འཇམ་དབྱངས་སྦྱིན་པ།
གཅེས་པའི་སྤུན་ཆུང་སངས་རྒྱམ་དང་སྐལ་རྒྱམ་གཉིས་ཀྱི་དྲུང་དུ།
ཡིད་སྐྱོའི་གནས་ཚུལ་དེ་ཐོས་ནས་བཟུང་སྤུན་ཆུང་གཉིས་ཡང་ཡང་སེམས་ངོར་འཆར། ལོ་ལྟར་དགག་དབྱེའི་ཤིང་སློང་ཞེས་ཁྱེད་ཅག་གཞོན་པ་ཚོ་འུར་ལངས་ས་དེས་དེ་རིང་དཀའ་ངལ་འཕར་མ་ཞིག་སྣོན་གྱི་འདུག་གམ། ང་ཡང་ཉིན་འདི་འགར་ཟུར་དུ་ཐོན་ཏེ་ར་སྐོར་དབེན་ས་ཞིག་ན་བསྡད་ཡོད། སེམས་གསོ་ཞིག་ཞུ་འདོད་སྙིང་ནས་འཕྱུར་ཡང་ཁ་པར་འདིའང་ཁོ་བ་ཅག་གིས་གཡུང་ལ་ཕབ་ཟིན་པས་ངང་སྒུག་ཙམ་བྱེད་པ་ལས་ཐབས་ཅི། འཕྲིན་ཐུང་ཞིག་བྲིས་ཀྱང་འབྱོར་མིན་ནི་ཅི་ཆ།
སྤྱིར་ན་ལོ་ཆུང་ཚོར་ཚོར་བ་རྣོ་ཞིང་། ཁྱེད་གཉིས་མགོར་མི་ཚེའི་སྡུག་བསྔལ་ལྷུང་བའང་ཐོག་མ་ཡིན་པས་ང་ཚོ་ལས་བསྲན་དཀའ་བ་ཏན་ཏན་ཡོད་སྲིད་མོད། ད་མཚམས་བདུན་རེ་གཉིས་འདས་ཟིན་པས་ཅུང་དྲག་ཙམ་འདུག་གམ།
ད་ནི་བྱམས་པོའི་ངག་དང་འཛུམ་པའི་མདངས་ཀྱིས་འཁྱུད་དེ། ཨ་མའི་་་་་ཞེས་ཁྱེད་གཉིས་ལ་ཉིན་ཤས་རེ་ནས་སྐོར་རྒྱག་མཁན་དེ་མེད་པས་རྒྱ་སྒོར་ཅེར་ནས་མ་བལྟ། ལྷག་དོན་མེ་ལྕེ་དམར་པོ་དེར་མ་བལྟ། དེས་ཁྱེད་གཉིས་ཀྱི་སེམས་པ་བསྲེག་ངེས།
དྲན་སླ་ཞིང་བརྗེད་དཀའ་བའི་བྱུང་བ་དག་ནི་འཇའ་ཚོན་གྱི་ཟོལ་གྱིས། གློག་བརྙན་གྱི་ཚུལ་དུ་མིག་ལ་འཁོར་ཞིང་ཞེ་ལ་ཐོགས་པ་ནི་ཆོས་ཉིད་ཡིན་ཡང་། སེམས་པ་བརླན་ནས་མ་འདུག དེས་ཁྱེད་གཉིས་ལ་མིག་ཆུ་སློང་སྲིད།
ཧ་ཅང་བཟོད་དཀའ་བའི་དུས་ཚོད་དེར་ཇག་པ་སྐོར་ཅིག་ཁྱིམ་ལ་བརྒྱུགས་ནས་དྲོད་མ་ཡལ་བའི་ཨ་མ་ཕྲོགས་པ་བདེན་ཡང་། དེ་ཚོར་ཁོང་ཁྲོ་དང་འཚེ་བ་མ་བྱེད། དེས་ཨ་མའི་ཐུགས་དགོངས་དཀྲུག་ངེས། ཡང་གཅིག་བཤད་ན་དེ་ནི་ང་ཚོའི་ལས་མ་ཡིན་ལ། འུ་ཅག་ཆོས་ལྡན་པའི་འཐབ་རྩོད་ཀྱི་ས་ཐིག་ལས་ཀྱང་རིང་ནས་འགོངས་ཡོད།
ཨ་མས་ཁྱེད་གཉིས་བཞག་ནས་སོང་བར་དྲིན་ཆུང་དུ་ནམ་ཡང་མ་བསམ་ཞིག ཁྱེད་གཉིས་བཞག་ནས་འགྲོ་བ་ནི་ཨ་མས་གང་ལས་ཀྱང་བཟོད་དཀའ། ཨ་མས་ཁྱེད་གཉིས་གཅེས་གཅེས་གཞན་གྱིས་མི་གཅེས། ཧ་ལམ་སོལ་བ་ཞིག་གི་གཟུགས་ལ་གྱུར་ནས་ཀྱང་ཁྱེད་གཉིས་ལ་ལྡིང་སྐོར་བརྒྱབ་ཡོད། འོན་ཏེ། ཨ་མས་མཐོང་བ་ནི་འཛམ་བུའི་གླིང་ཡིན། ས་ཡ་དྲུག་ཡིན། མཚོ་རླབས་བཞིན་འཕྱུར་ཡོང་བའི་ཧན་མི་རིགས་ཡིན། ཟོང་འཕེན་བཞིན་འདེད་ཀྱིན་པའི་ཁོག་རྩིས་ནག་པོ་ཡིན། ད་དུང་གོ་མེད་ཚོར་མེད་དུ་ལུས་པའི་ང་ཚོའང་ཡིན།
