དགོངས་སེལ་ཞིག་དང་ངའི་མཐོང་སྣང་། རས་པ།

—བརྩེ་བའི་བུ་ཆུང་གི་སྐྱེས་སྐར་ལ་ཕུལ་བ།

     ཉིན་ཤས་རིང་སྤྲོ་སྐྱིད་ལྡན་པའི་འཚོ་བ་ཅིག་ལ་བསམ་སྟེ་བརྩེ་བའི་བུ་ཆུང་ལ་ཕུལ་བར་གྲ་སྒྲིག་བྱས། དེ་རིང་བུ་ཆུང་ངའི་འཚོ་བའི་ཁྲོད་ཆེས་གལ་ཆེན་གྱི་གྲུབ་ཆར་གྱུར་ནས་ལོ་གཉིས་ཏག་ཏག་ཟིན་གྱི་ཡོད། ཁོ་རང་སྐྱོ་ངལ་ཆེ་བའི་མིའི་སྤྱི་ཚོགས་ཀྱི་ཆ་ཤས་ཤིག་སྟེ་བོད་མི་བཙན་བྱོལ་བའི་འཚོ་བའི་ཁྲོད་སྐྱེས་ཤིང་། སྐྱེས་པ་ནས་བོད་ཀྱི་འཐབ་རྩོད་ཀྱི་སྐད་སྒྲ་ཐོས་ཡོད། མི་ལོ་གཉིས་ཟིན་པའི་དེ་རིང་ཨ་ཕ་ཨ་མའི་རྗེས་སུ་ཁོས་བོད་ཀྱི་རྒྱལ་དར་ལ་མཛུབ་གུ་བཙུགས་ནས་ཚ་ཚ་འུར་འུར་དང་ལག་པ་ཡར་ལ་འགྱོགས་དགོས་པ་ཤེས་ཀྱི་བོད།  ཉམས་འགྱུར་འདི་ལྟ་བུ་མཐོང་དུས་ང་ལ་སྨྲ་མི་ཤེས་ཤིང་འཇིགས་ཡེར་བའི་ཚོར་བ་ཞིག་སླེབས་ཀྱི་འདུག  ཡིན་ནའང་། དེ་ལྟ་བུའི་གནས་བབ་ཅིག་ལས་འཚར་ལོངས་མ་བྱུང་ཐབས་མེད་ཡིན་ཏེ།  ཁོ་ལ་ད་ལྟའི་སྐབས་སམ། ཡང་ན། མ་འོངས་པའི་ལོ་ངོ་ཧ་ཅང་མང་པོར་རང་གི་བདག་དབང་ཅན་གྱི་རྒྱལ་ཁོངས་མེད་སྲིད།

       གྲོགས་པོ་བོན་རྒྱ་བསྟན་རབ་པས་ངའི་བུ་ཆུང་ལ་བྲིས་པའི་<<འབེལ་རྩོམ་དོན་གྲུབ་རྒྱལ་པོའི་>>ནང་དུ་”ཁྱོད་ཀྱི་ལྟེ་མཚལ་ཁྲག་གིས་ཟོས་པའི་རྡུལ་དེ་ཁྱོད་ལ་མི་དབང་ཞིང་།། བྱང་ཕྱོགས་ནགས་མའི་རི་ཁུག་འདི་ན་ཁྱོད་ལ་ཅི་ཡང་མེད་པར་སྐད།།”ཅེས་བྲིས་ཡོད། དངོས་གནས་བདེན་དེ། བྱང་ཕྱོགས་ནགས་མིའི་རི་ཁུག་འདིར་ཐ་ན་ངས་བུ་ཆུང་གི་ཆེད་དུ་བསམ་པའི་ཉིན་གཅིག་དེའང་ཅི་ཡིན་འདི་ཡིན་མེད་པར་གྱུར་བ་མ་ཟད།  ངས་རེ་སྒུག་བྱས་པའི་སྤྲོ་སྐྱིད་ཀྱི་ཉིན་མོའང་དྲོད་འཇམ་གྱི་ཉི་མ་ཤར་ཡོད་པ་དེ་གཅིག་པུར་གྱུར།  གང་ཡིན་ཟེར་ན། མདང་ནུབ་ངས་རང་དབང་དང་མིའི་ཐབ་ཐོང་ཆེད་རང་ལུས་མེ་རུ་བསྲེགས་ཏེ་རྒྱ་ནག་གཞུང་ལ་ངོ་རྒོལ་བྱས་པའི་འདས་པོ་རྡོ་རྗེ་ལྷུན་གྲུབ་ཀྱི་བརྙན་པར་ཞིག་ལ་བལྟས་པ་ཡིན། བརྙན་པར་འདི་ནི་ཁོང་གིས་མེར་བསྲེགས་གནང་བའི་བརྒྱུད་རིམ་ཀྱི་ཕྱེད་ཀ་ཞིག་རེད།  དེ་རིང་ད་དུང་ངའི་གཟུགས་པོར་ཤེད་ཤུགས་མེད་པའི་ཚོར་བས་ཁྱབ་འདུག་ཅིང་། ཞོགས་པ་སྔ་བོར་ཀང་རའི་ལུང་གཞུང་རིང་མོ་འདིའང་ནམ་རྒྱུན་དང་མི་འདྲ་བར་སྐྱ་ཤུར་ཤུར་གྱིས་བཟུང་བའི་མཐོང་སྣང་བྱུང་།  ཚོར་བ་འདིས་སྤྲོ་སྐྱིད་ཇི་ལྟར་བསུ་ཐུབ་ཀྱི་རེད་དམ།

