གནས་ཚུལ་གཏོང་མཁན། ཚེ་རིང་བཀྲ་ཤིས།
སྤེལ་ཚེས། སྤྱི་ལོ་༢༠༡༧ཟླ་༡༡ཚེས་༧ཉིན།
ཐའེ་ཝན་དུ་བོད་བརྒྱུད་ནང་བསྟན་ཞིབ་འཇུག་ཚོགས་པའི་རྒྱུན་ལས་གསར་པ་དང་འགན་འཛིན་ལྷན་ཚོགས་ཀྱི་ཚོགས་མི་སྐབས་ལྔ་བ་དེ་ཉིད་སྤྱི་ཟླ་བཅུ་པའི་ཚེས་བཅོ་ལྔའི་ཉིན་ད་ལྟའི་འགན་འཛིན་ལྷན་ཚོགས་ཀྱིས་སྤྱི་མོས་ཐག་གཅོད་བརྒྱུད་བསྐོ་བཞག་བྱུང་ཡོད།
དེ་ཡང་ཞིབ་འཇུག་ཚོགས་པའི་ཚོགས་གཙོ་ལྷ་རམས་པ་ཧ་ཤེན་རིན་པོ་ཆེས་དབུ་ཁྲིད་པའི་འགན་འཛིན་ལྷན་ཚོགས་ནས་གྲོས་བསྡུར་དང་སྤྱི་མོས་བརྒྱུད། ད་ལྟའི་ལས་ཐོག་འགན་འཛིན་ཚོགས་མི་བླ་མ་ཡེ་ཤེས་རབ་རྒྱས་མཆོག་ཚོགས་གཙོ་གསར་པར་བསྐོ་བཞག་དང་། ཐའེ་ཝན་གྱི་རྒྱའི་དགེ་བསྙེན་མ་ཀྲང་ལི་མེ་ལགས་རྒྱུན་ལས་ཚོགས་གཙོར་བསྐོ་བཞག་བྱུང་ཞིང་། དགེ་བསྙེན་མ་ཀྲང་ལགས་ནི་མུའུ་ཆོའུ་ཧྥོའུ་ལི་རྒྱལ་སྤྱིའི་མ་རྐང་ཚད་ཡོད་སྤྱི་གཉེར་ཁང་གི་སྤྱི་ཁྱབ་སོགས་ལས་གནས་དུ་མ་ཞིག་འཁུར་བཞིན་ཡོད་པ་དང་། རྒྱལ་ཁབ་མང་པོ་ཞིག་ཏུ་ཁེ་ལས་སོགས་དང་འབྲེལ་བའི་ལས་གནས་མང་པོ་ཁུར་བའི་འཛིན་སྐྱོང་གི་ཉམས་མྱོང་དང་ནང་ཆོས་དང་འབྲེལ་བའི་ཚོགས་སྡེ་དག་ཏུའང་ལས་ཀ་གནང་བའི་ཉམས་མྱོང་ཡོད་པ་ཞིག་ཡིན།
སྤྱི་ཟླ་བཅུ་གཅིག་པའི་ཚེས་དྲུག་ཉིན་འགན་འཛིན་ལྷན་ཚོགས་དང་རྒྱུན་ལས་གསར་རྙིང་ལྷན་འཛོམས་ཐོག་རྒྱུན་ལས་གསར་རྙིང་རྩིས་སྤྲོད་རྩིས་ལེན་ལེགས་པར་གྲུབ།
ཐེངས་འདིའི་འགན་འཛིན་ལྷན་ཚོགས་བརྒྱུད། ཞིབ་འཇུག་ཚོགས་པའི་དྲ་བརྙན་ཚོགས་གཙོ་ཚོགས་གཞོན་ལོགས་སུ་མི་དགོས་པའི་ཐོག་ཁྱོན་ཡོངས་ནས་ཞིབ་འཇུག་ཚོགས་པའི་རྩ་བའི་རྒྱུན་ལས་ཀྱིས་འགན་འཁུར་གནང་རྒྱུ་དང་།འབྱུང་འགྱུར་ཞིབ་འཇུག་ཚོགས་པའི་ལས་དོན་ཁ་ཕྱོགས་གཙོ་བོ་ཐའེ་ཝན་ས་གནས་ཀྱི་ནང་པའི་ཆོས་བརྒྱུད་ཁག་གི་བར་མཉམ་འབྲེལ་གོང་མཐོར་གཏོང་རྒྱུ། ས་གནས་མི་མང་དང་འབྲེལ་བའི་སྤྱི་ཚོགས་ཞབས་ཞུའི་ཕྱོགས་ལ་ཤུགས་སྣོན། བོད་བརྒྱུད་ནང་བསྟན་ནང་ཁུལ་དང་རྒྱལ་སྤྱིའི་ནང་པའི་ཆོས་བརྒྱུད་གཞན་དག་བར་ལ་བགྲོ་གླེང་གོ་སྒྲིག་དང་འབྲེལ་ལམ་གོང་མཐོར་གཏོང་རྒྱུ་སོགས་ཀྱི་ལས་དོན་གཙོ་ཆེར་འཛིན་རྒྱུར་མོས་མཐུན་བྱུང་ཡོད།
