དགའ་ཤོས་ཀྱི་གནས་ཚུལ།

བདུན་ཕྲག་འདིའི་ནང་ང་དགའ་ཤོས་ཀྱི་གནས་ཚུལ་ནི། རྒྱལ་བ་རིན་པོ་ཆེའི་ཨ་རིའི་ནང་གི་མཛད་འཕྲིན་མ་ཡིན་ལ། གཞོན་ནུ་ཚོགས་པའི་གསར་དུ་མགོ་འཛུགས་བཞིན་པའི་བོད་དོན་ལས་འགུལ་ཆེན་པོ་དེའང་མ་ཡིན། ཨ་རིའི་ནང་གི་བོད་དོན་གོམ་བགྲོད་དེ་ཡང་ཅི་ལ་ཡིན། བོད་དོན་རྒྱབ་སྐྱོར་ཆེད་ཕྱི་རྒྱལ་བ་རེ་ཟུང་གིས་ལྕགས་རྟ་ཞོན་ནས་སྐྱོད་བཞིན་པ་དེའང་མ་ཡིན། དེས་ན་གང་རེད་ཟེར་ན། མཛངས་མ་ཚེ་རིང་འོད་ཟེར་ལགས་ནས་རྒྱ་གཞུང་ལ་ཁྲིམས་གཏུགས་སམ་ཡང་ན་རྒྱ་གཞུང་ཁྲིམས་ལ་གཏུག་གི་ཡོད་པ་དེ་རེད། སྤྱིར་བཏང་རྒྱ་གཞུང་ལ་མཚོན་ན་ཁྱད་མཚར་པོ་ཞིག་རེད། ཁྲིམས་ལ་གཏུག་བྱ་ཁོ་ཚོ་རེད་ལ་གཏུག་སའང་ཁོ་ཚོ་རེད། གང་ཡིན་ནའང་ཁྱད་པར་མི་འདུག ངས་དེ་གནད་འགག་ཆེན་པོ་ཞིག་ཏུ་མཐོང་།  འོད་ཟེར་ལ་ཐོབ་ཤོར་ག་རེ་བྱུང་ནའང་དེ་རྒྱ་གཞུང་ལ་མཚོན་ན་གནད་འགག་ཅན་གྱི་དྲི་བ་གལ་ཆེན་པོ་ཞིག་ཆགས་ཀྱི་ཡོད་རེད་སྙམ།

གལ་སྲིད་འོད་ཟེར་ལ་བདེན་ཁ་སྤྲད་ནས་རྒྱལ་ཁ་ཐོབ་པ་ཡིན་ན། ད་བར་རྒྱ་གཞུང་ནས་བོད་མི་དམངས་ཐོག་ཁྲིམས་འགལ་གྱི་བྱ་སྤྱོད་མང་པོ་ཞིག་སྤེལ་དང་སྤེལ་བཞིན་པ་དེ་ཡོངས་སུ་ངོས་ལེན་བྱས་པ་ལྟ་བུ་ཞིག་ཆགས་ཀྱི་ཡོད། གལ་སྲིད་འོད་ཟེར་གྱི་བདེན་པ་ཆ་ཚང་ཡོད་པའི་ཁྲིམས་གཏུགས་དེ་ཤོར་བཅུག་པ་ཡིན་ནའང་།  རྒྱ་གཞུང་གི་ཁྲིམས་རྫིག་པོ་དེ་ཚོར་ལག་ལེན་མེད་པར་ཡིག་ཐོག་ཙམ་ཡིན་པ་དེ་འཛམ་་གླིང་མི་དམངས་ཀྱི་མིག་མདུན་གསལ་སྟོན་བྱེད་ཀྱི་ཡོད་པ་ལྟ་བུ་ཞིག་ཆགས་ཀྱི་འདུག  ཁྱེད་ཚོས་བལྟས་ན་རྒྱ་ནག་གིས་ལམ་ཁ་གང་འདེམས་ཀྱི་རེད་བསམ།

ད་རེས་ཀྱི་ཁྲིམས་གཏུགས་དེ་ལས་གལ་གནད་ཆེན་པོ་གཞན་ཞིག་ཀྱང་མཐོང་སྟེ། རྒྱ་ནག་གི་ཡིག་ཐོག་གི་ཁྲིམས་དེ་ཚོ་དངོས་སུ་ལག་ལེན་འཁེལ་བར་ཤེས་ལྡན་པ་ཚང་མར་འོས་འགན་ཡོད་པ་དང་དེ་ལ་ཚང་མས་བརྩོན་ལེན་བྱེད་དགོས་པའི་གོ་བརྡ་སྤྲད་པ་ལྟ་བུ་ཞིག་ཏུའང་མི་འགྲོའམ། མཐར་ངས་བོད་ནང་གི་ཤེས་ལྡན་པ་ཚང་མར་འབོད་སྐུལ་ཞུ་རྒྱུ་ཞིག་ནི། ཁྲིམས་མཐུན་གྱི་བྱ་བ་ཞིག་ཡིན་ཕྱིན་ཆད་དོན་དག་ཆུང་ཙག་ཅིག་ཡིན་ནའང་དེ་དོན་ཁྲིམས་གཏུགས་བྱ་རྒྱུ་དེ་གལ་་ཆེན་པོར་མཐོང་། ང་ཚོས་བཟོད་སྒོམ་མང་པོ་ཞིག་བྱས་བསྡད་པ་དེ་ཡིས་དབང་འཛིན་པ་རྣམས་སྐྱག་ལང་ལ་གཏོང་གི་ཡོད་པ་མ་ཟད་ཁོ་ཚོར་མུ་མཐུད་ཁྲིམས་འགལ་གྱི་བྱ་སྤྱོད་སྤེལ་བར་གོ་སྐབས་སྤྲོད་ཀྱི་འདུག ཡིན་ན་ཡང་འདི་ནི་ལས་སླ་པོ་ཞིག་མིན་པ་དེའང་ང་ཚོས་ལོས་ཀྱང་ཤེས། ང་ཚོའི་བོད་དོན་གྱི་ལས་འགུལ་འདི་རྒྱལ་སྤྱིའི་ནང་ཁྲིམས་མཐུན་ཡིན་པ་མ་ཟད་རྒྱ་ནག་གི་ཁྲིམས་དང་ཡང་མཐུན་གྱི་ཡོད་པ་དེའང་ངེས་པར་ཤེས་དགོས་ངེས་མཐོང་། ད་ལས་འགུལ་ཐེངས་གཉིས་པ་དེ་གང་ས་གང་དུ་ཁྲིམས་གཏུགས་བྱེད་པའི་ངོ་བོར་བསྒྱུར་ན་མི་ལེགས་སམ། དེ་ནི་ང་རང་གི་བསམ་ཚུལ་ཙམ་ཡིན། ཁྱེད་རྣམ་པའི་བསམ་ཚུལ་ཅི་འདྲ་ཡིན། ཤོད་དང་།