    འདས་པོ་རྡོ་རྗེ་ལྷུན་གྲུབ་ལགས་ཀྱིས་ཕྱི་ལོ་ ༢༠༡༢ ཟླ་ ༡༡ ཚེས་ ༤ ཉིན་རེབ་གོང་རྒྱལ་ཐང་ནས་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་བྱས་ཤིང་། མེར་བསྲེགས་སྐབས་སུ་ཁོས་ཧ་ཅང་བཟོད་བསྲན་ཆེན་པོས་དུས་ཡུན་གང་འཚམས་རིང་ཡར་ལངས་ནས་བསྡད་འདུག  ཁོང་ནི་ཇི་འདྲའི་མི་བློ་སྤོབས་ལྡན་ལ་སེམས་ཐག་ཆོད་པོ་ཞིག་རེད་ཨང་། ཁོང་གིས་”བོད་ལ་རང་དབང་དགོས་”པའི་འབོད་སྒྲ་དང་མཉམ་དུ་འཇིག་རྟེན་ལ་གྱེས་ཕྱག་ཕུལ། འོན་ཀྱང་། ངའི་མིག་ལམ་དུ་ད་དུང་ཁོང་འབར་བཞིན་འདུག་པ་མ་ཟད། མི་ཚོགས་ཀྱི་འབོད་སྒྲའང་གྲགས་ཀྱི་འདུག་ལ། སྟོད་གོས་དམར་པོ་གྱོན་པའི་བུད་མེད་ཅིག་གིས་ངུ་འབོད་དང་མཉམ་དུ་ད་དུང་ཕྱག་འཚལ་བཞིན་འདུག

    བརྩེ་བའི་བུ་ཆུང་ལགས། ཕྱི་ལོ་ ༢༠༡༢ ཟླ་ ༡༢ ཚེས་ ༡༢ ཉིན་འདི་ནི་ང་ལ་མཚོན་ན་ཁྱོད་མི་ལོ་གཉིས་ཧྲིལ་བོར་ལོན་པའི་དམིགས་གསལ་གྱི་ཉིན་མོ་ཞིག་ཡིན་ནའང་། ངས་ཁྱོད་ལ་ཉིན་མོ་འདིར་སྤྲོ་སྐྱིད་ལྡན་པའི་རྩེད་འཇོ་སྤྲོད་མ་ཐུབ་པར་དཔའ་བོ་ཁོང་གི་བློས་གཏོང་བྱས་པའི་སྐོར་གྱི་བརྙན་པར་འཁྱེར་ནས་འགན་འཁྱེར་མཁན་གྱི་མི་སྣ་ཞིག་ལ་ཕུལ་བར་སོང་བ་ཡིན། མ་ཟད། ཚུར་ལོག་དུས་ཀྱང་ཅི་ཡིན་འདི་ཡིན་མེད་པར་ལས་ཁུངས་སུ་འཛུལ་ཡོད། ཡི་གེ་འདི་འབྲི་དུས་ཀྱང་ངའི་སྣང་བ་འཇིག་རྟེན་གྱི་ཕྱིི་རོལ་ཅིག་གམ་རང་གིས་འགྲེལ་བཤད་མི་ཐུབ་པའི་ཚོར་སྣང་གིས་འགུལ་བསྐྱོད་ཡང་ཡང་རྒྱག་གི་འདུག་ལ། ཅི་ཞིག་ཆད་སོང་བ་ལྟར་ང་རང་ཁ་ཁུ་སིམ་མེར་ལུས་ཡོད།

