གནས་ཚུལ་ཡོང་ཁུངས། ཞིབ་འཇུག་ཚོགས་པའི་ཡིག་ཚང་།
དེ་ཡང་རྒྱལ་བའི་བསྟན་པ་རིན་པོ་ཆེའི་སྙིང་པོ་ཤེས་རབ་དང་སྙིང་རྗེའི་ཉམས་ལེན་འདི་དག་དེང་གི་དུས་འདིར་ཡང་འཛམ་གླིང་སྤྱི་ལ་མཁོ་བའི་ནོར་བུ་ཉིད་དུ་གྱུར་ཡོད་ན་ཡང་། དེ་ཉིད་ཡུལ་དུས་གནས་སྐབས་དང་འཚམས་པར་གདུལ་བྱ་རྣམས་ལ་ཡང་དག་པར་སྟོན་པར་བྱེད་པ་ལ་དམིགས་བསལ་འཆད་ཁྲིད་ཀྱི་ཐབས་ལམ་སོགས་དགོས་ངེས་ཡིན་པ་ལྟར། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ངོས་ནས་དུས་རིམ་དང་པོའི་ནང་ཆོས་འཆད་སྤེལ་གྱི་ཟབ་སྦྱོང་ཞིག་སྤྱི་ལོ་༢༠༢༡ ཟླ་ ༣ ཚེས་ ༡ ཉིན་ཐའེ་ཝན་གྱི་རྒྱལ་ས་ཐའེ་པེ་རུ་དབུ་འཛུགས་ཞུས་ཡོད།
འབྱུང་འགྱུར་ཟླ་བ་གསུམ་གྱི་རིང་གི་ཟབ་སྦྱོང་འདིར་ཐའེ་ཝན་དུ་བཞུགས་བཞིན་པའི་ཆོས་བརྒྱུད་སོ་སོའི་དགེ་འདུན་པའི་ཁོངས་ནས་ཟབ་སྦྱོང་ལ་དོ་སྣང་ཡོད་ཅིང་། འབྱུང་འགྱུར་ལག་ལེན་དུ་ཁེལ་ངེས་ཡིན་པར་ཡིད་ཆེས་ཞུ་ཆོག་པའི་ནང་ཆོས་ཀྱི་ཤེས་ཚད་མཁན་སློབ་དགེ་བཤེས་ཀྱི་གནས་རིམ་དུ་ཡོད་པ་གྲངས་གསུམ་ནས་བཞི་བསྡུས་ཏེ་རིན་མེད་ཐོག་ཟབ་སྦྱོང་འབུལ་གཏན་ཁེལ་ཡོད།
དེ་བཞིན་དུ། ཟབ་སྦྱོང་གི་ཆེད་དུ་དམིགས་བསལ་ལས་རིགས་སོ་སོའི་ནང་བསྟན་ཁྲོམ་རའི་བརྗོད་གཞི་དང་འབྲེལ་བའི་མཁས་དབང་དང་ཆེད་མཁས་པ་བཅུ་ཙམ་སྔ་ཕྱིར་གདན་འདྲེན་གྱིས་བརྗོད་གཞི་དང་འབྲེལ་བའི་ཟབ་སྦྱོང་སྤྲོད་རྒྱུ་ཡིན་པ་དང་། ཟབ་སྦྱོང་གི་ནང་དོན་གཙོ་བོ་གསུམ་དུ་ཕྱེས་ཡོད་པ་ལས། དང་པོ་དྲ་རྒྱ་བཀོལ་ཚུལ། གཉིས་པ། ཁྲོམ་རའི་རིག་པ། གསུམ་པ། ལས་གཞི་དོ་དམ་བཅས་ཀྱི་ཐོག་ལ་ཟབ་སྦྱོང་སྤྲོད་རྒྱུ་ཡིན།
ད་དུང་དེ་ལས་གཞན་དུ། གནའ་དེང་ཟུང་འབྲེལ་གྱི་ལམ་ནས་ནང་ཆོས་ངོ་སྤྲོད་བྱེད་སྟངས། འཚོ་བ་དངོས་དང་འབྲེལ་བའི་ནང་ཆོས་འཆད་སྟངས། མི་རིགས་དང་རིག་གཞུང་གི་འདུ་ཤེས་མི་འདྲ་བ་དང་འབྲེལ་ནས་ནང་ཆོས་འཆད་སྟངས། ལྟ་གྲུབ་དང་འབྲེལ་ནས་ནང་ཆོས་འཆད་སྟངས། ཚན་རིག་དང་འབྲེལ་ནས་ནང་ཆོས་འཆད་སྟངས། རོལ་རྩེད་དང་འབྲེལ་ནས་ནང་ཆོས་འཆད་སྟངས་སོགས་ཀྱི་ཐད་ལའང་ཟབ་སྦྱོང་སྤྲོད་རྒྱུ་ཡིན།
