དད་ལོག་ཟ་བ་མི་ཆོག་པ་ནི་དྲང་བདེན་དང་ཚན་རིག་གི་ལྡོག་ཕྱོགས་རེད།

Comments (16) on “དད་ལོག་ཟ་བ་མི་ཆོག་པ་ནི་དྲང་བདེན་དང་ཚན་རིག་གི་ལྡོག་ཕྱོགས་རེད།”

1. ད་ཡག་པོ་ཞེ་དྲག་རེད། བོད་པའང་ཡིན་མིན་དཔྱད་ཆོག་པ་དང་དཔྱད་པ་བརྒྱུད་ནས་དད་ཡུལ་མིན་ན་དོར་ཆོག་པའི་ལམ་ཁ་འགྲོ་བར་གྲ་སྒྲིག་དགོས་པས། བགྲོ་གླེང་འདི་བརྒྱུད་ནས་ལམ་ཁ་དེར་ཞུགས་ཐུབ་པར་ཡིད་ཆེས་འདུག

2. ཨ་ནུ་ཐང་པ་ལགས། བོད་སྐད་ནང་གི་དད་པ་ཟེར་བ་དེའི་དོད་ཐུབ་དབྱིན་སྐད་ལ་མིང་ཚིག་གང་ཡོད།

3. ཨ་ནུ་ཐང་གིས་རྩོམ་ཡག་ཅིག་སྤེལ་འདུག
   དབྱིན་ཡིག་ནང་དུ་དད་པ་ལ་ཧ་ལམ faith བཀོལ་བཞིན་པར་སྣང་། google ནང་འཚོལ་རོགས། གང་ལྟར་མི་བསླུ་བ་ནི་དད་པའི་གཞི་རྟེན་རེད། དེ་ལས་ལྡོག་པ་མཐའ་དག་བསླུ་བ་ཡིན་པས། དད་པ་ནི་དགོས་འདུན་ལྟར་སྤང་བླངས་བྱེད་ཆོག་པའམ། མ་དད་ནའང་ཆོག་པ་ཞིག་རེད་འདོད། རང་རེའི་གངས་ཅན་པས་སྤང་བླངས་གནང་ཐུབ་མེད་ལ། མི་ཐུབ་དོན་ཡང་སྐྱབས་འགྲོའི་འགོར་བླ་མ་གཙོ་བོར་བཞག་ཡོད་པར་ཐུག་ཡོད། དེ་བས། དེང་གི་བར་དུ་བོད་བརྒྱུད་སངས་རྒྱས་ཆོས་ལུགས་ལ་བླ་མའི་ཆོས་ལུགས་འབོད་དོན་ཡང་དེ་རེད། ད་དུང་མང་ཚོགས་ལ་ཁྲིམས་གཅོད་པའི་དབང་ཆ་བླ་མ་ཚོར་ཡོད། གོང་དུ་སྡེ་སྲིད་དང་འབྲེལ་བའི་རྩོམ་ཞིག་ཏུ་༼ཟངས་རྟ་མེ་འབར་མ༽ཞེས་པ་ནི་གསོན་བསྲེག་བྱེད་སྤྱད་ཀྱི་ཁྲིམས་ཆས་རེད་ལ། ཉུང་མཐར་བོད་ལ་ཁྲིམས་ཆས་དེ་དག་དུས་རབས་བཅུ་བདུན་དང་བཅོ་བརྒྱད་ནང་ད་དུང་ཡང་ཡོད་པས། སྟོན་པ་ཤཀྱཱ་ཐུབ་པའི་བསྟན་པ་དང་ཡོངས་སུ་འགལ་ཡོད་པར་མ་ཟད། སྲོལ་རྒྱུན་བོན་ཆོས་ལའང་དེ་རིགས་མེད།

4. རྣམ་པ་ཚོས་དགོོངས་ཚུལ་གསུངས་བར་ཐུགས་རྗེ་ཆེ།

   ཨོ་རེད། དབྱིན་ཚིག་ཏུ་གནམ་ལོ་ཡག་གིས་གསུངས་བ་བཞིན་རེད། དེ་ལས་ལྷག་གི་མིང་ཚིག་ཅིག་མི་འདུག འོན་ཀྱང་། དེ་ནི་རྣམ་པ་ཐམས་ཅད་དུ་བོད་ཀྱི་དད་པ་དང་མཐུན་གྱི་འདུག་ཅེས་ནས་བཤད་ཁག་པོ་རེད། དེ་ནི་སྤྱི་ཚོགས་མ་འདྲ་བས་ཡིན་པས་རེད། ཡིན་ཡང་། སྤྱི་ཡོངས་ནས་བཤད་ན་ཁྱད་པར་དེ་ཙམ་མི་འདུག

