དགོན་པའི་གཅར་རྡུང་ལམ་ལུགས་ལ་སྐྱོན་བརྗོད་ཀྱི་དེབ་ཐོན་ལ་ཉེ་བའི་གཏམ་བཟང༌།

སྤོབས་པ་མཐའ་ཡས།
རྩོམ་པ་པོ་གྲགས་ཅན་ཀླུ་སྨྱོན་ཧེ་རུ་ཀའམ་སྤྲུལ་སྐུ་ཡེ་ཤེས་རྒྱ་མཚོས་དགའ་འབྲས་སེ་གསུམ་གཙོས་བོད་ཀྱི་དགོན་སྡེ་ཁག་གི་ནང་དུ་ཤུགས་ཆེར་དར་བའི་སྒྲིག་ཁྲིམས་ལྕག་གིས་འཚོ་བ་ཞེས་སྒྲིག་ཁྲིམས་ཆུང་ཚག་འགལ་རིགས་ལ་གཅར་རྡུང་དྲག་པོ་བྱེད་སྲོལ་འདི་མཚམས་འཇོག་དགོས་སྐོར་རྩོམ་ཡིག་ཉི་ཤུ་ཡས་མས་ཤིག་ཕྱོགས་བསྡེབས་གྱི་དེབ་ཅིག་དཔར་སྐྲུན་བྱེད་འཆར་ཡོད་ཚུལ་ཐོས། གསན་ཚུལ་འཁོད་གསལ་ལ་དེབ་དེ་རང་རེའི་དགོན་སྡེ་ཆེ་གྲས་ཁག་གཅིག་ཆགས་ཡུལ་རྒྱ་གར་ལྷོ་ཕྱོགས་ནས་དཔར་སྐྲུན་བྱེད་རྒྱུ་ཡིན་ཞིང་རིང་མིན་དཔར་འགྲེམས་བྱ་རྒྱུ་རེད། གནད་དོན་འདི་ལྟ་བུ་ནི་སྤྱིར་ཆོས་ལུགས་གཞན་མེད་པའི་གདུག་རྩུབ་གཉའ་གནོན་གྱི་ལོག་སྤྱོད་ཡ་ང་བ་ཞིག་ཡིན་ལ་སངས་རྒྱས་ཀྱི་བསྟན་པ་མདོ་སྔགས་ཀྱི་ཐེག་པ་གང་དང་ཡང་མི་མཐུན། རང་རེའི་སྤྱི་ཚོགས་ཀྱི་སྲོལ་རྒྱུན་གནོན་ཤུགས་ཆེ་དྲགས་པས་གནད་དོན་དེར་གཞུང་ཁྲིམས་ཀྱི་སྟངས་འཛིན་དང་མང་ཚོགས་ཀྱི་ཁ་རྡུང་ཆེ་བ་ཕོག་མ་ཐུབ་པར་ད་དུང་ཡང་ལག་བསྟར་བྱེད་བཞིན་ཡོད། གནད་དོན་དེ་མི་རིགས་གཞན་གྱི་མཇལ་སྐོར་བས་ལྟ་ཉན་མེད་ཐོག་རང་རེའི་གྲྭ་རྐྱང་དཀྱུས་མ་དང་མང་ཚོགས་ཁྲོད་དུ་ཡང་སྔར་ནས་གླེང་གཞི་ཆེ། གཉའ་གནོན་ཡོད་སར་ངོ་རྒོལ་ཡོང་བ་ཆོས་ཉིད་ཡིན་སྟབས་ལོ་ཤས་སྔོན་གོང་སྨྲོས་རྩོམ་པ་པོ་མཆོག་གིས་དེའི་སྐོར་འགྲོ་བ་མིའི་ཐོབ་ཐང་ལ་རྡོག་རོལ་བཏང་བ་ཡིན་སྐོར་རྩོམ་ཡིག་ཅིག་བོད་ཀྱི་དུས་བབབ་གསར་ཤོག་ཏུ་ཆེས་ཐོག་མར་སྤེལ། དེ་ལ་མང་ཚོགས་སྤྱི་དང་གྲྭ་བ་དཀྱུས་མ་མང་པོས་དོ་སྣང་དང་གདེངས་འཇོག་མཐོན་པོ་བྱེད་བཞིན་པ་མཐོང༌། འོན་ཀྱང་ཆོས་ཟབ་ས་ན་བདུད་ཟབ་པའི་དཔེ་བཞིན་མངོན་གྱུར་རྟགས་ཀྱི་བདེན་པ་ངོ་སྤྲད་ཀྱང་ངམ་ནག་བཞིན་གྱི་གཉེར་མ་མི་གཏོང་མཁན་ཞིག་གིས་ལན་འདི་ལྟར་བཏབ་བྱུང༌། དྲག་རྡུང་མངར་གཅོད་བྱེད་པའི་ལམ་སྲོལ་དེ་ནི་རང་རེའི་ཆོས་ཁྲིམས་དར་གྱི་མདུད་པ་ཡིན་སྟབས་དེ་ལ་ནུབ་ཕྱོགས་པས་གླེང་བའི་འགྲོ་བ་ཐོབ་ཐང་སོགས་མེད་ཀྱང་ཆོག་ཅེས་བརྗོད། ད་དུང་ཆོས་ལ་མི་རྟོན་གང་ཟག་རྟོན་པ་སྟེ་གླེང་གཞི་ལས་མི་གླེང་བར་རྩོམ་པ་པོ་ལ་སྒྲོ་སྐུར་ཉག་ཉོག་མང་དུ་གླེང་བའི་ཨ་ཆད་ཨུ་ཐུག་གི་རྩོམ་ཡིག་ཅིག་སྤེལ་བར་ཡང་སྤྲུལ་སྐུ་ཡེ་ཤེས་རྒྱ་མཚོ་མཆོག་གིས་དེ་མ་ཐག་གི་འདོན་ཐེངས་ལས་རྣག་ཐོག་གཙགས་ཁེལ་གྱི་ལན་སྤེལ་བས་ཕ་རོལ་པོའི་ཁ་ལ་སྨྲ་བཅད་ཀྱི་རྒྱ་བཏབ།
ལེགས་བཤད་དུ། གཞན་ལ་ལྟ་བའི་མིག་ཡོད་ཀྱང༌། །རང་ཉིད་ལྟ་ན་མེ་ལོང་དགོས། །གསུངས་པ་བཞིན་རང་རེའི་མི་ལས་འཕགས་པའི་ལྷ་སྡེ་སྟེ་དགོན་སྡེ་ཁག་གི་ནང་དུ་མགོ་རུལ་བ་སྣ་ཡིས་མ་ཚོར་བར་གནད་དོན་དེ་ཚོར་ལན་མི་བྱེད་པར་ད་དུང་འགྲོ་བ་མིའི་ཐོབ་ཐང་རྩོད་ལེན་དང་འཛམ་གླིང་ཞི་བདེ་སྣེ་ཁྲིད་མཁན་སོགས་སུ་རློམ་པ་ཡ་ཆ། རང་རེའི་དགོན་སྡེ་ཁག་གི་ནང་དུ་ཡང་སྔོན་དུས་སུ་སྲོལ་ངན་དེ་མེད་པ་འདྲ། གཞུང་ཐོག་ནས་དེ་ལྟར་བྱེད་ཆོག་པའི་ཁྲིམས་སྲོལ་བཟོས་པ་སྡེ་སྲིད་སངས་རྒྱས་རྒྱ་མཚོས་བརྩམས་པའི་ཁྲིམས་ཡིག་དྭངས་ཤེལ་མེ་ལོང་ལ་འཁོད་པ་ལས་སྔ་བ་ཁོ་བོས་མ་མཐོང༌། ཁྲིམས་ཡིག་དེ་ལས་འཚངས་ཁ་རྒྱག་མཁན་སོགས་ལ་དབང་པོར་སྣད་ཡར་མི་ཡོང་བའི་རྡུང་བརྡེགས་སེམས་ངོ་འཕྲོད་པ་གཏོང་ཆོག་ཅེས་བྲིས་འདུག སྤྱིར་སྡེ་སྲིད་སངས་རྒྱམ་པས་དབང་པོ་སྣད་ཡར་བྱས་མ་བྱས་ཀྱི་ས་མཚམས་གང་ཞིག་ལ་འཛིན་མི་ཤེས་ཀྱང་རང་རེའི་དགོན་སྡེ་ཁག་གི་ནང་དུ་དབང་པོ་སྣད་ཡར་ཙམ་དུ་མ་ཟད་བསད་པའི་ལོ་རྒྱུས་ཀྱང་ཐོས་མྱོང༌། སྡེ་སྲིད་སངས་རྒྱམ་པ་ཆོས་སྲིད་ཟུང་འབྲེལ་གྱི་བླ་དཔོན་ཅིག་ཡིན་པ་དང་སྔོན་དུས་སུ་ཡུལ་ལུང་མང་པོར་ཉེས་ཆད་ལུས་སྟེང་ནས་གཅོད་སྲོལ་ཡོད་པས་དེ་ལྟར་ཡོང་སྲིད་པ་ཞིག་ཡིན་ཡང༌། དེང་དུས་སུ་ཡུལ་ལུང་ཕལ་མོ་ཆེར་ཡང་ཆད་པ་ལུས་སྟེང་ལ་གཅོད་སྲོལ་འགོག་བཞིན་ཡོད་ན་དགོན་སྡེ་ཆོས་ཚོགས་ཚོས་དེ་ལྟར་བྱེད་མི་རུང་བ་ལྟ་ཅི་སྨྲོས།
