བསྟན་འཛིན་རབ་དགའ།
བདེན་པའི་གད་རྒྱངས་བསྐལ་པའི་མེ་དཔུང་གིས།།
ངན་རྟོག་བྱེ་མའི་མཁར་རྫོང་སྟོང་ཕྲག་སྲེག།
ཁྲེལ་གཞུང་འགྱེལ་བའི་འཐེང་པོི་ཁྱུ་དང་ཁྱུ།།
ཁྲོམ་ལ་གཅེར་བུར་དེད་པའི་ལྟད་མོ་ལ།།
གུས་བསྟོད་མཐེ་བོང་རི་བོ་ནམ་མཁར་བརྩེགས།།
སྲིད་སྐྱོང་ཁྲི་ལ་འཁོད་པར་རྟེན་འབྲེལ་ཞུ།།
ཆུ་ངན་ལམ་ཤོར་བཞུར་རྒྱུན་ཐག་སེར་བཅད།།
ཇུས་གཞི་ངན་པའི་སྙིང་རྩ་དུམ་སེར་གཏུབ།།
མུན་ནག་འབྲེལ་བ་མང་པོའི་འགྲོ་འོང་བཀག།
སྤྱི་དོན་སྤྱི་བོས་བཏེགས་པའི་ཕེབས་སྟངས་ལ།།
ཡོངས་ཀྱིས་བསྔགས་བརྗོད་མེ་ཏོག་ཆར་དུ་བསྙིལ།།
སྲིད་སྐྱོང་ཁྲི་ལ་འཁོད་པར་རྟེན་འབྲེལ་ཞུ།།
ཇུས་དང་རྒྱབ་ལྗོངས་སྦྲགས་པའི་གཏམ་བཤད་དང་།།
འཆར་སྣང་འཆར་གཞི་ཕྱི་གསལ་ནང་གསལ་བ།།
དམངས་ཀྱི་སེམས་ངོར་བརྐོས་པའི་ཟབ་ཚད་དང་།།
སྙན་པ་ཕྱོགས་བཞིར་འཕྱུར་སྟངས་ཡིད་འོང་བ།།
འགྲན་གྱི་དོ་ཟླ་མེད་པའི་སྟངས་སྟབས་བཅས།།
སྲིད་སྐྱོང་ཁྲི་ལ་འཁོད་པར་རྟེན་འབྲེལ་ཞུ།།
དྲང་བདེན་གཤིས་ཀ་སྲོག་ལ་ཞུགས་པ་ཡི།།
དཔའ་ངར་རྣོན་པོས་རྫུན་གྱི་རྐང་པ་སྟོང་།།
གཏུབ་པའི་གླེན་པ་རྨོངས་པ་བརྒྱ་འདེད་ཀྱིས།།
བདེན་པའི་ལམ་སྣེར་གོམ་པ་སྤོ་སྟངས་བསླབ།།
ཐམས་མཁྱེན་པ་དགྱེས་པའི་སྲི་ཞུ་བ།།
སྲིད་སྐྱོང་ཁྲི་ལ་འཁོད་པར་རྟེན་འབྲེལ་ཞུ།།
སྔོན་གྱི་བྱུང་བ་གླེང་བའི་དྲན་པ་གསལ།།
ད་ལྟའི་གནས་སྟངས་མཐོང་བའི་གཏིང་མཐའ་གསལ།།
མ་འོངས་འཆར་གཞི་བཀོད་པའི་རིམ་པ་གསལ།།
ཕྱི་གསལ་ནང་གསལ་འོད་ཀྱི་གོང་བུ་ཞེས།།
གཅེས་ཤིང་བརྩེ་ཞིང་རེ་བས་མཐོར་བཏེགས་ནས།།
སྲིད་སྐྱོང་ཁྲི་ལ་འཁོད་པར་རྟེན་འབྲེལ་ཞུ།།
ཉེན་ཁའི་འཕྲང་ལམ་གཤགས་པའི་ལམ་ཁ་བསྟན།།
ཉམས་རྒུད་དོང་ཁ་གཅོད་པའི་བྱེད་སྟངས་བསྟན།།
དགོས་མེད་འཕྱོར་གོས་དབྲལ་བའི་ཐབས་བྱུས་བསྟན།།
ཀུན་དགེ་ཡར་རྒྱས་ཞིང་ལ་བགྲོད་སྟངས་བསྟན།།
མ་འོངས་རེ་བར་གོམ་པ་སྤོ་སྟངས་བསྟན།།
སྲིད་སྐྱོང་ཁྲི་ལ་འཁོད་པར་རྟེན་འབྲེལ་ཞུ།།
སྤྱི་སྙོམས་དྲང་བདེན་བྱེད་པའི་ལམ་ཞིག་བསྟན།།
ནུས་པ་མཉམ་སྤུངས་བྱེད་པའི་ཐབས་ཤིག་བསྟན།།
གོན་པ་མདུན་སྤོ་བྱེད་པའི་བྱུས་ཤིག་བསྟན།།
ཕྱོགས་དང་ཕྱོགས་ལ་ཡིད་ཆེས་རེ་བ་བསྐྲུན།།
བདེན་པའི་མི་བོ་རྒྱལ་བར་རྟེན་འབྲེལ་ཞུ།།
སྲིང་སྐྱོང་ཁྲི་ལ་འཁོད་པར་རྟེན་འབྲེལ་ཞུ།།
2021 ཟླ་ 4 ཚེས་ 14 དགེ་བ་ལའོ།།