ཐའེ་ལན་ཌུར་ཉིན་བཅུའི་རིང་འགྲུལ་བཞུད།(4)      

ཐེ་བོ་སངས་རྒྱས།

ཉིན་གསུམ་པ། 

དེ་རིང་ཕྱི་ཚེས་ ༣༡ གཟའ་ཕུར་བུའི་ཞོགས་ཀ་རེད། ཆུ་ཚོད་བདུན་པའི་ཐོག་མལ་ལས་ལངས་ཞོར་སྒེའུ་ཁུང་གི་ཕྱི་ལ་སྐེ་བསྲིངས། ནམ་མཁར་སྤྲིན་པ་ཟེར་བ་ཁུར་མོང་གི་སྤུ་འཕྲུ་*༡ཙམ་ཡང་མེད་ཅིང་ཚ་བ་དགའ་རབ་འདུག  ཁྱམས་འདབས་ཀྱི་ཁྲུས་རྫིང་ནང་མཆོངས་ནས་རྐྱལ་རྩལ་ངོམ།  ཆུང་དུས་ཆུ་རྐྱལ་ལ་དབྱིངས་ཞུགས་མྱོང་ཡང་དེ་ལུས་སྦྱོང་ཞིག་ཡིན་སྣང་མ་ཤར།  ཆུར་རྐྱལ་ཏེ་ཕྱིར་མགྲོན་ཁང་ནང་འཁོར་དུས་ཞབས་ཞུ་མས་ངའི་ཁང་མིག་གཙང་སྦྲ་བྱེད་ཀྱིན་འདུག  རྒྱ་ནག་གི་གཏམ་དཔེ་ལ།  “དངུལ་ཡོད་ན་འདྲེ་མོས་ལག་མཆིག་སྐོར་རོགས་བྱེད།”  ཟེར་བ་ཅིས་མ་བདེན།  འདི་ང་ཚོ་ཕྱུག་པོ་ཡིན་པའི་སྐད་ཆ་མིན།  ཧོབ་སྟེ་བལྟས་ན།  ས་རྒྱུས་མི་རྒྱུས་ཅི་ཡང་མེད་སར་སྒྲོ་ལཱར་Dollar ཟེར་བའི་ཤོག་ལྷེ་ལྗང་ཁྲ་འདི་ཡིས་གནས་མལ་གང་བདེ་དང་།  བཟའ་བཏུང་གང་ཞིམ་རེ་ཐོབ་པར་མ་ཟད།  སྐྱེ་ཕོ་མོ་ཀུན་གཡོག་ཏུ་ཁོལ་བ་འདི་ལས་ཡ་མཚན་པ་ཅི།  འོན་ཀྱང་།  འདིའི་རྒྱབ་ལོགས་ན་དབང་འཛིན་པ་ཞིག་གིས་དཀོན་མཆོག་དཔང་བཙུགས་ཀྱིས་དངུལ་སྲང་གཞལ་རྒྱུ་དམ་བཅས་ཡོད་པ་མ་ཡིན་ནམ།  ཉལ་ཁང་གཙང་མ་བཟོས་ཚར་རག་བར་ཁྲུས་རྫིང་འགྲམ་གྱི་རྐུབ་བཀྱགས་ཐོག་སྐུ་དྲག་ཅིག་གི་ཚུལ་དུ་ངལ་བསོས།  