རྡོ་རྗེ་དབང་ཕྱུག
གཞིས་བཞུགས་པ་ཞིག་གིས་བོད་དུ་ནང་བསྟན་དར་རིམ་དང་ནང་ཆོས་ཀྱི་བསྟན་དོན་ལས་བརྩམས་པའི་དེབ་གཞི་གསར་པ་ཞིག་བསྐུར་འབྱོར་བྱུང་བ་དང༌། བྱེས་འཁོད་པ་ཞིག་ནས་དཔར་ཕུད་དུ་ཡིན་གནས་འཁོད་པའི་སྙན་ངག་གི་དེབ་ཅིག་བསྐུར་འདུག་པ་གཉིས་དུས་ཚོད་གཅིག་མཚུངས་ལྟ་བུར་ལག་སོན་བྱུང་དོན་བཞིན། དེབ་གཞི་དེ་གཉིས་བཀླགས་པའི་མཐའ་དོན་དུ། གཞིས་བྱེས་གཉིས་ཀྱི་ཁ་སྟབས་དང་བསམ་བློའི་སྨིན་ཚད་མི་འདྲ་བའི་ངོས་ཤིག་མཐོང་བར་གྱུར།
དེ་ཡང༌། ངས་ཐོག་མར་བཀླགས་པ་ནི། བོད་ནས་བསྐུར་འབྱོར་གྱི་དེབ་དེ་ཡིན་ཞིང༌། དེའི་ནང༌། ཡོངས་གྲགས་ཀྱི་ཤོད་བབ་ལས་བརྒལ་ཞིང༌། དེར་ཡང་གནས་ལུགས་དང་རྒྱུ་མཚན་གྱི་རྒྱབ་ལྗོངས་དང་བཅས་ཏེ། བོད་དུ་ནང་པའི་ཆོས་དར་བའི་དུས་ཚོད་ནི། གནམ་གྱི་ཁྲི་བདུན་གྱི་དུས་སུ་ཡིན་པར་སྒྲུབ་ནས་འདུག་པ་དེས། གནད་དོན་གཞན་ཞིག་དྲན་སོས་པར་བྱས་པ་སྟེ། དེ་ནི་དགྲ་བཅོམ་པ་ཉི་མ་གུང་པའི་རྣམ་ཐར་ནང༌། ལྷ་ཐོ་ཐོ་རི་གཉན་བཙན་ཡར་སྔོན་གྱི་སྐབས་ནས་བོད་དུ་ནང་པའི་བསྟན་པ་དར་སྐོར་གསལ་ནས་འདུག་པ་དེ་དང༌། གཞན་དེང་གི་ཉམས་ཞིབ་པ་ཚད་ཐུབ་ཁག་ཅིག་ནས། ཐོ་རུ་གཉན་བཙན་སྐབས་བོད་དུ་དམ་པའི་ཆོས་ཀྱི་དབུ་བརྙེས་པར་བཤད་པ་ནི། རྒྱལ་པོའི་ཕོ་བྲང་དུ་ནང་པའི་ཆོས་ཀྱི་བསྟན་པ་དབུ་བརྙེས་པ་དང༌། སྲོང་བཙན་སྒམ་པོའི་སྐབས་དར་བར་བཤད་པ་ནི་རྒྱལ་པོའི་ཕོ་བྲང་ངམ་གཞུང་ངོས་ནས་བདག་རྐྱེན་མཐུན་འགྱུར་གྱི་མགོ་འདོན་བྱས་པའི་བརྒྱུད་རིམ་ཅིག་ཏུ་བལྟ་བའི་རྒྱབ་ལྗོངས་དེ་རེད། འདི་ནི་དཔེ་མཚོན་ཙམ་སྟེ། འདི་ཙམ་ཞིག་གིས་གཞིས་ལུས་པ་དེས་བརྩམས་པའི་དེབ་ཀྱི་རིན་ཐང་ཆ་ཚང་བ་གསལ་འདོན་ག་ལ་ཐུབ་མོད་ཀྱང༌། དོན་དག་བྱེ་བྲག་པ་འདི་འདྲ་ཅི་བས་མང་པོ་ཞིག་སྤུངས་ཤུགས་ཆེ་ཐང་དུ་ལྡན་འདུག་སྟབས། ཤོག་བུ་རེ་རེ་ཀློག་གིན་ཀློག་ཀིན་ལ་བསམ་གཞིགས་མང་དུ་བྱེད་དགོས་པའི་གནད་འགག་རེ་རེས་ཀློག་འདུན་གྱི་ཡི་ག་ཆེ་ནས་ཆེ་རུ་ཕྱིན།
