མཁན་པོ་དཔའ་བརྟ།
ད་ཞག་ཟླ་ངོ་འདིར་ཉིན་རེ་བཞིན་མཁས་བཙུན་བཟང་པོའི་ཡོན་ཏན་གྱིས་ཐུགས་རྒྱུད་ཕྱུག་པའི་དགེ་བའི་བཤེས་གཉེན་ཨ་བསྟན་ཕུན་ཚོགས་རིན་པོ་ཆེས་བྱང་ཆུབ་སེམས་དཔའི་སྤྱོད་འཇུག་གི་བཀའ་ཁྲིད་གནང་བ་ཞུ་བར་འདོད་པས་ཡུལ་གཞན་ནས་ཆེད་གཏད་ཀྱིས་ལས་བྱ་ཕྲན་ཚེགས་འགའ་སྣང་མེད་དུ་གཡུགས་ནས་རང་དགོན་དུ་བསླེབས།
བཀའ་ཆོས་ཞུ་བའི་ཉི་མ་རེ་རེ་བཞིན་གཞུང་གི་ཚིག་འགྲེལ་དང་ཞིབ་ཁྲིད། གཞུང་ཚིག་དང་གདམས་ངག་སྦྱར་ནས་གསུངས་པ་ན་ཕྲན་ལྟ་བུའི་ཆོས་དྲེད་ཀྱི་སེམས་ལ་སྨན་པོ་བྱུང་བ་ནི་བཤད་ཅི་དགོས།
ལྷག་པར་ཁོང་ལ་ནི་གཟུངས་སྤོབས་ཀྱི་བློ་གྲོས་གཞན་མཚུངས་མེད་པ་མངའ་བས་སྔར་བླ་མ་དང་མཁན་པོ་བཀའ་དྲིན་ཅན་དག་གིས་ཇི་ལྟར་གསུངས་པའི་ཞལ་རྒྱུན་རྣམས་པར་དུ་བཏབ་པ་བཞིན་ཐུགས་ཐོག་ནས་འཆད་ཐུབ་པ་མ་ཚད་དེང་དུས་ཀྱི་གནས་སྟངས་དང་། སོ་སོའི་རྒྱུད་ཚོད་དང་སྦྱར་ནས་དམ་ཆོས་སྟོན་མཛད་པ་དང་། ཁ་བཤད་ཁོ་ན་མ་ཡིན་པར་ཐུགས་དམ་དང་མཛད་སྤྱོད་ཀུན་ཀྱང་སྤྱོད་འཇུག་ཆེན་མོ་དང་ཞུ་དག་ཕེར་བ་འདིས་ཆོས་དང་བླ་མའི་ཁྱད་ཆོས་ལ་དང་འདོད་ཡིད་ཆེས་ཀྱི་དད་པ་གཙང་མས་དྲངས་པའི་མིག་ཆུ་དྲོན་མོ་ནི་ཉི་མ་དང་ཆོས་ཐུན་རེ་རེ་བཞིན་ཆོས་ཞུ་བ་ཇོ་སེར་དང་དགེ་བསྙེན་ལྔ་བརྒྱར་ཉེ་བ་འདུག་པ་ཀུན་ལ་འབབ་ཏུ་བཅུག་གི་འདུག
དེར་བརྟེན་ངས་ཀྱང་རང་གི་དྲིན་ཆེན་ཨ་མ་རྒན་མོར་བཀའ་ཆོས་གལ་ཆེན་འདི་ཐོབ་དགོས་པའི་སྐུལ་མས་ཉིན་བཞིན་ཆོས་ཁྲིད་ཁར་བཙན་གྱིས་ཡོང་བཅུག་པ་ཡིན།