དེ་ནས་ཅ་ལག་རོབ་ཙམ་བསྡུ་གསོག་བརྒྱབ་སྟེ་ཐོན་ཆོག་ཆོག་བཟོས།  གང་ཡིན་ཞེ་ན།  དེ་རིང་ང་ཚོ་ཕུ་ཁེ་ཐྲི་Phuket ཞེས་པའི་མཚོ་གླིང་གྲགས་ཅན་དེར་འགྲོ་དགོས་རེད།  མགྲོན་ཁང་གི་ཐག་ཉེའི་ཐའེ་ཟ་ཁང་ཞིག་ཏུ་སོང་ནས་ཞོགས་ཟས་ལ་འབྲས་ཕྱེའི་ཐུག་པ་རེ་བཏུང་།  ཕྱིར་མགྲོན་ཁང་དུ་ཡོང་ནས་འཚིག་ཇ་འདྲ་འཐུང་ཞོར་དེ་རིང་གི་འགྲིམ་འགྲུལ་ཇི་ལྟར་བྱ་རྒྱུའི་སྐོར་གྲོས་མོལ་བྱས།  ལམ་གྲོགས་གསུམ་ག་མེ་འཁོར་ནང་བསྡད་དེ་ཡུལ་ལྗོངས་ལ་ལྟད་མོ་ལྟ་བཞིན་འགྲོ་འདོད་མོད།  མེ་འཁོར་ནི་ལམ་ཕྱེད་ཙམ་ལས་མི་འགྲོ་བ་ཤེས་པས་སྤྱི་སྤྱོད་རླངས་འཁོར་ནང་འགྲོ་རྒྱུ་གཏན་ཁེལ།  ང་ཚོས་ཅ་ལག་འཐོལ་པ་འགའ་མགྲོན་ཁང་གི་སྣེ་ལེན་པ་མ་ནིང་མར་བཅོལ་བས་སྟབས་ཇེ་བདེར་སོང་།  སྤྱིར་ཐའེ་རྒྱལ་ཁབ་འདིར་རང་བྱུང་ཐོན་ཁུངས་ཀྱིས་ཕྱུག་ཅིང་།  དཔལ་འབྱོར་ཡར་རྒྱས་སུ་འགྲོ་བཞིན་པའི་ལུང་པ་ཞིག་རེད།  དེ་ཡང་གསེར་དང་།  གཤའ་དཀར།  ཞ་ཉེ།  ཏི་ཚ།  རིན་ཆེན་རྡོ་ཡི་རིགས།  རྡོ་སོལ་སོགས་ཟད་མི་ཤེས་པ་དང་།  ཕྱི་ལོ་༢༠༡༨ལོར་རྒྱལ་ནང་གི་ཐོན་སྐྱེད་རྩ་འབོར་ལ་GDP, ཨ་སྒོར་ཁྲག་ཁྲིག་ཆེན་པོ། ༡༣༢༣།  GDP, US$1.323 trillion(PPP; 2018 est,)  ཨེ་ཤ་ཡའི་ཨང་རིམ་མཐོ་གྲས་སུ་སླེབས་པར་བཤད་ལ།  བྷན་ཀོག་ནས་གང་ལ་བལྟས་རུང་དེ་ལྟ་ལོས་ཀྱང་ཡིན་སྙམ་པ་ཞིག་ཤར།

