཅུའི་ནང་དུ་རྒྱ་གཞུང་གིས་བསླུ་བྲིད་དང་པོ་བྱས། དེ་ཡང་༥༩ལོར་བཙན་བྱོལ་དུ་ཡོང་བའི་བོད་མི་རྣམས་ཕྱིར་ཕ་ཡུལ་དུ་གཏན་འཇགས་ཀྱིས་ཡོང་ཚེ། ཁོང་ཚོར་ཁང་པ་རེ་གསར་རྒྱགས་བྱས་པ་དང་།ཁོང་ཚོའི་བུ་ཕྲུག་དབྱིན་ཡིག་ཅུང་ཟད་ཤེས་མཁན་ཚོར་སློབ་དགེ་དང་གཞུང་གི་ལས་བྱེད་ཀྱི་བཀོད་སྒྲིགས་སོགས་བྱས་ཡོད།

ཁ་ཤས་ཞིག་དེ་འདྲ་ལ་མགོ་བོ་འཁོར་ནས་མི་ཚེ་ཡི་མཐའ་འཇུག་བར་དུ་རྒྱ་གཞུང་གིས་གང་ཞིག་བཤད་པ་ལ་མི་འདོད་པ་ན་ཡང་དགའ་བའི་རྣམ་འགྱུར་བསྟན་ཞོར་དུ་ལུས་ཡོད། ཡིན་ཡང་ཁོང་ཚོའི་སེམས་པ་དེ་རྒྱ་གཞུང་གིས་བསླུ་བྲིད་བྱས་ཐུབ་ཡོད་མེད་གང་ཡིན་ཀྱང་།བོད་ནང་གི་གཞི་ལུས་མི་དམངས་ཚོས་ཁོང་ཚོར་གཟིགས་སྟངས་ལ་ཡག་པོ་བྱུང་མེད། རྒྱུ་མཚན་ནི་གཞི་ལུས་མི་དམངས་ཀྱི་བསམ་བློའི་ནང་ཏྰ་ལའི་བླ་མ་གཡུགས་ནས་ཡོང་བཞག་པ་རེད་ཟེར་ནས་བལྟ་སྟངས་དང་མཐོང་སྣང་རྩ་བ་ནས་བཟང་པོ་ཞིག་བཟུང་མེད།འདིའི་གནས་ཚུལ་བོད་ཆོལ་ཁ་གསུམ་དུ་བྱུང་ཡོད།

འོན་ཀྱང་ཁ་ཤས་ཞིག་རང་གི་ཕ་མ་གཉེན་འཕྲད་བྱས་ཏེ་ཕྱིར་རྒྱ་གར་དུ་སླེབས་པ་ཚོ་གཞི་ལུས་མི་དམངས་ཀྱི་དགའ་མོས་བྱེད་བཞིན་ཡོད་པ་རེད།མི་སུ་ཡིན་ཡང་རང་གི་ཕ་ཡུལ་དང་ཕ་མ་གཉེན་ཉེ་ཐུགས་འཕྲད་བྱེད་འདོད་པ་མིའི་ཆོས་ཉིད་རེད། གཏན་འཇགས་ཀྱིས་བོད་ནང་ཕྱིར་ལོགས་པ་ཚོར་གོང་དུ་བཤད་པ་བཞིན་བྱུང་བ་མ་ཟད།རྒྱ་གཞུང་གིས་ས་གནས་གསར་ཤོག་སོགས་སུ་འགྲེལ་བཤད་ཀྱང་འདྲ་མིན་བྱས་ཡོད། འགྲེལ་བཤད་འདི་དག་ནི་ཕྱིར་བོད་དུ་གཏན་འཇགས་ཡོང་མཁན་ཚོས་བཤད་པ་ཡིན་མིན་ཐེ་ཚོམ་རེད། གང་ལྟར་བཙན་བྱོལ་ནང་གི་བོད་མི་ཚོ་ཕྱིར་བོད་ནང་དུ་ལོགས་ཐབས་སུ་བསླུ་བྲིད་ཀྱི་རྨི་ལམ་ཞིག་བཏང་ཡང་།རྒྱ་གཞུང་གི་རྨི་ལམ་ལྟར་འགྲུབ་ཐུབ་མེད།