   གོང་གི་ཚན་པ་དང་པོ་དེའི་མ་ཡིག་ཆད་འདུག་པས་ཡང་སྐྱར་བཀོད་ན་་་་་

   ༡༽ ཆོས་ལུགས་དང་མ་འབྲེལ་བའི་དད་པ།
   ༢༽ཆོས་ལུགས་དང་འབྲེལ་ཞིང་མ་འབྲེལ་བའི་དད་པ།
   ༣༽ཆོས་ལུགས་དང་འབྲེལ་བའི་དད་པ། བཅས་ཡིན།

5. ཡ་ད་ཚིག་གི་ཁ་སྤུ་སྣ་སྤུ་བཏོག་ནས་མ་འདུག་མ་གཏོགས་ཁྱེད་རང་ལ་མི་དགོས་པའི་དཀའ་ངལ་འཕྲད་ཀྱི་རེད། བོད་སྐད་ཀྱི་དད་པ་ཟེར་བ་དེའི་དོད་ཐུབ་ཏག་ཏག་ཅིག་དབྱིན་ཡིག་ལ་མི་འདུག དེ་ཡིན་དུས་བོད་སྐད་རང་གི་མིང་ཚིག་ལ་འགྲེལ་བཤད་བྱས་ན་བོད་མི་ལ་གོ་བརྡ་མི་འཕྲོད་པའི་དཀའ་ངལ་མི་འདུག
   དད་པ་འཇོག་ཡུལ་ལ་ཆོས་ལུགས་ཡིན་མིན་གྱི་ཁྱད་པར་འབྱེད་པ་སོགས་ཀྱང་ཁག་པོ་རེད།་དེ་ལྟར་ན་ཆོས་ལུགས་ཡིན་མིན་གྱི་ཁྱད་པར་གང་གིས་འབྱེད་ཅེས་པའི་དྲི་བ་དེ་སླེབས་ཡོང་གི་རེད།

6. བོད་ཀྱི་སྤྱི་ཚོགས་སུ་ཡོངས་་གྲགས་སུ་དད་པ་ནི་ཆོས་ལུགས་ལ་ཡི་ཡང་བའམ་ཡིད་ཆེས་རྩེ་གཅིག་ཏུ་བྱེད་པར་འདོད་ཀྱང་། དེ་ལྟར་དགོས་ས་མ་རེད། རྒྱུ་མཚན་ནི།

   ཚིག་མཛོད་ཆེན་མོ།

   ཐ་མི་དད་པདང་བས་ཡིད་ཆེས་པ།གནས་ལུགས་ཇི་བཞིན་དུ་རྟོགས་ནས་རང་ཡིད་དད་སོང༌།དགའ་བ་དང་ཆགས་པ་དང་སྲེད་པ།སྐོམས་དད་པ།དམར་དད་པ།ཆང་དད་པ།
   དགའ་བ་དང་ཆགས་པ།གཉིད་དད་ཆེ་བ།ནོར་དད་ཆེན་པོ།ཁྱེད་རྣལ་འབྱོར་པ་བྱ་བ་སྐྱུར་དད་ཆེ་བ་ཡིན།ཡང་དག་པའི་གནས་ལ་དང་བའི་ཡིད་ཆེས་དང་འདུན་པའི་རྟེན་བྱེད་པ་སྟེ་དགེ་བའི་སེམས་བྱུང་བཅུ་གཅིག་གི་ཡ་གྱལ་ཞིགདད་པ་རྙེད་པ།དད་པ་ཉམས་པ།དད་པ་ལོག་པ།རྨོངས་པའི་དད་པ།ཆོས་དད་རང་དབང༌།བ་སྤུ་གཡོ་བའི་དད་པ་ཐོབ་པ།