སྔ་དྲོ་ཆུ་ཚོད་ ༡༡ ཙམ་ལ་གླ་འཁོར་ཞིག་གླས་ཏེ་རླངས་འཁོར་འབབ་ཚིགས་སུ་བསྐྱོད།  ཕྱི་དྲོ་ཆུ་ཚོད་དྲུག་པའི་ཐོག་ཕུ་ཁེ་ཐྲིར་འགྲོ་མཁན་གྱི་རླངས་འཁོར་འཛིན་བྱང་རེ་ཉོས།  སྒུག་ཡུན་ཅུང་རིང་ཡང་སྟབས་ལེགས་སྟེས་དབང་གིས།རླངས་འཁོར་འབབ་ཚིགས་ནི་བལ་ཡུལ་གྱི་གནམ་གྲུ་ཐང་ལས་ཀྱང་མཐུན་རྐྱེན་འཛོམས་པོ་འདུག  ང་ཚོས་སྔ་ཉིན་ནས་ཉོ་འདོད་པའི་ཁ་པར་བྱང་བུ་རེ་ཉོ་རྒྱུ་རག་ཅིང་།  རོགས་པ་ཚོས་ཉོ་ཆ་ཙག་ཙིག་བརྒྱབ་རྗེས་འཚིག་ཇ་ཁང་ཞིག་ཏུ་སྐོམ་སེལ་ཐབས་བྱས།  ཉིན་གུང་ཡང་དེར་ཐའེ་ཤ་འབྲས་ཞིམ་ཐག་ཆོད་པ་ཞིག་ཟོས།  ལམ་ལ་ཆས་རག་བར་ཇ་ཁང་ཁམས་སངས་ས་ཞིག་ཏུ་ཇ་རེ་བཏུང་བཞིན་དུས་ཚོད་བསྐྱལ།  ཆུ་ཚོད་༦ཐོག་སྤྱི་སྤྱོད་རླངས་འཁོར་ཉིས་བརྩེགས་ཅན་དེའི་ཐོག་ཁར་འཛེགས།  ཞབས་ཞུ་མ་ཞིག་གིས་ཁ་ཟས་དང་སིལ་ཁུ་དག་དྲངས་པ་དང་མཉམ་དུ་རླངས་འཁོར་འགྲོ་འགོ་བརྩམས།  བྷན་ཀོག་ནས་ཕུ་ཁེ་ཐྲིའི་བར་སྤྱི་ལེ་དགུ་བརྒྱ་ལྷག་གི་ས་ཐག་ཡོད་པས་མཚན་ཐོག་ཐག་གི་ལམ་ཡིན་པ་བཤད་མ་དགོས།  ད་དུང་ཉི་མ་ནི་ཐག་ཚད་ཙམ་ཡོད་པས་ཡུལ་ལྗོངས་ལ་ལྟད་མོ་ལྟ་བའི་གོ་སྐབས་ཤར།  མྱུར་འགྲོས་གཞུང་ལམ་དེ་ལྷོ་ཡི་ཕྱོགས་སུ་དྲང་ངེར་འདུག  རླངས་འཁོར་གྱི་སྒེའུ་ཁུང་ལས་ཕྱི་རོལ་ཇི་ལྟར་མཐོང་བའི་ཚུལ་ནི།  བྱ་ལེན་མའི་ཟློས་གར་ལས།  “བདག་ལ་གློ་བུར་ཕྲ་རབ་དག་ཀྱང་ཆེ་བའི་ཕུང་པོ་ཉིད་དུ་སྣང་།།རང་བཞིན་ཉིད་ཀྱིས་འཁྱོག་པ་དག་ཀྱང་རིམ་པ་གཅིག་པའི་དྲང་པོར་གྱུར།།སོ་སོར་ཆད་པའི་ཆ་ཤས་ཀུན་ཀྱང་ལྷན་ཅིག་འབྱར་བའི་རྒྱུད་དུ་སྟེ།།སྐད་ཅིག་རེ་ལ་མཐོང་བའི་ཆ་རྣམས་རྒྱང་ན་མ་ཡིན་དྲུང་ན་མིན།།” ཞེས་པ་ལྟར་སྣང་།