དེ་རིང་ཡང་བསྐྱར་རྒྱ་གཞུང་གིས་ཉིན་གུང་གི་རྨི་ལམ་གསར་བ་ཞིག་གཏོང་གི་ཡོད་པ་རེད། དེ་ཡང་དུས་རབས་ཉི་ཤུའི་ལོ་རབས་བརྒྱད་བཅུའི་ནང་།རྒྱ་གར་དུ་སྐྱབས་བཅོལ་དུ་ཡོང་བའི་བོད་མི་ཚོ་བསླུ་བྲིད་བྱེད་འདོད་ཀྱིས་གཡོ་ཐབས་ཞིག་གི་འགོ་བརྩམས་བཞིན་ཡོད། ཁ་སང་དུས་བབ་གསར་ཤོག་ཐོག་ཕུད་པའི་༼བཙན་བྱོལ་བར་རྒྱས་ལས་ཁུངས་རྒྱག་འཆར༽འདིའི་ནང་བཤད་པ་ལྟར་ན་རྒྱ་རིགས་དང་བོད་རིགས་སོགས་ཕྱི་སྡོད་པ་རྣམས་ཕྱིར་རྒྱལ་ནང་དུ་ལོག་ཆོག་པའི་ཆོག་མཆན་དང་།མ་ཟད་རྒྱ་རིགས་ཤེས་ཡོན་ཅན་ཚོར་ལས་ཀ་ཡང་བཀོད་སྒྲིགས་བྱེད་ཚུལ་སོགས་བཤད་འདུག འདི་ནི་ཕྱི་སྡོད་རྒྱ་རིགས་རྣམས་ཐབས་ཀྱིས་འགུགས་ཐབས་ཁོ་ན་ཞིག་ཡིན།

དེ་བཞིན་ང་ཚོའི་བཙན་བྱོལ་ནང་དུ་ཡོད་པའི་བོད་མི་རྒན་གཞོན་ཚོར་འགུགས་ཐབས་སུ་ཡང་སྣེ་ལེན་གྱི་ལས་ཁུངས་རྒྱག་འཆར་བཤད་འདུག་མོད།འོན་ཀྱང་འདིའི་དམིགས་ཡུལ་དངོས་དེ་བཙན་བྱོལ་ནང་སྟོང་པ་བཟོ་འདོད་པ་དེ་ཡིན་ལ།མ་ཟད་རྒྱ་གཞུང་གིས་ནམ་རྒྱུན་ཏཱ་ལའི་བླ་མ་ཁྱོད་སྐུ་རྐྱང་དུ་ལྷག་གི་རེད་ཟེར་བའི་ཚིག་དེའི་དོན་ལ་ལག་ལེན་བྱེད་འདོད་པ་དེ་རེད། ཡིན་ཡང་འདི་ནི་རྒྱ་གཞུང་གི་ཉིན་གུང་གི་རྨི་ལམ་རང་ཡིན་པ་ལས་འགྲུབ་ཐུབ་པའི་རེ་བ་ཞིག་མི་འདོད།ངས་འདི་ནས་ནམ་རྒྱུན་ང་ཚོས་བེད་སྤྱོད་གཏོང་བཞིན་པའི་ཐ་སྙད་ཞིག་བཀོལ་སྤྱོད་བྱེད་ཀྱི་ཡིན་པས་དགོངས་འགལ་མེད་པར་ཞུ། དེ་ནི་གསར་འབྱོར་ཞེས་བའི་མིང་འདི་བེད་སྤྱོད་བྱེད་རྒྱུ་ཡིན།