ད་དུང་ཕྱོགས་ངོས་གཞན་ཞིག་ནས་བཤད་ན། དེབ་དེའི་ནང༌། ནང་པའི་བསྟན་པ་བོད་དུ་དར་བ་དང་འཕེལ་བའི་བརྒྱུད་རིམ་འདི་ནི། བོད་ཀྱི་ལོ་རྒྱུས་དང་མི་རིགས་ཀྱི་བསམ་བློ་གོང་འཕེལ་གྱི་མཚོན་རྟགས་ཤིག་ཡིན་པ་ནས། བོད་འདིར་ཐུན་མོང་མ་ཡིན་པའི་ཁྱད་ནོར་ཞིག་ཡོད་པའང་འདི་ཉིད་ཁོ་ནར་ངེས་པ་ཡིན་སྟབས། མེས་པོ་གོང་མ་རྣམས་ཀྱིས་ལུས་སྲོག་ལོངས་སྤྱོད་དང་བཅས་པ་བློས་བཏང་གིས་འབད་སྒྲུབ་གནང་བའི་ཤུལ་རྗེས་མི་ནུབ་པ་ཞིག་བྱེད་དགོས་པ་ད་ལྟའི་མི་རབས་ཀྱི་འགན་དུ་འཁྲི་བའི་ལས་དོན་གཙོ་བོ་ཡིན་པར་གསལ་འདེབས་དང༌། དེ་བས་ཀྱང་འདས་པའི་ལོ་རྒྱུས་ཀྱི་བསླབ་བྱ་དང་ཉམས་མྱོང་གཞི་ལ་བཞག་ནས་མདུན་ལྗོངས་ལ་ལྟ་སྟངས་གླེང་སྐབས། ནོར་བུའི་ནོར་ངོ་འདི་བཞིན་སྐྱ་སེར་ཐུན་མོང་ནས་ཆོད་དགོས་པ་གལ་ཆེ་བ་དང༌། དེ་ཚུལ་ཇི་ཙམ་ཉམས་སུ་བསྟར་བས་བོད་མི་རིགས་ཀྱི་ཐུན་མོང་མ་ཡིན་པའི་ཁྱད་ཆོས་མང་པོ་ཞིག་རྒྱུན་སྤེལ་ཐུབ་པའི་ངོས་དང༌། དེར་ཡང་ཉེ་རབས་དང་དེང་རབས་ཀྱི་གནས་བབ་མང་པོ་ཞིག་དཔེ་མཚོན་དུ་བགྲངས་ནས་བསླབ་འདོམ་གནང་སྟེ། མདོ་དོན་མི་རིགས་འདི་དང་རིག་གཞུང་འདི་མི་ཉམས་ཡུན་གནས་ཀྱི་བསམ་འདུན་དོན་ཐོག་ཏུ་འཁྱོལ་བ་ཞིག་བྱེད་དགོས་ན། བོད་མི་མི་རེ་ངོ་རེས་རང་ཉིད་ཀྱི་འོས་འགན་ངོས་འཛིན་ཐུབ་པ་ནས་ལས་དོན་མཐའ་དག་གི་མགོ་འཛུགས་དགོས་པའི་གསལ་བཤད་ནན་ཏུར་དུ་གནང་ནས་འདུག
