བཀྲ་ཤིས་དོན་འགྲུབ།
___ཁྲག་ཡིག་ཐེངས་གཉིས་པ་ཀློག་སྐབས་བྲིས་པ།
ཁྲག་མདོག་གི་དར་ཆེན་དགུང་ལ་འཕྱར་བའི
གནམ་བདེ་སྒོ་མོ་ཆེའི་འཇིགས་ཟིལ་དང
ཡུམ་བུ་བླ་སྒང་གི་དབུ་རྩེ་ནས
འཇའ་འོད་ཀྱི་ཀློང་དུ་ཟུག་པའི་དམུ་ཐག་གི་མཛེས་སྡུག
གནམ་ས་བླ་འོག་བསྒྱུར་བ་བཞིན
ནམ་ལངས་མུན་པ་རུབ་པ་བཞིན
བརྡབ་འཁྲུགས་དང་གདོང་ཐུག་ཤུགས་དྲག་ཁྲོད
ལྷ་མིན་འདྲེ་རུ་རྫུས་ནས་ཡོང་མྱོང་བའི་ཁྱོད་རང
སྐྲ་ལོ་རླུང་གིས་བསྐྱོད་བཞིན
བྲང་ཁོག་དགུང་ལ་གཏད་དེ
སྟག་སྒྲ་ཀླུ་ཁོང་གི་རུ་དར་འདྲ་བའི་དཔའ་བོའི་གླུ་སྐད་མཐོན་པོ
ཤྭ་འོད་ཀྱི་རླབས་དང་བསྡོང་ཞིང
རྒྱ་མཚོའི་ཀློང་འཁོར་ལ་བསྐྱིལ་ཏེ
མཚན་སྨག་གི་དངངས་འཚབ་ལ་བཏབ་པས
རི་ཚོགས་ཤིག་ཤིག་འགུལ་ཞིང་ཉི་ཟླ་མིག་ཆུས་བརླན
མདེའུ་སྐད་དང་མ་ཎིའི་སྐྱོ་དབྱངས་རྒྱུན་མི་ཆད་པའི་ཁྲོད
བརྩེ་དུངས་དང་ན་ཟུག་གིས་ནོན་པའི
ཁྱོད་ཀྱི་དབྱངས་རྟ་ཡ་ང་བ་དེས
མཐོ་སྒང་གི་ (Mona Lisa) ཚོའི་མཛའ་བརྩེ་གང་ཞིག
མཚོན་པར་བྱས་སོང་ལ
བེར་ནག་གོན་པའི་མི་བོ་ཆེ་སུ་ཞིག་གི་དཔའ་སྤོབས
རླུང་རྟར་བསྐྱོན་བྱུང་བས
ས་མཐོ་ས་མཐོ་ས་ཞིག་གི་ཁུད་ནས
རྩ་ཐང་གི་ཉིན་སྲིབ་བར་ནས
འབྲོག་མོ་ཞིག་གི་མིག་ཆུས་ཁྱོད་ལ་བསྒུག་འདུག
རི་བཙན་ས་བཙན་ས་ཞིག་གི་རྩེ་ནས
ཁ་བ་དང་རླུང་འཚུབ་རྒོད་ས་ནས
སྟག་ཤར་ཞིག་གི་ཞེ་འདང་གིས་ཁྱོད་རང་འཚོས་འདུག
(Mona Lisa) ནི་ཨི་ཋ་ལིའི་རི་མོ་བ་ (L.Davinci) ཡི་རི་མོའི་བརྩམས་ཆོས་གྲགས་ཅན་ཞིག་སྟེ། མི་གཞི་དང་ཀུན་སྤྱོད། ངང་གཤིས་དང་གཟུགས་བྱད་སོགས་ཀྱི་མཛེས་ཆོས་ཀུན་ཚང་གི་བུད་མེད་མཛངས་མའི་བསྡུས་གཟུགས་ཤིག་ཡིན་པར་བཤད།
རྩོམ་པ་པོར་་་་བཀའ་དྲིན་ཆེ་་་་་ཡི་རང་ཡོད།