བཙུན་ཐར་ཚེ་རིང༌།
སྔོན་གླེང༌།
སྤྱིར་འཛམ་བུ་གླིང་འདི་མི་ཙམ་མ་ཡིན་པར་སྐྱེ་འགྲོ་ཡོངས་ཀྱི་འཚོ་སྡོད་རྟེན་གཞི་ཡིན་པ་དང༌། ལྷག་པར་དུ་མི་དང་ཁོར་ཡུག་བར་གྱི་ཕན་ཚུན་རྟེན་ཅིང་འབྲེལ་བའི་གནས་ལུགས་མང་པོ་ཞིག་དང༌། ཡང་ན། མི་དང་ཁོར་ཡུག་གཉིས་ནི་ཕན་ཚུན་ལྟོས་ཚབ་ཆེན་པོ་ཡོད་པ་ཞིག་ཡིན་པས། འཛམ་གླིང་འགྱུར་འགྲོས་དང་བསྟུན་པའི་ཁོར་ཡུག་སྲུང་སྐྱོབ་ཐད་མི་རྣམས་ཀྱིས་དོ་སྣང་ཆེ་བྱེད་དགོས་པ་དང་ཕྱོགས་མཚུངས། ཡར་རྒྱས་ཆེན་པོ་སོང་ཡོད་ནའང༌། རང་ཅག་ཁ་བ་གངས་ཅན་གྱི་ཡུལ་ལ་རྒྱ་དམར་མ་སླེབས་སྔོན་མི་གྲངས་ཉུང་ལ་ཁ་དབུགས་གཙང་ཞིང་ཞི་བདེ་དང༌། ཆོས་ལྡན་གྱི་རྒྱལ་ཁབ་ཅིག་ཡིན་པས། ལྷ་ཆོས་དགེ་བ་བཅུ་དང་མི་ཆོས་གཙང་མ་བཅུ་དྲུག་གི་ཁྲིམས་ལག་བསྟར་བྱས་ཏེ་འཚེ་མེད་ཞི་བའི་ངང་ཁོར་ཡུག་སྲུང་སྐྱོབ་བྱེད་བཞིན་ཡོད་པའི་རྣམ་པ་དེར་འགྱུར་བ་ཐེབས་ནས་མུ་མཐུད་ཉམས་རྒུད་འགྲོ་བཞིན་ཡོད།
དེ་ཡང་དུས་རབས་ཉི་ཤུ་བའི་ལོ་རབས་ལྔ་བཅུ་ནས་བཟུང་རྒྱ་དམར་གྱིས་བོད་བཙན་བཟུང་བྱས་ཏེ། བསམ་ཡུལ་ལས་འདས་པའི་བོད་ཀྱི་སྐྱེ་ཁམས་ཤིང་ནགས་གཅོད་འབྲེག་དང༌། གཏེར་ཁ་བསྔོག་འདོན། རྩ་ཆེའི་རི་དྭགས་གསོད་པ། རྡུལ་ཕྲན་མཚོན་ཆའི་གང་སྙིགས་གཡུགས་པ། ཆུ་གློག་ལས་གྲྭ་རྒྱག་པ་སོགས་ཕྱོགས་མང་པོ་ཞིག་ནས་བོད་ཀྱི་ཁོར་ཡུག་ལ་གནོད་སྐྱོན་བགྲང་གིས་མི་ལངས་བ་བརྩམས་དང་རྩོམ་བཞིན་ཡོད་པ་འདི་འཛམ་གླིང་རྒྱལ་ཁབ་དག་ལ་ཕྱི་གསལ་ནང་གསལ་ཆགས་ཡོད། འཛམ་གླིང་མི་དམངས་ཀྱིས་རྒྱ་ནག་ལ་མཚམས་འཇོག་དགོས་པའི་འབོད་སྐུལ་རབས་དང་རིམ་པ་མང་པོ་བྱས་ནའང༌། རྒྱ་དམར་གྱིས་ད་དུང་མཚམས་འཇོག་བྱས་མེད་ལ། དེ་མཚུངས་བོད་ནང་གི་ཞིང་འབྲོག་མི་དམངས་ཀྱིས་ཀྱང་ཁོར་ཡུག་ལ་གནོད་པའི་རྩ་ཆེའི་རི་དྭགས་གསོད་པ་དང༌། ཤིང་ནགས་བཅད་དེ་སྡོད་ཁང་ལས་བཞིན་པ་སོགས་ཆུང་ས་ནས་ཁོར་ཡུག་ལ་གནོད་སྐྱོན་གཏོང་བའི་རྣམ་པའང་ཆེ་ནས་ཆེ་རུ་འགྲོ་ཡི་ཡོད།
