ཨོ་རྒྱན་ཉི་མ།
དེང་སང་ཡོད་ཚད་ཀྱིས་རྩོད་བཞིན་པ་ནི་ཐོབ་ཐང་རེད། ཆབ་སྲིད་པས་ཐོབ་ཐང་རྩོད་རྒྱུ་ནི་སྤྱིར་བཏང་ཞིག་རེད། ཆབ་སྲིད་ཅེས་པ་དེ་སྒེར་རང་ཉིད་དང་། རང་གི་ཚོགས་པ། རང་གི་མི་རིགས། རང་གི་རྒྱལ་ཁབ་ཆེད་དུ་རང་ཁེ་གཞན་ཕམ་བྱ་བའི་ཐབས་ལམ་ཞིག་རེད། དེ་ཕྱིར་ཆབ་སྲིད་པས་ཐོབ་ཐང་རྩོད་པ་དེ་ལ་དམིགས་བསལ་ཧ་ལས་དགོས་དོན་མི་འདུག་མོད། དམ་པའི་ཆོས་ཞེས་པ་དེ་རང་གཞན་གཙོ་བོར་བྱ་དགོས་པ་དང་། རང་དོན་ལས་གཞན་དོན་གཙོ་ཆེར་བཟུང་བའི་ཐབས་ལམ་ཞིག་ཡིན་དུས་རྩ་ནས་ཐོབ་ཐང་རྩོད་པ་དེ་མཐའ་གཅིག་ཏུ་ནོར་བ་རེད། སྔོན་གྱི་དུས་སུ་ཆོས་ལུགས་དང་། ཆོས་བརྒྱུད་བྱུང་བ་དག་ཕུལ་བྱུང་གི་བློ་གྲོས་མངའ་བའི་སྐྱེས་བུ་ཚད་ལྡན་ཞིག་དང་། དེས་ལམ་དང་ལུགས་སྲོལ་བཏོད་པའི་ལྟ་གྲུབ་ཚད་ལྡན་དག་གི་རྗེས་འབྲངས་པ་དག་མ་འབད་ངང་གིས་བྱུང་བ་ཞིག་ལ་ཆོས་ལུགས་དང་། ཆོས་བརྒྱུད་ཅེས་པའི་མཚན་དེ་ཆགས་པ་དང་། དེ་ཕྱིར་ང་ལ་ཆོས་བརྒྱུད་དང་ཆོས་ལུགས་ཀྱི་ཐོབ་ཐང་སྤྲོད་དགོས་ཞེས་པའི་དམིགས་ཀྱིས་བཀར་ཏེ། སྲིད་གཞུང་དང་། རྒྱལ་ཁབ་གང་རུང་ལ་སྙན་ཞུ་ཕུལ་བ་དང་། ཐོབ་ཐང་རེ་བ་དེ་འདྲ་དགོས་ཀྱིན་མེད། དེ་ཕྱིར་དམ་པའི་ཆོས་ཀྱི་ཁྱད་ཆོས་རེད། ད་ནི་ཆོས་ལུགས་པ་དག་གིས་ཆབ་སྲིད་པས་གང་བྱས་ཆོས་པས་བྱ་དགོས་པའི་འདུན་པ་ཉི་ཚེ་བ་ཞིག་གིས་སྣེ་ཁྲིད་དེ་ཡོད་ཚད་ནས་ཡོད་ཚད་ལོག་ལམ་དུ་འགྲོ་སོང་། སྔོན་བྱོན་གྱི་བདག་ཅག་གི་སྟོན་པ་ནས་བཟུང་བཀའ་གདམ་པའི་དགེ་བའི་བཤེས་ཚོས་ཐོབ་དང་། གོ་ས་ཡོད་ཚད་སྤངས་ཏེ་ཆོས་ཀྱི་སྙིང་པོ་དེ་ཁོ་ན་འཚོལ་བའི་རྒྱུ་མཚན་གྱིས་ཆོས་དེ་ལ་དམིགས་བསལ་གྱི་རིན་ཐང་ཞིག་བསླེབས་པ་དང་། དེའི་རྗེས་སུ་འཇུག་པའི་སྐྱེ་བོ་ཡང་གྲངས་ཀྱིས་མི་ལང་པ་ཞིག་བྱུང་བ་རེད། རང་ལ་ཆོས་ཀྱི་ཉམས་ལེན་མེད་ན་ཆོས་བརྒྱུད་ཀྱི་ཐོབ་ཐང་རྩོད་ཀྱང་རྗེས་འབྲང་རྙེད་པ་ཁག་པོ་རེད། དེ་ཕྱིར་ཁྱོད་རང་ཆོས་བརྒྱུད་ཀྱི་བདག་པོ་ཉིད་དུ་བྱ་འདོད་ན་མཁས་པའི་ཚུལ་དགུས་ལེགས་པར་བརྒྱན་པའི་དོན་དམ་པའི་ཆོས་པ་ཞིག་བྱོས་དང་། ཐོབ་ཐང་རྩོད་དགོས་རྒྱུ་མ་རེད་ལ། ཐོབ་ཐང་རག་མ་སོང་བསྙམ་པའི་ངོ་གནོང་དགོས་དོན་མེད་པར་མ་ཟད། ཁྱེད་རང་གི་རྗེས་སུ་འཇུག་པའི་སྐྱེས་བུ་ཚད་ལྡན་དུ་མ་ཞིག་བསླེབ་ངེས་རེད། ཐོབ་ཐང་དང་ཁེ་དབང་རྩོད་ནས་ཆོས་བརྒྱུད་ཅེས་པའི་མིང་ཐོབ་ཀྱང་གོང་ན་བཞུགས་པའི་དབུ་འཛིན་ཚད་ལྡན་ཞིག་མེད་ན་ཆོས་བརྒྱུད་ཁེ་འཆེ་བ་ཚོས་གྱོང་རག་རྒྱུ་ཉག་གཅིག་རེད། དེ་ཕྱིར་བོད་ཀྱི་ཆོས་བརྒྱུད་ཆེན་པོ་ལྔའམ། གཡུང་དྲུང་བོན་དང་བཅས་པའི་དགེ་འདུན་པའི་འདུས་སྡེ་སྣེ་ཁྲིད་པ་ཚོས་རང་གི་བརྒྱུད་པ་འཛིན་སྟངས་དེ་སྔོན་གྱི་དམ་པ་གོང་མ་ཚོའི་བྱས་རྗེས་ལ་གྱེན་དུ་ལྟ་བ་ལས། དེང་སང་རིག་གསར་བ་ཚོས་རྩོད་འགྲན་གྱི་ལམ་ལོག་ལ་ཐུར་དུ་མི་གཟིགས་པར། སྒོ་གསུམ་ཆོས་དང་མཐུན་པ་ཞིག་དགོས་པ་ནི་ཆོས་བརྒྱུད་ལ་སྨན་པའི་བྱ་བ་གལ་ཆེན་ཞིག་རེད། ངས་མཐོང་ཚོད་ལ་གནའ་བོའི་དུས་ཆོས་བརྒྱུད་ཀྱི་བདག་པོ་ཞེས་མིང་དོན་མཚུངས་པ་ཚོས་དེང་སང་གང་ཡང་མི་འཇོན་པར་ཕྱོགས་གཞན་ཞིག་ནས་ཆོས་བརྒྱུད་བྱེ་བྲག་པ་ཞིག་འབྱུང་ལ་ཉེ་བར་མཐོང་། གནའ་བོའི་ཆོས་བརྒྱུད་འཛིན་པའི་གང་ཟག་རེ་ཟུང་གིས་ཆོས་བརྒྱུད་ཀྱི་མིང་དང་། གོ་ས་ཙམ་ལ་ཆགས་ཤིང་། ཐོབ་ཐང་དེས་ང་རྒྱལ་བ་ལས། སྔོན་གྱི་རྒྱལ་བ་གོང་མའི་ཕྱག་བཞེས་ཕྲིན་སྒྲུབ་ནས་བཟུང་། དབང་ལུང་ཁྲིད་རྒྱུན་ཡོད་དབང་གཞུའི་རྗེས་སུ་འགྲོ་ལྡོག་མཚུངས་པའི་སྔ་ལྟས་སུ། ནང་གི་བསམ་བློ་དང་། ཕྱིའི་སྤྱོད་པ། ངག་གི་སྨྲ་བརྗོད་ལས་རྟོགས་ཐུབ་པས། ཚང་མས་ཡང་འདུག་བྱ་རྒྱུ་ཡོད་ན་དམ་པའི་གོང་མའི་གཤེགས་ཤུལ་བསྙེགས་དགོས་པར་འདོད་དོ། །
ད་སྐྱུར་ཞོག་རྒྱལ་ངན་རྗེས་འབྲང་པ།
ཐོབ་ཐང་མི་རྩོད་ན་ཆོས་རྒྱུད་ཁག་གི་འཐུས་མི་རྣམས་ཕྱི་འཐེན་བྱོས།
ཁྱེད་རྒྱབ་སྐྱོར་ཡོད
སྤྲུལ་སྐུ་སང་གི་དུག་ཐོག་ཆར་པ་ཞིག་གསུངས་འདུག་གདའ། ཆོག་ཤེས་བསྟན་བཅོས་དེ་ཡང་ཧ་ལས་པ་ཞིག་འདུག མཛེ་འབི་ལིའི་བྱ་ཁྱུང་གི་སྒྲུབ་ཐབས་སྟོན་པ་མ་ཡིན་པས།
རྩ་བའི་ཆ་ནས་བསམ་ཚུལ་ལ་རྒྱབ་སྐྱོར་ཡོད།