སངས་རྒྱས་ཀྱི་བསྟན་པ་ནི། རང་གི་ལུས་ལ་དཔེ་ལོངས་ལ། །གཞན་ལ་གནོད་པ་མ་བྱེད་ཅིག །ཅེས་པ་སྟེ་སྲིན་བུ་ཕྲ་མོ་ཚུན་ཆད་ཀྱི་བ་སྤུའི་ཁུངས་བུ་ཙམ་ལ་གནོད་པའི་སྦྱོར་བ་ཚུན་སྡིག་པའི་ལས་སུ་གསུངས་ཡོད་ན་བསྟན་རྩ་དགེ་འདུན་གྱི་སྡེ་ལ་རྡུང་བརྡེགས་ཀྱི་ལས་བརྩམས་ན་ལས་ངན་ཚབ་པོ་ཆེ་གསོག་པར་འགྱུར་བར་ཐེ་ཚོམ་ག་ལ་དགོས། བསྟན་པའི་རྩ་བ་འདུལ་ལུང་སྡེ་བཞི་པོ་གང་ན་ཡང་ཉེས་པ་ཕྱིར་བཅོས་ཐབས་སུ་རྡུང་བརྡེགས་གཏོང་དགོས་པ་ཚིག་འབྲུ་གཅིག་ཀྱང་མེད་ལ། བྱང་སེམས་ཀྱི་ཐེག་པ་ལས་ནི་བྱང་ཆུབ་སེམས་དཔའ་ལ་ངན་སེམས་གཅིག་སྐྱེས་ན་ཡང་ངན་སེམས་སྐྱེས་པའི་སྐད་ཅིག་མའི་གྲངས་བཞིན་དམྱལ་བར་གནས་པར་འགྱུར་བར་གསུངས། རྡོ་རྗེ་ཐེག་པ་ལས་ནི་དེ་ལས་ཀྱང་རྡོ་རྗེའི་སྤུན་ལ་ཁྲོས་པ་ཙམ་ཡང་མི་རུང་ན་བརྡེགས་པ་ལྟ་ཅི་སྨྲོས། དེ་བཞིན་རང་གི་རྡོ་རྗེའི་ལུས་ལ་དཀའ་ཐུབ་ཀྱི་གདུང་བ་སོགས་ཀྱང་བཀག་ཡོད་ཀྱང་རྒྱས་པར་རེ་ཞིག་གླེང་བར་མི་བྱ། དེ་ལྟར་ལྷ་ཆོས་དང་མི་ཆོས། ཆོས་ཁྲིམས་དང་ཡུལ་ཁྲིམས་གང་ལ་བལྟས་ཀྱང་སྲོལ་ངན་དེ་འགོག་དགོས་པ་སྨྲོས་སུ་མེད་ཀྱང་སྐྱེས་བུ་སྙིང་སྟོབས་ཀྱི་བདག་པོ་རེ་ཟུང་ཙམ་ལས་དེ་ལྟར་གླེང་བ་ཙམ་ཡང་རྔོ་ག་ལ་ཐོགས། མདོར་ན་སྤྱོད་ངན་འདི་ནི་སངས་རྒྱས་ཀྱི་ཆོས་དང་མི་མཐུན་པའི་ཚུལ་མཁས་པ་སྟོང་གི་དབུས་སུ་བླུན་པོ་བདག་ལྟ་བུས་ཀྱང་བསྒྲུབ་ནུས་སོ། །
འདི་དང་འདི་ལྟ་བུའི་བྱ་བཞག་དག་ནི་ཆོས་སྲིད་ཀྱི་ཚོགས་སྡེ་བྱེ་བྲག་པའི་ནོར་འཁྲུལ་ཅན་གྱི་སྲོལ་རྒྱུན་ཙམ་ལས་རིང་དུ་བརྒལ་ཏེ་འགྲོ་བ་མིའི་རིགས་ཀྱི་མངོན་འདོད་དང་མཐུན་པའི་ཕན་བདེ་བཙས་སུ་འགྱུར་བས་ན་རྗེས་སུ་ཡི་རང་གི་གནས་བླ་ན་མེད་པ་ལགས་སོ། །