སྤོབས་པ་མཐའ་ཡས།
ནང་པ་སངས་རྒྱས་པའི་སྟོན་པ་རྒྱལ་བ་ཤཀྱཱ་ཐུབ་པ་ནི་དཔའ་བོའི་རིགས་རྒྱུད་དུ་འཁྲུངས་ཤིང་རབ་ཏུ་མ་བྱུང་གོང་དམག་གི་དྲག་རྩལ་སྣ་ཚོགས་ལ་སྦྱངས་མྱོང་། དེར་བརྟེན་ཁོང་གིས་བརྒྱུད་པའི་ཉམས་ལེན་གྱི་བཞུད་ལམ་ནང་དུ་ཡང་ཕྱིའི་དྲག་པོ་དམག་འཐབ་དེ་ཉིད་ནང་རང་རྒྱུད་ཀྱི་ཉོན་མོངས་པ་འདུལ་ཐབས་ལ་སྦྱར་དེ་ཉམས་ལེན་གནང་ཚུལ་ཡོད། དེར་བརྟེན་ཁོང་གིས་བསྟན་པ་དམ་པའི་ཆོས་ཀྱི་ནང་ལ་ཡང་ཉམས་ལེན་གྱི་རིམ་པ་མང་པོ་ཞིག་དྲག་པོ་དམག་འཐབ་དང་དཔེ་སྦྱར་བ་དང་དཔའ་བོ་དང་རྡར་མའི་ཆོས་མཚུངས་སྦྱར་བ་སོགས་ལ་བརྟེན་ནས་དྲག་པོ་དམག་གི་ཐ་སྙད་མང་པོ་ཞིག་ཀྱང་ཆོས་ཀྱི་སློབ་སྟོན་སྐབས་སུ་བེད་སྤྱོད་གནང་ཡོད། དཔེར་ན་བདུད་བཏུལ་བའི་མཛད་པ། དགྲ་བཅོམ་པ་དང་། དགྲ་ལས་རྒྱལ་བ་ལྟ་བུ་ཧ་ཅང་མང་། བསྟན་བཅོས་ལས་ཀྱང་བྱང་ཆུབ་སྤྱོད་འཇུག་གི་སྐབས་སུ་ཉོན་མོང་པ་དེ་དགྲ་དང་བྱང་ཆུབ་ཀྱི་སེམས་དེ་དཔའ་བོའི་དཔེ་རུ་སྦྱར་ནས་གསུངས་པ་ལྟ་བུ་ཧ་ཅང་མང་།
སྟོན་པ་གོའུ་ཏ་མ་སིདྷརྠ་དེ་ཉིད་ཀྱི་བསྟན་པ་ནི་ཞི་བདེ་དང་། འཚེ་བ་མེད་པ། མཛའ་མཐུན་བཅས་གཞི་རྩར་བཞག་པའི་ལྟ་གྲུབ་ཅིག་ཡིན་ན་ཡང་དཔའ་བོའི་རང་གཟུགས་གསལ་བོར་མཐོང་ཞིང་དཔའ་བོའི་རང་གཤིས་རྗེན་པར་མངོན་པའི་ཆོས་ལུགས་འདིས་ཨེ་ཤེ་ཡའི་གླིང་གི་དཔའ་བོ་མང་པོ་ཞིག་གི་ཡིད་དབང་གཏིང་ནས་འཕྲོག་ཅིང་རང་རྒྱལ་གཞན་ཕམ་དྲག་སྤྱོད་ཀྱི་རྟོག་པ་རང་ཤུགས་ཀྱིས་བཞུས་ཏེ་ནང་པའི་ཆོས་ཉམས་ལེན་དང་ཁྱབ་སྤེལ་བྱས་པའི་ལོ་རྒྱུས་མང་པོ་ཡོད། དཔེར་ན་རྒྱ་གར་གྱི་ཡུལ་ཁམས་ཆེན་མོ་གཅིག་གྱུར་བྱེད་མཁན་ཆོས་ཀྱི་རྒྱལ་པོ་ཨ་ཤོ་ཀ འཛམ་གླིང་སུམ་གཉིས་དབང་འོག་ཏུ་བསྡུས་པར་གྲགས་པའི་བོད་ཀྱི་རྒྱལ་པོ་ཁྲི་སྲོང་ལྡེའུ་བཙན། གནམ་འོག་གི་ཕྱེད་ཀ་ལ་དབང་བར་བསྔགས་པའི་སོག་པོའི་ཇང་གི་སི་ཁན་གྱི་གདུང་རྒྱུད་གོ་དན་དང་ཀུབ་ལི་ཁང་སོགས་ཡིན།
