ལྷ་རྩེའི་ཁུ་བྱུག
ང་ཚོ་འགྲོ་མགོན་བཀའ་བརྒྱུད་པའི་ཆོས་བརྒྱུད་ཆེན་མོ་དཔལ་ལྡན་འབའ་རོམ་པ་དར་མ་དབང་ཕྱུག་མཆོག་གི་སློབ་ཆེན་འགྲོ་མགོན་ཏི་ཤྲཱི་རས་པ་ཁོང་གིས་བརྩམས་གནང་བའི་བསྟན་བཅོས་ཡོན་ཏན་འོད་ཅེས་མདོ་མཚན་ཉིད་ཐེག་པ་ནས་སྔགས་བླ་མེད་ཕྱག་རྒྱ་ཆེན་པོའི་རྣལ་འབྱོར་བཞི་རིམ་བར་དུ་ཉམས་ལེན་དང་གཞུང་བཤད་རྨད་དུ་བྱུང་བའི་བསྟན་བཅོས་ཤིག་ཡོད། རྗེས་འཇུག་པ་ང་འདྲ་བ་མང་པོས་ཚིག་དོན་གྱི་ཞིབ་ཆ་ལ་ཚིག་འགྲེལ་གྱི་ཡིག་ཆ་སོགས་ཕར་ཞོག གཞུང་བཤད་ཀྱི་སྤྱི་དབུབ་ཙམ་དང་ཉམས་ལེན་གྱི་རིམ་པ་ཙམ་གོ་བས་མ་ཕིག་ནས་ད་བར་ལུས་ཡོད། བར་དུ་ཀུན་གྱིས་མགུར་ཉོབ་མ་ཟེར་གྱིན་རྡུལ་གྱིས་ཟིན་པའི་ཟ་ཆོག་ཙམ་གྱི་གོ་གནས་མེད་པར་རང་དགར་བཞག འབའ་རོམ་མགུར་མཚོ་གསུང་སྐབས་སྒྲུབ་ཁང་ཡིན་ན་དུམ་བུ་གཉིས་ལ་བགོས་པ་སོགས་ཀུན་གྱིས་བཀླག་པར་དཀའ་ལས་བརྩིས་པར་མངོན་གསལ་རེད་པས་དགོངས་པའི་གསང་གནད་ཕར་ཟད་དུ་ལུས་ནས་ད་ལ་ཐུག
ཉེ་ཆར་སྐྱོ་བྲག་མཁན་པོ་དགའ་དབང་ལགས་ཀྱིས་མདོ་ཡི་དགོངས་པ་གོ་བས་གཏིང་ཕུག་ཅིང་། རྒྱུད་ཀྱི་གསང་གནད་དོན་གྱི་ལམ་སྟོན་པ། ཕྱག་ཆེན་རྣལ་འབྱོར་བཞི་རིམ་ལ་ལུང་གིས་ཟུར་རྒྱན། སྙིང་པོ་ཉམས་ལེན་གྱི་འཇོག་སོ་བྲོ་ཁ་ལག་གཏད་དང་། ཟབ་དོན་ལག་རྐྱངས་ཀྱི་ཚུལ་དུ་ཚིག་གི་འགྲེལ་བ་རྒྱས་བསྡུས་འཚམས་པ། ཐོས་བསམ་པ་ཡིན་ན་རིག་པའི་ན་འཕར་ཞིང་། ཉམས་ལེན་པ་ཀུན་གོལ་ནོར་ཤོར་གསུམ་བྲལ་བའི་སྙིང་པོ་ངོ་སྤྲོད། འཇོག་ཐབས། བོགས་འདོན་སོགས་གནད་ཚང་འདི་དག་སྣང་གིས་དཀྱིལ་སྒྲིབ་རྟོག་གེས་མཐའ་དབྲལ་བ་མ་ཡིན་པར་འགྲོ་མགོན་ཏི་ཤྲཱི་རས་པའི་དགོངས་པ་ཚུལ་བཞིན་བཀྲལ་བའི་མགུར་འགྲེལ་སྙིང་པོ་གསལ་བ་དང་། ཏི་རས་མཆོག་གི་བླ་སྒྲུབ་སེམས་ཉིད་གཅེར་མཐོང་། ཚོགས་འཁོར་གྲུབ་པའི་དགའ་སྟོན། ཚོགས་འཁོར་འདོན་ཟིན། མགུར་མཚོ་སྙིང་བསྡུས། བླ་སྒྲུབ་དྲིས་ལན། མགུར་འགྲེལ་ལོ་རྒྱུས། ཡང་དག་སྨོན་ལམ་བཅས་སྨིན་གྲོལ་ཟུང་ལྡན་གྱི་དཔེ་ཆ་པོད་གཅིག་ང་ཚོའི་བགོ་སྐལ་དུ་བཞག་པ་ནི། ཅི་འདྲའི་ངོ་མཚར་བ་དང་། ཅི་འདྲའི་རྨད་དུ་བྱུང་བ་ཞིག་རེད། པར་དུ་མ་བསྐྲུན་སྔོན་དུ་གུས་པས་ཞིབ་ཏུ་མཇལ་བའི་ཚོར་བ་ཡིན་གྱི་དཔེ་ཆ་མ་མཐོང་གོང་དུ་ཁ་ཚོན་བཅད་པ་གཞར་ཡང་མིན་ནོ། །
རེད་དེ་རྗེ་བཙུན་མི་ལ་རས་པ་མཆོག་གིས་བློ་རྒྱུད་སྡེ་ལ་དྲིས་གསུང་པ་བཞིན་ང་ཚོ་རྒྱལ་བ་འབའ་རོམ་པའི་སློབ་བརྒྱུད་བཅས་པས་བློ་དྲི་སའི་གདམས་ངག་གི་ཟ་མ་ཏོག་སྔོན་མེད་ཡིད་བཞིན་གྱི་ནོར་བུ་འདི་འཆད་ཉན་རྣམ་དག་གིས་བསྟན་པའི་སྲི་ཞུར་འགྱུར་ངེས་སྙམ་ནས་དགའ་བ་འབུམ་གྱིས་བརྟས་ཏེ་ངས་དཔེ་འཕྲིན་གྱི་ཚུལ་དུ་ངོ་སྤྲོད་ཞུས་པ་ཡིན།
2014-04-16
འབའ་རོམ་བཀའ་བརྒྱུད་འདི། བཀའ་བརྒྱུད་ཆེ་བཞི། ཆུང་བརྒྱད་ནང་གི་གང་གི་ཁོངས་སུ་བསྡུས་སམ། ལགས།