སྤོབས་པ་མཐའ་ཡས།
ངོ་རྒོལ་ལངས་པའི་ཕྱི་ཉིན་ནས་རྡ་རམ་ས་ལའི་ཚོགས་པ་ཚོས་བོད་མི་དགུ་བཅུ་ལྷག་ཅིག་བསད་སོང་ཟེར་ནས་བཞི་བཅུ་ཙམ་ཞིག་གི་གནས་ཡུལ་དང་མིང་ཐོ་ཚུན་གསལ་བསྒྲགས་བྱས་སོང་། དེ་ནས་མི་རིང་བའི་དུས་ནས་པེ་ཅིང་གི་ཕྱོགས་ནས་དེ་བདེན་པ་མིན་སྐོར་དང་བསད་སོང་བའི་མིང་ཐོའི་ཁོངས་མི་དེ་དག་ལ་ལ་ནི་ད་དུང་གསོན་པོ་བདེར་གནས་ཡིན་ཚུལ་དང་། ལ་ལ་ནི་དེ་ལྟའི་མི་ཞིག་གཏན་ནས་མེད་ཚུལ། ལ་ལ་ནི་མིང་ཙམ་ལས་གསལ་བོ་མེད་པ་སོགས་ལན་འདེབས་བྱས་སོང་། དེ་ལ་རྡ་རམ་ས་ལའི་ཕྱོགས་ནས་གསལ་ཁ་བཏོན་པ་སོགས་བྱེད་ཐུབ་མ་སོང་། དེ་ནས་རིམ་བཞིན་ཡུལ་དེ་ནས་མི་དེ་དང་དེ་ཙམ་བསད་སོང་ཟེར་ནས་བགྲངས་བཞིན་ད་ལྟ་ཉིས་བརྒྱ་ལྷག་ཅིག་ལོངས་ཚར་འདུག པེ་ཅིང་ཕྱོགས་ནས་ཟིང་འཁྲུགས་པས་ལྷ་ས་ནས་མི་ཉི་ཤུ་ཡས་མས་ཤིག་བསད་སོང་ཟེར་བ་དང་གཞན་ཡང་མཚོ་སྔོན་དང་དཀར་མཛེས་སོགས་ནས་ཀྱང་ཕན་ཚུན་རེ་ཟུང་ཞིག་བསད་པ་ཙམ་གསལ་བསྒྲགས་བྱས་ཡོད།
རྡ་རམ་ས་ལའི་ཕྱོགས་ནས་བོད་ཁུལ་གྱི་ས་ཆ་གང་ཞིག་ཏུ་ཟིང་ཆ་ལངས་ཚུལ་དང་ལྷན་དུ་མི་འདི་དང་འདི་བསད་འདུག་ཟེར་ཡང་དེ་དག་གི་འབྱུང་ཁུངས་རུས་མིང་སོགས་གསལ་ཁ་ཡོད་པ་ཧ་ཅང་ཉུང་། བོད་ནང་དུ་གཞུང་གི་བཀག་སྡོམ་དམ་བསྒྲགས་དེ་ཙམ་ཡོད་ཐོག་འབྲེལ་གཏུག་གི་ཆ་རྐྱེན་དེ་ཙམ་མི་བཟང་སྟབས་གནས་ཚུལ་ངོ་མ་མགྱོག་མྱུར་དུ་གོ་བ་དཀའ་ཞིང་གནས་ཚུལ་ལོག་པར་གོ་བ་ཡང་སྲིད། ཡིན་ན་ཡང་རིམ་གྱིས་གནས་ཚུལ་ཇེ་གསལ་དུ་འགྱུར་ངེས་ཡིན་པས་རིམ་བཞིན་ཁ་གསལ་དུ་གཏོང་འོས་ཀྱང་དེ་ནས་སྔགས་འདྲ་ཞིག་བགྲང་ཚར་བ་བཞིན་བསྐྱར་ཞིབ་ཀྱིས་ལམ་ནས་མི་སུ་དང་སུ་བསད། སུ་དང་སུ་རྨས། སུ་དང་སུ་ཞིག་བཙོན་དུ་ཚུད་པ་སོགས་ཐེང་དང་པོའི་ཁྱབ་བསྒྲགས་ལས་ལྷག་ཅིག་གང་ཡང་གོ་རྒྱུ་མི་འདུག