ཡང་བླ་མ་ཁོང་གིས་ཉིན་གུང་ངམ་དགོང་མོ་ལྟ་བུའི་དུས་ཚོད་བེད་སྤྱད་དེ་ནད་པ་དང་སྒེར་ཆོས་ཞུ་བ་འགར་སྨན་བླའི་དབང་བརྒྱ་སོགས་བཀའ་དབང་འགའ་གནང་དགོས་བྱུང་བའི་ཁར་ངའི་ཨ་མ་ནི་ལུང་པ་འདིའི་སྤྱི་སྲོལ་བཞིན་འཚང་ཁ་ཁོ་ནས་འགྲོ་བ་མ་ཚད་ང་ལ་ཡང་དར་ཁ་དང་མནྜལ་རྒྱུ་དངུལ་དངོས་སྤྲད་ནས་ཁྱོད་ད་ལོར་ལོ་དུས་དང་སྤར་ཁ་གཅིག་གཅིག་ཡིན་པས་ལྷ་གཅིག་གཅིག་གི་དབང་ཐོབ་དགོས་ཡོད་རབས་མང་དག་ཅིག་ལབ་ནས་འཁྲིད་འགྲོ་འདུག
དེ་རིང་ངས་ཨ་མར་དབང་གནང་ས་གཟིམ་ཆུང་ཡིན་པས་མི་མང་ན་བླ་མ་ལ་འོ་བརྒྱལ་ཡོད་ལ་ང་ཡང་སྤྱིར་བཏང་གི་དབང་ཞུ་རྒྱུར་དེ་ཙམ་དགའ་པོ་མེད་རབས་ལབ་དུས། ཨ་མས་ང་ལ་མ་དགའ་བའི་རྣམ་འགྱུར་བཅས་ཆོས་དང་བླ་མ་ལ་དད་པ་མེད་ན་ཆེས་ཐ་ཆད་པའི་མི་ཡིན་རབས་དང་། དབང་བསྐུར་རེ་ཞུ་ཐུབ་ན་ལོ་ཟླ་མང་པོའི་སྐེག་བར་ཆད་ཞི་འགྲོ་བའི་རྒྱུ་མཚན་མང་དུ་བགྲངས་ནས་མོ་རང་གཞན་མང་པོ་དང་མཉམ་དུ་དབང་ཞུ་སར་བུད་ཐལ།
རྗེ་ཙོང་ཁ་པས། སངས་རྒྱས་ལས་ཀྱང་དཀོན་པའི་རྡོ་རྗེ་ཐེག །ཅེས་གསུངས་པའི་གསང་སྔགས་རྡོ་རྗེ་ཐེག་པའི་བསྟན་པ་དང་མཇལ་ནས་དབང་ཞུ་བར་མི་སྤྲོ་བ་ནི་རང་སྐལ་རང་གིས་བཅད་པ་ཙམ་ཞིག་རེད་འདོད། ཁྱད་པར་དུ་དབང་དོན་ངོ་འཕྲོད་ཐུབ་པའི་རྨང་གཞིའི་ཤེས་ཡོན་ཡོད་བཞིན་དུ་ད་དུང་དབང་ཞུ་མི་འདོད་པ་ངོ་མ་ཁྱད་མཚར་རེད། དམ་ཚིག་དང་སྡོམ་པ་སྲུང་ཁག་པོ་འདུག་ཟེར་ན་མ་ཁྱབ་སྟེ། སོར་སྡོམ་དང་བྱང་སྡོམ་ཡང་སྲུང་ཁག་པོ་ཡོད་པས་སོ།། གསང་སྔགས་ཀྱི་དཀྱིལ་འཁོར་གཅིག་མཇལ་བས་བསྐལ་བར་བསགས་པའི་སྡིག་སྒྲིབ་འདག་པ་ཡང་རྒྱུད་ལས་གསུངས་ཤིང་། མི་ཚེ་གང་བོར་སོར་སྡོམ་སྲུང་བ་ལས་ཉི་མ་གཅིག་ལ་གསང་སྔགས་རྡོ་རྗེ་ཐེག་པའི་དབང་སྐུར་ཞུས་ན་ཚོགས་བསགས་སྒྲིབ་སྦྱོང་གི་ནུས་པ་བསྡུར་ཐབས་མེད་པ་ཞིག་ཡིན་པ་ཡང་མཁྱེན་དགོས། འདི་འདྲའི་གོ་བ་ལོག་སྒྲུབ་པ་མང་དྲགས་ནས་དེང་སང་དགེ་ལུགས་པའི་ཕྱོགས་སུ་གསང་སྔགས་ཀྱི་བསྟན་པ་ཉམས་ཧ་ཅང་དམའ་བོ་ཞིག་ཆགས་དང་ཆགས་བཞིན་པ་རེད་ལ། ཆོས་བརྒྱུད་གཞན་པར་ཡང་དེ་བཞིན་ཡིན་པ་འདྲ།
