གཡུ་དྲུག་དཀར། རྡ་ས།
གོ་ཐོས་སུ་ཁྱེད་ནི་གསར་བུ་ཆུང་ཆུང་ཞིག་རེད་ཟེར་ཡང་།འདྲ་པར་སྟེང་གི་ཕོ་ཉམས་དང་ཤ་ཁ་གང་བའི་བརྗིད་ཉམས་ལ་ལྟོས་ན། ཆེན་པོ་ཆེན་པོ་ཞིག་ཏུ་མཐོང་། གྲགས་ཚུལ་ལ་ཁྱེད་ནི་སློབ་ཆེན་སློབ་མ་ཞིག་ཏུ་མཆིད་མོད།དྲ་ཐོག་དང་ཤོག་ཐོག་གི་ཁྲག་ཡིག་དེ་དག་ྐློག་དུས། མཁས་ཆེན་མཁས་ཆེན་ཞིག་རེད་སྙམ། ལྟོས་ཚོད་ལ་ཁྱེད་ནི་མི་སེར་དཀྱུས་མ་ཞིག་ཏུ་སྣང་ཡང་། ཁྱེད་ཀྱི་དཔའ་ལམ་དེ་མཐོང་དུས། དཔའ་བོ་སྟག་འདྲ་ཞིག་ཡིན་པ་གཞི་ནས་རྟོགས།
དུས་ཚོད་ཀྱི་ཉག་ཁ་རུ། ལོ་ཚད་ཀྱི་འོས་ཐང་མིན་ཤས་ཆེ་བའི་ཁྱེད་རང་ལམ་ལ་ཆས་བྱུང་། ཁྱེད་ཀྱིས་གདུང་སེམས་ཀྱི་མིག་ཆུ་མོད་དུ་ཕོ་བཞིན། བྲང་ཁོག་གི་སྐྱོ་དབྱངས་ཤུགས་ཀྱིས་གྱེར་བཞིན། ས་ཆེན་གྱི་ཐོང་ག་རུ། གཞན་གྱིས་མཐོང་མི་ཆོག་པའི་དུར་ཁྲོད་ནས་དུར་ཁྲོད་བརྒྱུད་དེ། ཤི་བོ་རེ་རེའི་རྗེས་ལ་ར་མདའ་ཆས་ཤིང་། རང་ཉིད་ཁོང་ཚོའི་རྣམ་ཤེས་རེ་རེའི་སྐྱོར་མ་བྱས། ཁྱེད་ཀྱིས་གནས་ལུགས་ཀྱི་དར་ཆ་སྤྱི་གཙུག་ཏུ་བསྒྲོན་ཏེ། ཁྲིམས་ལུགས་ཀྱི་རྒྱ་མ་ལག་ཏུ་ཐོགས་ནས། འཇིག་རྟེན་དཀར་ངོགས་སུ། བརྒལ་མི་ཆོག་པའི་བཙོན་དུང་མུན་དོང་གི་སྒོ་ར་བརྟོལ་ཏེ། བཙོན་པ་རེ་རེའི་ན་ཟུག་དང་འཁུན་སྒྲ་སྨྱུག་རྩེ་རུ་དྲངས་ཤིང་། རང་ཉིད་ཁོང་ཚོའི་སེམས་ཀྱི་ཁེན་ས་བྱས། ཁྱོད་ཀྱིས་སྙིང་དམར་པོའི་དར་ཆ་ཁ་བ་ཅན་གྱི་འདས་མ་ད་གསུམ་གྱི་ལས་དབང་ལ་གཏད་དེ། གཉའ་གནོན་དང་ཐུབ་ཚོད་ཀྱི་ཆག་འཇིག་ཁྲོད། རང་ཉིད་མི་བུ་གསོན་པོ་དག་གི་སྙིང་ཕུར་བྱས།
ཁྱོད་ཀྱིས་ཁ་གྲགས་མི་ཆོག་ས་ནས་ཀི་འདེབས་ཤིང་། མི་འགྲོ་མི་ཆོག་ས་རུ་རྟ་རྒྱུགས་ལ། མགོ་འབུར་མི་ཆོག་ས་ནས་ཁུ་ཚུར་སྒྲེང་བའི། རང་གི་ཡུལ་མི་ཚོའི་མཐའ་ནས་སྐོར་བཞིན། ཁ་བ་ཅན་གྱི་དཔའ་སྙིང་དམར་པོ་གཡུང་མོ་ལུག་ལྟར་འཚོ་བའི་རྫི་གླུ་རིང་མོ། ཡངས་བའི་རྩྭ་ཐང་དང་རི་ལུང་གི་ཉན་ས་ཡིན་ལ། བྲག་མཐོན་པོ་དང་རྫ་སྨུག་པོའི་ཁོང་གསེང་ལས་མཆེད་པའི། ཁྱེད་ཀྱི་གླུ་སྐད་ཀྱི་བྲག་ཅ། ངར་ངར་ཤིག་ཤིག་གིས་སྲིད་པའི་གངས་རྒན་གྱི་ར་བ་ལས་བརྒལ་ཏེ། ཁ་འབབ་བཞི་ཡི་བཞུར་རྒྱུན་དང་འགྲོགས་ནས། མི་ཡུལ་ལ་གཏུགས་བཤེར་དུ་ཆས་བྱུང་།
རེད་ཡ། ཁྱེད་ཀྱི་དཔའ་ལམ་ནི། སྙིང་དམར་པོའི་དཔའ་དར་ལྷབ་ལྷབ་གཡོ་ཞིང་། བྲང་ཁོག་གི་དཔའ་སྐད་ལྷབ་ལྷབ་གྲགས་འོང་ཚུལ་དེ་འོ།།
སེང་རྡོར་དྲ་བའི་ཁ་འབྱེད་ཨེ་ཐུབ་ཀི
ཡུའུ་ཤུལ་ལ་ས་འགུལ་བྱུང་འདུག ངས་ད་ལྟ་cctvཐད་གཏོང་ལ་བལྟས་མ་ཁད་ཡིན། ཕལ་ཆེར་གནས་ཚུལ་ཚབས་ཆེན་ཡིན་ས་རེད། ཨོྃ་མ་ཎི་པདྨེ་ཧཱུྃ་ཧྲཱི།