སྣང་ཤེས།
མ་བརྟག་རྒྱུད་ཀྱི་རྟོག་པ་མཐོང་དཀའ་སྟེ།།
གྲུབ་པའི་རྟགས་རྣམས་སྨྱོན་པའི་གར་དུ་མཐོང་།།
རྣལ་འབྱོར་སྣང་ཉམས་བསྲེས་པའི་དགའ་བ་འདི།།
སྲིད་པའི་འཆིང་རྒྱ་ཀུན་ལས་ཐར་པ་ལགས།།
སྐྱོ་བ་མེད་དེ་འཛིན་པའི་རྩ་བ་བཅད།།
དགའ་བ་མེད་དེ་ཐམས་ཅད་རོ་གཅིག་ཉིད།།
རྩ་བྲལ་སྣང་བའི་སྨུག་སྤྲིན་སངས་བ་ན།།
སེམས་ཉིད་ནམ་མཁའི་ངོ་བོ་ངང་གིས་མཐོང་།།
ན་བས་མི་རྒུད་རྐྱེན་ངན་གཡང་དུ་ལེན།།
འཆི་བར་མི་འཇིགས་ཕུང་པོར་ཞེན་པ་བྲལ།།
སྒོ་ངའི་སྦུབ་ནས་གཤོག་རྩལ་རྫོགས་ལུགས་འདི།།
ཁྱུང་ཕྲུག་ལྟ་བུའི་སྦས་པའི་རྣལ་འབྱོར་ཡིན།།
འདི་སྣང་སྒྱུ་མ་ཆོ་འཕྲུལ་ཉིད་དུ་ཤེས།།
སེམས་ཀྱི་སྡོད་ལུགས་ཀ་དག་ཉིད་དུ་རྟོགས།།
གཞི་མེད་འཁྲུལ་བའི་རྩ་བ་གཏིང་ནས་བཅད།།
ཡིན་མིན་རྟོག་པའི་འཆིང་བ་ཀུན་ནས་བསལ།།
བྱིན་རླབས་བླ་མར་མི་རེ་ཡེ་རྫོགས་ཡིན།།
དངོས་གྲུབ་ལྷ་ལ་མི་རེ་ལྷུན་གྲུབ་ཡིན།།
འུར་རྡོ་གཅིག་གིས་བྱ་བརྒྱ་སྤུར་ལུགས་འདི།།
བློ་དམན་སྙིང་རྩ་གཅོད་པའི་གཤེད་མ་ཡིན།།
རྟེན་འབྲེལ་གྱེན་ཏུ་ལྡོག་པའི་རྩལ་རྒུ་ཡོད།།
ལས་འབྲས་རྫུན་དུ་གཏོང་བའི་ཐབས་རྒུ་ཡོད།།
སྤངས་བླངས་འཛིན་པ་བཅད་པའི་རྣལ་འབྱོར་ང་།།
སྣང་ཞེན་གཡུལ་ལས་རྒྱལ་བའི་དཔའ་བོ་ཡིན།།