པེ་ཅིང་གི་ཕྱོགས་ནས་ཀྱང་ངོ་རྒོལ་ལངས་མ་ཐག་ནས་ཏཱ་ལས་བཀོད་སྒྲིག་དང་ཇུས་འགོད་ཞིབ་ཚགས་བྱས་སོང་ཟེར་ནས་གནས་ཚུལ་མ་བྱུང་སྔོན་ནས་གོ་ཡོད་པ་ལྟ་བུར་ཁྱབ་བསྒྲགས་བྱས་ཀྱང་རིམ་གྱི་དེའི་སྐོར་ལ་ཁུངས་སྐྱེལ་སོགས་ཚད་ལྡན་གང་ཡང་མེད་པས་ཕྱོགས་གཉིས་པོ་ལ་མཚུངས་པའི་ཁྱད་ཆོས་ལྡན།
རྡ་རམ་ས་ལའི་ཚོགས་པ་ཚོའི་ངོས་ནས་དང་པོར་ཁྱབ་བསྒྲགས་བྱས་པ་ལས་ཁ་གྲངས་ཉུང་དུ་གྱུར་སོང་ན་གཉའ་ཞུམ་པའི་ཚོར་སྣང་ཞིག་གིས་སྔ་མ་གང་བརྗོད་དེ་མུ་མཐུད་ནས་ཨུ་ཚུགས་ཀྱིས་བརྗོད་བཞིན་པ་ཡིན་ནམ། དང་པོར་ཁོང་ཁྲོའི་དབང་གིས་སྒྲོ་འདོགས་དང་འབྲེལ་ནས་མི་མང་པོ་ཞིག་བསད་སོང་ཚུལ་ཁྱབ་བསྒྲགས་བྱས་ནས་ད་དོན་དངོས་སུ་ཁ་གྲངས་དེ་ལས་ཉུང་བ་ཞིག་ལས་བསད་མེད་ན་དེས་རྡ་རམ་ས་ལའི་ཚོགས་པ་ཚོར་ཡིད་ཆེས་བརླགས་རྐྱེན་དུ་འགྱུར་བའི་ཞེད་སྣང་ཡོད་པ་འདྲ་ཨེ་ཡིན། ཡང་མིན་ན་འདི་དང་དེ་བྱས་ཀྱི་ཁྲལ་སོད་ཙམ་གྱི་ལས་ཀ་འཁྱོལ་ཙམ་ལས་ཡུན་རིང་པོ་དང་ཞིབ་ནན་ཀྱི་ངལ་བ་བརྟེན་འདོད་མེད་པ་ཡིན་ནམ་གང་ཡིན་མ་ཤེས།
སྤྱིར་བཏང་རྒྱལ་ཁབ་བམ་མི་རིགས། ཚོགས་སྡེ་དང་ཆོས་ལུགས་སོགས་སྤྱིའི་རང་དབང་གི་ཕྱིར་མི་གསོད་པ་དང་རང་ཉིད་ཤི་བ་གང་ཡིན་ཡང་ལེགས་ཉེས་གཉིས་གང་རུང་གི་མཐར་གནས་པའི་ལས་ཚབ་པོ་ཆེ་ཞིག་ཡིན། སྲོག་ལས་གཅེས་པ་ཞིག་སུ་ལ་ཡང་མེད་སྟབས་དེ་ཉིད་མི་རིགས་དང་རྒྱལ་ཁབ་ཀྱི་ཆེད་དུ་འདོར་ཕོད་པ་ནི་ལེགས་ཉེས་གཉིས་གང་རུང་གི་མིག་དཔེར་འགྱུར་རྒྱུར་གོར་མ་ཆག་སྟབས་དོ་སྣང་དང་ཞིབ་འཇུག་བྱ་དགོས་པའི་ལས་ཤིག་ཡིན་པས། འདི་དང་དེ་བསད་སོང་ཟེར་བའི་རྩིས་བགྲང་ཙམ་དུ་མ་ལུས་པར་ཡུལ་དུས་རུས་མིང་བཅས་གནས་ཚུལ་ཁ་གསལ་ཁུངས་འཁྱོལ་རང་གཞན་ཡིད་རྟོས་པའི་གནས་སུ་གྱུར་པ་རེ་འཚོལ་བསྡུ་བྱས་ནས་གངས་ཅན་པའི་ལོ་རྒྱུས་ཀྱི་ནང་དུ་གནས་པར་བྱ་རྒྱུ་དེ་གལ་ཆེ་བར་སེམས།