དེ་ཡང་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པ་ནི། ཉིས་སྟོང་དགུའི་ལོར་ཐའེ་ཝན་དུ་བཙུགས་ཤིང་། ཐོག་མར་གཞི་རྩའི་རྐང་འཛིན་མཁན་སྤྲུལ་བཞི་ཡོད་པ་ནས་ད་ལྟ་ཆོས་བརྒྱུད་རིས་མེད་ཀྱི་མཁན་སྤྲུལ་དགེ་བཤེས་བཅུ་ལས་གྲུབ་པའི་ཆོས་ཚོགས་ཁག་མཉམ་འདུས་ཀྱིས་གཉེར་སྐྱོང་བྱེད་བཞིན་པའི་ཚོགས་པ་ཞིག་ཡིན་པ་དང་།ཆོས་བརྒྱུད་ཁག་གི་བླ་ཆེན་ཚང་མས་རྒྱབ་གཉེར་དང་ངོས་འཛིན་ཡོད་པ་དང་། ཐའེ་ཝན་རྒྱལ་ཡོངས་རང་བཞིན་གྱི་ཚད་ལྡན་དེབ་སྐྱེལ་ཡོད་པའི་ཁེ་གཉེར་མིན་པའི་སྒྲིག་འཛུགས་ཤིག་ཡིན་ལ། ད་ལྟའི་ཆར་ཐའེ་ཝན་དུ་ཁྱོན་ཡོངས་ནས་ངོས་འཛིན་དང་གདེངས་འཇོག་ཡག་པོ་ཡོད་པའི་ཐའེ་ཝན་གྱི་བོད་བརྒྱུད་ནང་བསྟན་ཐུན་མོང་གི་ཚོགས་པ་ཞིག་ཆགས་ཡོད།
ཞིབ་འཇུག་ཚོགས་པའི་ཚོགས་གཙོ་རྒན་ཡེ་ཤེས་རབ་རྒྱས་ནི། འཁྲུངས་ཡུལ་ཁམས་ནང་ཆེན་དང་། ཆུང་ནས་འབྲི་གུང་བཀའ་བརྒྱུད་ཀྱི་བསྟན་སྒོར་ཞུགས་ཤིང་ཀ་བཀྲ་ཤིས་དགོན་སོགས་སུ་གསན་བསམ་གནང་ཞིང་། ཕྱིས་འཕགས་ཡུལ་འབྲི་གུང་བཀའ་བརྒྱུད་ཀྱི་བྱེས་ཀྱི་གདན་ས་བྱང་ཆུབ་གླིང་དུ་དབུ་མཛད་སོགས་ཀྱི་ལས་འགན་འཁུར་གནང་། སྤྱི་ལོ་༡༩༩༨ལོར་ཐའེ་ཝན་དུ་ཕེབས་གནང་ཞིང་། ད་ལྟའི་ཆར་ཤེས་རབ་འོད་སྣང་སྒོམ་སྒྲུབ་ལྟེ་གནས་དང་བཀའ་བརྒྱུད་བྱམས་རྩེའི་ཆོས་གླིང་སོགས་ཀྱི་འགན་འཛིན་གནང་མུས་ཐོག བོད་ནང་དུ་ད་ཕྲུག་སློབ་གྲྭ་གསར་འཛུགས་དང་། སྐབས་གཉིས་པ་དང་གསུམ་པ་བཞི་པ་བཅས་ཀྱི་ཞིབ་འཇུག་ཚོགས་པའི་འགན་འཛིན་ལྷན་ཚོགས་ཀྱི་ཚོགས་མི་གནང་བ་དང་སྐབས་ལྔ་བའི་ཞིབ་འཇུག་ཚོགས་པའི་འགན་འཛིན་ཚོགས་གཙོར་དངོས་སུ་འདེམས་ཐོན་བྱུང་ཡོད་པ་བཅས།