འབའ་སྲས།
དཔྱིད་ཀྱི་མེ་ཏོག་གང་བུ་ཡིས།།
དྲུག་རྐང་ཅན་ལ་ངལ་སྦྱིན་པའི།།
སྡུག་བསྔལ་སྤྲིན་པས་མ་ཐེགས་པས།།
མིག་ཆུའི་སྦྲང་ཆར་ས་རུ་བྱོ།།
སྒྲུབ་ལ་འབྱོལ་བའི་རྣམ་འབྱོར་བ།།
ཏིང་འཛིན་བསྟེན་པའི་དྲང་སྲོང་ཡང་།།
དཔྱིད་ཀྱི་སྒྱུ་མའི་འཕྲུལ་མཐོང་ནས།།
སོར་བཅུའི་འདབ་མ་འདམ་དུ་ཐོར།།
གཏི་མུག་དགའ་མས་དམ་པོར་འཁྱུད།།
ཀ་ཁའི་ངག་ལ་རྨ་ཆགས་པ།།
རིག་པའི་ཁྱེ་འུ་རྨས་མ་ཚོས།།
སྐྱེད་མའི་མཛེས་ལྗོངས་མུན་པར་མཐོང་།།
རི་བོང་འཛིན་པའི་ཟླ་བ་དང་།།
གསེར་འོད་འཕྱོ་བའི་ཉི་མ་ཡི།།
དཀྱིལ་འཁོར་ཡོངས་སུ་རྫོགས་པའི་ཁ།།
དཔྱིད་ཀྱི་ཚལ་ལ་ཆེ་ཆེར་འབྱེད།།
འཛིན་མའི་དཔལ་ལ་མཛེས་སྡུག་གྱི །
ཕུན་ཚོགས་ཤེལ་གྱི་མེ་ལོང་དུ།།
སྙིམ་པའི་མཐིལ་གྱི་རི་མོ་བཞིན།།
དཔྱིད་དུས་སྒྱུ་མའི་སྐྱེད་ཚལ་འཕྲུལ།།
ཀུན་བཟོད་དགའ་མའི་ལང་ཚོ་ལ།།
མདོངས་མཐའི་སྒྲོ་ཡི་འཕྱོར་སྒེག་གྱིས།།
མགྲིན་སྔོན་མགྲིན་པ་བདུད་རྩི་ཡིས།།
སྔོ་བར་བསྒྱུར་ལྟར་མིག་ལ་སྒྱུ།།
སྦྲང་ཆར་བསིལ་མའི་དངོས་གྲུབ་ཀྱིས།།
མེ་ཏོག་འདབ་མའི་ལང་ཚོ་བསྐྱེད།།
ཀ་ལ་པིང་ཀར་ཅོ་འདྲི་བའི།།
སྦྲང་ཆུང་གླུ་ཡི་པི་ཝང་སྙན།།
སྒྲིམ་པའི་རྣ་ཞགས་རིང་བ་ཡི།།
ལག་ལྡན་སྔོ་བསངས་མ་ཡི་ཁྱུ།།
ཙན་དན་དྲི་བཟང་བརྗེད་གྱུར་ཏེ།།
དཔྱིད་དུས་ཚལ་གྱི་རྨི་ལམ་སྟུག །
དགའ་མ་ལྷ་ལམ་ཆུ་འཛིན་རྩེར།།
འདོད་ལྡན་འོད་ལྔ་ལམ་མེར་བཀྲ།།
ཐིག་ལེ་སྦྲང་ཆར་ཟེགས་པ་ཡིས།།
དཔྱིད་དུས་མེ་ཏོག་འཛུམ་མེར་དགོད།།
དཔྱིད་དུས་སྒྱུ་མའི་འཇོ་སྒེག་གིས།།
སྤྲིན་དཀར་མཁའ་རུ་རྩེན་པའི་མིག །
ལོང་བས་མེ་ལོང་ལྟ་བ་བཞིན།།
རང་གཟུགས་མ་མཐོང་ངུ་བར་བྱེད།།
སྐྱེད་ཚལ་མེ་ཕུང་སྙིང་གི་སྦུབས།།
འབར་བའི་མཆེད་ཤུགས་རལ་གྲི་ཡིས།།
མགྲིན་བཅུ་མགོ་བོ་བཅད་པའི་ཁྲག །
དཔྱིད་ཀྱི་ཚལ་དུ་དམར་བར་འཁྱིལ།།
དཔྱིད་དུས་སྒྱུ་མའི་སྐྱེད་ཚལ་དུ།།
སྙིང་ཁྲག་ཧཱོུཾ་ཡིག་འཁྱུག་རྩལ་གྱིས།།
དམར་ཞིང་རྣག་གིས་གང་བ་ཡི།།
དཔྱིད་དུས་སྒྱུ་མའི་སྐྱེད་ཚལ་བསྐྲུན།།
༢༠༡༧/༠༤/༢༨
སྙན་གི་ཡ།