ཡག་པོ་གསུངས་ཤག ཡིན་ཡང་ཆོས་བརྒྱུད་མང་ཞིག་ཆབ་སྲིད་ནང་ཞུགས་ཟིན་ཅིང་། དེ་ལྟར་ཞུགས་པར་ལ་ཡང་སྐྱོན་གང་ཡང་ཡོད་མ་རེད། དེར་བརྟེན་ཆོས་ལུགས་བྱེ་བྲག་འགའ་ཤས་ཞུགས་ལ་འགའ་ཤས་མ་ཞུགས་པ་ཡིན་ན། མ་འོངས་པར་རྙོག་དྲ་ཆེན་པོ་ཞིག་ཡོང་ངེས་ཡིན། དེ་བཞིན་ཆོས་ལུགས་རིས་མེད་ཀྱི་འཚོགས་འདུ་ནི་ཆབ་སྲིད་ཀྱི་ངོ་བོ་གང་ཡང་མ་ཡིན་ལ། དེར་ཁ་ཆེ་སོགས་ཞུགས་ཐུབ་ན་ཆོས་ལུགས་མཐུན་ལམ་སོགས་མང་བོར་ཕན་པ་ལས་སྐྱོན་གང་ཡང་མེད་སྙམ།
དངོས་གནས་ཡག་པོ་ཞེ་དྲགས་གསུངས་འདུག རྗེས་སུ་ཡིད་རངས་ཡོད། ཆོས་པས་ཐོབ་ཐང་རྩོད་དུས་ངན་མཐའ་ལ་ཐུག་ཡོད་པ་གསལ་པོ་ཆགས་ཚར་བ་རེད། དེ་དག་གི་ལུས་ལ་ཆོས་གོས་གྱོན་ཡོད་པ་ཙམ་གྱི་ཁྱད་ཆོས་ལས་མ་འདས། བཀྲིས་བདེ་ལེགས།
ཆོས་ལུགས་ཀྱི་ཐོབ་ཐང་ནི་ཆོས་ལུགས་འཕེལ་རྒྱས་ཀྱི་མཐུན་རྐྱེན་ཡིན་པས། ཐོབ་ཐང་མེད་ན་ཆོས་བརྒྱུད་འཕེལ་རྒྱས་ལ་ཚད་བཀག་འཐེབ་ངེས་རེད། བཅོན་ལྡན་འདས་ཀྱིས་ཀྱང་རང་ཉིད་དབེན་ས་འགྲིམ་རྒྱུའི་ཐོབ་ཐང་བརྩད་ཅིང་བླངས་པ་རེད། ད་ལྟའི་བོད་ཀྱི་གནས་སྟངས་འདིའི་ཐོག་ནས་ཀྱང་ཐོབ་ཐང་གཙོ་བོ་གང་ཞིག་དགོས་ཀྱི་ཡོད་པ་གསལ་པོར་མཚོན་ཡོད།
ངས་བལྟས་ན་ཐོབ་ཐང་བརྩད་ནས་རེགས་ཚར་པའི་རྗེས་སུ་ཐོབ་ཐང་དེར་འགན་འཁུར་དགོས་པ་ལས་བེད་སྤྱོད་ལོག་པར་མི་གཏོང་རྒྱུ་དེ་དོན་གྱི་སྙིང་པོ་རེད་སྙམ། འགའ་རེས་བླ་སྤྲུལ་གྱི་ཐོབ་ཐང་ཁྱེར་ནས་ཆོས་འགལ་གྱི་བྱ་སྤྱོད་སྤེལ་བཞིན་ཡོད་ཅིང་། ད་དུང་རང་ཉིད་མཐོན་པོའི་མཐོན་པོ་ཡིན་སྙམ་པའི་ཁེངས་དྲེགས་ཀྱིས་སྐད་ཆ་སྦོམ་པོའི་སྦོམ་པོ་འཆད་བཞིན་པ་འདི་ནི་དངོས་གནས་བསྟན་པའི་གཤེད་མ་རེད། དེ་བས་དེ་རིགས་ལ་ནམ་ཡང་ཐོབ་ཐང་སྤྲོད་མི་ཉན་ཞིང་སྤྲད་ཟིན་པ་ཡིན་ན་ཕྱིར་བསྡུ་བྱེད་དགོས་པ་རེད། དེ་བསྟན་པའི་ཕྱི་ཤུན་དང་ནང་ཁྲོལ་གཉིས་ཀ་སྐྱོབས་པའི་ཐབས་ལམ་ཞིག་རེད། མདོ་དོན་སྙིང་པོར། ཐོབ་ཐང་ཡོད་པ་དེ་ལོག་ལམ་དུ་མ་འཁྱེར། ཐོབ་ཐང་དགོས་ན་འགན་ཞིག་ཀྱང་ཡོད།
སྐུ་ཞབས་ཨོ་རྒྱན་ཉི་མ་ལགས་ཀྱིས་གསུངས་པ་དེ་གོ་རྒྱུ་ཆེན་པོ་འདུག།འོན་ཀྱང་རྩོམ་འདིའི་ནང་དུ་ཐོབ་ཐང་དང་དབང་ཆ།རང་དབང་དང་འོས་འགན་གཞན་རྒྱལ་བའི་ལུང་གི་བསྟན་པ་དང་དེའི་གནས་སའི་མི་རིགས་དང་སྐད་ཡིག་སོགས་ཀྱི་བར་གྱི་རྟེན་འབྲེལ་དེ་ར་འགྲེལ་བརྗོད་གསལ་བོར་ཞིག་གནང་འཐུབ་ན་བསམ་བློ་གསར་བ་ཞིག་འཁོར་རྒྱུ་ཡོད་ཤས་ཆེ།།
ལུང་རྟོགས་གཉིས་ཀྱི་བསྟན་པ་འཛིན་པ་ལ་ང་ལ་ཐོབ་ཐང་དགོས། གོ་ས་དགོས་ཞེས་རྩོད་ནས་རག་རྒྱུ་ཞིག་མ་ཡིན་པར། ལུང་གི་མགྲིན་པ་བརྒྱན་ཞིང་། རྟོགས་པས་ཐུགས་རྒྱུད་ཕྱུག་སོང་ན་གཟོད་དད་ལྡན་ཚོས་རང་འགུལ་གྱིས་དང་ལེན་བྱ་ངེས་པས། དེ་དུས་བསྟན་པ་འཛིན་སྐྱོང་སྤེལ་གསུམ་བྱ་ཐུབ་སོང་ན། རང་གཞན་གཉིས་ཀྱི་འདོད་དོན་ལེགས་ཕྱོགས་ནས་སྒྲུབ་ཐུབ་པ་ནི། སྔོན་གྱི་དམ་པ་གོང་མའི་རྣམ་ཐར་གཟིགས་དང་ཤེས་ངེས་རེད། དེ་མིན་རང་ལ་ལུང་དང་རྟོགས་པའི་བསྟན་པ་འཛིན་པའི་ཆ་རྐྱེན་མ་ཚང་བཞིན། ཆབ་སྲིད་ཀྱི་ཐབས་ལམ་དག་བེད་ཆོད་གཏོང་བསྡད་པ་ཡིན་ན་དམ་པའི་རིན་ཐང་གནོད་པར་མ་ཟད། ཆོས་ལུགས་ཀྱི་ཐོབ་ཐང་རྩོད་པ་ནི་མིང་དང་། གོ་ས། དངུལ་ཞིག་ལས་གཞན་བསམ་བློ་མེད་པར་ཐག་བཅད་དེ་སྨྲ་ཐུབ།
ཨོ་རྒྱན་ཉི་མ་མཆོག་ནས་ཧ་ཡག་པོ་གསུངས་འདུག རང་གི་རྣམ་དཔྱོད་ཀྱི་མཐུ་ལས་རིགས་ལམ་ལོ་རྒྱུས་དང་མཐུན་པའི་གཏམ་དེ་ལྟར་བཏོན་པ་ལ། མི་དགའ་མཁན་བྱུང་ན་བྱེད་རྒྱུ་གང་ཡང་མེད། ཐམས་ཅད་མགུ་མཁན་ཞིག་སུས་བྱེད་ཐུབ། སྟོན་པ་བཅོམ་ལྡན་འདས་ལྟ་བུའང་མུ་སྟེགས་པ་རྣམས་ཀྱིས། མི་སྡུག་པའི་མཚན་མ་དགུས་བརྒྱན་པ་ཞིག་ཏུ་མཐོང་བ་མ་ཡིན་ནམ།
ཆོས་ལུགས་ཀྱི་ཐོབ་ཐང་རྩོད་པ་ནི་མིང་དང་། གོ་ས། དངུལ་ཞིག་ལས་གཞན་བསམ་བློ་མེད་པར་ཐག་བཅད་དེ་སྨྲ་ཐུབ། ཟེར།
ཨོ་རྒྱན་ཉི་མ་འདི་དེང་སྤྲུལ་་དཀྱུས་མ་ཚོ་དང་མ་འདྲ་བའི་ཤེས་ཡོན་ཅན་ཞིག་ཡིན་ཚོད་ དེས་ན་ཁྱེད་ནས་ལྕམ་ཞིག་བཙལ་བ་ལ་ང་ཚོས་བསམ་ཤེས་ཅིག་བྱེད་དགོས་པ་འདྲ་ བསམ་དུག་ལས་གནག་པའི་རབ་བྱུང་ཁ་ཅིག་སྙིངལ་པོ་ཅི་ཡང་མི་འདུག་།
དགེ་བསྙེན་རྡོ་རྗེ་ལགས་ཁྱེད་རང་གི་ཨ་པོ་ཧོ་ལ་རྒྱབ་པ་མཐོང་གི་མེད་པ་འདྲ། ཨ་པོ་ཧོ་ཡིས་ཐུད་ཟ་བ་མཐོང་གི་ཡོད་ས་རེད། ད་ལྟ་ང་ཚོར་བོད་མི་རིགས་འདི་ཆགས་འཇིགས་ཀྱི་གནས་སུ་ལྷུང་ཡོད་པའི་སྐབས་གོང་༧ས་མཆོག་གཙེས་པའི་ཆོས་རྒྱུད་ཁག་གི་བླ་ཆེན་རྣམས་པས་བོད་ཀྱི་ཆོས་དང་རིགས་གཞུང་ལ་སྲུང་སྐྱོབས་བྱས་པ་མ་ཟད་འཛམ་གླིང་སྟེང་ནང་པ་ཡོངས་ལ་བློ་ཆེན་གྱི་བྱས་རྗེས་བཞག་ཡོད། དེ་ཚོར་མཁྱེན་པར་གནང་རོགས་ཞུ།