   དག་ཡིག་གསར་བསྒྲིགས།

   ཡང་དག་པའི་གནས་ལ་ཡིད་ཆེས་པའི་འདུན་པའི་རྟེན་བྱེད་པ་སྟེ་དགེ་བའི་སེམས་བྱུང་བཅུ་ གཅིག་ གི་ཡ་གྱལ། གནས་ལུགས་ཇི་བཞིན་དུ་རྟོགས་ནས་རང་ཡིད་དད་སོང ་ ལྟ་བུ། ( དད་གུས ) ཡིད་ཆེས་ཤིང་གུས་པ་བྱེད་པའི་བྱ་སྤྱོད་ཀྱི་མིང་སྟེ། སློབ་མས་དགེ་རྒན་ལ་དད་གུས་བྱེད་ཅིང་དགེ་རྒན་གྱིས་སློབ་མ་ལ་ཤ་ཚ་དགོས་ལྟ་བུ། ( དད་འདུན ) ཡིད་ཆེས་ཤིང་རེ་བ་བྱེད་པའི་བསམ་པའི་མིང་སྟེ། ནད་པས་སྨན་པ་བཟང་པོར་དད་འདུན་བྱེད་ལྟ་བུ།

7. གོང་གི་གནས་ཚུལ་དེ་དག་བརྟེན་ནས་དད་པ་ནི་ཆོས་ལུགས་གཅིག་བུ་ལ་གོ་དགོས་ཀྱི་མི་འདུག

8. ཡ་གྲོགས་པོ་བསོད་ནམས་ལགས། ཚིག་མཛོད་ཙམ་ལས་འབྲི་དེད་ཤེས་པས་ཅི་ཡང་མི་ཤེས་པས་སྤྲུལ་སྐུ་དང་དད་པ་སྐྱོན་དུ་མཐོང་བར་ཁག་མེད་དོ།། སྤྱིར་ན་དད་པ་ལ་མུ་གསུམ་ཡོད་དོ། དཔེར་ན། དང་པོ་ཡང་དག་པའི་དད་པ་ཡིན་ལ་དད་ལོག་མ་ཡིན་པ་ནི་ཡང་དག་མི་བསླུ་བའི་སྤྲུལ་སྐུ་ཡང་དག་དང་དམ་པའི་ཆོས་ལ་དད་པ་པདྨ་ང་ལྟ་བུ་དང་། གཉིས་པ་ཡུལ་བསླུ་བ་ཅན་མའོ་ལྟ་བུ་དད་པ་དང་ཏང་ལ་དད་པ་ཨ་ནུ་ཐང་བསོད་ནམས་ལྟ་བུ་རེད། གསུམ་པ་གཉིས་ཀ་མིན་པ་རང་གར་གནས་པའི་མི་ཆོས་མེད་བཏང་སྙམ་པའི་ཚན་རིག་པ་ལྟ་བུའོ།། དེས་ན་དད་པ་དང་འདོད་པ་མ་ནོར་ཡང་ཡང་གསུང་པ་ལ་གོ་རྒྱུ་ཆེན་པོ་ཡོད་པས་བསོད་ནམས་རང་འདི་འདྲས་ཆོས་སྲིད་གང་ལ་ཡང་ཕན་པ་ལས་གནོད་པ་ཅན་འབྲི་དགོས་པའི་རྒྱུ་མཚན་གང་ཡིན་ནམ།

9. པདྨ་ལགས། ངས་བོད་ཀྱི་བརྡ་དག་གིས་ཅི་ལྟར་དད་པ་ལ་འགྲེལ་སྟངས་སྐོར་སྤོབས་མཐའ་ལ་བཀོད་པ་ལས་གཞན་དུ་མེད། ཁྱེད་ཀྱི་ཞེན་འདོད་ཀྱི་དད་པ་ནི་གསུམ་དུ་འགྲེལ་ཁུལ་བྱས་ཡོད་ཀྱང་། ཆོས་རྒྱུད་རེ་རེ་དང་མཁས་བ་རེ་རེ་ཡི་འགྲེལ་བཤད་སྣ་ཚོགས་ཡོད། འོན་ཀྱང་། མཐའ་ཐུག་ན་ཆོས་དང་འབྲེལ་བའི་དད་པ་དང་། མ་འབྲེལ་བའི་དད་པ། འབྲེལ་ལ་མ་འབྲེལ་བའི་དད་པ་གསུམ་དུ་འདུས་ཡོད།

