འཆི་མེད།
༡
ཡང་ཡང་བསྒྲུགས་ཤིང་ཡང་ཡང་གཏོར་པའི་བག་ཆགས་ཀྱི་ས་བོན།
ཅིས་ཀྱང་མིད་སྒོ་ནས་ལུས་དགོས་པའི་མཛེས་སྡུག་གི་ངག་རྒྱུན།
རྒྱང་རིང་ན་ཅི་ཡང་མེད་པའི་ངའི་རྒྱང་རིང་།
གནམ་མཐའི་ཕྱི་མིག་དེ་ང་ལ་ལྷག་སྲིད་དམ།
རྨི་ལམ་ལས་སད་རྗེས་ལམ་བུ་མི་རྙེད་པའི་སྡུག་བསྔལ།
དཔྱིད་ཀྱི་དྲན་པ་ཁོ་ནས་བསླངས།
རྒྱུས་མེད་ཡིན་ལ་རྒྱུས་ཡོད་ཡིན་པའི་དྲན་པའི་སྣེ་གཉིས།
ཇི་ལྟར་མཐུད་ཚུལ་སུས་ཀྱང་ཤོད་མ་ནུས།
དྲི་ལན་དེ་ཡང་རླུང་གིས་ཁྱེར།
ལྕགས་རི་དེ་དང་འཇིག་རྟེན་དེ།
ཕྱག་འཇུ་རེ་རེས་གྱེས་ཕྱག་འབུལ་ཐབས་མ་བྱུང་བ།
གང་དང་ཅི་ཡིས་ལན།
གནམ་ས་ཁ་འཕྲོད་དཀའ་པ།།
ཆར་བས་འབྲེལ་ལམ་འཇོག་གིས།།
སྙིང་གི་གའུར་བཅུག་པའི།།
ཆད་མདོ་མཆི་མས་བཀྲུས་སོང་།།
༢
སྨྲ་བ་འགགས་པའི་གནས་སྐབས་གང་རུང་ལ།
འཚང་ག་ཤིག་ཤིག་གི་ཐ་སྙད་དེ་དག་གིས།
ཁྱེད་ལ་ཡ་ཆུང་བསང་པའི་གཞས་ཤིག་གཏང་ཐབས་བྲལ།
ཇི་ལྟར་ཉེ་ན་དེ་ལྟར་བཀྱེད་དགོས་པའི་ཁ་སྟབས་དེས།
སྙིང་ཉེ་བའི་ངའི་ཡིག་ཆུང་རེ་རེ་མུན་པའི་གཏིང་ལ་དེད།
ཚེ་རབས་འདི་ཡི་བུ་ལོན་མ་ཡིན་པའི་བུ་ལོན་གང་ཞིག་གིས།
གས་ཆག་ཅིག་ལ་ལྷན་པ་ཡང་ཡང་གླན།
སེམས་ཀྱིས་བརྒྱུས་ཤིང་ཚིག་ལ་དྲུབས་པ་དེ།
གྲུ་ཤན་ཕར་འགྲོ་ཞིག་ལ་བསྐུར་བར་བྱ།
དྲན་པའི་རུས་པ་འཐོར་དུས།
ང་རང་ཁྱེད་ཀྱི་གྲིབ་མའི་ནང་ན་འཁྱམས།
འཁྱག་དར་གྱི་སྦུབས་ནས་བསྐལ་བར་ལུས་དགོས་པའི་རྡོ་བར།
རྡོ་བ་ལས་འཁྱག་པའི་རྡོ་བའི་སྙན་ངག་ཁོ་ན་ཡོད་པས་ཆོག
ཉག་གའི་ཕར་རྒྱབ་དེ་ན།།
ཨེ་ཡོད་ཡང་ཡང་དྲི་འོང་།།
མཆི་མའི་རྫོངས་པ་ཞིག་ལ།།
ཕྱི་མིག་ལན་གཅིག་ཡོད་རོགས།།
༣
གཏམ་རྒྱུད་དེ་ཡི་མཚོན་དོན་ཡིན་པའི་ཁ་བའི་ཁྲོད་ཀྱི་རྒྱ་སེ།
སྐྱི་བསེར་རླུང་གིས་ཁྱེར་ནས་རྒྱང་ལ་ཡལ།
ཚིག་ལ་མདུད་པ་ཅིའི་ཕྱིར་བཏབ་པ།
ཁྱེད་ཀྱིས་ང་ལ་མི་དྲི་རོགས།
གཅིག་དེ་རི་བོའི་རྩེ་ན།
གཅིག་དེ་མཚོ་མོའི་གཏིང་ན།
ལམ་ལ་གོལ་ས་ཡིན་མིན།
སོ་སོའི་སེམས་ལ་བསྐྱོན་ཡོད།
འདི་ཕྱིའི་འདུན་པའི་རི་མོ།
རང་རང་ལས་ཀྱིས་བྲིས་སོང་།
སེམས་ཀྱིས་རྒྱང་མར་བལྟས་པའི་ཕ་མཐའ་ན།
བཏབ་པའི་སྨོན་ལམ་རླུང་ཁའི་མར་མེ་འདྲ།
གདམ་ཀ་ནི་གདུག་རྩུབ་ཉག་ཅིག་སྟེ།
ཡོད་ཚད་རྒྱུན་ལྡན་དུ་གྱུར་ཚར་བའི་རྗེས་ལ།
ལོ་ཟླའི་འགྲོས་ཀྱིས་དེད་དང་མ་དེད་གང་ཡིན་ཡང་།
འཇའ་ཚོན་གྱི་མཛེས་སྡུག་ཉིད།
མི་ལོ་མང་བོ་ཞིག་གི་རྗེས་ལ།
དྲན་པའི་རྒྱུ་ཕྱོགས་གློ་བུར་བ་ཞིག་གིས།
སྨྲ་བརྗོད་མང་བོའི་དོད་དུ་ཕན་ཚུན་ཡང་ཡང་བསྐུར་མྱོང་བའི་
རྟ་ཕོ་རྔོག་རིང་དེ།
བདེ་འཚམས་མཚོན་བྱེད་དུ།
ངས་ཡང་བསྐྱར་ཁྱེད་ལ་ལན་གཅིག་བསྐུར་སྲིད།
དཔྱིད་ཀྱི་དྲན་པ་ནི་ཉི་ནུབ་ཀྱི་གཏམ་རྒྱུད་ཡིན།
མི་ལོ་སྟོང་གི་ལྕགས་སྒྲོག་སིལ་བུར་གཏོར་པའི་ངའི་དྲན་པ་དེ་ཡིན།
དཔྱིད་ཀྱི་དྲན་པ་ནི། འདྲིས་ཐབས་མེད་ལ་གྱེས་ཐབས་ཀྱང་མེད་པའི་སེམས་ཀྱི་བུ་ལོན་དེ་ཡིན། བསྐྱུར་ན་ཡིད་ལ་བརྣག་ཅིང་།
བལ་ན་ན་ཟུག་དགུ་འགྱུར་ཡིན་པའི་ངའི་སྙིང་གི་ཚེར་མ་དེ་ཡིན།