ཨ་པོ་ཧོ། མ་རེད། ཨ་པོ་ཧོར། རེད། ཡང་བསྐྱར་ཅིག་ཀློགས་དང་། ཟེར་མཁན་ཡང་ང་མ་རེད་དོ།
ཨ་ལེ།ཆོས་ལུགས་ཀྱི་ཐོབ་ཐང་ཟེར་པ་དེ་འདྲ་མི་དགོས་པ་ཅིག་ཡིན་ན།དེང་སང་ང་ཚོས་རྒྱ་ནག་གཞུང་ལ་ཆོས་ལུགས་རང་དབང་གི་ཐོབ་ཐང་དགོས་ཞེས་འབད་བརྩོན་ཇི་ཙམ་གནང་གི་འདུག།དེའང་དགོས་མཁོ་མེད་པ་རིགས་པ་མགོ་མཚུངས་རེད་ད།རང་གི་རྐུབ་ལ་རྩ་ཐུར་ཀྱང་མི་འགྲོ།གཞན་གྱི་རྐུབ་ནང་རྒྱུགས་པ་བཅུག་ཟེར་པ་དེ་རེད་ད།
ཆོས་བརྒྱུད་ཀྱི་ཐོབ་ཐང་སྤྲོད་ན་གཅིག་མཚུངས་སྤྲོད་དགོས་པ་རེད།མི་སྤྲོད་ན་གཅིག་མཚུངས་མི་སྤྲོད་དགོས་པ་རེད།༡ཇོ་ནང་པ་ཚོ་དེ་སྔ་ཀ་ཤེ་མེར་ནས་ལྷ་སར་ཡོང་བའི་ཁ་ཆེ་ཆོས་པ་བརྒྱ་ཕྲག་ཁ་ཤས་དང་རྒྱ་གར་ནང་ལྟོ་གོས་ཁོངས་མ་འཁྱོལ་བར་ཡེ་ཤུས་ཆོས་ཚོགས་སུ་ཞུགས་པ་ཁ་ཤས།དེང་སང་མིང་ཙམ་ལས་མེད་པའི་བུ་ལུགས་དང་བོ་དོང་ལུགས་སོགས་དང་མི་འདྲ་བར།བོད་རང་ས་ནས་བྱུང་བའི་ལྟ་གྲུབ་རང་རྐང་ཚུགས་པ་ཅིག་ཡིན་པ་དགེ་ལུགས་པའི་མཁས་གྲུབ་མང་པོས་ཇོ་ནང་གི་ལྟ་བ་ངན་པར་སྒྲུབ་སྐབས་གསུངས་ཡོད་ཅིང་།བོད་ནང་ལྷ་སྡེ་མི་སྡེ་ཡང་རྫོང་ཁག་མང་པོ་ཡོད་པ།ཆོས་ཉམས་ལེན་གྱི་ཆ་ནས་ཀྱང་དགེ་ལུགས་པ་སོགས་ལས་ཡག་ག་ཡིན་པ་༧རྒྱལ་བ་རིན་པོ་ཆེས་རིས་མེད་ཆོས་ཚོགས་སྟེང་གསུངས་སོང་ང་།།
༢མང་པོ་ཅིག་གིས་བཙན་བྱོལ་ནང་ཇོ་ནང་པར་གྲངས་ཀ་ཉུང་མདོག་བསྟན་གྱི་འདུག་མོད།བཙན་བྱོལ་ནང་གི་ཆོལ་ཁ་ཆོས་བརྒྱུད་ཀྱི་སྤྱི་འཐུས་ཚོ་གཞིས་ལུས་མི་མང་གི་ངོ་ཚབ་ཡིན་པ་མ་གཏོགས།འོས་ཤོག་བརྒྱ་ཁ་ལོངས་པས་སྤྱི་འཐུས་ཆགས་བཞིན་པའི་ཆོས་བརྒྱུད་མང་པོ་ཡོད་ལ།ཆོལ་ཁའི་ཆ་ནས་ཀྱང་མདོ་སྨད་ལྟ་བུར་མི་ཉུང་དྲག་སྟེ་སྤྱི་འཐུས་ཀྱི་གྲངས་ཚད་དེར་ཆོལ་ཁ་གཞན་གྱི་ནང་བསམ་ཚུལ་ཤུགས་ཆེ་སླེབས་བཞིན་པ་རེད།དེ་འདྲར་བརྟེན་ཇོ་ནང་པར་སྤྱི་འཐུས་དང་ཆོས་བརྒྱུད་ཐོབ་ཐང་ངེས་པར་སྤྲོད་འོས་པ་ཅིག་རེད།