དེ་ཡང་ནང་ཆོས་འཆད་སྤེལ་གྱི་ཟབ་སྦྱོང་འདི་ཉིད་རྒྱ་ས་ཐའེ་པེ་ལ་དབུ་འཛུགས་ཀྱི་ཉིན་དང་པོར་སྐུ་མགྲོན་གཙོ་བོ་གནའ་དེང་རིག་པའི་གནས་ལ་མཁྱེན་རྒྱ་ཡངས་པའི་རྒྱལ་སྤྱིའི་དགེ་ལྡན་ལྷན་ཚོགས་ཀྱི་ཕྱག་བསྟར་ངེས་སྟོན་པ་དང་། དགའ་ལྡན་ཁྲི་ཐོག་ཁང་གི་དྲུང་ཆེ་ཤར་རྩེ་མཁན་ཟུར་བྱང་ཆུབ་ཆོས་ལྡན་མཆོག་གིས་དྲ་ལམ་བརྒྱུད་ནས་ཟབ་སྦྱོང་གི་བརྗོད་གཞི་དང་འབྲེལ་བའི་བཀའ་སློབ་གལ་ཆེན་གནང་བར་མ་ཟད། ཁྲོམ་ར་རིག་པའི་ཆེད་མཁས་པ་སེན་དིས་དང་། རྒན་ངག་དབང་འཕྲིན་ལས། མཁན་པོ་གཡུལ་རྒྱལ་བཅས་ཀྱིས་ཀྱང་ཟབ་སྦྱོང་དང་འབྲེལ་བའི་གསུང་བཤད་གལ་ཆེན་གནང་།
དེ་བཞིན་ཞིབ་འཇུག་ཚོགས་པའི་དབུ་འཛིན་ལས་ཐོག་པ་མཁན་པོ་འཇིགས་མེད་རྣམ་རྒྱལ་དང་ཚོགས་གཞོན་སློབ་དཔོན་བསོད་ནམས་ཉི་མ་བཅས་ནས་ཀྱང་ཟབ་སྦྱོང་གོ་སྒྲིག་གི་དགོས་དམིགས་དང་རྒྱུ་མཚན་སོགས་དང་འབྲེལ་བའི་གཏམ་བཤད་གནང་ཡོད།
དེ་མིན་ཟབ་སྦྱོང་འདིར་དངོས་སུ་མཉམ་ཞུགས་གནང་མཁན་རྣམ་པ་དང་། ཉིན་དང་པོའི་དབུ་འཛུགས་མཛད་སྒོར་ཆེད་ཕེབས་གནང་བའི་སྐུ་མགྲོན་བཅས་ཚུད་པའི་རིས་སུ་མ་ཆད་པའི་མཁན་སྤྲུལ་དགེ་བའི་བཤེས་གཉེན་བཞི་བཅུ་ཙམ་འདུ་འཛོམས་གནང་ཐུབ་ཡོད་ལ། དྲ་ཐོག་ཐད་གཏོང་ལ་མཉམ་ཞུགས་གནང་མཁན་གྱི་དྲ་འབངས་དང་གསར་འགྱུར་བརྒྱུད་ལམ་སོགས་ཀྱིས་ཀྱང་དོ་སྣང་ཆེན་པོ་གནང་འདུག །
དེ་ཡང་ཟབ་སྦྱོང་འདི་ཉིད་ཀྱི་དཔལ་འབྱོར་མཐུན་རྐྱེན་གཙོ་བོ་མཁྱེན་བརྩེ་ཐེབས་རྩ་ཚོགས་པས་གནང་ཞིང་། ཞིབ་འཇུག་ཚོགས་པའི་མགན་འཛིན་དང་ལས་བྱེད་ཡོངས་ཀྱིས་ཐུགས་སྣང་ཆེན་པོས་ལས་འཆར་གོ་སྒྲིག་ཞིབ་ཚགས་བཟོས་པ་བརྒྱུད་ཟབ་སྦྱོང་འདི་དངོས་སུ་མངོན་གྱུར་བྱུང་བ་ཞིག་ཡིན།
ཟབ་སྦྱོང་འདི་ཡང་སྤྱི་ལོ་༢༠༢༠ ཟླ་ ༡༢ ཚེས་༡༣ ཉིན་ཐའེ་ཝན་དུ་༧སྐྱབས་རྗེ་རྫོང་སར་མཁྱེན་བརྩེ་རིན་པོ་ཆེ་དབུ་བཞུགས་ཀྱིས་འཚོགས་པའི་དམ་ཆོས་འཆད་སྤེལ་གནང་ཐབས་ཀྱི་ཟབ་སྦྱོང་གི་ཚོགས་འདུ་སོགས་བརྒྱུད་ནས་གྲོས་བསྡུར་དང་གཏན་ཁེལ་བྱུང་བའི་ཞིབ་འཇུག་ཚོགས་པའི་ལས་གཞི་གལ་ཆེན་ཞིག་ཆགས་ཀྱི་ཡོད་པ་རེད།
སྔོན་རབས་བོད་མཁས་པས་རྣམས་ཀྱིས། ་འོང་། ཡོངས་ཁྱབ་ཀྱི་དཔེ་ཆ་དག་ན་མཆིས་པས། དེ་ལ་གནས་ན་དགེ་མཚན་ཆེའོ།