སྐབས་མཚམས་འདི་འདྲ་ཞིག་ལ། བྱེས་འཁོད་པ་ཞིག་ནས་དཔར་ཕུད་དུ་ཡིན་གནས་འཁོད་པའི་སྙན་ངག་གི་དེབ་དེ་ཡང་ཞིབ་ཚགས་པོས་ཐེངས་གཅིག་བཀླགས་པ་ཡིན། མགོ་ནས་མཇུག་བར་བཀླགས་པའི་མཐའ་མ་དེར། ནམ་རྒྱུན་གྱི་གོམས་སྲོལ་ལྟར་གང་བཀླགས་ཚར་བའི་དེབ་དེར་རིན་ཐང་ཅི་ཡོད་ཀྱི་བཀླགས་ཐོ་འདེབས་པའི་བརྒྱུད་རིམ་ནང༌། སྐབས་མཚམས་འགར་མ་རཻད་ལབ་རྒྱུ་མེད་པའི་ཚིག་གྲུབ་གང་འཚམ་ཞིག་འདུག་ཅིང༌། ལག་པར་གང་ཐེབས་དང་ཁ་ནས་གང་ཐོན་གྱི་ཐ་སྙད་མང་པོ་ཞིག་རྡོ་ཆག་བཙན་བསྒྲིགས་བྱས་ནས་འདུག་པ་ལས། གཞན་ནི་ཡིག་ནོར་གྱིས་ཁེངས་པའི་དེབ་འདི་བཞིན་སླད་ནས་བསྐྱར་ཀློག་གི་རིན་ཐང་ཅི་ཡང་མ་མཐོང་ཞེས་ཐོ་འགོད་བྱས་པ་ཡིན། དེ་ནི་ཉེ་བའི་ཟླ་ཤས་ནང་དེབ་གྲངས་སུམ་ཅུ་སོ་གཉིས་བཀླགས་པའི་མཐའ་མ་དང༌། བཀླགས་པས་དུས་ཚོད་ཆུད་འཛའ་བར་བྱས་པའི་དེབ་ཐོ་ལས་ཨང་དྲུག་པ་དེ་ཆགས་སོང༌། གནས་སྟངས་འདི་ནི་ངས་སྙན་ངག་ཀློག་སྟངས་མ་ཤེས་པས་ཡིན་ནམ་གང་ལྟར། ང་ཁྱོད་ལ་དགའ། མཛེས་མ། ཞེས་པ་ལྟ་བུའི་ཚིག་གྲུབ་དེ་དག་ནི་ངའི་ལྟ་སྟངས་ཀྱི་སྙན་ངག་ཆགས་མ་ཐུབ་པས་རེད། འདི་ལྟར་ལོ་འཁོར་མོ་གཅིག་གི་ནང་གང་བཀླགས་པའི་དེབ་ཐོར་བསྐྱར་ཞིབ་ཅིག་བྱས་པར། བོད་གཞིས་བྱེས་གཉིས་བར་དམིགས་ཕྱོགས་མི་འདྲ་བ་གཉིས་ཆགས་ནས་ཡོད་པའི་ངོས་འཛིན་ཐོབ་བྱུང་ལ། དེ་བས་ཀྱང་བོད་ཀྱི་ལོ་རྒྱུས་གླེང་རིམ་ནང༌། ཕན་ཚུན་དགྲར་འཛིན་གྱི་འདུ་ཤེས་ཤིག་ཀྱང་སླེབས་ཀྱིན་པ་སྟེ། ཉེ་བའི་ཆར་གསར་བཏོན་བོད་ཀྱི་ལོ་རྒྱུས་གླེང་བའི་དེབ་གཞི་༼བོད་ཀྱི་ལོ་རྒྱུས་རགས་རིམ་གཡུ་ཡི་ཕྲེང་བ༽རྩོམ་པ་པོ་ཆབ་སྤེལ་ཚེ་བརྟན་ཕུན་ཚོགས་ཀྱིས་བཅར་འདྲི་བརྒྱུད་རང་ཉིད་ཀྱི་བསམ་ཚུལ་བཏོན་པ་༼བོད་ལྗོངས་སློབ་ཆེན་རིག་དེབ་༽ནང་བཀོད་ཐོན་ལྟར་ན། ༼གཡུ་ཡི་ཕྲེང་བ༽ནི་བོད་རང་ལྗོངས་དྲིལ་བསྒྲགས་ལས་ཁུངས་ནས་བོད་ལྗོངས་སྤྱི་ཚོགས་ཚན་རིག་ཁང་དང༌། བོད་ལྗོངས་སྲིད་གྲོས། བོད་ལྗོངས་སློབ་གྲྭ་ཆེན་མོ་བཅས་ལ་ལྗོངས་ཡོངས་ཀྱི་ལས་བྱེད་པ་དང་རྒྱ་ཆེའི་མང་ཚོགས་ནང༌། ཁ་བྲལ་ལ་ངོ་རྒོལ་དང༌། མེས་རྒྱལ་གོང་བུ་གཅིག་གྱུར་གྱི་སྲིད་བྱུས་གཞི་རྩར་བཟུང་བའི་རྒྱལ་གཅེས་རིང་ལུགས་ཀྱི་སློབ་གསོ་གཏོང་བའི་རླུང་འཕྲིན་དྲིལ་བསྒྲགས་སློབ་གཞི་ཞིག་དགོས་པ་དང་དེའི་གཙོ་འགན་བོད་ལྗོངས་སྤྱི་ཚོགས་ཚན་རིག་ཁང་གིས་འཁྱེར་དགོས་པའི་བཀའ་ཕབ་པ་དང༌། དེ་རྗེས་རླུང་འཕྲིན་དྲིལ་བསྒྲགས་ཀྱི་སློབ་གཞི་དེ་གཞི་ལ་བཞག་པའི་ལོ་རྒྱུས་དེབ་གཞི་ཞིག་རྩོམ་དགོས་པའི་འགན་སྤྲད་པ་དང༌། དེ་ཡང་༼བོད་ཀྱི་སྲིད་དོན་རྒྱལ་རབས༽ལ་དགག་པ་བྱ་རྒྱུ་དམིགས་ཕྱོགས་གཙོ་བོར་བཟུང་འབྲེལ། ནང་ཁུལ་དུ་རྒྱལ་གཅེས་རིང་ལུགས་ཀྱི་སློབ་གསོའི་ཁ་ཕྱོགས་ལ་གཟས་པའི་ལས་འགན་སྤྲད་གནས་དང༌། དངོས་གཞི་རྩོམ་སྒྲིག་གི་བརྒྱུད་རིམ་ནང་དུའང༌། བོད་ཀྱི་སྔར་ཡོད་ཡིག་ཆ་གཙོ་བོར་བྱས་ཏེ་བྲིས་ན་འཐུས་རྒྱུའི་ཆོག་མཆན་ཞུས་ཐོབ་བཞིན་བརྩམས་པ་དང༌། དེ་བས་ཀྱང་བོད་འདི་བཞིན་མེས་རྒྱལ་གྱི་མངའ་ཁོངས་བསྙོན་དུ་མེད་པ་ཞིག་ཡིན་མོད་ཀྱང༌། ཡིག་འབྲུ་རེ་རེས་ཁུངས་སྐྱེལ་རྩ་འདེད་བྱ་དགོས་ན་དཀའ་ཚེགས་ཆེ་སྐོར་གྱི་དགོངས་ཚུལ་བཏོན་ཡོད་པ་ལྟ་བུ་རེད། འདི་ལྟར་ཆབ་སྲིད་ཀྱི་དགོས་མཁོ་ཞིག་གི་དབང་གིས། བོད་གཞིས་བྱེས་གཉིས་བར་མི་འདོད་བཞིན་དུ་ནང་ཁུལ་དགག་རྒྱག་གི་བརྒྱུད་རིམ་ཞིག་ཡོད་པར་གྱུར་སྟབས། ༼བོད་ཀྱི་སྲིད་དོན་རྒྱལ་རབས༽དང་༼བོད་ཀྱི་གནས་བབ༽གཉིས་ནི་བོད་དང་རྒྱལ་སྤྱིའི་སྤྱི་ཚོགས་ནང་བོད་དོན་གྱི་ཤུགས་ཆེན་པོ་བཟོས་དང་བཟོ་མུས་ཀྱི་དེབ་གཞིར་ངོས་འཛིན་དང་ཆབས་ཅིག་པར། རྩ་འཛུགས་རང་བཞིན་ལྡན་པའི་ཚོགས་ཆུང་ཆེད་འཛུགས་ཀྱིས་༼བོད་ཀྱི་ལོ་རྒྱུས་གོ་བབ་དཔྱད་ཞིབ་༽ཞེས་པའི་དེབ་སྟོད་སྨད་གཉིས་བཏོན་ཏེ་འགྲེམས་སྤེལ་བྱས་དང་བྱེད་མུས་སོགས་ཤིན་ཏུ་མང་བ་འདི་ཐད། བྱེས་འཁོད་པ་རྣམས་ནས་ཀྱང་བདེན་པ་གཞིར་བཞག་གི་ལན་འདེབས་ཀྱིས་རྗེས་ཟིན་པ་ཞིག་བྱུང་ན་ནི། ང་ཚོའི་འགན་དང་དགོས་རྒྱུ་གཉིས་ཀ་རེད་སྙམ་མོ།།