༣ད་ཆ་ང་ཚོས་རྒྱ་ནག་གོང་བྲན་གཞུང་ལ་རང་སྐྱོང་གི་ཐོབ་ཐང་རྩོད་པ་དང་།རྒྱལ་སྤྱིའི་སྟེང་རྒྱ་ནག་གིས་ང་ཚོར་དབྱེ་འབྱེད་དང་མིའི་ཐོབ་ཐང་རྡོག་རོལ།ཆོས་དད་རང་དབང་བཅས་པ་མི་སྤྲོད་པ་སྒྲོག་བཞིན་པའི་སྐབས་འདིར།ང་ཚོས་ནང་ཁུལ་དུ་དབང་ཆ་ཡོད་མེད་དང་གྲངས་ཀ་མང་ཉུང་ལ་ལྟོས་ཏེ་ཁྱད་གསོད་དང་གཉའ་གནོན་གཏོང་རེས་བྱེད་པ་ནི།དོན་དམ་གྱི་བོད་མིའི་མཐུན་སྒྲིལ་རྡོག་རོལ་བཏང་སྟེ་རྒྱ་དམར་གྱི་མངོན་འདོད་སྒྲུབ་པ་ཟུར་བལྟས་ལེབ་མཐོང་རེད།
༤དེ་སྔའི་ཆོས་རིག་བཀའ་བློན་ལྟ་བུ་གནད་ཡོད་ཚོས་ཇོ་ནང་ལ་ཐོབ་ཐང་དགོས་ན་བོད་གཞུང་ལ་བཤད་ནས་ཁྱོ་མེད་པ་རེད།དེ་ལས་ཇོ་ནང་གིས་བཤད་སྒྲུབ་ལག་རྗེས་བཞག་སྟེ་ཧ་ལས་དགོས་པ་ཅིག་གནང་ཐུབ་ན་དཔང་རྟགས་ཡོད་པ་འདྲ་བོ་ཅིག་གསུངས་སོང་མོད།དེང་སང་གྲུབ་མཐའ་རིས་མེད་ནང་དེ་འདྲ་གནང་ཐུབ་པ་དུས་དབང་གིས་དཀའ་མོ་རེད་འདུག་ག།ཆེ་ས་ནས་བཙན་བྱོལ་དུ་འབྱོར་ནས་བཟུང་སྟེ་བླ་ཆེན་ཕན་ཚུན་བར་ཚུན་ཆད་ལ་རྙོག་བྲ་ཇི་ཙམ་བྱུང་མྱོང་བ་དང་ཇི་ཙམ་འཁྲབ་ཡོད་པ་གཟུར་གནས་ཚོས་ཟུར་བལྟས་ལེབ་མཐོང་ཡིན་པ།ནུབ་ཕྱོགས་ཡུལ་ཁག་ནང་བོད་ཀྱི་ཆོས་སྤེལ་པ་མང་པོ་ཅིག་གིས་བཙན་གཡེམ་འཕྲོག་བཅོམ་དང་མགོ་བསྐོར་སོགས་ལས་ཀ་སྡུག་ཅག་སྣ་ཚོགས་བྱས་པ།ནུབ་ཕྱོགས་པའི་གསར་ལམ་ཆེ་ཤོས་ཁག་ཏུ་འཐོན་ཏེ་རྒྱ་ནག་གཞུང་གིས་བེད་སྤྱོད་ཇི་ཙམ་གཏོང་གི་འདུག།དགེ་ལུགས་པའི་གདན་ས་ཁག་ཏུ་ནི་མི་གསོད་རེས་གཏོང་བ་དང་དགེ་ཕྲུག་ལ་བཙན་གཡེམ་གཏོང་བ་སོགས་ཇི་ཙམ་ཡོང་གི་འདུག།སོ་སོ་དེ་འདྲ་ཡིན་བཞིན་དུ་ཇོ་ནང་པར་ཐོབ་ཐང་དགོས་ན་བཤད་སྒྲུབ་འགྲན་ཟླ་བྲལ་བ་ཡོང་དགོས་མདོག་སྟོན་པ་ནི་ཧམ་བཤད་དང་དབང་ཡོད་རེད་ད།
༥ད་སྔ་ཚུན་ཇོ་ནང་བའི་ཆོས་ཁོ་ནར་ཡིད་ཆེས་ཀྱིས་མི་ཚེ་སྐྱེལ་མཁན་གྱི་ཛམ་ཐང་རྫོང་ཁོངས་གཅིག་པུར་བོད་དོན་ཆེད་སྲོག་གཏོང་མཁན་དང་རྒྱ་དམར་ལ་ངོ་རྒོལ་བྱེད་མཁན།རང་ལུས་བསྲེགས་མཁན་མང་པོ་བྱུང་སོང་བས།བཙན་བྱོལ་བོད་མི་ཚོ་དྲང་བདེན་དང་འདྲ་མཉམ།ལས་རྒྱུ་འབྲས་ལ་ཡིད་ཆེས་ཡོད་པ་ཡིན་ན་ཇོ་ནང་པ་ཚོར་སྤྱི་འགྲོས་ཀྱི་ཐོབ་འོས་པའི་ཐོབ་ཐང་དེ་སྤྲོད་དགོས་འདུག།འོན་ཀྱང་།ད་རུང་མུ་མཐུད་ཁ་ཡར་དཀྱུ་མར་དཀྱུ་བྱས་ཏེ་བོད་ནང་གནས་ཚུལ་ཛ་དྲག་དང་རྒྱ་མིའི་མངོན་འདོད་སྒྲུབ་པ།ནང་ཁུལ་དཀྲུག་ཤིང་སོགས་འབྲེལ་མེད་ཀྱི་ཞྭ་ནག་པོ་མགོ་ལ་གཡོག་སྟེ་འབུར་འཇོམས་བྱེད་རྩིས་བྱས་ན།དབང་ཆ་ཡོད་མེད་ཙམ་དང་ཆེ་ཆུང་ཙམ་མ་གཏོགས་བཙན་བྱོལ་སྤྱི་ཚོགས་འདིའང་དོན་དངོས་སུ་རྒྱ་དམར་དང་གཅིག་པ་ཡིན་པའི་དཔང་རྟགས་རེད།
ཆོས་བརྒྱུད་དང་མན་ངག་རྒྱུན་འཁྱོངས་བྱ་དྲན་ན་རང་གིས་ཚུལ་བཞིན་ཉམས་སུ་བླངས། གཞན་ལ་ཚུལ་བཞིན་གདམ་པ་ལ་བརྟེན་ནས་བསྟན་པ་རྒྱས་དགོས་པ་ལས། ཆོས་བརྒྱུད་ཀྱི་མིང་དང་། རྐུབ་སྟེགས་ཀྱི་རྩོད་རྒྱབ་པ་ནི། ཆོས་ལུགས་ཀྱི་མིང་འཁུར་ཡང་ཆབ་སྲིད་ཁོག་ལ་ཞུགས་པའི་དན་རྟགས་རེད། རྒྱ་ནག་གཞུང་གིས་བོད་ཀྱི་རིག་གཞུང་རྩ་མེད་དུ་གཏོང་དྲན་ན་ཡང་། བོད་པ་ཚོས་སྒོ་གསུམ་ཆོས་དང་མཐུན་པའི་སྤྱོད་ལམ་གྱིས་གནས་པ་དང་། སྲོལ་རྒྱུན་གྱི་རིག་གཞུང་གི་འགག་རྩ་བཟུང་སྟེ། གནས་ཐུབ་སོང་ན་བསྟན་པ་དང་། རིག་གཞུང་ལ་གོད་ཆག་འབྱུང་མི་ཐུབ་པ་དེ་ཕར་བལྟས་ཚུར་གཟིགས་རེད། ངས་བལྟས་ཚོད་ལ་ཕྱིའི་རྐྱེན་གཅིག་པུ་མ་ཡིན་པར་བོད་པ་ཚོ་རང་ངོས་ནས་ཀྱང་འཇོན་གྱི་མེད་པའི་ཚོར་སྣང་ཞིག་རྟག་པར་སླེབ་ཀྱི་འདུག་ལ། ཆོས་པ་ཚོས་སློབ་སྦྱོང་བྱེད་དགོས་ཟེར་མཁན་ལས། སྡོམ་དང་། དམ་ཚིག་སྲུང་དགོས་ཟེར་མཁན་དང་། ལས་འབྲས་སྲུང་དགོས་ཟེར་མཁན་ཆེས་ཤིན་ཏུ་ཉུང་ཉུང་རེད། བོད་པ་ཚོས་བོད་དང་། བོད་ཀྱི་རིག་གཞུང་ཞེས་ཁ་ནས་བཤད་མཁན་མང་པོ་འདུག་སྟེ། བོད་ཀྱི་ནང་ཆོས་ཕར་བཞག་བོད་སྐད་ང་། བོད་ཡིག་ཀློག་མི་ཤེས་མཁན་མང་པོ་རེད། བོད་སྐད་དང་། བོད་ཡིག་ལ་དོ་སྣང་མེད་མཁན་དེ་གཙོ་བོ་གོང་ན་སྡོད་མཁན་གྱི་སྐུ་དྲག་དང་། སྐུ་ངོ་ཚོའི་བུ་ཕྲུག་ཚོ་རེད། ཁོ་ཚོའི་ཁ་ནས་བཤད་ཚད་བོད་དོན་ཡིན་ཡང་། ལག་ལེན་ལ་ཐུག་དུས་བོད་ཡིག་ཀྱང་རང་གི་ཕྲུ་གུ་ཚོར་སྦྱང་བའི་བརྩོན་པ་བྱེད་ཀྱིན་མེད་ན། བོད་དོན་ཞེས་པའི་གཡེར་གྲགས་ཅན་དེ་ཁ་ཙམ་ལས་དོན་ལ་མེད་པའི་སྒྲ་དབྱངས་ཤིག་རེད།
ཨོ་རྒྱན་ཉི་མ་ལ་འདི་ནི་དགོས་ངེས་ཀྱིས་དཔྱད་ཞིབ་ཞིག་གནང་འདུག་ན་ཐུགས་རྗེ་ཆེ། བཙན་བྱོལ་བའི་ནང་ད་ཆ་ཆོས་ལུགས་ཀྱིས་མི་སྣ་ཆབ་སྲིད་སྟེང་ཡོང་རྒྱུ་མང་བ་སྐྱོན་ཡིན་ལ། ད་ཆ་ཆོས་ལུགས་ཀྱིས་སྤྱི་མཐུས་དེ་ཚོ་སྒོ་རྒྱབ་དགོས་པའི་དུས་ལ་འབབས་ཡོད་འདུག་ལ། གྲོས་ཚོགས་སྟེང་ངེས་པར་གྲོས་ཆོད་ལམ་ནས་བཅའ་ཁྲིམས་ནང་འཁོད་པའི་ཆོས་ལུགས་སྤྱི་མཐུས་ཡོང་ཁུངས་རྣམས་གྲོས་ཚོགས་ལམ་ནས་ཕྱིར་འཐེན་བྱ་དགོས་པ་ཞིག་ཡིན་ནོ།
