བདེ་ཆེན་སྒྲོལ་མ།
༼བོད་ནང་གི་ཚེ་སྲོག་ལ་བསྡུས་པའི་བོད་དོན་ལས་འགུལ་དང་བཙན་བྱོལ་ནང་གི་ཕུགས་རྒྱང་མེད་པའི་ཁྱབ་བསྒྲགས་རིགས་ལམ་སྐོར།༽
ང་ནི་ནམ་ནམ་ཞར་ཞར་དུ་བོད་ནང་གི་བོད་མི་སྤུན་ཟླ་དག་ལ་སེམས་གཏིང་ནས་ཡིད་ཆེས་དང་རེ་བ་ཡོད་མཁན་ཞིག་དང་། ནམ་ནམ་ཞར་ཞར་དུ་བོད་ནང་གི་བོད་མི་སྤུན་ཟླ་དག་གི་ཚེ་སྲོག་དང་མདུན་ལམ་ལ་སེམས་ཁུར་ཡོད་མཁན་ཞིག་ཡིན།
ཡིན་ནའང་། ང་ནི་བཙན་བྱོལ་ནང་གི་བོད་མི་སྤུན་ཟླ་དག་ལ་དེ་ཙམ་གྱི་ཡིད་ཆེས་དང་རེ་བ་མེད་མཁན་ཞིག་དང་། ལྷག་པར་དུ་གཞོན་ནུ་དང་བུད་མེད་ལྟ་བུའི་སྐབས་འཚོལ་བའི་ཚོགས་པ་དག་ལ་དེ་བས་ཀྱང་ཡིད་ཆེས་དང་རེ་བ་གཏན་མེད་མཁན་ཞིག་ཡིན།
མཚམས་མཚམས་སུ་བོད་མི་དམངས་སྤྱི་འཐུས་དང་འཛིན་སྐྱོང་བཀའ་ཤག་ཀྱང་སྐབས་འཚོལ་བའི་ཚོགས་པ་འདི་དག་དང་འདྲ་བར་ཕུགས་རྒྱང་མེད་པའི་ཁྱབ་བསྒྲགས་ཙམ་གྱི་ལམ་དུ་ཞུགས་འགྲོ་བ་ནི་ཧ་ཅང་བློ་ཡིད་ལ་མི་ཤོང་བའི་དུས་རབས་དང་ཉི་འོག་གི་རིགས་མཐུན་འུ་བུ་ཅག་གི་ནག་ཉེས་རྡོག་རྡོག་པོ་ཡིན་པར་སྙམ་མོ།།
བར་ལམ་ཞིག་ནས་བོད་ཨ་མདོ་རྔ་བའི་ཕྱོགས་ནས་རྒྱ་ནག་དམར་གཞུང་གི་དྲང་བདེན་མ་ཡིན་པའི་བཙན་གནོན་དབང་འཛིན་དང་བོད་མི་རིགས་རང་གི་ལ་རྒྱ་དང་བདེ་སྡུག་གི་དོན་དུ་མྱི་མང་པོ་ཞིག་གིས་རང་གི་གཅེས་བའི་ཚེ་སྲོག་ལ་མ་འཛེམས་པར་རྒྱ་རྒོལ་གྱི་ལས་འགུལ་ཡང་དང་འོར་གྱིས་སྤེལ་སོང་།
ལང་ཚོ་མཆོད་མེ་རུ་སྦར་བའི་མི་བུ་དེ་དག་ནི་བོད་མི་རིགས་ཀྱི་ལོ་རྒྱུས་ཤོག་ངོས་སུ་གསེར་ཡིག་གིས་འབུར་དུ་ཐོན་ཡོད་ལ། ཁོང་ཅག་ནི་བོད་མི་རིགས་ཀྱི་རྒྱལ་གཅེས་དཔའ་བོ་དཔའ་མོ་ཞེ་གཅིག་རེད། ཡིན་ནའང་། ཁོང་ཅག་གི་རྣམ་ཤེས་ལྷོད་ལྷོད་ངང་གཟིམ་ཐུབ་པའི་གྲུབ་འབྲས་དང་རེ་བའི་མངོན་འདོད་ཀྱི་ས་མཚམས་ལ་ང་ཚོ་ད་དུང་སླེབས་མེད་ལ། གཅིག་བྱས་ན་ང་ཚོའི་ཕུགས་རྒྱང་མེད་པའི་ཁྱབ་བསྒྲགས་དང་ལས་འགུལ་རིམ་པ་དག་གིས་ཁོང་ཅག་གི་རྣམ་ཤེས་ལ་ཕྱོགས་གཞན་ཞིག་ནས་ཚ་འདྲི་བྱས་མེད་པའི་ཁ་ཚོན་ཡང་གཅོད་དཀའ་བའི་གནས།