སྟོན་པ་བཅོམ་ལྡན་འདས་ཀྱི་གསུང་ལས་བདུད་བཏུལ་དང་། དགྲ་བཅོམ་པ། དགྲ་ལས་རྒྱལ་བ་སོགས་ཀྱི་ཐ་སྙད་གང་ཞིག་ཡིན་ཡང་འཇུག་ཡུལ་དངོས་ནི་རང་རྒྱུད་ཀྱི་ཉོན་མོངས་པ་ལ་དགྲ་ཡི་ཐ་སྙད་སྦྱར་བ་མ་གཏོགས་ཕྱིའི་དགྲ་བོ་ལྟ་བུར་གཏན་ནས་མི་འཇུག ཡིན་ན་ཡང་དམིགས་བསལ་ཞིག་ལ་དཔལ་དུས་ཀྱི་འཁོར་ལོའི་སྐབས་སུ་བྱུང་བའི་རིགས་ལྡན་དྲག་པོ་ལྕགས་ཀྱི་འཁོར་ལོ་ཅན་གྱི་དམག་གིས་ཀླ་ཀློ་འཇོམས་པར་གསུངས་པ་དེ་ནི་ནང་གི་ཉོན་མོང་པའི་དགྲ་ཙམ་དུ་མ་ཟད་ཕྱིའི་དགྲ་བོ་སྟེ་མི་གསོད་རྟ་བསྒྱེལ་གྱི་གནས་ཚད་ཀྱང་མཐོན་པོ་ཞིག་བསྟན་འདུག་པས་ཁ་ཆེའི་ཇིཧཏི་དང་མཚུངས་ཆོས་མང་པོ་ཡོད། དེ་ནི་ནང་པ་སངས་རྒྱས་པའི་ཡིག་ཆ་ནས་དགྲ་བོ་ཞེས་པ་ཁ་གསལ་པོས་ཕྱིའི་དགྲ་ལ་ངོས་བཟུངས་བའི་སྐབས་ཡོད་པའི་ཡིག་ཆ་གཅིག་པོ་དེ་ཡང་ཡིན།
ཕྱོགས་གཞན་ཞིག་ནས་ཁ་ཆེ་བ་ཚོས་བཤད་བཞིན་པའི་དམ་པའི་དམག་འཁྲུགས་སམ་ཇི་ཧཏི་ཞེས་པའི་དམག་འཁྲུགས་དེ་དང་དུས་ཀྱི་འཁོར་ལོ་ལས་བྱུང་བའི་རིགས་ལྡན་དྲག་པོའི་དམག་གིས་ཀླ་ཀློ་འཇོམས་པར་གསུངས་པ་དེ་གཉིས་ལ་འདྲ་ས་ཧ་ཅང་མང་པོ་ཞིག་ཡོད། དེ་ཡང་དཔེར་ན་དམག་འཁྲུགས་དེ་སྙིང་རྗེས་ཀུན་ནས་བསླངས་པ་མ་གཏོགས་ཞེ་སྡང་གིས་ཀུན་ནས་བསླངས་པ་མ་ཡིན་པ། དེ་ཡང་རང་དང་ལྟ་བ་མི་མཐུན་པའི་དམག་གིས་བཙན་འཛུལ་གྱིས་རང་ཕྱོགས་ཀྱི་ཆོས་ལུགས་ལ་ཉམས་ཆག་གཏོང་བ་ལས་སྐྱོབ་ཆེད་ཡིན་པ། དམག་འཁྲུགས་དེ་གཙོ་བོར་ནང་གི་ཉོན་མོང་པ་འདུལ་བའི་ཐབས་ཡིན་པ་མ་པ་ཟད་ཕྱིའི་མི་གསོད་རྟ་བསྒྱེལ་གྱི་རིམ་པ་ཡང་གནང་ཡོད་པ། དམག་འཁྲུགས་དེ་ལས་རྒྱལ་རྗེས་སུ་ཡང་བསྐྱར་འཛམ་བུ་གླིང་ཞི་བདེའི་གོ་སྐབས་འབྱུང་བ། དེ་ཡང་ཡང་ནས་ཡང་དུ་འབྱུང་དགོས་པ་ཞིག་མ་ཡིན་པར་རང་གི་བསྟན་པ་དེ་ཉིད་ལ་ཉམས་ཆག་འཇིག་ཉེན་དངོས་ལ་ཐུག་སྐབས་སུ་དམག་འཁྲུགས་རྒྱག་དགོས་པ་སོགས་རེད།
ནང་པ་སངས་རྒྱས་པ་ཚོའི་ཁྲོད་དུ་དུས་འཁོར་གྱི་བཤད་སྟངས་འདིས་ཆབ་སྲིད་ཀྱི་ཐོབ་ཤོར་ཆེད་དུ་བེད་སྤྱད་ནས་ཤུགས་རྐྱེན་ཅུང་ཟད་རེ་ཡང་ཐེབས་མྱོང་བ་འདྲ། དེ་ཡང་སྔོན་དུས་སུ་རྒྱལ་དབང་སྐུ་ཕྲེང་བཅུ་གསུམ་པའི་མཚན་ཞབས་གནང་མྱོང་མཁན་སོག་པོའི་གྲྭ་བ་རྡོ་རྗེ་ཡིབ་ཟེར་བ་དེས་ར་ཤི་ཡ་ནིི་ཤམ་བྷ་ལ་ཡིན་