10. ད་མདོ་དོན་གསལ་ཡོང་གི་འདུག དད་པ་ཡིན་ན་ཆོས་ལུགས་ཁོ་ན་མ་ཡིན་པར་ཕྱོགས་མང་བོར་འཇུག་པ་དང་། བོད་ཕོངས་བྱེད་གཙོ་བོ་གཅིག་དེ་འདས་པའི་དུས་ཡུན་ནང་དོགས་སློང་བྱེད་མ་ཆོག་པའི་ལམ་ནས་སྤྲུལ་སྐུར་དད་པ་དེ་རེད་ལ། བྱ་སྤྱོད་དེས་བླ་མ་སྤྱི་དང་། སྒོས་སུ་ཆོས་སྲིད་གཉིས་ཀ་གཉེར་བའི་བླ་མ་ཚོར་ཚད་ལས་བརྒལ་བའི་དབང་ཤུགས་བསྐྲུན་ཡོད་པས། ཆོས་ལུགས་ལག་ཆར་བཟུང་སྟེ་སྤྱི་དོན་ཕལ་ཆེ་བ་རྡུལ་དུ་བཏང་ཡོད། ད་ལྟ་འདི་ལ་ཡོ་བསྲང་ཡོང་ཐབས་ཐད་བགྲོ་གླེང་གཙོར་འཛིན་རྒྱུ་མ་གཏོགས་ཚིག་ངོས་ནས་ལྷག་དགོས་དོན་མི་འདུག་སྙམ།

11. ཨ་ནུ་ཐང་ལགས་ལ། ནང་ཆོས་ཀྱི་གཞུང་ལུགས་ལས་དད་པ་ལ་རིགས་མི་འདྲ་འགའ་ཤས་གསུང་ཡོད་མོད་གཙོ་ཆེ་ཤོས་དེ་རྒྱུ་མཚན་ཤེས་ནས་ཐོབ་པའི་དད་པ་འདི་ཁོ་ན་རེད། དེ་ཡང་རྒྱུ་མཚན་ཡང་དག་ལ་བརྟེན་ནས་ཡུལ་དངོས་པོའི་གནས་ཚུལ་དཔྱད་དེ་མཐར་ཡིད་ཆེས་རྙེད་པ་ཞིག་ལ་ཟེར་ཚོད། ནང་ཆོས་ཀྱི་མཚན་ཉིད་རིག་པའི་ངོས་ཐད་ནས་བཤད་ན་ཐོག་མར་ཡུལ་གང་དང་གང་ལ་འཇུག་པར་ཡང་ཐེ་ཚོམ་དང་དོགས་དཔྱོད་ཀྱིས་འཇུག་དགོས་ཤིང་། བར་དུ་རིགས་པ་དང་རྒྱུ་མཚན་གྱིས་དཔྱད། མཐར་ཡུལ་དངོས་པོའི་བདེན་དོན་གྱི་ཆོས་ཉིད་རེག་ཚེ་ད་གཟོད་ཡིད་ཆེས་འཕེལ་དགོས་པའི་གོ་རིམ་འདི་འདྲ་ཞིག་བསྟན་ཡོད། དེའི་ཕྱིར་ཐེ་ཚོམ་དང་རྟོག་དཔྱོད་ནི་ནང་ཆོས་མཚན་ཉིད་རིག་པར་ཆ་མཚོན་ན་ཐོག་མའི་རྨང་གཞི་ལྟ་བུ་ཞིག་དང་། ཡིད་ཆེས་དང་དད་པ་གཉིས་ནི་དེ་དག་གི་གྲུབ་དོན་ནམ་བྱེད་འབྲས་ལྟ་བུ་ཞིག་ལ་གོ་དགོས། ནང་ཆོས་ཀྱི་གཞུང་ནས་བཤད་པའི་དད་པ་བྱེད་སྟངས་དངོས་དང་། ནང་ཆོས་བྱེད་མཁན་གྱིས་དད་པ་བྱས་སྟངས་གཉིས་ལ་གནམ་ས་བླ་འོག་བརྗེས་པ་ལྟ་བུའི་ཁྱད་པར་ཡོད་ནའང་དེ་ནི་ཆོས་པར་ཁས་འཆེས་མཁན་དག་གི་སྐྱོན་ཡིན་པ་ལས་ནང་ཆོས་ཀྱི་སྐྱོན་མིན་པ་ནི་རྣམ་པ་ཚོ་ལ་གསལ་འདེབས་ཐེངས་ཤིག་ཡིན། དཔེར་ན་མང་གཙོའི་ལྟ་གྲུབ་སྨྲ་བར་ཁས་འཆེས་མཁན་དག་གི་བྱས་ཉེས་ཡོད་ཚད་མང་གཙོའི་ལྟ་གྲུབ་ཀྱི་སྐྱོན་མིན་པ་ང་ཚོ་ལ་མཐོང་བ་མངོན་སུམ་ཡིན་པ་ནང་བཞིན་རེད། ཡང་། ནང་ཆོས་ལས་དད་པ་བྱེད་སྟངས་གཞན་ཞིག་ཀྱང་བསྟན་ཡོད། དེ་ནི་མི་བུ་རང་ལ་ལེགས་ཉེས་རྣམ་འབྱེད་ཀྱི་ནུས་པ་མེད་པའམ་རྣམ་དཔྱོད་ཀྱི་ཤེས་རབ་མེད་པ། ཡང་ན། ཡུལ་ཆོས་ཉིད་ཀྱི་བདེན་པ་ཟེར་བ་ཅི་ཡིན་དང་། དེ་ཇི་ལྟར་འཚོལ་པའི་བརྒྱུད་རིམ་ལ་མགོ་བོ་རྨོངས་པ་དག་གིས་འོལ་ཚོད་བྱུང་རྒྱལ་གྱི་སྨྲ་བ་སྤངས་ནས་བདེན་པར་སྨྲ་བའི་ཚད་མའི་སྐྱེས་བུ་ཞིག་གི་རྗེས་སུ་འབྲང་སྟེ་ཡིད་ཆེས་བྱེད་དགོས་པར་བསྟན་ཡོད། འདི་ནི་ད་ལྟའི་དངོས་ཡོད་གནས་ཚུལ་དང་ཡང་མཐུན་པ་ཞིག་རེད།