རེབ་འདིར་སྔ་ན་མེད་པའི་དགའ་སྤོབས་སྐྱེས་དགོས་པ་ཞིག་ནི། གནད་འགག་གི་སྐབས་འདིར་བཀའ་ཤག་དང་སྤྱི་འཐུས་ཚོགས་ཀྱང་ཁྲོམ་ལ་ཐོན་ནས་མི་དམངས་དང་མཉམ་ཞུགས་བྱས་པ་འདི་རེད། བཀའ་ཤག་གིས་རྒྱལ་ཚོགས་དང་སྤྱི་འཐུས་ཀྱིས་ལྡི་ལིར་ལས་འགུལ་སྤེལ་རྒྱུ་ཡིན་པའི་གསལ་བསྒྲགས་ནི་དགའ་འོས་པ་ཞིག་ཅི་ལ་མིན་ཡང་། ལས་འགུལ་གྱི་རིམ་པ་ནི་སྔ་མ་སྔོན་མ་དག་དང་འདྲ་བར་ལྡི་ལི་ཅན་ལྡིར་མན་ལྡིར་ནས་ཟས་བཅད་ངོ་རྒོལ་དང་མར་མེའི་ཁྲོམ་སྐོར་ཙམ་ཡིན་པས་ཞེ་བློ་གཏིང་ནས་སྐྱོ་སོང་།
ཅན་ལྡིར་མན་ལྡིར་འདི་ནས་ལོ་ཤས་གོང་གཞོན་ནུ་སོགས་སྐབས་འཚོལ་བའི་ཚོགས་པ་ཁག་ཅིག་གིས་བོད་མི་རིགས་ཀྱི་སེམས་ཁུངས་ལ་ཆུ་འཁྱག་བླུགས་པའི་གཏམ་རྒྱུད་སྐྱོ་ལ་རིང་མོ་དེ་ད་དུང་སུས་ཀྱང་བརྗེད་མེད་ཚོད་ཡིན། ད་རེབ་ཀྱི་དབུས་སྒྲིག་འཛུགས་ཀྱི་ལས་འགུལ་འདི་ཡང་དེ་ཙམ་དུ་མི་འགྲོ་བའི་སྨོན་ལམ་འདེབས་བཞིན་ཡོད།
མ་གཞི་ནས་ང་ཚོས་ལས་འགུལ་ཞིག་སྤེལ་དུས་གནས་ཡུལ་རྒྱ་གར་དང་ཨ་རི་ལ་སོགས་པའི་རང་དབང་གི་ཡུལ་ཕྱོགས་གཞན་ཞིག་གི་སྒོ་ཁ་ནས་འཕག་འཚག་རྒྱག་དགོས་དོན་དང་དམིགས་ཡུལ་ཅི་ཞིག་ཡིན་ནམ།
དངོས་ཐུབ་བདེན་ཐོག་གི་སྐད་ཆ་བཤད་ན། བོད་ནང་ལ་དཀའ་ངལ་བཟོ་མཁན་ནི་རྒྱ་ནག་དམར་གཞུང་ཡིན་པ་ལས་རྒྱ་གར་དང་ཨ་རི་སོགས་ནི་མ་རེད། དེ་བས་ང་ཚོས་ཐད་ཀར་རྒྱ་ནག་དབུས་ལ་རང་གི་བསམ་དོན་བཤད་པ་དང་རྣམ་འགྱུར་སྟོན་དགོས་པ་ལས་བོད་ཀྱི་ཁ་དཔེར་ཉི་མ་ལམ་ནས་རྫོགས་རྒྱུའི་གྲ་སྒྲིག་བྱེད་པ་འདི་ཅི་ཞིག་ཡིན་ནམ།
ང་ཚོ་རེབ་ཐེངས་གཅིག་གིས་པེ་ཅིང་ལ་མི་སླེབས་པ་བདེན་དུ་ཆུག་ཀྱང་། ང་ཚོ་མི་ལོ་ལྔ་བཅུའི་རིང་པེ་ཅིང་གི་གཡས་གཡོན་ཙམ་ལ་ཡང་བརྟོལ་མ་ཐུབ་པ་ནི་དབུ་དང་དབུས་ན་བཞུགས་མཁན་དག་གིས་ངེས་པར་དུ་བསམ་གཞིག་བྱེད་དགོས་པར་འདོད་དོ།།