པ་དང་ར་ཤི་ཡའི་གོང་མ་ཚར་ནི་རིགས་ལྡན་ཡིན་པས་རྒྱལ་དབང་སྐུ་ཕྲེང་བཅུ་གསུམ་པས་ཀྱང་ར་ཤི་ཡ་དང་མཉམ་འབྲེལ་བྱས་ན་ཀླ་ཀློ་བྷི་རི་ཁྲི་ཤི་ལས་རྒྱལ་ནུས་པའི་སྐུལ་མ་གནང་ཚུལ་ཡོད་པ་དང་། དེ་བཞིན་སོག་པོའི་དཔོན་པོ་ཚོའི་ཁྲོད་ན་ཡང་རིགས་ལྡན་གྱི་སྤྲུལ་བ་ཡིན་པར་འདོད་མཁན་ཡོད་པ་དང་། ཕྱི་ལོ་༡༩༣༠སྐོར་ལ་ཉི་ཧོང་གིས་ནང་སོག་ལ་བཙན་འཛུལ་བྱེད་སྐབས་སུ་ཡང་ཉི་ཧོང་གི་དམག་དཔོན་ཚོས་སོག་པོ་ཚོའི་བློ་སྣ་འགུགས་ཆེད་དུ་ཉི་ཧོང་ནི་ཤམ་བྷ་ལ་ཡིན་ཚུལ་བཤད་མྱོང་བ་སོགས་རེད།
དགེ་འདུན་ཆོས་འཕེལ་གྱི་གཏམ་རྒྱུད་གསེར་ཐང་དུ་དུས་འཁོར་རྩ་རྒྱུད་ལས་རྡི་ལི་རྒྱལ་པོའི་མཁར་རྫོང་གི་མིང་འབྱུང་ཚུལ་ཞིག་ཀྱང་གསུངས་ཡོད་པ་དྲན། གཅིག་བྱས་ན་དུས་ཀྱི་འཁོར་ལོ་འདི་རྒྱ་གར་དུ་ཁ་ཆེའམ་མུ་སི་ལེམ་གྱི་ཆོས་ལུགས་པའི་བཙན་འཛུལ་སླེབས་ནས་ནང་པ་སངས་རྒྱས་པའི་ཆོས་ལུགས་ཉམས་ཉེས་སུ་བཏང་ཕྱིན་དུ་མུ་སི་ལེམ་པ་ཚོར་འཇིགས་སྣང་སྐུལ་ཆེད་དམ་ནང་པ་སངས་རྒྱས་པ་ཚོར་སྙིང་སྟོབས་སྐྱེད་ཆེད་དུ་བརྩམས་པ་ཞིག་དང་། རིགས་ལྡན་གྱིས་ཀླ་ཀློ་འཇོམ་པའི་དམག་འཁྲུགས་སོགས་ཀྱང་ཁ་ཆེའི་ཇིཧཏི་ལ་དཔེ་བཀབ་ཀྱིས་བཟོས་པ་མིན་པའི་ངེས་པ་མི་འདུག སྤྱིར་ན་དུས་འཁོར་ལས་གསུངས་པའི་ཀླ་ཀློ་ཞེས་པ་དེའི་སྐད་དོད་ལེགས་སྦྱར་དུ་ཡོད་པ་དེ་ནི་འཇུག་ཡུལ་ཁ་ཤས་ཡོད་མོད་མཚམས་རེར་ཁ་ཆེབའམ་མུ་སི་ལེམ་པ་ལ་འཇུག་པ་དང་། མཚམས་རེར་དུ་རུ་ཥ་པ་སྟེི་ནུབ་དང་བྱང་གི་ཕྱོགས་ཀྱི་བཙན་འཛུལ་བའི་སྤྱི་མིང་ལྟ་བུ། མཚམས་རེར་ལེགས་སྦྱར་གྱི་སྐད་མི་ཤེས་མཁན་སོགས་ལ་འཇུག་པ། མཚམས་རེར་རྒྱ་གར་བ་མ་ཡིན་པ་ཚང་མར་འཇུག་པ་ལྟ་བུ་ཞིག་རེད། ཡིན་ན་ཡང་དུས་འཁོར་ལས་གསུངས་པའི་ཀླ་ཀློ་ཞེས་པ་དེ་ཁ་ཆེ་མུ་སི་ལེམ་པ་བ་ཁོ་ན་ལ་འཇུག་པ་འདྲ་བས་དུས་འཁོར་འདི་ཁ་ཆེ་མུ་སི་ལེམ་དང་འབྲེལ་བ་ཆེན་པོ་ཞིག་འདུག དེར་བརྟེན་མ་འོངས་པར་དུས་འཁོར་རྩ་འགྲེལ་འདི་དག་ཤ་གཟུགས་ཟ་རྐྱང་མ་ཡིན་པར་སློབ་སྦྱོང་ཞིབ་འཇུག་གཏིང་ཟབ་མོ་ཞིག་བྱེད་དགོས་པ་ཡང་གལ་ཆེན་པོ་རེད།