12. དད་པ་ལ་དབྱིན་ཡིག་གི་ནང་དུ faith ཡང་ན་ belief ཟེར།
    ཐོག་མར་དད་ལོག་ཟ་བ་ཟེར་སྐབས་དོན་དག་གོ་ཤེས་མ་སོང་། ངས་བསམ་པར་དད་པ་ལོག་མཁན་རྣམས་ཀྱིས་དད་རྫས་ལ་ལོངས་སུ་སྤྱོད་མི་ཆོག་པ་ནི་ཚན་རིག་དང་རྒྱབ་འགལ་རེད་ཟེར་བ་ལྟ་བུ་གོ་སོང་། འོན་ཀྱང་དེ་མིན་པ་འདྲ། དད་ལོག་ཟ་བ་ཟེར་བའི་ཐ་སྙད་དེ་འདྲ་གོ་མྱོང་མེད། དད་ལོག་སྐྱེས་ཟེར་བ་གོ་མྱོང་། གང་ལྟར་གང་ཡིན་རུང་དོན་དད་ལོག་སྐྱེས་མི་ཆོག་པ་ནི་ནང་པ་སངས་རྒྱས་པ་དང་ཚན་རིག་དང་མི་མཐུན་ཟེར་བ་འདྲ། དེ་ནི་དོན་དངོས་ཐོག་ནས་སངས་རྒྱས་པའི་ཆོས་མ་ཤེས་པའི་རྟགས་མཚན་རེད། ཕར་ཕྱིན་ཐེག་པ་ཙམ་དུ་མ་ཟད་གསང་སྔགས་ཀྱི་ཆོས་ནང་དུ་བླ་མ་སངས་རྒྱས་སུ་བལྟ་དགོས་པ་དང་བལྟ་དགོས་པའི་རྒྱུ་མཚན། ལྟ་བའི་ཕན་ཡོན། མ་བལྟས་པའི་ཉེས་དམིགས་སོགས་གསུངས་ཡོད། འོན་ཀྱང་གལ་སྲིད་བླ་མས་རྨོངས་པའི་དབང་གིས་འགྲེལ་ལོག་དང་མི་མཐུན་པ་ཞིག་བཤད་ཚེ་དེ་ལྟར་དུ་ཉན་དགོས་པ་མེད་ཅེས་གསལ་པོར་གསུངས་ཡོད།

13. ཅོལ་ཆུང་ཨ་ནུ་ཐང་ལགས། དད་པ་ལ་དྭངས་བའི་དད་པ། ཡིད་ཆེའི་དད་པ། མངོན་འདོད་ཀྱི་དད་པ་བཅས་ཡོད། དེ་དག་དོད་དབྱིན་སྐད་དུ་ཡོད་དམ།

