གླིང་གཅེར་བུ།
དཔལ་ཡོན་གྱི་ཡོ་ལངས་དང་མི་སེམས་ཀྱི་འཇིག་རྟེན།
______འཇུ་སྐལ་བཟང་གི་སྙན་ངག་(གྲོང་ཁྱེར)་ལ་མྱོང་བའི་ཕྲན་དཔྱད།
ཀློག་པ་ཙམ་གྱིས་ཡིད་ངོར་དོགས་འཆར་གྱི་སྣང་བརྙན་མང་པོ་ཞིག་འཚང་ཡོང་བའི་མཚོན་དོན་རང་བཞིན་ཅན་གྱི་སྙན་ངག་འདི་ནི། ཧ་ཅང་གནས་ལུགས་ཀྱི་གཏིང་ཚད་ཟབ་ཅིང་སྙན་ངག་རང་ངོས་ཀྱི་ཤོང་རྒྱ་ཆེ་བ། འགལ་འདུའི་རྣམ་པ་རྒོད་ཅིང་དང་འགྱུར་བའི་གཤིས་ཤིག་གཙོ་བོར་བཟུང་ནས་བྲིས་ཡོད་ལ། ནང་དོན་གྱི་ཆ་ནས་ཀྱང་འགྱུར་བའི་ངོ་བོ་ཞིག་གི་གཟུགས་སུ་གྲུབ་པར་བྱས་པའི་སྙན་ངག་འདི་ནི་མཚར་སྣང་བསྐྱེད་ཅིང་ཡུན་གྱིས་བསམ་ན་དོན་ལ་གནས་པ་ཞིག་ཡིན་ཏེ།
དེ་ཡང་གྲོང་ཁྱེར་ཅན་དང་གྲོང་ཁྱེར་དུ་འགྱུར་བ་ནི་དུས་རབས་འདི་དང་མི་རབས་འདིའི་མཚོན་དཔེ་ཞིག་ཏུ་གྱུར་ཡོད་པ་ལྟར། རྩོམ་པ་པོས་གྲོང་ཁྱེར་ཞིག་གི་སྣང་བརྙན་དང་གྲོང་ཁྱེར་གྱི་མིའི་འཚོ་བ་དང་དེ་ཡི་ངོ་བོ་དང་འགྱུར་བ་བརྗོད་བྱར་བཟུང་སྟེ་དུས་རབས་དང་མི་རབས་ཡང་ན་གྲོང་ཁྱེར་དང་གྲོང་གསེབ་ཀྱི་ཁྱད་པར་དང་དེ་ལས་ཀྱང་གནའ་རབས་དང་དེང་རབས་བར་གྱི་འགྱུར་ལྡོག་ཞིག་འགྲེལ་བཞིན་ཡོད།
གྲོང་ཁྱེར་ཅན་དང་གྲོང་ཁྱེར་ཅན་དུ་འགྱུར་བ་ནི་མ་གཞི་རྩོམ་པ་པོས་མི་སྡུག་པ་ཞིག་དང་མི་ཡག་པ། དཔེར་ན། རྩོམ་པ་པོས་ཐོག་མར་གྲོང་ཁྱེར་གྱི་རྣམ་པའམ་སྣང་བརྙན་འབྲི་སྐབས་ཁ་རླངས་དང་ལུས་དྲོད་ཀྱིས་བཅུན་པ། འདོན་ཡོན་གྱི་ངོ་བོ་ན་ཡོད་པ། གྲོང་ཁྱེར་གྱི་མི་ཚོགས་ཀྱང་ཁ་ལུད་ཀྱི་གཟུགས་ཀྱིས་བཞུར་བཞིན་པའི་སྣང་བ་སོགས་ང་ཚོའི་སྣང་ངོར་གཞར་ཡང་མི་སྡིག་པའི་ངོ་བོར་བཅོས་ཡོད་པ་རེད་ལ།
དེ་བཞིན་སྙན་ངག་འདིའི་མགོ་ལུས་ཧྲིལ་བོ་འགྱུར་བའི་ངོ་བོ་འགྱུར་བ་དང་འགལ་བའི་ལས་སུ་བཅོས་ཤིང་འགྱུར་བ་དེ་ཡང་མི་སྡིག་པ་ཞིག་དང་ཡག་པོ་མིན་པ་ཞིག་གི་ངོས་ནས་བྲིས་ཡོད་པ་རེད། དཔེར་ན། ཆུ་ཕྲན་དང་རྩ་ལྗང་བཞག་ནས་ཨར་འདམ་དང་རྣོ་ལྕགས་ཀྱི་བཙོན་ལ་ཚུད་པ། འདང་རྒྱག་བྲལ་བའི་མགོ་བོ་མང་པོས་ཞབས་བྲོ་ཇི་ལྟར་བརྒྱབ་ཀྱང་མཇུག་མཐར་ཐམས་ཅད་ཤོར་བའི་སྐྱོ་སྣང་ཙམ་ལས་མིན་པ། མཐའ་ན་མི་དག་གི་ཀུན་སྤྱོད་ཀྱི་རྣམ་གཞག་དེ་ཡང་གཞོན་ནུ་མའི་ལྭ་བ་ལྟར་མགོ་མཇུག་བྲལ་བ་ཞིག་ཏུ་འགྱུར་བཞིན་པ།
