སྟོང་ཉིད་མ། བྲག་འགོ།
ཕྲན་ལ་མཚོན་ན་ད་སྔོན་ཡན་ཆད་བར་སྒྱིད་ལུག་གི་དབང་དུ་ཤོར་དྲགས་པས་བཀླགས་མཆན་ཟེར་བ་ཞིག་འབྲི་བའི་སྲོལ་མེད་ལ་བྲིས་ཀྱང་མ་མྱོང་། དེ་བས་ཅི་ལྟར་འབྲི་དགོས་མི་ཤེས་ལ། གང་ལྟར་མཇུག་བསྡུ་དགོས་པ་ནི་དེ་བས་ཀྱང་ཝ་སྨུག་པའི་ནང་དུ་མགོ་འཁོར་བ་ནང་བཞིན་ནོ། །ཡིན་ནའང་སྔོན་ཆད་རང་གིས་མ་ཤེས་ས་མང་པོ་ཞིག་གིས་རྐྱེན་གྱིས་བསྒྲུབ་དགོས་པའི་བྱ་བ་མང་པོ་ཞིག་འཐུས་ཤོར་དུ་སོང་བས་ད་ལྟ་འགྱོད་ཀྱང་ཕྱིས་འདུག དེ་བས་ད་ཐེངས་འདི་འདྲ་ཞིག་འབྲི་འདོད་པ་ནི་ངའི་རྗེས་ཀྱི་སློབ་གྲོགས་ཚོ་ང་ལྟ་བུ་འགྱོད་པའི་ལམ་དུ་མི་ཕྱིན་པར་ཅུང་ཨེ་ཕན་ནམ་སྙམ་པའམ་རང་ཉིད་ཀྱི་ནོར་འཁྲུལ་ལ་འགྱོད་བཤགས་བྱེད་སྟངས་ཤིག་ཀྱང་ཡིན།
ཕྲན་ལ་མཚོན་ན་སློབ་ཆུང་ནི་མགོ་རྔ་མེད་པའི་རྨི་ལམ་ཞིག་དང་འདྲ་བར་ཀ་ཁའི་གོ་རིམ་ཙམ་ཡང་སྦྱངས་མ་ཐུབ། སློབ་འབྲིང་ནས་བཟུང་ཁྲལ་གསོད་སྤྱད་ཙམ་སྦྱངས་ཁུལ་བྱས་མོད། དེའང་སྦྱངས་དེབ་ཁོ་ན་ལས་དཔེ་དེབ་གཞན་ལ་བལྟས་པ་ནི་ཕར་ཆེར་མེད་ཟེར་ནའང་ཆོག སྐབས་དེར་དགེ་རྒན་ཡིན་ནའང་ཆོག་ཉེ་འཁོར་གྱི་མི་ཡིན་ནའང་ཆོག ཁོ་ཚོའི་མིག་ལམ་ན་ཐོབ་སྐར་ལས་གཞན་མེད་པའི་ཤུགས་རྐྱེན་དང་གཅིག མི་རང་ལ་གོ་རྟོགས་དང་བསམ་ཤེས་མེད་པ་སོགས་རྐྱེན་གང་མང་གི་རྒྱུགས་འབྲས་ནི་རང་ཉིད་ཀྱི་འཇོན་ནུས་ངོ་སྤྲོད་བྱེད་པའི་ཐབས་ལམ་ཉག་གཅིག་ཡིན་པའི་འདོད་བློ་སྲ་མཁྲེགས་ཅན་དེ་དམ་གྱིས་བཟུང་ནས་དུས་ཚོད་མང་པོ་ཞིག་སོས་བཏབ་ན་མི་ཟུག་ཅིང་། ལྕེས་བལྡགས་ན་མི་ཞུ་བའི་ཅི་ཞིག་གི་འདོད་བློ་ལ་གཞོལ་བའི་སློབ་དེབ་དག་ལ་མགོ་བོ་འཁོར་ནས་དུས་ཚོད་གཟད།
ཡིན་ནའང་ཕྱིར་འདང་ཞིག་བརྒྱབ་ན་ཚིག་དོན་མཁྲེགས་པོ་འགའ་ལས་ཀླད་ཁྱིམ་ན་ཅི་ཡང་མེད་པས་སྣང་ངོས་ཤིག་ལ་གསེར་སྲང་སྟོང་གིས་ཀྱང་མི་ཁུག་པའི་ལོ་དེ་དག་ལ་འོས་མེད་བྱས་སོང་བསམ་པའི་དངན་པ་ཞིག་དབང་མེད་དུ་ཤོར། དེ་བས་སློབ་མ་ཞིག་ལ་མཚོན་ན་སློབ་གསོའི་རྣམ་པའི་དབང་གིས་སྦྱང་བྱ་དག་ཀྱང་འཐུས་ཤོར་གཏོང་ག་ལ་ཉན། འོན་ཏེ་དེའི་ཞོར་དུ་བསླབ་ཕྱིའི་དཔེ་ཆ་བཀླག་རྒྱུ་ནི་ཤིན་ཏུ་ནས་ཀྱང་གལ་ཆེ་བར་རིགས།