14. ཅོལ་ཆུང་ལགས། ་ཡང་ཞུ་རྒྱུ་ལ། ཁྱེད་སངས་རྒྱས་ཀྱི་ཆོས་ཁས་མི་ལེན་མཁན་ཞིག་ཡིན་ན་གནས་ཚུལ་ཐ་དད་རེད། ཁས་ལེན་ཞིག་ཡིན་ཕྱིན་བོད་ཀྱི་བླ་སྤྲུལ་ཚོས་དད་པ་དང་དམ་ཚིག་སྐོར་གསུངས་པ་ལས་སངས་རྒྱས་བཅོམ་ལྡན་འདས་ཀྱིས་གསུངས་མེད་པ་གང་ཞིག་གསུངས་འདུག ཁྱེད་ལ་གསལ་སྟོན་བྱེད་རྒྱུ་ཡོད་དམ། ཁྱེད་མདོ་རྒྱུད་བསྟན་བཅོས་ལ་སྦྱངས་པ་སྤུ་ཙམ་མེད་པའི་རྟགས་མཚན་གསལ་པོ་སྟེ། དེ་དག་ལས་དམ་སྡོམ་དང་དེ་དག་དང་འགལ་བའི་ཉེས་པ་དང་ལམ་གྱི་རྩ་བ་བཤེས་གཉེན་་ཚུལ་བཞིན་བསྟེན་པར་རག་ལས་ཚུལ་བཅས་ལན་བརྒྱར་གསུངས་ཡོད། འོན་ཏེ་བོད་ཀྱིས་བླ་སྤྲུལ་ཚོས་རང་གིས་གང་གསུངས་པ་དེ་ཉམས་ལེན་གནང་གི་མི་འདུག་ཟེར་གྱི་ཡོད་ན་དེ་ཡང་རེ་ཟུང་རེད་མ་གཏོགས་ཚང་མ་དེ་ལྟར་མིན་པས་བཅོལ་ཆུང་ཁྱེད་བློ་འཚབ་དེ་ཙམ་ཨེ་དགོས་ན།

15. བཙན་བྱོལ་བས་གསུངས་པ་དེ་ག་རང་རེད། ནང་ཆོས་ནང་དད་ལོག་ཟ་ཞེས་པའི་ཐ་སྙད་དེ་འདྲ་གཏན་ནས་མེད། དེ་ག་རང་ལ་བརྟེན་ནས་ཨ་ནུ་ཐང་ཁོང་གསུང་རབ་ཀྱི་བརྡ་་ཆད་ཙམ་ལ་ཡང་རྨོངས་མཁན་ཞིག་ཡིན་པར་གོ་བས་ཆོས་ཀྱི་མངར་དྲི་མི་བྲོ་བ་གསལ་པོ་རེད། ཕལ་ཆེར་འཇིག་རྟེན་གྱི་སྐྱུར་དྲི་ཡང་མི་བྲོ་བ་ཞིག་ཡིན་ས་རེད།

16. ཚིག་གཅད་གཅིག་ཀྱང་ཉན་པ་ལ།། གང་གིས་བླ་མར་མི་འཛིན་ན།། ཁྱི་ཡི་སྐྱེས་བ་བརྒྱ་བླངས་ནས།། སྨྲེ་ཤ་ཅན་དུ་སྐྱེས་བ་འགྱུར།། ཅེས་བ་ནི་དད་ལོག་གི་ཉེས་དམིགས་མ་རེད་དམ། གནས་ལུགས་ཅི་ཡང་མེད་པ་ཚིག་ངན་གྱིས་སྒྲུབ་བྱེད་འགྲོ་ན་རྣམ་པ་ཚོའི་ཐུགས་འདོད་རེད། ཅི་ཡང་ཞུ་ཡ་མེད། གང་ལྟར་དགེ་ཕྲུག་ཡོད་མཁན་ཞིག་ཡིན་ན་གཟབ་གཟབ་བྱོས། ཁོང་ཁྲོས་ཆིག་ངན་བཤད་ཅིང་ལག་གིས་དྲག་རྡུང་བྱས་ན། འཇུག་འབྲས་བོད་དུ་བྱུང་བའི་གནས་ཚུལ་བཞིན་རེད། དགོན་ནང་དུ་ཉོན་མོང་འདུལ་བ་ལྟ་ཅི། དེ་ལས་ལྡོག་སྟེ་རླུང་རོ་མ་ཞིག་ཏུ་གྱུར་ན་རང་སྡུག་མ་རེད་དམ།