རང་རེའི་བོད་ཀྱི་ས་ཁྱོན་ལ་སྤྱི་ལེ་གྲུ་བཞི་མ་ས་ཡ་གཉིས་དང་ཕྱེད་ཀ་ཡོད་པ་དང༌། གླིང་ཆེན་བདུན་གྱི་ཡ་གྱལ་ཡོ་རོབ་གླིང་ཆེན་གྱི་རྒྱ་ཁྱོན་བཞི་ཆ་གཅིག་ཟིན་གྱི་ཡོད། བོད་ནི་འཛམ་གླིང་གི་མཐོ་ཤོས་ཡིན་པ་དང་གངས་རིའི་བསྐོར་བའི་ས་ཆ་ཞིག་ཡིན་པས་ཨེ་ཤ་ཡའི་ཆུའི་འབྱུང་ཁུངས་ཀྱང་ཡིན། ཆུ་དེ་དག་ཁྱིམ་མཚེས་རྒྱལ་ཁབ་ཁག་ལ་བཞུར་གྱིན་ཡོད་པས། བོད་ནང་ཁོར་ཡུག་བཙོག་ཏུ་འགྲོ་བཞིན་པ་འདིས་འཛམ་གླིང་གི་གནམ་གཤིས་དང་ཁོར་ཡུག་གང་སར་གནོད་སྐྱོན་ཚབས་ཆེན་བྱུང་བ་ལ་བརྟེན། འཛམ་གླིང་རང་བཞིན་གྱི་ཁོར་ཡུག་སྲུང་སྐྱོབ་ལྟེ་གནས་ཤིག་ཏུ་གྱུར་ཡོད་པ་ཇི་ལྟར་སྲུང་སྐྱོབ་བྱ་ཕྱོགས་ལ་རང་ཉིད་ཀྱི་བསམ་ཚུལ་མདོར་བསྡུས་ཤིག་སྤེལ་ཡོད་པ་གཤམ་གསལ།
ཤིང་ནགས་སྲུང་སྐྱོབ་སྐོར།
རྒྱ་ནག་གིས་བོད་ལ་བཙན་འཛུལ་མ་བྱས་པའི་ཡར་སྔོན་ལ་ཤིང་ནགས་ཀྱི་རྒྱ་ཁྱོན་སྤྱི་ལེ་གྲུ་མ་བཞི་མ་ ༢༢༡༨༠༠ ཡོད་པ་དང༌། རྒྱ་དམར་བོད་ལ་སླེབས་ནས་ཤིང་ནགས་གཅོད་འབྲེག་མང་པོ་བྱས་པའི་སྟབས་ཀྱིས་ད་སྐབས་གསུམ་ཆ་གཅིག་ཙམ་མ་གཏོགས་ལྷག་མེད་པས། རྒྱ་ནག་གཞུང་གིས་ཤིང་ནགས་སྲུང་སྐྱོབ་ཀྱི་བཅའ་ཁྲིམས་གཏན་འབེབས་བཟོས་ཡོད་ནའང༌། ཁྲིམས་ལྟར་ལག་བསྟར་བྱེད་ཐུབ་ཀྱི་ཡོད་པ་མ་རེད། ཤིང་ནག་གཅོད་འབྲེག་གི་དབང་གིས་བོད་ཀྱི་སྔ་མོའི་ཁོར་ཡུག་གནས་སྟངས་དང་གནམ་གཤིས་ལ་འགྱུར་བ་ཐེབས་ཡོད་པ་དང་བོད་ཀྱི་ཐོན་ཁུངས་གཙོ་བོ་གཞི་རིམ་གྱི་རོང་འབྲོག་ཞིང་ལས་ཀྱི་འཚོ་རྟེན་ཞིང་ས་དང༌། འབྲོག་པའི་རྩྭ་ས་སོགས་ལ་ཆར་ཆུ་དུས་ལྟར་མི་འབབ་པའི་དཀའ་ངལ་ཆེ་རུ་ཕྱིན་ཏེ། ལོ་འབྲས་དང་རྩྭ་ལྡུམ་ཡག་པོ་སྐྱེས་མ་ཐུབ་པར་བརྟེན་ལོ་ལྟར་གྱི་ཡོང་འབབ་ལས་གཞན་འཚོ་གནས་ལའང་དཀའ་ངལ་འཕྲད་ཀྱི་ཡོད། འདི་ལ་བོད་མིའི་ངོས་ནས་ཁ་ཡོད་ལག་ཡོད་ཀྱི་སྲུང་སྐྱོབ་ག་འདྲ་ཞིག