གཞན་ཡང་དཔེ་ཀློག་བྱེད་སྐབས་དཔེ་ཆ་རིན་ཐང་ཅན་རེ་བདམ་རྒྱུ་ནི་ཤིན་ཏུ་གལ་ཆེ་སྟེ། དེང་སང་དཔེ་དེབ་སྣ་མ་སྣ་ཚོགས་ཤིག་ཆར་ཤུལ་གྱི་ཤ་མོ་བརྡོལ་བ་བཞིན་མང་བས་ཚང་མ་ལ་ནི་བལྟས་པས་མི་ཚར། དེ་བས་བཀོལ་སྤྱོད་ཀྱི་རིན་ཐང་ཆེ་ཞིང་རང་ཉིད་ཀྱི་ཆེད་ལས་དང་མཐུན་པའི་དཔེ་ཆ་རེ་ལ་བལྟ་རྒྱུ་ནི་དེ་བས་ཀྱང་གལ་བར་སྙམ། རྒྱུ་མཚན་ནི་དཔེ་ཆ་འདྲ་མིན་སྣ་ཚོགས་བལྟ་ཐུབ་ན་ལོས་བཟང་སྟེ་མི་ཚེ་ལ་ཚད་ཡོད་པས་དཔེ་ཆ་ཚད་མེད་ཅིག་ལ་ནི་བལྟ་མི་ནུས་པས་སོ། །
ད་ཐེངས་སྟེས་དབང་ཞིག་གིས་སྙན་ངག་ལ་འཇུག་པའི་ལམ་ཞེས་པའི་དཔེ་དེབ་ཅིག་ལག་ལ་འབྱོར་ནས་བཀླགས་རྒྱུ་བྱུང་ལ་དེ་དང་འབྲེལ་རང་གི་འདོད་ཚུལ་འགའ་ཞུས་ན་འདོད་སོང་། དཔེ་དེབ་འདི་ནི་འབད་མེད་ལྷུན་གྱིས་གྲུབ་པ་ཞིག་མ་ཡིན་ལ་གནམ་ནས་ལྟུང་བ་ཞིག་དང་ས་ནས་བརྡོལ་བ་ཞིག་མ་ཡིན་པར་རྩོམ་མཁན་ཁོང་གིས་ཐོག་མར་སློབ་པ་དང་སྦྱོང་བའི་གོ་རིམ། བར་དུ་སློབ་ཁྲིད་ཀྱི་ཉམས་མྱོང་། གཞན་དཔེ་དེབ་མང་པོ་ལ་ཟུར་བལྟ་སོགས་བྱས་པ་གཞིར་བཞག་བསྲེག་བཅད་བརྡར་བའི་གསེར་བཞིན་དུ་བཙག་ནས་བྱུང་བའི་འབྲས་བུ་སྟེ། ཁ་དམ་ཞིང་རྟོགས་དཀའ་བའི་ལྐོག་གྱུར་ཏུའང་མ་སོང་། གོ་རིམ་མེད་ཅིང་མགོ་རྔ་མཁྲེགས་པའི་ཉག་ཉོག་གི་གནས་སུ་ཡང་མ་གྱུར་པ། འཚོ་བ་དངོས་དང་ཡ་བྲལ་དུ་མ་སོང་བ། གོ་སླ་ཞིང་མཁས་ཆེན་གང་མང་གི་སྙན་ངག་གི་དཔེར་བརྗོད་གཞི་གཅིག་ཏུ་འདུས་པའི་སྙན་ངག་ལག་དེབ་སྟབས་བདེ་མོ་ཞིག་འདུག དེ་བས་ང་དང་ང་ལྟ་བུ་རིག་པའི་རྩལ་མེད་ཅིང་ལེ་ལོའི་སྐྱི་ལྤགས་མཐུག་པ་དག་ལ་མཚོན་ན་ནི་དཔེ་དེབ་འདིས་སྟབས་བདེ་བསྐྲུན་འདུག་བསམས།
