འབའ་སྲས།
—-རྭ་རྒྱའི་གངས་ལྗོངས་ཤེས་རིག་ནོར་བུའི་སློབ་གླིང་དབུ་བརྙེས་ནས་ལོ་འཁོར་ཉི་ཤུ་བར་ཕུལ་བ།
“འཇིགས་མེད་”རིགས་ཞེན་གཤོག་པ་མཁའ་རུ་ལྡིང་།།
ལྷག་བསམ་དར་དཀར་”རྒྱལ་མཚན་”ཏོག་ཏུ་བཞེངས།།
གདོང་དམར་བོད་ཀྱི་ཤེད་བུ་ངོ་མ་ཁྱོད།།
ལག་ཟུང་ཁ་སྦྱོར་མཛེས་པའི་མེ་ཏོག་གཏོར།།
མི་འཇིགས་”བཛྲ”་ཤེས་རིག་སྲོག་གི་སྙིང་།།
“ཚུལ་ཁྲིམས”རབ་གཙང་འདུལ་བའི་ལུང་གི་རྒྱན།།
གཙུག་ལག་”རྒྱ་མཚོར”་བརྒལ་ལ་སྙེ་བའི་རྟེན།།
སློབ་དཔོན་གང་དེར་དད་པའི་སྤུ་ལོང་གཡོ།།
རྨོངས་པའི་མིག་”ལྡོང་”ཅན་ལ་དམིགས་ཀྱི་བུ།།
སྣ་མང་རིག་པའི་གཏེར་གྱི་”ཡོན་”འཛིན་མཁན།།
ནན་”ཏན་”བློ་ཡི་རིག་པར་བསྒྲིན་མེད་པ།།
“རྒྱ་”ཆེན་ཤེས་བྱའི་”མཚོ་”ཡི་གྲུ་བར་བཀུར།།
དེ་ཡང་ཁ་ཡག་ངོ་བསྟོད་གྲགས་པའི་ལུགས།།
རྒྱང་དུ་དོར་ཏེ་དངོས་བདེན་གཏམ་འདི་ཞུ།།
མཚན་མོ་ཉིན་མོར་བསྒྱུར་པ་མ་ཡིན་ཡང་།།
ཉིན་མོ་ཉིན་བཞིན་བྱས་པའི་ཚུལ་འདི་རྨད།།
སྨད་ཕྱོགས་རྒྱ་ཡི་འབྱོར་བས་མ་བསླུས་ཤིང་།།
སྟོད་ཕྱོགས་རྒྱ་གར་བཀའ་ཡིས་མ་བསྐུལ་བར།།
བར་མ་བོད་ཡུལ་སྲོག་གི་དར་ཆ་རུ།།
གཅེས་སེམས་རླུང་གིས་བསྒྲེངས་པའི་མཛད་པ་མཐོ།།
མདོ་སྨད་ཡུལ་གྱི་འབྲོག་པའི་རི་གསེབ་ན།།
ཤེས་རིག་འོད་ཟེར་འབྱེད་པའི་སྐར་མ་འབུམ།།
ཉི་མའི་འོད་དང་བསྡོངས་ཞེས་མགུ་བའི་གཏམ།།
ནུབ་ཕྱོགས་རྒྱལ་ཁབ་དག་ན་སྙན་པར་སྒྲོགས།།
ཟང་ཟིང་འབྱོར་བས་དཀྱིལ་འཁོར་མ་བཞེངས་ཤིང་།།
ལུང་བསྟན་བརྗིད་པོས་ཁྲི་ལ་མ་བསྐོས་ཀྱང་།།
མཁས་བཙུན་རིགས་གཅེས་མངའ་བའི་ཡོན་ཏན་གྱིས།།
ཕྱོགས་ཀྱི་རྐང་གཉིས་སེམས་ཀྱི་བརྟན་པ་འཕྲོག །
བོད་ཀྱི་མཁས་པ་མི་གསུམ་གྲགས་པ་ཡིས།།
བསྟན་པ་སླར་ཡང་མདོ་ཁམས་སྨད་ནས་གསོས།།
དེ་ལྟར་བོད་ཀྱི་ཤེས་རིག་གསོན་པའི་ཤུགས།།
རྭ་རྒྱའི་ཡུལ་ནས་བསྐྱེད་པའི་ཚུལ་འདི་འདྲ།།
མཚམས་སྤྲིན་དམར་བའི་བླ་གོས་སྐུ་ན་མཛེས།།
ཤེས་བྱའི་བདུད་རྩི་གསུང་གི་བུམ་པར་འཕྱོ།།
གདོང་དམར་བོད་ཀྱི་ལ་རྒྱ་ཐུགས་སུ་བརྟན།།
སྐུ་གསུང་ཐུགས་ཀྱི་མཛད་པ་ཉམས་མེད་ཤོག།
སློབ་གླིང་དེ་ཡི་སློབ་མ་མ་ཡིན་ལ།།
རྣམ་པ་གསུམ་གྱི་སློབ་ཁྲིད་མ་འཐོབ་མཁན།།
སྙན་ངག་སྨྲ་བ་རྣམས་ཀྱི་གྲལ་མཐའ་བ།།
འབའ་སྲས་འབོད་པས་ཧྥ་རན་སི་ནས་ཕུལ།།
༡༤/༠༧/༡༤ མཚན་གུང་དུ།
ཤེས་ནས་བཀུར་ན་དོན་གྱིས་བརྩིས་ནི་ཡིན།
མ་ཤེར་བསྟོད་ན་བརྫུན་གྱིས་གཡོག་ནི་ཡིན།
གྲལ་མཐའ་གང་ཅན་པ་ཚོ་སུའི་ཡིན་ཡང་།།
གྲལ་དེར་མེད་ན་འབའ་ཁོ་སྨྱོ་ས་རེད།
ཧ་ཧ་ཧ། རྩེད་མོ་ཡིན། མཐོལ་ལོ་བཤགས་སོ། བཤགས་སོ།
དཀར་ནག་འབྱོར་བའི་ཤུགས་དང་ལྗིད་པོའི་བཀའ།།
གང་ལ་མ་བརྟེན་ཅི་ཡང་མ་བརྩིས་པ།།
ལེགས་ཀྱང་བར་མའི་རྨོངས་པའི་སྤྱི་ཚོགས་ཀྱི།།
བསགས་དངུལ་ཤུགས་ཀྱིས་བསྡུས་པའི་ཚུལ་འདི་སྐྱོ།།