་བྱེད་དགོས་བརྗོད་ན། གཙོ་བོ་ལས་འགུལ་ཞིག་སྤེལ་ན་དང་པོ་སོ་སོ་ནས་འགོ་བཙུགས་ཏེ་སྤེལ་དགོས་པ་ཡིན་སྟབས། བོད་པ་རང་ངོས་ནས་ཁོར་ཡུག་ལ་གཏོར་བརླག་རིགས་མཚམས་འཇོག་བྱེད་པ་ནས་མགོ་འཛུགས་དགོས། དེ་ཡང་ཆུང་ས་ནས་གཞི་རིམ་བོད་རིགས་མང་ཚོགས་ཀྱིས་གདོད་མའི་སྐབས་ཀྱི་ཁང་པ་ལས་སྟངས་དོར་ཏེ་དེང་རབས་ཀྱི་ཁང་པ་ལས་སྟངས་སོགས་ལ་མིག་དཔེ་བལྟས་ནས་མདོ་དོན་ཁང་བཀོད་ཀྱི་ཆེད་དུ་ཤིང་ནགས་ཕོན་ཆེ་སྤྱོད་མི་དགོས་པ་བྱེད་དགོས།
བོད་ནི་ཆོས་ལུགས་དར་ཁྱབ་ཆེ་ཞིང་ཆོས་སྤེལ་བླ་མ་མང་བའི་རྒྱལ་ཁབ་ཅིག་ཡིན་སྟབས། བླ་མ་རྣམ་པས་རང་གི་ལྷ་སྡེ་དང་དགོན་སྡེ་སོགས་རང་ཉིད་ལ་གུས་བརྩེ་ཡོད་པའི་མི་མང་ལ་ཁོར་ཡུག་དང་འབྲེལ་བའི་ལམ་སྟོན་གནང་དགོས་པ་གལ་ཆེ། འདི་ནི་བརྒྱུད་ལམ་གལ་ཆེ་ཤོས་རེད། དཔེར་ན། ད་ལོའི་དུས་དབང་སྐབས་ྋསྐྱབས་མགོན་རིན་པོ་ཆེས་གཞིས་སྡོད་བོད་མི་ཡོངས་ལ་པགས་རིགས་རྒྱན་གོན་སྐོར་གྱི་བཀའ་སློབ་མང་པོ་གསུངས་པ། བོད་མིའི་ངོས་ནས་ལག་བསྟར་ག་འདྲ་བྱས་ཡོད་པ་བོད་ཕྱི་ནང་གཉིས་ལ་ཕྱི་གསལ་ནང་གསལ་ཆགས་ཡོད་པ་བཞིན། ཤིང་ནགས་སྲུང་སྐྱོབ་ཀྱི་དགེ་མཚན་དང་གཅོད་འབྲེག་གི་གནོད་སྐྱོན་སྐོར་གྱི་བཀའ་སློབ་བོད་ནང་གི་གཞིས་སྡོད་བོད་མི་རྣམས་ཀྱི་བསམ་བློའི་ནང་བཞག་ན་ཆེས་ཕན་ཐོགས་ཆེ།
དེང་གི་ཆར་རྒྱལ་ཡོངས་ཀྱི་སྲིད་ཇུས་དང་འབྲེལ་བའི་ལས་གཞི་རིམ་པ་སོགས་ལག་བསྟར་བྱེད་བཞིན་པའི་ཁོར་ཡུག་གནོད་སྐྱོན་གཏོང་བ་སོགས་ལ། ཕྱི་ལོ་༥༩ནས་བཟུང་སྟེ་ད་བར་དུ་ཁོར་ཡུག་ལ་གནོད་སྐྱོན་ཐེབས་པ་གཞི་རིམ་མང་ཚོགས་ཀྱིས་ཡུལ་ཚོ་དང་རྫོང༌། ཞིང་ཆེན་སོགས་ལ་ལོ་དུ་མར་མིག་སྔར་དུ་ལོ་འབྲས་དང་རྩྭ་ས་སོགས་ལ་གནོད་སྐྱོན་ཐེབས་པའི་སྙན་ཞུ་རིམ་པ་བཞིན་འབུལ་དགོས་པ། དེ་མཚུངས་བོད་ནང་གི་གཞི་རིམ་ལས་བྱེད་དང་མཐོ་རིམ་ལས་བྱེད་རྣམས་ཀྱིས་ཀྱང་མང་ཚོགས་ལ་རྒྱལ་སྤྱིའི་ཁྲིམས་དང་རྒྱ་ནག་གི་ཁྲིམས་སྲོལ་ཟུང་འབྲེལ་དང་མཐུན་པའི་ཤིང་ནགས་སྲུང་སྐྱོབ་སྐོར་ལ་སློབ་གསོའི་བྱ་སྤྱོད་སྤེལ་དགོས།