གཞན་ཡང་གཞུང་གི་སློབ་གྲྭར་འགྲིམ་པའི་སློབ་མ་དག་མ་ལ་མཚོན་ན་དམའ་འབྲིང་ལོ་རིམ་དང་པོ་ནས་བཟུང་མཐོ་འབྲིང་བར་དཔེ་དེབ་སོ་སོའི་ནང་དུ་ཨ་ལགས་དུང་དཀར་ཚང་གིས་མཛད་པའི་ཚིག་རྒྱན་རིག་པའི་སྒོ་འབྱེད་དགོད་རྒྱུ་བཀོད་ཡོད་མོད། ཡིན་ནའང་དེབ་དང་པོའི་ནང་རྒྱན་འགའ་རེ་བསྒྲིགས། ཡང་གཞན་ཞིག་གི་ནང་འགའ་རེ་བཀོད། མདོར་ན་མ་གཞི་ཆ་ཚང་བའི་རིག་ཚན་ཞིག་འདི་ལྟར་ཡ་བྲལ་དུ་བཏང་བཞག་དུས། སྔ་མ་བསླབས་ནས་ཅུང་ཙམ་ཤེས་ཡོང་དུས་མཇུག་མེད་པ། ལོ་གཅིག་ཙམ་ཕྱིན་དུས་ཡང་དེའི་འཕྲོ་བཀོད་ཡོད་ཀྱང་སྔོན་མ་དེར་གསལ་ཁ་མེད་པར་གྱུར་པས་གཅིག་སྦྱངས་ཁུལ་བྱས་ཀྱང་མཇུག་མཐར་གྲུབ་འབྲས་ཅི་ཡང་མེད་པ། དེ་ལྟར་ཡིན་དུས་སྙན་ངག་ལ་སྦྱང་བ་འདོད་མཁན་རེ་ཡིན་དུས་སློབ་དེབ་ཏུ་བཀོད་པ་ཙམ་གྱིས་ནི་ཅི་ཡང་མི་ཡོང་བར་གཞི་འཛིན་ས་ཨ་ལགས་དུང་དཀར་གྱི་ཚིག་རྒྱན་རིག་པའི་སྒོ་འབྱེད་གཙོར་བྱས་སྙན་ངག་གི་ལག་དེབ་འགའ་རེ་ལ་གཟིགས་རྒྱུ་ནི་ཅིས་ཀྱང་གལ།
སྙན་ངག་ལ་འཇུག་པའི་ལམ་ཞེས་པའི་དེབ་འདི་ནི་རྩོམ་མཁན་ཁོང་གིས་ཆེད་དུ་ཆེད་སྦྱོང་འཛིན་གྲྭའི་སློབ་མ་དག་ལ་ཁ་གཏད་པ་ཞིག་ཡིན་འདུག་ལ། དེ་ལས་ཀྱང་གལ་ཆེ་བ་ཞིག་ནི་དཔེར་བརྗོད་དུ་རྗེ་བཙུན་མི་ལ་རས་པའི་མགུར་དང་ང་ཚོ་དང་ཤ་འདྲིས་པགས་འདྲིས་སུ་གྱུར་བའི་དམངས་ཁྲོད་དུ་དར་བའི་གླུ་གཞས་སོགས་བོད་མི་རིགས་རང་གི་རིག་གནས་ཀྱི་རྐང་རྩ་དང་མཐུན་པའི་གོ་བདེ་ཁ་གསལ་ཞིང་འཐུས་ཚང་ཅན་ཞིག་ཏུ་སྣང་སོང་བས་ཤེས་རྟོགས་ཀྱི་མདུད་པ་མ་གྲོལ་ཞིང་བློ་གྲོས་ཀྱི་པདྨོ་མ་བཞད་པའི་ང་དང་ང་ལྟ་བུ་དག་ལ་མཚོན་ན་དཔེ་དེབ་འདི་ནི་སྟབས་བདེ་རིན་ཐང་ཅན་ཞིག་འདུག་སྙམ།
རྩོམ་ཡག་པོ་བྲིས་ཤག སློབ་སྦྱོང་བྱེད་པ་དེའང་ལྐོག་གྱུར་ནས་འགོ་མི་འཛུགས་རྒྱུ་དེ་གནད་འགག་རེད། བཙན་བྱོལ་ནང་གི་སློབ་ཕྲུག་ཚོར་ཐོག་མ་ལྐོག་གྱུར་ནས་འགོ་བརྩམས་ཡོད་ཙང་། ཅི་གང་མགོ་ཚོས་ཀྱི་མི་འདུག་ག བོད་ནང་ནས་ཡོང་མཁན་ཚོ་ག་འདྲ་ཡག་པོ་འདུག
སྔོན་རྒྱལ་ལོ་དོན་གྲུབ་ལགས་ནས་ཏིང་ཞོ་ཕེང་གི་རེ་འདུན་ལྟར་བོད་ནང་དགེ་རྒན་གཏོང་ཡ་མ་རེག་པ་ལའང་ཁག་མི་འདུག སྐབས་དེར་བཙན་བྱོལ་ནང་རྩོམ་འགོ་འཁྱོངས་མཁན་རྒན་པ་རེ་གཉིས་ཤིག་ལས་ཡོད་མདོག་ཁ་པོ་མ་རེད།