དགོང་མོའི་ཆུ་ཚོད་ ༡༡ ཙམ་ལ་ཟས་རིགས་སྣ་ཚོགས་འཛོམས་སའི་ཁྲོམ་ར་ཞིག་ཏུ་འབྱོར།  མགྲོན་པོ་རྣམས་ཀྱིས་ཆབ་བསང་གི་རྗེས་སུ་དགོང་ཟས་ལ་རོལ།  ང་ཚོས་ཐའེ་སྟབས་བདེ་ཐུག་པ་དང་ཤིང་ཏོག་རེ་ཟོས་རྗེས་སླར་ཡང་ལམ་ལ་ཆས།  མུན་ནག་ནང་ཡུལ་ལྗོངས་ཀྱི་བཀོད་གསལ་པོར་མཐོང་རེ་བྲལ་བས་ཁ་པར་ལས་གླུར་ཉན་བཞིན་གཉིད་ལ་ཤོར།  དེའི་བར་ལམ་ཁ་ཧ་ཅང་བདེ་བས་མཚན་འགྲུལ་ལ་དཀའ་ཚེགས་དེ་ཙམ་མ་བྱུང་།

ཉིན་བཞི་པ། 

ཕྱི་ཟླ་༢ཚེས་༡གཟའ་པ་སངས།  ནམ་ལངས་དུས་རླངས་འཁོར་ལྡིར་ལྡིར་གྱིས་ལྷོ་ནས་ལྷོར་བཞུད་ཀྱིན་འདུག  སྒེའུ་ཁུང་ལས་ཉི་འོད་གསེག་འཕྲོས་ཀྱིས་མགྲོན་པོ་དག་གི་རྨི་ལམ་དཀྲོགས།  ཡུལ་ལ་ལར་ལྷོ་བྱང་གཉིས་ཀྱི་གནམ་གཤིས་དྲོ་གྲང་དང་།  གངས་རི་དང་ནགས་རི།  རྩྭ་ཐང་དང་བྱེ་ཐང་།  གཞའ་ཚན་ཡོད་མེད་སོགས་ཀྱི་ཁྱད་པར་ཆེ་མོད།  རྒྱལ་ཕྲན་འདིར་དེ་ཙམ་ཧེ་བག་ཡོད་ཚོད་མི་འདུག  ཆུ་ཚོད་༡༠ཙམ་ལ་ཕུ་ཁེ་ཐྲིའི་རླངས་འཁོར་འབབ་ཚིགས་སུ་འབྱོར།  རླངས་འཁོར་ལས་བབས་ཏེ་ཕུ་ཁེ་ཐྲིའི་མཚོ་ཁར་འགྲོ་སྟངས་ཐད་སྐད་ཆ་དྲིས་དུས།  མཚོ་ངོགས་ཁ་ཤས་ཡོད་པ་ལས་ཁྱོད་ཚོ་གང་དུ་འགྲོ་ཞེས་ལྡོག་འདྲི་བྱེད་ཀྱི་འདུག  མཐར་ལམ་སྟོན་བྱས་གསལ་ལྟར།  དང་པོ་ཊུ་ཊུ་ཞིག་ཏུ་བསྡད་ཅིང་ཡུད་ཙམ་སོང་རྗེས་སྤྱི་སྤྱོད་རླངས་འཁོར་ཞིག་གི་ནང་འཛུལ་ཏེ་པཱ་ཏོང་Patong མཚོ་ཁར་བསྙེགས།  ཡུལ་ལྗོངས་ཉམས་དགའ་ལ་ལམ་ཁ་བདེ་བ་སྤྱི་ལེ་འགའ་བརྒལ་མཐར་པཱ་ཏོང་མཚོ་ཁར་སླེབས།  དེ་ནི་མཚོ་ཁུགས་སུ་ཆགས་པའི་གྲོང་བརྡལ་ཧ་ཅང་སྐྱིད་པོ་དཔེ་གསར་གྲོང་ཁྱེར་Smart City ཞིག་གི་ཁྱད་ཆོས་ཚང་།  ཐའེ་ལན་ཌུའི་ལྷོ་སྣེའི་ཕུ་ཁེ་ཐྲི་འདི་ཉིད་མིང་དུ་གྲགས་དོན།  ཆར་སྤྲིན་འཁྲིགས་པའི་ནགས་ཀློང་དང་།  ཨན་ཌ་མཱན་རྒྱ་མཚོའི་Andaman Sea,  ནང་མཚོ་གླིང་རི་ཕྲན་མཛེས་སྡུག་ལྡན་འགའ་ཡོད་པར་མ་ཟད།  དྭངས་ཤིང་གཙང་བའི་མཚོ་མོ།  ཐའེ་བཟོ་བཀོད་འབུར་དུ་དོད་པའི་ལྷ་ཁང་དང་ཐུབ་སྐུ་ཆེན་མོ།(Big Buddha) འདོད་རྒུའི་ལོངས་སྤྱོད་འཛོམས་པའི་མཚོ་ཁ་འགའ་ཡང་ཡོད་པས་ལོས་ཡིན།