ཕྱི་སྡོད་བོད་མི་ཡོངས་ཀྱིས་རྒྱ་ནག་གིས་ལོ་ལྟར་ཤིང་ནགས་གཅོད་འབྲེག་གི་སྒྲིག་གཞི་སོགས་ཀྱི་ལས་ཀ་མཚམས་འཇོག་བྱེད་དགོས་པའི་སྐད་འབོད་རྒྱག་པ་དང་ཆབས་ཅིག་ཕྱིའི་རྒྱལ་ཁབ་ཁག་གི་ཤིང་ནགས་སྲུང་སྐྱོབ་ཀྱི་ཚོགས་པ་སོགས་ལ་གསལ་བོ་འགྲེལ་བཤད་སྐྱོན་དགོས་པ་མ་ཟད། ཚོགས་པ་དེ་དག་གམ་ཡང་ན་བོད་མི་ཁོར་ཡུག་སྲུང་སྐྱོབ་ཀྱི་སློབ་སྦྱོང་ཐོབ་པ་དག་གིས་བོད་ནང་དུ་ཁོར་ཡུག་སྲུང་སྐྱོབ་ཀྱི་སློབ་གསོའི་ལས་འགུལ་སྤེལ་དགོས་པ། བོད་མིའི་ངོས་ནས་ཁ་ཡོད་ལག་ཡོད་ཀྱིས་གསལ་བསྒྲགས་བསྐྱངས་ནས་འཛམ་གླིང་འདིའི་སྒང་རྒྱ་མིས་བོད་ནང་གི་ཤིང་ནགས་གཅོད་འབྲེག་སོགས་གསལ་བོ་མཁྱེན་རྟོགས་བྱེད་དགོས།
བོད་གཞུང་གིས་གསར་དུ་འབྱོར་བའི་སློབ་གྲྭ་ཤེས་རབ་དགའ་ཚལ་སློབ་གླིང་དང༌། སུ་ཇ་བོད་ཁྱིམ་སློབ་གྲྭ་གཉིས་ལ་ཆེད་དམིགས་ཀྱིས་ཁོར་ཡུག་སྲུང་སྐྱོབ་ཀྱི་སློབ་སྦྱོང་སྤྲོད་དགོས་པ་ཤིན་ཏུ་གལ་ཆེ། ཁོ་ཚོ་ཕྱིར་བོད་ཡུལ་དུ་ཕྱིན་ན་རང་ཉིད་ཀྱི་ནང་དང་ཚོ་བ་སྡེ་བ་སོགས་ལ་ཁོར་ཡུག་སྲུང་སྐྱོབ་ཐད་འགྲེལ་བཤད་རྒྱག་ཐུབ་པ་བྱེད་དགོས། དེ་ལྟར་རིམ་བཞིན་རྒྱལ་སྤྱིའི་སྒང་ལ་ཤེས་རྟོགས་བྱུང་ནས་རྒྱ་ནག་ལ་སྐྱོན་བརྗོད་དང་བོད་ནང་གི་གཞི་རིམ་མང་ཚོགས་ཀྱི་སེམས་ངོར་བཞག་ཐུབ་ན། ད་གཟོད་ཤིང་ནགས་སྲུང་སྐྱོབ་ཐད་ནུས་པ་ཐོན་པ་དང་བོད་གཞི་རིམ་ཞིང་འབྲོག་ཐོན་སྐྱེད་ཀྱང་ཡར་རྒྱས་འགྲོ་ཐུབ།
གཏེར་ཁ་སྔོག་འདོན་སྲུང་སྐྱོབ་སྐོར།
ཕྱི་ལོ་ ༡༩༤༨ ནས་རིམ་བཞིན་རྒྱ་དམར་གྱིས་བོད་ཆོལ་ཁ་གསུམ་བཙན་བཟུང་བྱས་ནས་མི་ལོ་བཅུ་ཕྲག་བཞི་ལྷག་ཕྱིན་པའི་རིང༌། རྒྱས་བོད་ནང་གི་གཏེར་ཁ་བསྔོག་འདོན ༡༢༦ ལྷག་བྱས་ཡོད་པ་དང༌། ཁོ་ཚོས་རིན་ཆེན་གཏེར་ཁ་རྣམས་རྒྱ་ནང་དུ་དབོར་དང་འོར་བཞིན་ཡོད་པ་དང༌། བོད་ཀྱི་རིན་ཐང་ཅན་གྱི་གཏེར་ཁའི་དཔལ་འབྱོར་ཀྱིས་རྒྱ་ནག་རྒྱལ་ཁབ་འཛམ་གླིང་རྒྱལ་ཁབ་ཁྲོད་རིམ་བཞིན་དཔལ་འབྱོར་ཡར་རྒྱས་ཅན་གྱི་གྲལ་དུ་ཕྱིན་ཡོད། ད་དུང་གཏེར་ཁའི་འགྲིམ་འགྲུལ་སྟབས་བདེའི་ཆེད་མཚོ་བོད་ལྕགས་ལམ་གསར་འཛུགས་བྱས་ཏེ་ ༢༠༠༦ ཟླ་ ༧ ཚེས་ ༡ ལ་དངོས་སུ་བསྐྱོད་རྒྱུའི་ཁྱབ་བསྒྲགས་གནང་ཡོད། ལྕགས་ལམ་འཛུགས་བསྐྲུན་ཆེད་མ་དངུལ་རྒྱ་སྒོར་དུང་ཕྱུར་བརྒྱ་ལྷག་བཏང་བ་དེའི་མ་རྩ་ཕྱིར་བསྡུའི་ཆེད་དུ་ལྕགས་ལམ་དེའི་འབབ་ཚིགས་སྔོ་ལྗང་ཅན་དང་རྩ་ཆེའི་རི་དྭགས། ནགས་ཀླུང་ཡོད་པའི་ས་ཆ་མཛེས་ཤིང་ལྟ་ན་སྡུག་པ་སོགས་ལ་ཆེད་དུ་ཡུལ་སྐོར་སྤྲོ་འཆམ་འཛུགས་རྒྱུ་གཏན་འབེབ་བྱས་ཡོད། དེའི་བོད་ཀྱི་ཁོར་ཡུག་ལ་གནོད་སྐྱོན་བགྲང་གིས་མི་ལངས་པ་འབྱུང་རྒྱུར་ཐེ་ཚོམ་མེད་པ་དང༌། བོད་ཞིང་འབྲོག་གི་ས་ཞིང་དང་རྩྭ་ས་ལའང་གནོད་པ་མང་པོ་འབྱུང༌།
ད་དུང་གཏེར་ཁ་བསྔོགས་འདོན་མཁན་རྒྱ་ནག་མི་སེར་མང་པོ་བོད་དུ་སླེབས་པས་བོད་ཀྱི་གཏེར་ཁ་བསྔོགས་འདོན་ས་ཚིགས་རེ་རེར་རྒྱའི་གྲོང་བརྡལ་ལྟ་བུ་ཆགས་རྒྱུ་དང༌། བོད་རིགས་རྣམས་རྒྱའི་མི་སེར་ལ་ཆགས་རྒྱུའི་ཛ་དྲག་གི་གནོད་སྐྱོན་དང་ཁོར་ཡུག་ཐད་ལ་བསམ་ཡུལ་ལས་འདས་པའི་གནོད་སྐྱོན་རབས་དང་རིམ་བ་མང་པོ་འབྱུང་བར་བརྟེན། བོད་མི་རིགས་རྒྱ་མི་རིགས་ལ་བསྒྱུར་རྒྱུའི་གནོད་སྐྱོན་ཡང་ཤུགས་ཆེན་ཐེབས་རྒྱུ་གདོན་མི་ཟ། ཆེས་ཛ་དྲག་གི་སྐབས་འདིར་ང་ཚོས་ག་འདྲ་བྱས་ནས་མྱུར་བར་སྲུང་སྐྱོབ་བྱེད་དགོས་ཞེ་ན། ཆུ་མ་ཡོང་གོང་ལ་རགས་དང༌། དགྲ་མ་ཡོང་གོང་ལ་ཟོན་ཟེར་བའི་དཔེ་ལྟར། བོད་ནང་གི་བོད་མི་རྒྱུ་འབྱོར་ཕྱུག་པ་རྣམས་མཉམ་རུབ་ཀྱིས་དབུས་གཞུང་གི་ཡུལ་སྐོར་ལྗོངས་རྒྱུ་མ་བཙུགས་པའི་སྔོན་ལ་ས་གནས་གཞི་རིམ་གྱི་གྲོང་གསེབ་ཁག་གི་ཤིང་ནགས་དང་གཏེར་ཁ། སྔོ་ལྗང་ཅན་གྱི་ས་གཞིའི་སྟེང་ཡུལ་སྐོར་ལྗོངས་རྒྱུ་བྱ་ཡུལ་རེ་འཛུགས་ཐུབ་ན་རང་ས་རང་གི་ཡིན་པས་སྲུང་སྐྱོབ་བྱེད་ཐུབ་པ་དང་དེ་དང་འབྲེལ་བའི་ས་གནས་དེ་དག་གི་གྲོང་གསེབ་ཀྱི་ལས་མེད་རྣམས་ལ་ལས་ཀ་སྤྲོད་ཐུབ་པ་མ་ཟད། རྒྱ་ནག་གི་སྲིད་ཇུས་ནུབ་བརྒྱུད་ཐོན་འབྱེད་ཆེན་མོ་ལའང་འབྲེལ་བ་ཡོད། ས་གནས་དེ་དག་གི་གཞི་རིམ་མང་ཚོགས་ཀྱི་དཔལ་འབྱོར་ཐོན་ཁུངས་ལའང་ཆེས་ཕན་ཐོགས་ཆེ་སྙམ།
བྱེས་འབྱོར་མི་མང་དང་བཙན་བྱོལ་གཞུང༌། གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་གང་རུང་གིས་ྋགོང་ས་མཆོག་མཉམ་འབྲེལ་རྒྱལ་ཚོགས་དང་ཡོ་རོབ་གྲོས་ཚོགས་ཀྱི་ཁོར་ཡུག་སྲུང་སྐྱོབ་སྐོར་གྱི་ཚོགས་བཅར་ལ་ཕེབས་ཐུབ་པའི་སྙན་ཞུ་རིམ་བཞིན་ཞུས་ཏེ་དེའི་ནང་ཞུགས་ཐུབ་ཐབས་བྱས་ནས་བོད་ནང་གི་ཁོར་ཡུག་སྲུང་སྐྱོབ་ཐད་ཁྱབ་བསྒྲགས་ཤུགས་ཆེན་བྱེད་ཐུབ་པར་མ་ཟད། མུ་མཐུད་དུ་བོད་ནང་གི་ཁོར་ཡུག་བཙོག་ཏུ་འགྲོ་བཞིན་པ་འཛམ་གླིང་མི་མང་གིས་ཤེས་རྟོགས་བྱུང་ཐུབ། ད་དུང་བོད་གཞིས་བྱེས་གཉིས་ཀྱི་དེང་རབས་རྩོམ་པ་པོ་རྣམས་ཀྱིས་ཁ་ཚ་དགོས་གཏུགས་ཀྱིས་ཁོར་ཡུག་སྲུང་སྐྱོབ་ཀྱི་སྐོར་དཔེ་ཆ་གང་མང་བརྩམས་པ་དང་གོང་ས་མཆོག་གི་ཁོར་ཡུག་བཀའ་སློབ་སོགས་གཞི་རིམ་མང་ཚོགས་ལ་བཀྲམས་ན་བོད་མི་དམངས་ཀྱིས་ཁོར་ཡུག་སྲུང་སྐྱོབ་ཐད་ཀྱི་བསམ་བློའི་ལངས་ཕྱོགས་རྙེད་ཐུབ་པ་ཡིན།
རྩ་ཆེའི་རི་དྭགས་སྲུང་སྐྱོབ་སྐོར།
རྒྱ་ནག་གིས་བོད་ཞི་བའི་བཅིངས་འགྲོལ་བཏང་ཡོད་ཅེས་ཁ་གཡང་བསྒྲགས་པ་ནས་བཟུང་བོད་ནང་ལ་རྒྱ་ནག་འབོར་ཆེན་སླེབས་དང་སླེབས་བཞིན་ཡོད་པས། ཁོ་ཚོའི་འཚོ་བའི་ཐོག་དཀའ་ངལ་རིམ་བཞིན་འཕྲེད་ནས་འཚོ་བ་སྐྱོ་བོ་ཆགས་དུས་ས་གནས་དེ་ནས་རི་དྭགས་རྔོན་པ་དང་བོད་མི་རང་ངོས་ནས་ཀྱང་འཚོ་བ་སྐྱོ་བའི་གནས་སྟངས་ལ་གདོང་ལེན་ཆེད་དུ་རི་དྭགས་རྔོན་བཞིན་ཡོད། རྩ་ཆེན་རི་དྭགས་དེ་དག་ལ་སྲུང་སྐྱོབ་ག་འདྲ་ཞིག་བྱེད་དགོས་ཞེ་ན། ས་གནས་དེ་དག་གི་སྡེ་དཔོན་དང་གྲོང་དགོན་གྱི་བླ་མ་སོགས་ཀྱིས་དང་བླངས་ཀྱི་ཚོགས་པ་བཙུགས་ཏེ་ས་གནས་དེ་གའི་ཁོར་ཡུག་ལ་ལྟ་རྟོགས་ནན་མོ་བྱེད་དགོས་པ་དང་རི་དྭགས་རྔོན་རྒྱག་མཁན་དེ་ཚོ་འཛིན་བཟུང་བྱས་ཏེ་རྫོང་དང་ཡུལ་ཚོ་སོགས་ཀྱི་འབྲེལ་ཡོད་ལས་ཁུངས་ལ་རྩིས་སྤྲོད་བྱེད་དགོས།
གཞན་བརྒྱད་ཅུ་གྱ་གྲངས་ལོ་ལ་ཨ་མདོའི་ཡུལ་གྱི་རྡུང་ལེན་པ་བདུ་བྷེ་ཡིས་རི་དྭགས་སྐྱོ་གླུ་བླངས་པས་གཞི་རིམ་གྱི་རོང་འབྲོག་མང་ཚོགས་ཀྱི་སེམས་ངོར་བག་ཆགས་ཟབ་མོ་བཞག་ཏེ་རྔོན་ལས་བཅད་པ་སོགས་མང་པོ་བྱུང༌། དེ་ལྟར་གཞིས་བྱེས་གཉིས་ཀྱི་རྩོམ་པ་པོ་ཚོས་ཁོར་ཡུག་གི་རིན་ཐང་དང༌། སྲུང་སྐྱོབ་གལ་འགངས་བརྗིད་གཞི་བྱས་པའི་གཞས་ཚིག་བརྩམས་ཏེ་གཞས་པ་ཚོར་མཁོ་སྤྲོད་བྱས་ཏེ། རྒྱ་ཆེའི་བོད་རིགས་མང་ཚོགས་ཀྱི་གོ་རྟོགས་སྤེལ་ཐབས་བྱེད་དགོས། དེ་ལྟར་ལོ་ཁ་ཤས་སོང་བའི་རྗེས་རིམ་བཞིན་རི་དྭགས་རྔོན་མཁན་ཇེ་ཉུང་དུ་སོང་ནས་རྩ་ཆེའི་རི་དྭགས་རྣམས་ཞི་བདེ་དང་ཁོར་ཡུག་གཙང་མའི་ཁ་དབུགས་ཁྲོད་འཚོ་བ་ལོངས་སུ་སྤྱོད་ཐུབ་མ་ཟད། བོད་ཀྱི་ཁོར་ཡུག་འདི་ཞི་བདེའི་ལྟེ་གནས་ཤིག་ཏུ་འགྱུར་ཐུབ་པ་དང༌། འདི་འདྲའི་ནུས་པ་ཞིག་སྤེལ་ནས་བོད་ཀྱི་ཁོར་ཡུག་གནས་སྟངས་སླར་གསོ་ཐུབ་པ་ཡིན། དེས་བོད་ཀྱི་འཚོ་གནས་དང་ཁྱིམ་མཚེས་རྒྱལ་ཁབ་དང་ཡུལ་ལུང་ཁག་གི་འཚོ་གནས་ལ་གཞོགས་འདེགས་མི་དམན་པ་བྱེད་ཐུབ་ཁར། ཆེ་ས་ནས་བཤད་ན། གཞོགས་འདེགས་འདི་དག་གིས་དངོས་ཤུགས་བརྒྱུད་གསུམ་ནས་རྒྱལ་སྤྱིའི་དཔལ་འབྱོར་གོང་སྤེལ་ལའང་ནུས་པ་ཆེན་པོ་འདོན་ཐུབ་པ་ལགས་སོ།།
བོད་མི་རིགས་ཀྱིས་རྒྱ་མི་རིགས་ལ་མི་དགའ་བ་མ་ཟད། བོད་ཀྱི་རི་ཆུ་ནགས་གསུམ་གྱིས་རྒྱ་མིར་ནམ་ཡང་མི་དགའ་ཞེས་པ་དེ་བདེན་པ་བདེན་ཐུབ་རེད།
