དཔའ་བོ་བསོད་ནམས་དར་རྒྱས་མཆོག་གི་གདུང་ཐལ་ཕ་ཡུལ་ཤ་སྦྲང་དུ་འཁྱེར་ཡོང་འདུག

གནས་ཚུལ་གཏོང་མཁན། སྐལ་བཟང་ཉི་མ་ཡིིན།

བོད་མདོ་སྨད་རེབ་གོང་ཤ་སྦྲང་གི་རྒྱལ་གཅེས་དཔའ་བོ་བསོད་ནམས་དར་རྒྱས་ལགས་ཀྱིས་སྤྱི་ལོ་༢༠༡༢ལོའི་སྤྱི་ཟླ་༣པའི་ཚེས་༡༧ཉིན་རེབ་གོང་རྫོང་ཐོག་ཏུ་སྐུ་ལུས་མཆོད་མེར་ཕུལ་ཏེ་རྒྱ་ནག་གཞུང་ལ་ངོ་རྒོལ་གྱིས་སྐུ་གྲོངས་བ་དང་། དེ་མ་ཐག་ཁོང་གི་ཕ་ཡུལ་གྱི་ཡུལ་མི་དང་རེབ་གོང་གི་ས་ཕྱོགས་གང་ཡིན་གྱི་མི་ཚོགས་མང་པོས་སྨོན་ལམ་དང་ཁ་གཡང་ཁྲོད་ཁོང་གི་སྐུ་གདུང་རོང་བོ་དགོན་ཆེན་གྱི་ལྟག་རྒྱབ་གདུང་རྒྱལ་ཀླད་ཅེས་པ་རུ་སྦྱིན་བསྲེགས་བྱས་ཤིང་། ཁ་སང་ཕྱི་ཚེས་༡༨ཉིན་གྱི་ཞོགས་པའི་ཆུ་ཚོད་དགུ་བའི་ཐོག་སླར་ཡང་ཁོང་གི་ཕ་ཡུལ་ཤ་སྦྲང་གི་ཡུལ་མི་དང་གཞན་རེབ་གོང་ཕྱོགས་ཁ་བཅུ་གཉིས་ཀྱི་མི་མང་རླངས་འཁོར་ལྔ་བཅུ་ནས་དྲུག་བཅུ་ཙམ་གྱིས་ཁོང་གི་གདུང་ཐལ་ཕ་ཡུལ་ཤ་སྦྲང་དུ་འཁྱེར་ཡོང་འདུག

དེ་བཞིན་ཁ་སང་ཉིན་གང་བོར་ཁོང་གི་ཁྱིམ་དུ་གདུང་ཐལ་ལ་མཇལ་བ་དང་ཁྱིམ་མི་ཚོར་གདུང་སེམས་མཉམ་བསྐྱེད་བྱེད་དུ་ཡོང་མཁན་རེབ་གོང་གི་ཡུལ་སྡེ་རེ་རེ་དང་དགོན་པ་རེ་རེ། མི་སྒེར་བཅས་མཚམས་མ་ཆད་པར་ཡོང་གིན་པ་དང་། གཅན་ཚ་ཕྱོགས་ནས་ཀྱང་ཡར་ཡོང་གིན་པ་རེད་ལ། དེ་དག་གིས་དཔའ་བོ་ཁོང་གི་མ་འོངས་པའིོ་ཁྱིམ་མིའི་སླད་དངུལ་སྒོར་ཁྲི་ལས་བརྒལ་བ་དང་འབྲུ་རིགས་རླངས་འཁོར་བྱས་ཏེ་དྲུད་ནས་ཡོང་ཡོད་པ་རེད། མདང་ནུབ་ཤ་སྦྲང་གི་ཁྱིམ་ཚང་རེ་རེའི་ཁྱིམ་མི་རེ་རེས་མཆོད་མེ་རེ་འཁྱེར་ནས་ཤ་སྦྲང་དགོན་ཕུན་ཚོགས་ཆོས་གླིང་གི་ཆོས་རའི་ནང་འཛོམས་ཏེ་དཔའ་བོ་ཁོང་ལ་མྱ་ངན་ཞུ་བཞིན་༸གོང་ས་མཆོག་གི་གསོལ་འདེབས་བཏོན་པ་དང་། ཕྱིར་རང་རང་གི་ཁྱིམ་དུ་གྲོལ་ནས་འགྲོ་ཞོར་སྐད་ཤུགས་ཆེན་པོས་རྒྱལ་རིན་པོ་ཆེའི་གསོལ་འདེབས་བཏོན་པ་དང་མཆོད་རྟེན་ལ་སྐོར་བ་བརྒྱབས་འདུག

དེ་རིང་ཕྱི་ཚེས་བཅུ་དགུའི་ཉིན་གྱི་སྔ་དྲོ་ནས་བཟུང་སྟེ་རྩེ་ཁོག་དང་གཅན་ཚའི་ཕྱོགས་ཡར་མར། རྐང་ཚ། མཚོ་སྔོན་པོ་སོགས་ཡུལ་ལུང་འདྲ་མིན་གྱི་མི་སྣ་མཚམས་མ་ཆད་པར་ཁོང་གི་ཁྱིམ་དུ་མྱན་ངན་ལ་ཆེད་བཅར་ཞུ་བཞིན་ཡོད་འདུག ད་ལྟའི་ཆར་དཔའ་བོ་ཁོང་གི་ཕ་ཡུལ་ཤ་སྦྲང་དུ་རྒྱ་ནག་གཞུང་གི་ཉེན་རྟོག་པ་དང་དམག་མི་སོགས་འབྱོར་མི་འདུག་མོད། ཡུལ་མི་ཚོས་ཉིན་ཤས་རྗེས་ནས་ཡོང་རྒྱུ་ཡིན་པར་ཚོད་དཔག་དང་། གྲ་སྒྲིག སེམས་འཁྲལ་བྱེད་ཀྱི་ཡོད་འདུག