ང་ཚོ་གསར་འབྱོར་བ་ཚོ་ཡང་རང་ལ་དཔལ་འབྱོར་དང་ཕྱོགས་མང་པོ་ཞིག་ནས་ནུས་པ་ཆེན་པོ་མེད་ན་ཡང་།བོད་མི་རིགས་ཀྱི་བདེ་སྡུག་འདི་དང་༧གོང་ས༧་མཆོག་ལ་དད་གུས་བླ་ན་མེད་པ་བཅངས་ཏེ།ཁ་ལ་དཔགས་པའི་སོ་ཞེས་བའི་དཔེ་ལྟར་རང་ནུས་གང་ལྕོགས་ཀྱིས་ཞབས་ཞུ་སྒྲུབས་བཞིན་ཡོད།ལྷག་པར་དུ་ཡང་རྒྱ་གཞུང་ལ་བོད་རྒྱ་སྐད་ཡིག་གིས་སྨྱུག་གུའི་མཚོན་ཆ་རྒྱ་གཞུང་ལ་གཏད་མཁན་ཡང་ཕལ་ཆེར་གསར་འབྱོར་བ་ཡིན། འདི་དག་ཚང་མ་རིམ་གྱིས་རྒྱ་གཞུང་གིས་གཡོ་ཐབས་སྤྱད་དེ་བཀུགས་ནས་གྲགས་མེད་དུ་བཟོ་འདོད་དེ་རེད་སྙམ།ཡིན་ཡང་གསར་འབྱོར་བ་ཚོའི་སེམས་ནང་དུ་ཡང་ཕ་བོང་ཟེགས་མས་སྐྱོར་ཞེས་པའི་དཔེ་བཞིན་སོ་སོའི་སེམས་ནང་ནམ་ཡང་༧གོང་ས༧་མཆོག་བློས་གཏོང་ཐབས་མེད། གལ་སྲིད་བོད་ལ་ཕྱིར་ཕྱིན་པའི་གྲོགས་པོ་དང་གྲོགས་མོ་ཚོ་ཡང་རྒྱ་གཞུང་གིས་གཡོ་ཐབས་སྤྱད་འགུགས་ཐབས་བྱེད་བཞིན་ཡོད་སྲིད་མོད།འོན་ཀྱང་ཁོ་རང་ཚོའི་སེམས་དེ་ནམ་ཡང་འགུགས་ཐབས་མེད།སེམས་འགུགས་མ་ཐུབ་ཚེ་ལུས་པོ་བཀག་ཀྱང་ཐབས་ཤེས་དེ་ཙམ་མེད།

དེས་རྐྱེན་རྒྱ་གཞུང་གིས་ཏྰ་ལའི་བླ་མ་སྐུ་རྐྱང་དུ་འཇོག་འདོད་པའི་གཡོ་ཐབས་དེ་ང་ཚོ་ཚང་མས་གང་གཟབ་བྱེད་དགོས་བར་སྙམ། ཡིན་ཡང་གསར་འབྱོར་བ་ཉུང་ཤས་རེ་ཟུང་ཞིག་རྒྱ་གཞུང་གིས་བསླུ་བྲིད་བྱས་ཡོད་སྲིད།ཁ་ཤས་ཞིག་ཆབ་སྲིད་བཙོན་པའི་མིང་ཐོག་ནས་ཕྱི་རྒྱལ་དུ་བཏང་།དེ་གར་ནས་རྒྱ་ཡི་གཞུང་ཚབ་ཁང་གི་གསོལ་མགྲོན་བཤམས་ཏེ་བཀུགས་པ་མ་ཟད།དེང་སང་བོད་ནང་ན་ཡང་རྒྱ་གཞུང་གིས་གསོ་ཕག་བཞིན་བསྡད་ཡོད་པ་ཡང་གོ་ཐོས་འདུག གང་ལྟར་མང་པོ་ཞིག་ལུས་འགུགས་ཐུབ་ན་སེམས་མི་འགུགས་པ་ང་རང་ཡིད་ཆེས་ཡོད། ༢༠༠༨་ནས་བཟུང་བོད་མི་གཞི་བྱེས་གཉིས་ཀྱི་སེམས་སུ་རྨ་ཁ་ཆེན་པོ་ཞིག་བཟོས་ཡོད་པ་མ་ཟད། རྨ་ཁའི་ཐོག་ལ་ཚྭ་ཆུ་ཉི་མ་རེ་རེ་བཞིན་ལྡུགས་བཞིན་ཡོད་པས་སེམས་ཀྱི་ན་ཟུག་དེ་རུས་པའི་གཏིང་ལ་ཕྱིན་ཡོད། གང་ལྟར་ཡང་དེ་རིང་རྒྱ་གཞུང་གིས་བཙན་བྱོལ་བར་ལས་ཁུངས་རྒྱག་འཆར་གྱི་དམིགས་ཡུལ་ཐེངས་གཉིས་པ་ནམ་ཡང་འགྲུབ་ཐབས་མེད་པ་ཞིག་རེད།