ཡོད་ཚད་འཕྲུལ་ལས་ཅན་དུ་གྱུར་བའི་ཤུལ་ན། མི་རྣམ་འཕྲུལ་ཆས་ཀྱི་བྲན་དུ་གྱུར་ཏེ་ཐོབ་ཤོར་ཞིག་ལ་བརྣག་ཅིང་འདང་རྒྱག་ལྕི་མོ་ཞིག་དྲུད་ནས་ངལ་གསོ་མེད་པར་མི་ཚེ་ཧྲིལ་བོར་རྒྱུག་པས། རང་ཉིད་རང་ལ་དབང་བའི་ཁོར་ཡུག་གི་ཀི་སྒྲ་དང་ཧབ་ཆ་ཡང་བག་ལ་ཞ་ཞིང་ཡོད་ཚད་གཞུང་ལམ་གྱི་དྲ་བ་དང་རླངས་འཁོར་གྱི་རླབས་རྒྱུན་གྱིས་ཁུར་བས། མཐའ་ན་མི་སེམས་ཕན་ཚུན་ཡང་གཅིག་ཏུ་ཕྲད་པའི་སྐལ་བ་ཤིན་ཏུ་ཕྲ་བར་གྱུར་བས་ཡོད་ཚད་རེ་དོགས་འབའ་ཞིག་གི་སེམས་ངལ་གྱིས་བཟུང་ཡོད།
འདི་ལྟ་བའི་མི་ཚེ་ཞིག་ནི་འོག་ནས་མི་མང་པོ་ཞིག་ལ་འཚོ་བའི་སྤྲོ་སྣང་ཡལ་ཞིང་བླང་དོར་གྱི་རྣམ་གཞག་བྲལ་བ་སོགས་བྱུང་བཞིན་པ་ནི། རྩོམ་པ་པོས་དེང་རབས་ཅན་དང་གྲོང་ཁྱེར་ཅན། འཛུག་སྐྲུན་ཅན་ལ་འགྱུར་བའི་མཐའ་མཇུག་གི་གྲུབ་འབྲས་ཙམ་པོ་བ་ཞིག་ཡིན་པར་འགྲེལ་ཡོད་ལ། དཔེར་ན་གཱན་དྷི་སོགས་ཀྱིས་བཟོ་ལས་ཅན་དང་འཕྲུལ་ལས་ཅན་དེང་རབས་ཅན་གྱི་རྣམ་པར་འགྱུར་ཞིང་བསྒྱུར་བ་ནི་འགྲོ་མིའི་རང་ཉིད་ལ་བཙོན་ར་ཞིག་བཟོ་སྐྲུན་བྱ་བཞིན་ཡོད་པ་སོགས་ཀྱི་སྡོམ་ཚིག་བཀོད་པ་ལྟར། མཐའ་མཇུག་རང་སྡུག་རང་གིས་ཉོ་བའི་ལས་ཁོ་ན་ལས་མིན་ཟེར་ཡོད་མོད།
ཏག་ཏག་བསམ་བློ་ཞིབ་མོར་བཏང་ན་དུས་ད་ལྟ་དུས་ཚོད་དེར་ཇི་བཞིན་སླེབས་ཡོད་པའི་ལས་སུ་གྲུབ་ཡོད་ཏེ། མི་སེམས་ཀྱི་ཚབ་མཚོན་འཕྲུལ་ཆས་ལ་བཅོལ་བས་མི་སེམས་ཀྱི་འབྲེལ་འདྲེས་ཡལ་ཞིང་ཕན་ཚུན་གྱི་ཡིད་ཆས་ཡལ་བ། འཛུགས་སྐྲུན་སོགས་ལས་གྲོང་ཁྱེར་ཡོད་ཚད་ཇེ་རིང་ནས་ཇེ་མཐོར་ཤིན་པས་ས་འགུལ་དང་འབྱུང་བཞི་ཅུང་ཙམ་འཁྲུག་པ་ནས་མི་སྲོག་མང་པོ་གྲངས་གར་མི་ཐེབས་པ་ལྟ་བུ་བྱུང་དགོས་པ་དག་ནི། དོན་དམ་པར་འདི་དག་ཡོད་ཚད་ང་རང་ཚོས་རང་ཉིད་ཚོར་རང་ཤི་བརྒྱག་སའི་ལྕེབ་ཐག་བཟོས་བ་དང་མི་མཚུངས་སམ།
ཡོད་ཚད་ནས་ཡོད་ཚད་དེང་རབས་ཅན་ལ་ཕྱོགས་པའི་དུས་སུ། རྩོམ་པ་པོས་དེང་རབས་ཅན་གྱི་དཔལ་ཡོན་འཕེལ་རྒྱས་དང་དེས་སྐྱེད་པའི་མཇུག་འབྲས་ལ་སྡོམ་ཚིག་ཅིག་བརྒྱབ་ཡོད་འདུག་ལ། དེ་བས་ད་དུང་སྙན་ངག་འདིའི་ཁྱད་ཆོས་གཙོ་བོ་ནི་སྙན་ངག་གི་བརྗོད་དོན་གྱི་ཤོང་རྒྱ་ཆེ་བ་དང་མཚོན་དོན་རང་བཞིན་གྱི་འབྲི་ཐབས་སྤྱད་ཡོད་པ། གཏིང་ཟབ་པའི་གནས་ལུགས་ཤིག་སྣ་བརྙན་རང་བཞིན་གྱིས་འགྲེལ་ཡོད་པ། ཀློག་པ་ཙམ་གྱིས་དོགས་སྣང་གི་འཇིག་རྟེན་ཞིག་ཅི་བཞིན་ཡིད་ངོར་འཚང་ཡོང་བའི་སྒྱུ་རྩལ་གྱི་འབྲི་ཐབས་ཁྱད་པར་བ་ཞིག་སྤྱད་ཡོད་པ་དེའོ།
༢༠༡༥/༤/༢༦/