    དེ་ཡིན་ཡང་།  བོད་ནི་རང་དབང་གི་འཚོ་བའི་ཁྲོད་གནས་དགོས། སྐད་ཆ་འདི་མ་བཤད་པའི་སྔོན་དུ་བོད་མིའི་རང་བསྲེགས་ངོ་རྒོལ་གྱི་དགོས་འདུན་ནི་ཆབ་སྲིད་ཀྱི་ལངས་ཕྱོགས་གང་རུང་ཐད་འཁྱོག་བསྒྱུར་གྱི་གཏམ་བཤད་དང་རྩོམ་ཡིག་སྤེལ་བཞིན་པའི་བོད་མི་དང་། ཕྱི་རྒྱལ་བའི་ལྟ་ཚུལ་ལ་དགག་པ་བྱེད་དགོས། གང་ཡིན་ཟེར་ན། ཆབ་སྲིད་འཐབ་རྩོད་ཀྱི་ལངས་ཕྱོགས་བཤད་པ་ནི་བོད་ཀྱི་གནས་བབ་འདི་ལྟ་བུའི་སྐད་ཆ་མིན་པ་འདྲ། ངས་ཤེས་ཚོད་ལྟར་ན་སྲིད་གཞུང་ལ་གསར་བརྗེ་བྱེད་པ་དང་། སྲིད་གཞུང་ཟུར་འཛུགས་བྱས་མྱོང་བའི་གནས་བབ་གང་དུའང་མི་རིགས་རང་བཞིན་གྱི་ཐོབ་ཐང་མ་རག་པའི་དཀའ་ངལ་འཕྲད་མེད་པ་འདྲ་ལ། བོད་བཞིན་དུ་རང་དབང་གི་ལམ་ཁ་ཅི་ཡང་མེད་པའི་མི་རིགས་ཀྱང་ཕལ་ཆེར་མེད་པར་བཤད་ཆོག ཡིན་ནའང་། ད་ལྟའི་བོད་ནི་མ་མཐའི་སྐད་བརྡའི་ཁྱབ་ཁོངས་ཀྱང་ཧ་ཅང་ཆུང་ཆུང་དུ་འགྱུར་བཞིན་ཡོད།

       ཡང་གཅིག་བཤད་ན། བོད་ཀྱིས་དུས་རབས་གསར་བའི་ནང་དུ་རང་གི་འཚོ་བའི་ལམ་ཕྱོགས་ཐད་གཞི་ནས་གོམ་པ་སྤོ་བར་འབད་བརྩོན་བྱེད་ཀྱི་ཡོད་པ་དང་། གནའ་ནས་བརྒྱུད་འཛིན་བྱས་པའི་བོད་ཀྱི་གོམས་སྲོལ་ཕལ་ཆེ་བས་དེང་གི་སྤྱི་ཚོགས་ལ་མཉམ་ཞུགས་བྱེད་མི་ཐུབ་པའི་རྒྱུ་མཚན་ཡང་གཞི་ནས་རྙེད་ཀྱི་ཡོད།  བོད་མི་རྣམས་ཀྱིས་རང་དབང་གི་དགོས་གལ་མཐོང་བའི་མགོ་བརྩམས་ཤིང་། གོམ་པ་དང་པོ་ཡིན་པའི་ཆ་ནས་འདྲ་མཉམ་མིན་པ་དང་། ཐོབ་ཐང་མེད་པ། རང་དབང་གི་རྣམ་གཞག་མང་པོ་ཞིག་གི་ཐད་དུ་བཀག་རྒྱ་ཡོད་པར་མི་འདོད་པ་བྱེད་ཀྱི་ཡོད། དེའི་རྐྱེན་གྱིས་འདི་ནི་འགྲོ་བ་མིའི་ཐོབ་ཐང་དང་འབྲེལ་བ་ཡོད་པའི་ངེས་ཤེས་ལྡན་པའི་འཐབ་རྩོད་ཅིག་ལས་གཞན་གང་ཡང་མིན། ཁྱོད་ནི་མི་རིགས་འདིས་རྗེས་རབས་པ་ཞིག་ཡིན་ཞིང་། ཁྱོད་ཀྱི་མི་ཚེ་ནི་འདི་ལྟ་བུའི་དཀའ་རྙོག་ཆེ་བའི་དུས་སྐབས་ནས་འགོ་ཚུགས་ཡོད། འོན་ཀྱང་། གནད་དོན་ཐག་གཅོད་ཀྱི་ཐབས་ལམ་ནི་རྗེས་ནས་ཡོང་ངེས་ཡིན།  བརྩེ་བའི་བུ་ཆུང་ལགས། ཁྱོད་རང་བདེ་ཐང་ངང་འཚར་ལོངས་ཡོང་བར་སྨོན།

                                                                               ༢༠༡༢། ༡༢ ། ༡༢ ཉིན་བྲིས།