ཉིན་གུང་ང་ཚོ་པཱ་ཏོང་དུ་སླེབས་པ་དང་དྲ་ཐོག་ནས་མགྲོན་ཁང་བཙལ་ཅིང་དགོས་རྒུ་ས་ཁྲའི་ལམ་སྟོན་ལྟར་རྒྱལ་པོའི་ཁབ་མགྲོན་ཁང་།royal hotel ཞེས་པར་གནས་ཚང་གླས།  མགྲོན་ཁང་འདིའི་སྦྱིན་བདག་ལཱག་ནོ་ནས་ཡོང་བའི་རྒྱ་གར་བ་ཞིག་རེད་འདུགཁྲུས་རེ་གསོལ་རྗེས་འདབས་ཀྱི་ཟ་ཁང་ཞིག་གི་ནང་ཞོགས་ཇ་དང་གུང་ཚིགས་ལྷན་དུ་ཟོས།  གནམ་གཤིས་དྲོ་ཚད་༣༠སྒང་ལ་ཡོད་པས་ང་ཚོས་ཕུ་མེད་སྟོད་ཐུང་དང་།  དོར་ཐུང་།  ཉི་ཁེབས་ཞྭ་མོ་རེ་གྱོན་ཏེ་མཚོ་ཁར་འཆམ་འཆམ་དུ་བསྐྱོད།  མཚོ་ཁར་རྐུབ་སྟེགས་ཉལ་ཁྲི་མ་མཚམས་མཚམས་སུ་བསྒྲིགས་ཤིང་ཉི་གདུགས་ཁྲ་ལམ་མེར་ཕུབ་པ་དང་།  ཤ་མདོག་དང་སྐྲ་མདོག་མི་འདྲ་བའི་མི་རིགས་སྣ་ཚོགས་པ་འདུས་ཏེ།  ལ་ལ་རྒྱ་མཚོར་རྐྱལ་བ་དང་།  ལ་ལ་སྐྱིད་ཉལ་རྒྱག་པ།  ལ་ལ་དཔེ་དེབ་ཀློག་པ།  ལ་ལ་དྲ་སྤོལ་རྩེ་བ།  ལ་ལ་རྒྱུག་ཤར་གློད་པ།  ལ་ལ་གྲུ་ཆུང་གཏོང་བ།  ལ་ལ་མཆོངས་གདུགས་ལ་འཕུར་བ་སོགས་བྱེད།  གུས་པ་ལོ་མང་གོང་དུ་རྒྱ་གར་ལྷོ་ཕྱོགས་གྷོ་ཝཱ་Goa མཚོ་ཁར་འགྲོ་མྱོང་ས་དང་ཕལ་ཆེར་འདྲ་བོ་འདུག་དྲན།  ང་ཚོ་པཱ་ཏོང་གྲོང་བརྡལ་གྱི་སྨད་ནས་སྟོད་བར་མཚོ་འགྲམ་བརྒྱུད་རྐང་ཐང་དུ་ལེ་བར་ལྔ་དྲུག་ཙམ་སོང་།  དེ་ནས་འཛམ་གླིང་ནང་སྐད་གྲགས་ཆེ་བའི་འཚིག་ཇ་ཁང་Starbucks ཞིག་འཚིག་ཇ་རེ་ཉོས་ཏེ་ལྷོད་ལྷོད་ངང་མཚོ་ཁའི་ཉི་མ་ནུབ་ཚུལ་ལ་ལྟད་མོར་གཡེངས།  ས་རུབ་རྗེས་སྲང་བར་ཀུན་ཏུ་ལམ་སྒྲོན་ཁྲ་ལམ་མེར་སོང་།  ཕྱོགས་ཡོང་མགྲོན་པོ་རྣམས་སྲང་ལམ་དུ་སྐོར་གཡེང་བྱེད་ཀྱིན་འདུག  ང་ཚོ་ཁྲོམ་ར་འགུ་ཁ་གང་བ་ཞིག་ཉུལ་མཐར་ལན་གྲུ་ལཱ་མེན་兰州拉面ཞེས་པའི་ཟ་ཁང་ཞིག་ཏུ་འཛུལ་ནས་ལཱ་མེན་དང་ཝུ་སིབ་ཁུ་ནག་རེ་བཏུང་།  ཐུག་པའི་བྲོ་བ་དེས་བོད་མདོ་སྨད་ནས་ཐག་ཉེ་བའི་ལན་གྲུ་གྲོང་ཁྱེར་ངོ་མར་སླེབས་པའི་ཚོར་སྣང་སྟེར།  ལན་གྲུའི་ལཱ་མེན་ནི་རྒྱ་ནག་སྐམ་ས་ཆེན་མོར་རླུང་ལྟར་གྲགས་ཤིང་ཕྱི་རྒྱལ་དུའང་གོ་རྒྱུ་འདུག  དགོང་མོ་འཕྱི་ཙམ་ཕྱིར་མགྲོན་ཁང་དུ་ཡོང་ནས་ཁ་བརྡ་གློད།  ཆུ་ཚོད་༡༡ཟིན་མཚམས་གློག་སྒྲོན་དང་ལྷན་དུ་གཟིམས།  (མུ་འགོད།)

མཆན།*༡སྔོ་ལྡུམ་གཞུང་རྟ་རྐང་གཅིག་ཁོང་སྟོང་བཅད་ན་འོ་མ་བཞུར་བ།  མེ་ཏོག་སེར་པོ་འཐོར་རྗེས་ཤིང་བལ་ལྟ་བུའི་སྤུ་འཕྲུ་དཀར་པོའི་ཚོམ་བུ་འདོགས་པ།  བྱིས་པ་ཚོས་རྩེད་འཇོས་ཕུ་བཏབ་ན་གནམ་ལ་འཕུར་བ་ཞིག་གོ།