མི་མང་པོ་ཞིག་བསད་སོང་བའི་ཁྱབ་བསྒྲགས་བྱེད་ཐུབ་རྒྱུ་དེ་གལ་ཆེན་དུ་འཛིན་མཁན་ཡོད་ངེས་རེད།
དཔེར་ན། བོད་དུ་ངོ་རྒོལ་ལངས་ྭཔའི་ཕྱི་ཉིན་དེ་ག་རང་ལ་ངས་ངས་གྲོགས་པོ་ཞིག་ལ་གླེང་མོལ་བགྱིས་པར་ངས་ཁོ་ལ་རང་ཕྱོགས་ནས་ནམ་ཡིན་ཡང་འདི་དང་དེ་བྱུང་གི་གནས་ཚུལ་བདེན་པར་སྨྲ་ཕོད་རྒྱུ་དེ་གལ་ཆེན་པོ་རེད། གལ་སྲིད་རྫུན་སྨྲས་ན་གནས་སྐབས་རིང་མི་རེ་ཟུང་ཧ་ལས་པར་བྱེད་པའམ་གསར་འགོད་པའི་དོ་སྣང་འགུགས་ཐུབ་ངེས་ཀྱང་ཕུགས་སུ་རང་རེ་ལ་ཡིད་རྟོན་བརླགས་པའི་རྒྱུར་འགྱུར་བ་གདོན་མི་ཟ་བས་ནམ་ཡིན་ཡང་ཁ་གསལ་ཁུངས་འཁྱོལ་གྱི་འགན་ཞིག་འཁུར་རྒྱུ་དེ་གལ་ཆེ་ཞེས་བརྗོད་པ་ཡིན། དེར་ཁོང་གིས་ཀྱང་ཧ་ཅང་བདེན་པ་རེད་ཅེས་བརྗོད་བྱུང་། དེ་མ་ཐག་ཏུ་ཕྱི་མི་ཞིག་སླེབས་ནས་སེམས་ཁུར་ཆེ་མདོག་གིས། བོད་དུ་གནས་ཚུལ་བྱུང་འདུག་ཟེར་གྱིན་འདུག བོད་མི་ག་ཚོད་བསད་ཡོད་རྒྱུ་རེད་ཟེར། ངའི་གྲོགས་པོས་གནས་ཚུལ་ཁ་གསལ་གོ་མདོག་གིས། བདུན་བརྒྱ་ཙམ་ཞིག་བསད་ཡོད་ངེས་རེད་ཟེར། དེར་ཁོས་ང་ལ་བལྟས་ནས་དགོད་ཙམ་བྱེད་ཅིང་། རྫུན་ཏོག་ཙམ་རེ་བཤད་དགོས་རྒྱུ་རེད། པེ་ཅིང་ཕྱོགས་ནས་ཀྱང་ག་ཚོད་སྒྲོ་འདོགས་བྱེད་ཅིང་འདུག་ཟེར། དོན་དངོས་སུ་རྫུན་དེ་ཁོང་ཁྲོའི་དབང་གིས་སྨྲས་པ་ཙམ་ལས་རང་ཕྱོགས་ཀྱི་རྩ་དོན་ལ་ཕན་པ་ཞིག་མིན། ཟམ་གདོང་གཞུང་གི་རྩ་བའི་རྩ་དོན་ཡང་བདེན་པ་དང་། འཚེ་བ་མེད་པ། ཡང་དག་པའི་དམངས་གཙོ་རིང་ལུགས་བཅས་ཡིན་པར་ཞལ་གྱིས་བཞེས་པ་མ་ཡིན་ནམ།