བོད་དུ་ནང་བསྟན་དར་བའི་དུས་སྐབས་གནམ་གྱི་ཁྲི་བདུན་གྱི་དུས་སུ་ཡིན་པ་དང༌། གྲི་གུམ་བཙན་པོས་བོན་བསྟན་བསྣུབས་ཤིང་མཐར་ལོ་ངམ་གྱིས་གསོད་དོན་ཡང་ཁོང་ནང་བསྟན་ལ་དད་པའི་རྐྱེན་གྱིས་ཡིན་ཚུལ་རྩོམ་ཡིག་ཅིག་རྡ་རམ་ས་ལར་བཞུགས་པའི་ཀིརྟི་སྤྲུལ་སྐུས་ལོ་མང་པོའི་སྔོན་ནས་བྲིས་འདུག དེ་ཡང་བོན་གྱི་བསྟན་བཅོས་སམ་ལོ་རྒྱུས་ག་གེ་མོ་ཞིག་གི་ནང་ན་བྲིས་ཡོད་པ་དེར་ཁུངས་གཏུག་པ་ཡིན་གསུངས་འདུག དེ་ཡང་ད་ཡོད་བོན་གྱི་བཀའ་བསྟན་ཟེར་བ་དེ་ཚོ་ཡིད་རྟོན་ཐུབ་པ་ཞིག་ཡིན་ན་དེ་ལྟར་ཤོས་ལོས་ཆོག
བོད་ཕྱི་ནས་དེབ་སྤུས་དག་འདོན་མི་ཐུབ་དེ་བརྗོདབྱ་དང་རྗོད་བྱེད་སོགས་སྤུས་དག་མི་དག་ཅི་རིགས་ཡོད་ཀྱང༌། སྐྱོན་ཆེ་ཤོས་ཤིག་ནི་དཔེ་སྐྲུན་ཁང་ཟེར་བའི་ཞུ་དག་དཔྱད་ཞིབ་བྱེད་རོགས་མེད་པས་ཁག་ཀྱང་མི་འདུག བོད་ཕྱི་ནས་དེབ་འདོན་མཁན་མང་པོ་ཞིག་ལ་མཚོན་ན་རྩོམ་བྲི་མཁན། ཡི་གེར་གཏག་མཁན། ཞུ་དག་བྱེད་མཁན། དཔར་སྐྲུན་ཅུས་འགོད་པ་ཚང་མ་ཡང་རང་ཉིད་གཅིག་པོས་གཅིག་ལྕོག་བྱེད་དགོས་པས་སྐྱོན་ཆ་མང་པོ་ཞིག་ལྷགས་ཡོང་གིན་འདུག
རྒྱ་ནག་གི་ཕྱོགས་ནས་སྲིད་དོན་རྒྱལ་རབས་ལ་དེ་ལྟ་བུའི་གནད་ཆེན་པོ་ཞིག་ཏུ་བརྩིས་ནས་ལས་ཁུངས་དང་མི་སྣ་མང་པོ་ཆེད་འཛུགས་ཀྱིས་དགག་པ་རྒྱག་གི་ཡོད་པ་མཐོང་བས་བོད་མི་མང་པོའི་སེམས་ངོས་སུ་སྲིད་དོན་རྒྱལ་རབས་དེ་སྔར་ལས་རིན་ཐང་ཆེན་པོ་ཞིག་ཏུ་འགྱུར་བཞིན་འདུག བོད་ཀྱི་གོ་བབ་ཟེར་བའི་དེབ་དེའི་མགོར། སྲིད་དོན་རྒྱལ་རབས་ནི་ལོ་རྒྱུས་རྐྱང་པ་ཞིག་མ་ཡིན་པར་བོད་རང་བཙན་གྱི་རིག་པའི་གཞུང་ལུགས་ཤིག་ཀྱང་ཡིན་པས་ང་ཚོས་དགག་དགོས་ཞེས་བརྗོད་ཡོད་པ་མཐོང་བྱུང་ངམ།