དབང་གི་གནད་དོན་ཡག་པོ་ཞིག་ཤེས་དགོས་དབང་ཞུ་བ་ལ། དེ་ཤེས་པའི་སྟེང་ནས་དབང་ཞུནས་ཡག མ་གཞི་ནས་དབང་ཐོབ་པའི་ས་མཚམས་གང་ནས་ཡིན་མིན་ཤེས་དགོས། རྒྱུད་སྡེ་དག་ནས་དབང་མཚན་ཉིད་པ་ཐོབ་ས་ནི་ས་དང་པོ་ཐེག་པ་ཆེན་པོའི་མཐོང་ལམ་ཐོབ་པ་ནས་བཤད་ཡོད། མ་ཟད་དབང་ཐོབ་དང་མ་ཐོབ་ནི་སེམས་ཀྱི་གནས་ལུགས་མངོན་སུམ་དུ་རྟོགས་དང་མ་རྟོགས་ལ་བཞག་འདུག དེ་མིན་ཚེ་རིལ་ཚེ་ཆང་ཙ་ཀ་ལི་སོགས་མགོ་ལ་བཞག་པ་ཙམ་གྱོས་དབང་ཐོབ་ཀྱི་ཡོད་ན་ཧཧཧ་རེད། དབང་ཞུས་ཚད་ལ་དཔགས་ན་ཕལ་ཆེར་བུམ་པ་མགོ་ལ་བཞག་ནས་མགོ་ལེབ་ལེབ་ཡོང་ས་ཡོད་པའི་བོད་རིགས་མང་པོ་ཡོད། མ་གཞི་ནས་དབང་སྐུར་གྱོ་སྐབས་སུ་ཚེ་རིལ་ཚོགས་སོགས་ཟ་རྒྱུ་ཡོད་པ་དང་ཚེ་ཆང་འཐུང་རྒྱུ་ཡོད་པ་མིག་གིས་ལྟས་ན་ཁྲ་ཁྲ་ཟིང་ཟིང་མང་པོ་ཞིག་མཇལ་རྒྱུ་ཡོད་པ་སོགས་ལ་བརྟེན་ནས་ཤར་ཕྱོགས་པའི་རྨོངས་འཐོམ་པ་ཕལ་ཆེར་ཁྲིད་ལས་དབང་ཞུ་བར་འགྲོ་མཁན་མང་བ་ཡོད། ནུབ་ཕྱོགས་པ་དེ་ཚོ་དབང་རྣོན་ཆོས་ཀྱི་རྗེས་འབྲང་ཡིན་པར་བརྟེན་ཁོང་ཚོས་དབང་ཞུ་ལས་ཆོས་ཁྲིད་ཞུ་རྒྱུར་དགའ་མོས་ཆེ་བ་ཡོད།
བླ་མ་ལ་དད་པ་དང་། ངེས་འབྱུང་། བྱང་སེམས། ཡང་དག་པའི་ལྟ་བ་མེད་ན། དབང་ཐོབ་དཀའ་ན་ཡང་། དེ་དག་ཇི་ལྟ་བ་བཞིན་དུ་མ་སྐྱེས་བར་དུ། དབང་མ་ཞུས་ནས་བསྡད་ན་ཡང་། གྱོང་ཆེའོ།།
ཁག་པོ། ཞེས་པའི་སྒྲ་དཀའ་བ་ཞེས་སྒྱུར་ཐུབ་ན། བོད་སྐད་འཆལ་བར་མི་འགྲོ་བར་ཕན་ཆེའོ།
་
བདག་དང་བདག་ལྟ་བུ་དབང་གྲལ་དུ་བསྡད་དེ། བུམ་དབང་ ། གསང་བའི་དབང་། ཤེས་རབ་ཡེ་ཤེས་ཀྱི་དབང་། ཚིག་གི་དབང་བཅས་ཞུ་བའི་རྩིས་བྱས་པས།། བྱིན་རླབས་ཙམ་ཐོབ་རུང་། དམ་ཚིག་དང་སྡོམ་པ་ཚུལ་བཞིན་སྲུང་བ་མེད་པས་གནད་དུ་སྨིན་པ་དཀའོ།