ཟླ་བ་དབང་ཕྱུག
དབྱངས་ཅན་ལྷ་མོའི་ཞལ་གྱི་དཀྱིལ་འཁོར་ལྟ་བུའི།།
དཀར་དམར་ཚོས་ཀྱིས་ཕྱུག་པའི་ཞལ་རས་ངོས་ཀྱི།།
གཡོ་ལྡན་ཟུར་མིག་བུང་བའི་འཕུར་རྩལ་དེ་ཡིས།།
སེམས་ཀྱི་ཉ་མོ་ལྕགས་ཀྱི་ཀྱོ་བས་དྲངས་སོང་།།
སྐུ་གཟུགས་རིང་ཐུང་སྙོམས་པའི་དྲངས་ཚུགས་ལྡན་ཞིང་།།
སྐེད་པའི་ཨ་ལོང་སྒོར་མོའི་འཁོར་འགྲོས་ཡངས་བ།།
ངང་མོ་མཚོ་ལ་རོལ་བའི་ཞི་དུལ་ཉམས་ཀྱིས།།
བྱམས་ལྡན་བོད་ཀྱི་བུ་མོའི་ཁྱད་ཆོས་མཐོང་སོང་།།
ཆོལ་གསུམ་གཅིག་ཏུ་འདྲེས་པའི་སྐད་ཀྱི་གདངས་ལ།།
རྔ་རིག་རོལ་མོའི་གར་གྱི་སྒེག་ཉམས་ལྡན་པ།།
མ་བཟང་བུ་མོའི་འགྱུར་གྱི་སྙན་ཆ་ཞིག་གིས།།
ཐོས་འཛིན་གསོས་སུ་སྦྲང་རྩིའི་གནང་སྦྱིན་བསྩལ་སོང་།།
སྐྱ་སེང་དགུང་དུ་སྙེག་པའི་ས་འཛིན་མཐོན་པོ།།
ལྷུང་ལྷུང་དལ་འགྲོས་རྒོད་པའི་ཆུ་སྒྲ་སིལ་མ།།
རྩེ་འཛུམ་ཞི་དུལ་ཅན་གྱི་ཞལ་རས་དྲོན་མོ།།
རྡ་སའི་རི་ངོགས་འདི་ནས་ཡལ་ཐབས་མི་འདུག།
འཛུམ་ན་མེ་ཏོག་ལྟ་བུའི་ཞལ་རས་དྲོན་མོ།།
བགད་ན་མུ་ཏིག་བསྟར་འདྲའི་སོ་ཕྲེང་གཙང་མ།།
སོང་ན་རྨ་བྱའི་ཉམས་ཀྱི་གོམ་འགྲོས་ཡངས་མོ།།
བདག་གི་སེམས་ངོགས་འདི་ནས་ཡལ་ཐབས་མི་འདུག།
ཉིན་མཚན་ཟླ་ལ་བསྲེས་ནས་ལོ་གཉིས་འགོར་སོང་།།
སེམས་པ་འཁྱག་ལ་སྦྱར་ནས་ལོ་གཉིས་འགོར་སོང་།།
གློ་སྙིང་ས་རུ་ལྷུང་བའི་ཚོར་སྣང་ཞིག་གིས།།
ཚིག་གཅིག་སྙན་ལ་སྒྲོན་པའི་གོ་སྐབས་མ་ཐོབ།།
རི་དང་ལུང་བ་བརྒལ་བའི་བར་ཐག་མེད་ལ།།
ཆུ་དང་གཙང་པོ་བཙན་པོས་ཆོད་ཐག་མེད་ཀྱང་།།
བདག་གི་སེམས་ཀྱིས་གཞེངས་བའི་ལྷ་ཡུལ་ཞིག་ན།།
ཁྱོད་ནི་ཨུ་མ་ཞིག་གི་གཟུགས་སུ་འཁྲུངས་ཡོད།།
ནམ་ཡང་བདག་གིས་སེམས་ལ་གོ་ཆ་བགོས་ཏེ།།
ཁྱེད་ཀྱི་གཡུལ་སར་ཞུགས་པའི་ལྟ་གོན་བྱས་མོད།།
མིག་རིལ་སྟོང་ཕྲག་མང་པོའི་སོ་མྱུལ་བཙན་པོས།།
དམར་ཆུང་ཡིད་འདི་དོགས་པའི་ལམ་དུ་དྲངས་སོང་།།
ཟུངས་ཁྲག་ཟུངས་ནས་འཕྱོ་བའི་ཚོར་བའི་རླབས་རྒྱུན།།
འགོག་མེད་ན་ཆུང་པདྨའི་སྙན་དུ་བཞུར་ཐལ།།
གཡས་གཡོན་རྒྱབ་མདུན་ཅིག་ལ་ཕོག་ཐུག་སོང་ན།།
སེམས་དང་བསམ་པའི་སྟེང་ནས་དགོངས་དག་ཞུའོ།།
འོད་དཀར་ཟླ་བའི་ལང་ཚོའི་དཔལ་ཡོན་ཅན་གྱི།།
གཤིས་བཟང་ཡིད་དུ་འོངས་བའི་ཨ་མདོའི་བུ་མོ།།
སེམས་འདི་ཁྱོད་ལ་ཤོར་བའི་གཏམ་རྒྱུད་གསན་ན།།
བུ་ཞིག་ཁྱོད་ལ་དུང་བའི་སྡུག་བསྔལ་མ་བརྗེད།།
རྡ་ས་མི་མང་དཔེ་མཛོད་ཁང་གི་ཉེ་འཁྲིས་ནས་བྲིས།
དྷ་སའི་དཔེ་མཛོད་མདུན་དུ་ཡོད་པའི། །
ཐག་རིང་ཨ་མདོའི་ཡུལ་གྱི་བུ་མོ། །
ཡུལ་དབུས་སྟོད་དུ་སྐྱེས་པའི་བུ་ཕོ། །
དཔེ་མཛོད་རྒྱབ་ཏུ་སྒུག་ནས་བསྡད་ཡོད། །