བྱ་མདོ་སྐལ་རྒྱམ།
ངས་ཇི་ལྟར་བལྟས་ཀྱང་ཁྱོད་ཀྱི་གཏིང་མ་མཐོང་ལ
ང་ཇི་ལྟར་སོང་ཡང་ཁྱོད་ཀྱི་མཐའ་མ་རྙེད
ཡིན་ཡང ངས་རང་ཉིད་ཉམས་ཆུང་ནུས་མེད་ཅིག་རེད་མི་འདོད
ང་ལ་མིག་ཡོད་པས་ངས་ཁྱོད་ལ་བལྟ་དགོས་ལ
ང་རང་མི་ཡིན་པས་ངས་ཁྱོད་རང་བཙལ་དགོས
ཁྱོད་རང་བཙལ་བའི་བརྒྱུད་རིམ་ཁྲོད
མཚམས་ལ་ལར་མྱ་ངམ་གྱི་ཐང་ནས་ལྷག་དུས་ཀྱང
ངས་རང་ཉིད་ཁེར་རྐྱང་རེད་མ་འདོད
རྒྱུ་མཚན་ འཇིག་རྟེན་ན་ཁྱོད་པའི་རྐྱེན་གྱིས་རེད
མི་ལོ་ཉི་ཤུའི་ཡར་སྔོན་གྱི་ནངས་མོ་ཞིག་ལ
དྲོད་འཇམ་གྱི་མཁའ་དབུགས་ཁྲོད་ནས
ཁ་བ་ལེབ་མོ་ལེབ་མོ་བྱས་ཏེ
ཧ་ཅང་ཞི་འཇམ་ངང་དལ་གྱིས་འབབ་ཀྱིན་འདུག
བཤད་ཚོད་ལ ཁ་བ་འབབ་དུས་ལམ་ལ་ཆས་ན
ཁ་ལས་དགེ་ཞིང་བསམ་དོན་འགྲུབ་ཡོང་ཟེར
དེའི་ཕྱིར ངས་ཅིས་ཀྱང་ཁྱོད་རང་རྙེད་ངེས
ད་ལྟ་ཉི་མ་ནུབ་ལ་ཉེ་བས
འཇིག་རྟེན་ཡོངས་མག་མོག་ཏུ་འགྱུར་གྱིན་འདུག
མུན་པ་རུབ་དུས་ངས་ཅི་ཡང་མི་མཐོང་བས
ཐ་ན་རང་ཉིད་ཀྱང་བོར་སྲིད་མོད
ཁྱོད་ཡོད་པའི་སེམས་ཀྱི་ཉམས་སྣང་ཞིག་ལ
ངས་རང་ཉིད་ཀྱང་གནས་ལུགས་ཆུང་ཆུང་ཞིག་ཡིན་འདོད
2014/9/16
བཀུར་འོས་སྐལ་རྒྱམ་ལགས། ཨ་སྐྱོ་བ་བའི་དག་ཆ་འདི་ཡིན་པའི་ཤེས་བྱེད་འདྲ་ཡོད་དམ། ངས་ཡུན་རིང་འཚལ་ཡང་མ་རྙེད། ཀློང་རྡོལ་བླ་མའི་གསུང་དུམ་ཞིག་ཏུ་ཚིག་ཏུ་ཡོད་ཀྱང་། ད་དེ་ཡང་རྙེད་ཀྱི་མི་འདུག
ཉམས་ཆུང་དང་ཉམ་ཆུང་གཉིས་ལ་ཁྱད་པར་ཡོད་དམ།
བྱམས་པ་ལགས། དེང་གི་རྩོམ་ཡིག་ཅིག་ཏུ་འདི་ལྟར་མཐོང་བ་ལས་ཁུངས་མེད། མི་ཆེན་ལགས་ལ། ནུས་པ་དང་འཁོས་ཀ་ཞན་པའི་མི་ལ་ཉམ་ཆུང་འདི་འབྲི་དགོས་པ་འདྲ་ཡང་། ཉམས་ཞེས་བྲིས་པའང་མང་བས་ངས་ཐག་མ་ཆོད་ལ་དག་ཡིག་ཚད་ལྡན་རེ་ལག་ཏུ་རེག་མ་སོང་། དགོངས་དག