རྒྱ་ནག་གཞུང་ལ་བཅའ་ཁྲིམས་དང་རྩ་ཁྲིམས་ཟེར་བ་སོགས་སྲོལ་ཡིག་ཤིན་ཏུ་མང་པོ་ཞིག་ཡོད་ཀྱང༌། དོན་དངོས་ཐོག་རྒྱ་དམར་གཞུང་འཛིན་པ་ཚོས་བཀའ་གཙོ་བོར་འཛིན་པ་ལས་ཁྲིམས་ཀྱིས་དབང་ལུང་བསྒྱུར་པ་ནི་ཉིན་སྐར་ཙམ་དུ་ཟད།
བོད་མི་རིགས་ཀྱིས་ཀྱང་ཁོར་ཡུག་ལ་སྲུང་སྐྱོབ་བྱེད་དགོས་པ་མང་པོ་ཡོད་པ་རེད། ཡིན་ཡང་ལག་བསྟར་བྱ་ཐུབ་གི་ཡོད་པ་མ་རེད། དཔེར་ན་ཁ་སང་ཁེ་ཉིན་གྱི་མགོ་ལོག་གི་སློབ་ཆེན་པ་དང་གཙན་ཚའི་སློབ་ཆེན་པ་སོགས་ཀྱི་མ་བསྐུལ་དང་བླངས་ཀྱིས་ཁོར་ཡུག་གཙང་སྦྲ་བྱེད་མགོ་བཙུགས་སོང་། དེ་དང་གཅིག་མཚུངས་སུ་བོད་རིགས་ས་ཁུལ་ཡོངས་ལ་དེ་ལྟར་བྱ་བཟང་མགོ་འཛུགས་ཐུབ་ན། ཆུང་ས་ནས་ཁོར་ཡུག་གཙང་མ་བཟོ་བར་ཕན་ཐོགས་ཤིན་ཏུ་ཆེ། དེ་མིན་ད་དུང་སོ་སོའི་ས་ནས་ཁོར་ཡུག་སྐོར་གྱི་ལས་འགུལ་གང་མང་ཡོད་པ་དེ། ས་ཕྱོགས་སོ་སོའི་བླ་མ་སོགས་ཀྱིས་མིག་དཔེ་བལྟ་ས་ཞིག་བཟོ་ཐུབ་ན་ཡག་ཤོས་ཡིན་པས། ཕ་ཡུལ་གྱི་རིན་པོ་ཆེ་ཚོ་དེའི་སྐོར་ལ་དོ་སྣང་ཉིན་མོའི་སྐར་མ་ནང་བཞིན་ཡིན། སློབ་ཆེན་པ་སོགས་ཀྱི་ངོ་སོ་ཡར་ལ་བསྟོད།
སྤྱིར་ཡིན་ན་ཁོར་ཡུག་ལ་གཙང་སྤྲ་བྱེད་དགོས་པ་སོ་སོའི་འཕྲོད་བསྟེན་ལ་གཙང་སྦྲ་བྱས་པ་དང་གཅིག་པ་རེད།སྒོས་སུ་བོད་པའི་ཁོར་ཡུག་ལ་བོད་པ་རང་གིས་སྲུང་སྐྱོབ་བྱེད་དགོས་པ་མང་པོ་ཡོད་པ་རེད། དཔེར་ན་གཅན་ཚའི་སློབ་ཆེན་པ་དང་མགོ་ལོག་སློབ་ཆེན་པ་སོགས་ཀྱི་མ་བསྐུལ་དང་བླངས་ཀྱིས་ཁོར་ཡུག་གཙང་སྦྲ་བྱེད་མགོ་བཙུགས་པ་རེད། དེ་ལྟར་བོད་ས་ཁྱོན་ཡོངས་ལ་ཁྱབ་པ་ཡིན་ན། མ་མཐའ་ཡང་ཁོར་ཡུག་གཙང་མ་ཆགས་པ་རེད། སྤྱིར་ཁོར་ཡུག་སྲུང་སྐྱོབ་སྐོར་གཞིས་ཀྱི་རིན་པོ་ཆེ་སོགས་ལ་རག་ལས་ཡོད་ནའང་། དེ་ཚོས་ཁོར་ཡུག་སྲུང་སྐྱོབ་སྐོར་ཉིན་མོའི་སྐར་མ་དང་འདྲ། ངས་འདི་ནས་སློབ་ཆེན་པ་ཚོར་མུ་མཐུད་ངོ་སོ་ཡར་ལ་བསྟོད་ཟེར་ནས་བསྐུལ་མ་གནང་གི་ཡོད། སློབ་ཆེན་པ་ཚོར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན།