ནགས་ཕྲན་པ་བསོད་ནམས་ཚེ་རིང་།
ཟླ་འདིའི་ཚེས་ ༢༡ ཉིན་རྒྱབ་ཆུ་ཚོད་ ༤ ནས་ ༦ བར་འཇིགས་བྲལ་བསྟན་འཛིན་གྱིས་གོ་སྒྲིག་འོག་སྦེལ་ཀོབ་ལུགས་བསམ་མཉམ་འབྲེལ་ཚོགས་ཁང་དུ་༸གོང་ས་མཆོག་གིས་ ༢༠༡༡།༠༣།༡༤ ཉིན་སྐབས་བཅུ་བཞི་པའི་གྲོས་ཚོགས་སུ་བསྩལ་བའི་གསུང་འཕྲིན་གྱི་དགོངས་དོན་སྦེལ་ཀོབ་ཁུལ་གཞིས་ཆགས་གསར་རྙིང་གཉིས་ཀྱི་གནད་ཡོད་མི་སྣ་དང་། དོ་སྣང་ཅན་གྱི་མི་སྣའི་བསམ་ཚུལ་བརྗེ་ལེན་གྱི་བགྲོ་གླེང་ཞིག་འཚོགས་སོང་།
ད་ལན་ཚོགས་འདུ་འདིའི་ཐོག་གོ་སྒྲིག་པ་འཇིགས་བྲལ་བསྟན་འཛིན་གྱིས། ༸གོང་ས་མཆོག་གིས་གྲོས་ཚོགས་སུ་གསུང་འཕྲིན་ཕེབས་པའི་དགོངས་དོན་ཐོག་རང་རང་ལ་བསམ་ཚུལ་གང་ཡོད་པ་བོད་སྤྱི་ལ་བསམས་ནས་འཛེམས་དོགས་མེད་པར་གསུང་རྒྱུའི་རེ་བ་ཡོད་བརྗོད་སོང་། ཐེངས་འདིའི་བསམ་ཚུལ་བརྗེ་ལེན་གྱི་བགྲོ་གླེང་འདིའི་སྟེང་དབུས་གཞོན་ནུའི་ཚོགས་གཞོན་ཟུར་པ་བློ་བཟང་ཡེ་ཤེས་དང་། ས་གཞོན་སློབ་སྟོན་པ་རྒན་བློ་བཟང་རྡོ་རྗེ། ས་གཞོན་ཚོགས་གཙོ་ཟུར་པ་པདྨ་ཚེ་དབང༌། ས་གཞོན་ཚོགས་གཙོ་ཚེ་རིང་ལྷ་སྐྱབས། ས་གནས་བུད་མེད་ཚོགས་གཙོ་བསྟན་འཛིན་དབང་མོ། གངས་ལྗོངས་རང་བདེན་རྩོད་ལེན་མཐུན་ཚོགས་ཀྱི་ཚོགས་གཙོ་བློ་བཟང་དཔལ་ལྡན་སོགས་སྦེལ་ཀོབ་ས་གནས་ཀྱི་གནད་ཡོད་མི་སྣ་དང་། དུས་རྒྱུན་བོད་དོན་ཆབ་སྲིད་ཐོག་དོ་སྣང་ཅན་སྐྱ་སེར་མི་གྲངས་བཅོ་ལྔ་ཙམ་གྱིས་ྋགོང་ས་མཆོག་གི་མཚན་གནས་རྗེས་འབྲེལ་དང་བཅས་པའི་ཆབ་སྲིད་འགན་དབང་མི་མང་གིས་འདེམས་བསྐོ་བྱས་པའི་ཆབ་སྲིད་ཀྱི་འགོ་ཁྲིད་རྣམས་ལ་རྩིས་སྤྲོད་བྱ་རྒྱུའི་གསུང་འཕྲིན་དང་འབྲེལ་བའི་གནད་དོན་ཐོག་བགྲོ་གླེང་དང་བསམ་ཚུལ་གླེང་སློང་བྱས་ཡོད་པ་དང༌། སྐབས་དེར་ྋགོང་ས་མཆོག་གིས་དུས་ཡུན་རིང་པོ་ནས་བོད་བསྟན་སྲིད་མི་རིགས་དང་བཅས་པའི་མ་འོངས་མདུན་ལམ་ཆེད་གཟིགས་རྒྱང་རིང་པོའི་དགོངས་པ་བཞེས་ཕྱོགས་གསུང་འཕྲིན་དེའི་ནང་དོན་དང་རྒྱབ་ལྗོངས་ལ་དོགས་སློང་འགྲེལ་བཤད་མི་དགོས་པར་གསུང་འཕྲིན་རང་ལ་གསལ་པོ་ཡོད་པ་དང༌། བཀའ་དགོངས་དེའི་ཐོག་དཀའ་ངལ་ག་འདྲ་ཞིག་འཕྲད་ཀྱང་གདོང་ལེན་གྱིས་ཤར་བསྐྱོད་བྱེད་དགོས་པའི་བསམ་ཚུལ་ཕལ་ཆེ་བས་གཅིག་གྱུར་གླེང་ཡོད་པ་དང་། ༸གོང་ས་མཆོག་ལ་དབྱིན་ཇིའི་རྒྱལ་མོ་ལྟ་བུའི་མཚན་གནས་ཤིག་འབུལ་ཐུབ་པ་ཡིན་ན་ཡག་པོ་ཡོད་ཚུལ་གྱི་དགོངས་ཚུལ་ཤུགས་ཆེ་བྱུང་སོང་བ་དང་། དེ་བཞིན་ྋགོང་ས་མཆོག་གི་གསུང་འཕྲིན་ལག་བསྟར་བྱེད་ཕྱོགས་སོགས་ཀྱི་ཐད་མི་མང་ནས་བསམ་ཚུལ་བསྡུ་ལེན་བྱེད་པའམ། ྋགོང་ས་མཆོག་གི་ཆབ་སྲིད་དབུ་ཁྲིད་གནང་དགོས་མིན་གྱི་གནད་དོན་མི་མང་གིས་ཐག་གཅོད་བྱེད་དགོས་པར་མཐོང་གི་མེད་པ་དང༌། གལ་ཏེ་མི་མང་ནས་བསམ་ཚུལ་བསྡུ་ལེན་དང་ཐག་གཅོད་དགོས་པའི་གནས་ཚུལ་བྱུང་པ་ཡིན་ན་མི་མང་བྱིངས་ཀྱི་ཆབ་སྲིད་གོ་རྟོགས་དང་། སྤྱི་ཡོངས་གནས་ཚུལ་ཐོག་ནས་ྋགོང་ས་མཆོག་གི་དགོངས་གཞི་ཡག་པོ་རྟོགས་ཐུབ་ཀྱི་ཡོད་མེད་བཤད་ཚོད་མི་ཐིག་པར་བརྟེན། བོད་རང་དབང་འཐབ་རྩོད་དང་འབྲེལ་བའི་བོད་མི་རིགས་རྒྱལ་ཁབ་ཀྱི་མ་འོངས་པའི་མདུན་བསྐྱོད་བྱེད་ཕྱོགས་ྋགོང་ས་མཆོག་གི་དགོངས་གཞི་བཞིན་འགྲུབ་རྒྱུར་འགལ་རྐྱེན་འཕྲད་སྲིད་པའི་སྐོར་ལ་བསམ་ཚུལ་གཅིག་མཚུངས་བྱུང་སོང་།