ང་ཚོ་འདི་གར་ཕུགས་རྒྱང་མེད་པའི་ཁྱབ་བསྒྲགས་ཙམ་གྱི་རྩེད་མོ་མང་དུ་རྩེད་ཆོག་ཆོག་ཡིན་ཡང་། བོད་ནང་གི་བོད་མི་སྤུན་ཟླ་དག་ནི་ཚེ་སྲོག་གི་ཉེན་ཁར་ཡོད་པ་མ་ཡིན་ནམ།
དཔེར་ན། ད་རེབ་སྟེ་ཕྱི་ཚེས༡༩ཉིན་གྱི་བོད་མིའི་ངོ་རྒོལ་འདི་ནི་བོད་ཨ་མདོ་རྔ་བའི་མིག་སྔར་གྱི་གནད་དོན་ཐག་གཅོད་དང་ཞི་ལྷང་ཡོང་ཆེད་རྒྱལ་ཚོགས་དང་ལྡི་ལི་སོགས་བོད་རིགས་ཡོད་པའི་འཛམ་གླིང་གི་ས་ཁུལ་གང་སར་ཉིན་གཅིག་དུས་གཅིག་ལ་སྤེལ་གནང་མཛད་པ་ཞིག་ཡིན་ཡང་།
སྐབས་བབ་དབུས་སྒྲིག་འཛུགས་དང་སྤྱི་འཐུས་ཚོགས་ཀྱི་འབོད་ཚིག་ལ་བསམ་ན། དེ་ནི་གཏན་ནས་བློ་བདེ་བདེ་ཞིག་མ་རེད། ང་ཚོའི་ད་རེབ་ཀྱི་འབོད་ཚིག་ནི་བོད་ཨ་མདོ་རྔ་བའི་ཛ་དྲག་གི་གནས་སྟངས་སྐྱོབ་ཐབས་འབའ་ཞིག་ཡིན་འོས་ཀྱང་། འབོད་ཚིག་ནི་སྣ་ཚོགས་པ་སྟེ། རིག་གཞུང་གཏོར་བཤིག་དང་ཆབ་སྲིད་གནོན་ཤུགས། བོད་རྒྱ་ཞི་མོལ། ཆབ་སྲིད་བཙོན་པའི་སྐོར་སོགས་རེད།
ང་ཚོའི་ལས་འགུལ་ལ་རྒྱལ་ཁབ་གཞན་དང་མི་རིགས་གཞན་ནང་བཞིན་གྱི་མིག་མཐོང་ལག་ཟིན་གྱི་གྲུབ་འབྲས་མི་ཐོན་པ་ཡང་། མཐར་གཏུགས་ན་ང་ཚོས་ནམ་རྒྱུན་གནད་དོན་མང་པོ་ཞིག་ཕྱོགས་གཅིག་ཏུ་སྤུངས་ནས་ལས་འགུལ་སྤེལ་སྟངས་འདིས་ལན་པ་འདྲ་འདུག་གོ།།
༢༠༡༡ཟླ༡༠ཚེས༢༠ལ།
བདེ་ཆེན་ལགས། ཁྱེད་ཀྱིས་”མཐར་གཏུགས་ན་ང་ཚོས་ནམ་རྒྱུན་གནད་དོན་མང་པོ་ཞིག་ཕྱོགས་གཅིག་ཏུ་སྤུངས་ནས་ལས་འགུལ་སྤེལ་སྟངས་འདིས་ལན་པ་འདྲ་འདུག་གོ།”ཞེས་པ་འདི་ནི་ཁོ་བོས་ཀྱང་རྟག་ཏུ་འདོད་པའི་ཡུལ་ཞིག་རེད།
མ་གཞི་ནས་ལས་འགུལ་ཅི་ཞིག་སྤེལ་ནའང་དམིགས་ཡུལ་ཆུང་ཆུང་ཞིག་དང་དེ་མ་འགྲུབ་བར་དུ་མཚམས་མི་བཞག་ན་ལས་འགུལ་ལ་ནུས་པ་ཐོན་པ་ཞིག་རེད།