བོད་ཀྱི་དུས་བབ་ཚགས་ཤོག་གཅིག་གི་སྟེང་ལ་ད་ལོའི་ངོ་རྒོལ་སྐོར་ཀྱི་དེབ་ཅིག་ཕྱོགས་བསྒྲིགས་བྱ་རྒྱུ་ཡིན་པའི་ཁྱབ་བསྒྲགས་བྱུང་ཡང་ད་བར་འདོན་སྤེལ་བྱས་པ་མཐོང་རྒྱུ་མི་འདུག འདིར་ངས་བོད་གཞུང་དང་ཚོགས་པ་ཁག་ལ་རྒྱབ་གཏད་ཀྱིས་སྐྱོན་འདོགས་བྱེད་འདོད་པས་མིན་ཡང་དངོས་གནས་གླེང་དགོས་པའི་དཔའ་བོ་དཔའ་མོ་མང་པོ་ཞིག་གི་མཛད་རྗེས་ཀྱང་དང་མཚན་སྙན་ཡང་རྫུན་གྱི་ཁྱབ་བསྒྲགས་དེ་ཚོས་ཁེབས་ནས་ཉིན་ཞིག་དེ་དག་གི་མཛད་རྗེས་ཀྱང་མི་གསལ་འགྱུར་ཉེན་འདུག པེ་ཅིང་གི་ཕྱོགས་སམ་རྡ་རམ་ས་ལའི་ཕྱོགས་གང་ནས་རྫུན་སྨྲས་ཀྱང་ང་ཚོས་དེའི་རྫུན་སྐུབ་རྡོལ་དགོས་ལ་དོན་དངོས་ཀྱི་དཔའ་བོ་དཔའ་མོ་དེ་དག་དང་དེ་དག་གི་མཛད་རྗེས་ཟིན་དགོས། བུ་རབས་ཚ་རྒྱུད་ལ་ངོ་སྤྲོད་བྱ་དགོས། གངས་ཅན་པའི་རིགས་རྒྱུ་ནམ་གནས་བར་སེམས་ཁོངས་སུ་གནས་པར་བྱ་དགོས།
བརྒྱ་བཀྲོངས་སོང་དང་སྟོང་བཀྲོང་སོང་ཟེར་བའི་རྩིས་བགྲངས་ཙམ་དུ་ལུས་ན་རང་གཞན་སུ་ཡིན་ཡང་ཡིད་རྟོན་འོས་དཀའ་བས་ན་ངས་ཁྱེད་ཚོར་རེ་བ་གཅིག་ཞུ་བཞིན་པ་ནི་ཡུལ་གང་ན་བོད་མི་སུ་ཟེར་བ་ཞིག་ད་ལོའི་ངོ་རྒོལ་གྱི་ཟིང་ཆའི་ནང་སྲོག་ཤོར་བའི་གནས་ཚུལ་ཁུངས་དག་རེ་གོ་ན་འདིར་འགོད་རོགས། ་མི་གཅིག་ལས་བཀྲོངས་མེད་ཀྱང་རུང་དེ་ཉིད་ང་ཚོའི་མི་རིགས་དང་རྒྱལ་ཁབ་སླར་གསོའི་ཆེད་དུ་སྲོག་དོར་བ་ཡིན་ན་ང་ཚོ་ཚང་མས་རྗེས་སུ་དྲན་པར་འོས་ལ་དེ་ཉིད་ཀྱི་ནང་མི་སྤུན་ཟླ་ཚོར་སེམས་གསོ་རེ་ལས་མ་འབྱོར་ན་ཡང་བྱ་བར་འོས། འདིར་གླེང་བར་འོས་པ་མང་དུ་མཆིས་ཀྱང་ྐློག་པ་པོ་དག་སུན་པར་འགྱུར་བར་དོག་ནས་དེ་ཙམ་ཀྱིས་དེ་རེང་འཐུས་པར་བྱས་སོ། །