ཨ་མ་དང་ཨ་མའི་རིགས་ནི་ང་ཚོ་ཐུན་མོང་གི་ཚབ་ཏུ་བཞེངས་པའི་ཧ་ཅང་ཛ་དྲག་གི་བརྡ་ཐོ་དམར་པོ་ཞིག དེས་ན་ཁྱེད་གཉིས་ཀྱིས་སྤོབས་སེམས་བསྐྱེད་ལ་དཀའ་ངལ་སྟོབས་ཤུགས་སུ་སྒྱུར་པར་གྱིས།
མཐར་དོན། ད་ནི་ཁྱེད་གཉིས་ཀྱང་མི་ཆུང་བས་རང་ཉིད་ལོ་རྒྱུས་ཀྱི་མི་སྣ་ཞིག་ཡིན་པ་སེམས་ལ་བཟུང་ནས། དུས་ཚོད་ཆུ་ཟོས་སུ་མི་གཏོང་བར་གཙོ་བོ་རང་འཁྲིའི་བསླབ་པ་སློབ་གཉེར་ལ་གང་ཐུབ་བརྩོན་པ་གནང་རྒྱུ་ལས་ལྷག་པའི་ཨ་མའི་རེ་བ་བསྐང་རྒྱུ་དང་དྲིན་ལན་འཇལ་རྒྱུ་གཞར་ཡང་མེད་ལ། དེ་ལས་ལྷག་པའི་གངས་ཅན་པའི་སྤྱི་དོན་གཉིས་པ་ཞིག་ཀྱང་མེད་པ་ཐུགས་མངའ་མཛོད།
ཅེས་ཆུང་ནས་འདྲིས་ཤིང་གཅེས་པའི་སྤུན་ཆུང་གཉིས་ལ་ཕུ་བོ་འཇམ་དབྱངས་སྦྱིན་པས་འཕགས་ཡུལ་ལྷོ་ཕྱོགས་དཔལ་ལྡན་འབྲས་དཀར་སྤུངས་པ་དང་ཁ་ཐག་མི་རིང་ཞིང་། ར་སྐོར་དུ་ངང་ལག་དང་ཎ་རེས་ཡཱའི་སྡོང་བོ་མོད་སའི་དབེན་གནས་ཞིག་ནས་བོད་རྒྱལ་ལོ༢༡༤༢/༨/༤དང་། ཕྱི་ལོ༢༠༡༥/༩/༡༧ ཉིན་སེམས་ཚོར་གྱིས་བཏེགས་ཏེ་སྤྲིངས་པ་
དགེའོ།། །།
དྲག་ཏུ་འཕར་བཞིན་པའི་སྙིང་དམར་བོའི་དབུས་ནས་ཟུག་གཟེར་ལངས་ཤིང་། འདྲེན་བྱེད་ཟུང་ལས་དབང་མེད་ཆུ་ཐིགས་བབས་སོང་། གོ་ལའི་ཁྱོན་དུ་སེམས་ལྡན་ཡོད་ཚད་པོས་རང་གི་ཨ་མར་མ་གཅེས་ཤིང་། བུ་ཕྲུག་གིས་ཨ་མ་བྲལ་ཕོད་པ་ཞིག་གང་ན་ཡོད། ངོ་མ། བདག་ཅག་གི་ལས་ངན་པོ་འདི་དུས་ནམ་ཞིག་ཏུ་ཟློག་གམ།
ལོ་ལྔ། བཅུ། ཡང་ན་དུས་གཏན་དུ། འོན་ཀྱང་བདག་ཅག་ལ་གོད་ཆགས་དང་རྐྱེན་ངན་བློ་ཡུལ་ལ་གཤོང་དཀའ་ཞིང་བཟོད་དཀའ་བ་ཇི་སྙེད་ཅིག་བྱུང་དང་འབྱུང་གིན་གདའ་ནའང་། ཁྱད་ནོར་བྱམས་སྙིང་རྗེ་དང་། བཟོད་པ་སོགས་ཀྱིས་གཞོམ་པ་ནི། མཉམ་མེད་བུ་རམ་ཤིང་བས་བདག་ཅག་ལ་སྩལ་བའི་ལེགས་སྐྱེས་བླ་མེད་དུ་ཁུམས།
ཀློག་གིན་ཀློག་ཀིན་སེམས་པ་ཧ་ཅང་སྐྱོ་སོང་། མ་མེད་བྱིས་པ་ཚོའི་སྡུག་བསྔལ་ནི་ཇི་འདྲའི་བཟོད་པར་དཀའ་བ་ཞིག་ཡིན་ཨང་། གདུང་སེམས་མཉམ་བསྐྱེད་ཞུ་རྒྱུ་ལས་གཞན་གྱི་བྱ་ཐབས་ཅི་ཡང་མི་འདུག
དཔའ་མོ་བཀྲ་ཤིས་སྐྱིད་ལགས་ཀྱི་བུ་ཕྲུག་ཚོ་ནི་ང་ཚོ་བོད་མི་ས་ཡ་དྲུག་གི་བུ་ཕྲུག་ཀྱང་ཡིན། མ་ཡུམ་ཁོང་གིས་སྐུ་ལུས་དམར་པོ་མེ་རུ་བསྒྲོན་པའང་རང་ཅག་ཁ་བ་ཅན་པའི་བདེན་དོན་ཞིག་གི་ཆེད་ཡིན། ཁོང་ཚོའི་མི་ཚེའི་མདུན་ལམ་དང་ཤེས་ཡོན་སླ྄ོབ་སྦྱོང་སོགས་ཀྱི་ཐད་ང་ཚོ་བོད་མི་ཚོས་ཕན་ཐོགས་ངེས་པར་དུ་སྒྲུབ་དགོས་པ་ང་ཚོ་ཚང་མའི་འགན་འཁྲི་ཡིན་ནོ།།