བོན་རྒྱ་ཁྱོད་རང་གིས་དམིགས་ཡུལ་ཆུང་ཆུང་ཟེར་བ་དངོས་ཡོད་གནས་ཚུལ་རང་རེད། མི་བུ་ཁྱོད་རང་གིས་ཟན་ཤམ་འོད་དང་ལྡན་པ་དེ་དམིགས་ཡུལ་ཆུང་ཆུང་གང་འདྲ་ཞིག་བཟུང་ནས་འཕུད་དམ།
ཤ་བོ་ཁྱོད་རང་ཡིན་ན་སྔ་རྗེས་སུ་བོད་མིའི་སྤྱི་ཚོགས་ནང་གླིང་དང་། ས་རཱ། ད་ཆ་ཝར་ན་སོགས་སུ་འབྲས་བུ་གཏན་ནས་མེད་པའི་སློབ་མའི་ངང་ཚུལ་གྱི་ལེའུ་རྫོགས་རྒྱུ་མེད་པར་ཆེ་སར་བོད་མིའི་སྒྲིག་འཛུགས་དང་། རྒྱ་མྱིའི་མིག་གི་ཚེར་མ་ལྟ་བུའི་བོད་ཀྱི་གཞོན་ནུའི་ཚོགས་པ་སོགས་ལ་དོན་མེད་སྐྱོན་བརྗོད་བྱེད་པ་རང་གི་འཇོན་ཐང་དང་། གྲུབ་འབྲས་སོགས་གང་ནས་བལྟས་ཀྱང་བཞད་བགད་ཀྱི་རང་བཞིན་རེད་འདུག དེ་ལས། བུ་ཁྱོད་དེ་རེབ་ཝར་ན་སློབ་གྲྭར་སློབ་སྦྱོང་ཡག་པོ་བྱེད། ལག་ཁྱེར་ཞིག་རེག་ཨེ་ཐུབ་བལྟོས། དེ་ལས་སྤྱི་ཚོགས་ཀྱི་གནས་ཚུལ་གོ་ཚོད་ཀྱི་མ་རེད། སློབ་ཕྲུག་སློབ་སྦྱོང་ཡག་པོ་བྱེད་དགོས་ལ་ལྷག་པར་དགེ་རྒན་ཚོའི་ཞལ་ལ་ཉན་པོ་བྱེད་ཨང་། ངའི་བསླབ་བྱ་ཡིན་དཱ། བདེ་མོ་བྱོས།
སྨྱུག་ཁ་ཕྱི་ནང་གང་སར་བསྐོར་རྒྱུ་སྨྱུག་ཐོག་པ་ཞིག་གི་ལས་སུ་སྣང་ཡང་། དང་ཐོག་རང་ཉིད་ཀྱི་ཀླད་ལྐོག་ལ་གཙང་དག་རེ་བྱས་ཏེ་ཁ་ལག་གཉིས་ཀ་མཉམ་འགུལ་བྱ་དགོས་པའི་དུས་སུ་བབ་ན་ཡང་། ང་ཚོའི་སྨྱུག་ཐོག་པ་ཚོ་ཁ་བཤད་དང་སྟོང་གཏམ་ལ་གོམས་པ་ལས་འགུལ་སྐྱོད་དང་འཕགས་འཚག་ལ་དོ་སྣང་དེ་ཙམ་མེད། ཕྱོགས་འདི་ན་ང་ཚོར་ནམ་ཡང་འདང་གི་མེད་ནས་སྟོང་ཏེ་ཡོད།
བོད་པ་ཚང་ཟེར་བ་དེའི་མི་སྒེར་ལ་ཁ་རྡུང་གཏོང་གིན་འདུག
ངའི་བསམ་ན་རྩོམ་ཡིག་སྤེལ་མཁན་གྱི་གང་ཟག་དཔྱད་པ་མ་བཏང་བར་རྩོམ་ཡིག་ལ་དཔྱད་བརྗོད་སྤེལ་ན་ད་བཟོད་རང་ཉིད་ཀྱི་དམིགས་ཡུལ་འགྲུབ་སོང་བ་རེད་བསམ་མོ།
བདེན་པ་ཉིད་རྒྱལ་གྱུར་ཅིག
ང་ཚོའི་སྨྱུག་ཐོག་པ་ཚོས་ཁ་ནང་ལ་བསྐོར་ནས་དང་པོ་སོ་སོས་ཅི་ཞིག་སྒྲུབ་ཡོད་མེད་ཡག་པོ་བལྟས་ནས།
ད་འཚམས་གཞུང་དང་ཚོགས་སྡེ་ཁག་ལ་གཅིག་བཤད་ན་ལེན་པོ་རེད།