གླིང་དཀར་ལྷ་རྗེས་ལགས་ཁྱེད་རང་གི་སྐད་ཆ་བཤད་སྟངས་དེ་ལ་གཅིག་ལྟས་པ་ཡིན་ན་རྒྱ་མའི་གུང་ཁྲན་གྱི་ལྟ་བ་འདྲ་པོ་ཡོད་ས་རེད། དེ་ཙམ་དུ་མ་ཟད་ཆོས་དུག་ལ་བརྩི་མཁན་གྱི་བླུན་རྨོངས་ཅན་གྱི་གང་ཟག་ཞིག་ཡིན་པ་ཐེ་ཚེམས་མི་འདུག ཆོས་ལུགས་ཀྱི་སྤྱི་འཐུས་དེར་གལ་ཆེར་ཡིན་མིན་སྐོར་གོང་༧ས་མཆོག་དང་ཟམ་གདོང་རིན་པོ་ཆེ་གཉིས་ཀྱི་བཀའ་སློབ་ལ་ཞིབ་འཇུག་ཡག་པོ་བྱས་ན་ཧ་གོ་ཡིས་རེད། གཏམ་མི་ཡི་བཤད་རྒྱུ་རང་གི་བཤད།
ལྕགས་ཀམ་པའི་འཇུག་རྒྱུ་ལག་པས་འཇུག རྒྱ་གུང་ཁྲན་བཤད་རྒྱུ་ཁྱེད་རང་བཤད། ཧཧཧཧཧཧ་་་་་་་་་་་་་
སློབ་དཔོན་དབྱིག་གཉེན་གྱི་མངོན་པ་མཛོད་ལས།
སྟོན་པའི་དམ་ཆོས་རྣམ་གཉིས་ཏེ། །
ལུང་དང་རྟོགས་པའི་བདག་ཉིད་དོ། །
དེ་འཛིན་བྱེད་དང་སྨྲ་བྱེད་པ། །
སྒྲུབ་པར་བྱེད་པ་ཁོ་ནའོ། །
ཞེས་གསུངས་པ་ལྟར། ལུང་གི་བསྟན་པ་དངུལ་ལོར་དང་འདྲ། རྟོགས་པའི་བསྟན་པ་ནི། དངུལ་ལོར་དེའི་རྒྱབ་རྟེན་གསེར་དང་འདྲའོ། །
རྩ་བའི་ཆ་ནས་བཤད་ན་ཆོས་བརྒྱུད་ནི་བཅིང་ཐག་ཡིན་ལ། སྤྱི་ཚོགས་ཡར་རྒྱས་ཀྱི་བཀག་རྡོ་དེ་བས་ཡིན། འོན་ཀྱང་དེང་སང་ཁ་དང་གྲོད་པ་ཆོས་བརྒྱུད་ལ་རྟེན་པའི་ག་གེ་མོ་ཞིག་ལ་མཚོན་ན། མེད་དུ་མི་རུང་བ་ནི་ཆོས་བརྒྱུད་དེ་ཡིན་ཏེ། དེ་མེད་ན་ཁོ་ཚོའི་འཚོ་ཐབས་ཀྱི་རྨང་གཞི་མེད་ལ། དད་ལྡན་ཚོ་མགོ་རྨོང་པར་བྱེད་པའི་ཐབས་ལམ་ཡང་དེ་བས་མེད། དེར་སོང་ཐོབ་ཐང་མ་རྩད་ཐབས་མེད་རེད་ལ། གཡོ་རྒྱུ་མི་འཁྲབ་ཡང་དེ་བས་ཐབས་མེད་རེད།
ལྟ་ལོག་པ་ལགས་ཆོས་བརྒྱུད་སྤྱི་འཐུས་མི་དགོས་ཟེརན་ཁྱེད་རང་གི་རྒྱ་མའི་འདོད་དོན་འགྲུབ་པ་དང་ཁྱེད་རང་ལ་དགོས་ཡ་དེ་གར་ཡིན་པ་འདྲ། ད་ལྟས་སྐབས་སུ་ཆོས་ལུགས་སྤྱི་འཐུས་གལ་ཆེར་ཡིན་པ་གོང་༧ས་མཆོག་དང་ཟམ་གདོང་རིན་པོ་ཆེ་རྣམ་གཉིས་ཀྱི་བཀའ་སློབ་ལ་ཞིབ་འཇུག་ཡག་པོ་བྱས་ན་ཧ་གོ་གི་རེད་མ་གཏོག བླུན་པོ་ཆུ་སྣ་ག་འཁྲིད་ཟེར་བའི་དཔེ་ལྟར་ད་འདྲ་རང་མ་བྱས་ན་ཡག་གི་རེད་ལགས།