སྐྱོ་བྲག་དགའ་དབང་།
དཔལ་ལྡན་ཟླ་བ་གྲགས་པས་འགྲོ་བ་མི་རྣམས་ཀྱི་སེམས་ཁམས་དང་འབད་བརྩོན་ཐད། བསྡོམས་ཚིག་འདི་འདྲ་ཞིག་བཀོད་ཡོད།
སྐྱེ་བོ་འདི་ཀུན་བདེ་བ་མངོན་འདོད་ཅིང་། །
མི་རྣམས་བདེ་བའང་ལོངས་སྤྱོད་མེད་མིན་ལ། །
ལོངས་སྤྱོད་ཀྱང་ནི་སྦྱིན་ལས་འབྱུང་མཁྱེན་ནས། །
ཐུབ་པས་དང་པོར་སྦྱིན་པའི་གཏམ་མཛད་དོ། །
ཚོང་སོ་ནམ་སོགས་དང་སྦྱིན་པ་ནི་འཕྲལ་ཕུགས་ཀྱི་མིག་རྒྱང་རིང་ཐུང་གི་ཁྱད་པར་ཙམ་ཡིན། དོན་འདི་ཉིད་ལ་བརྟེན་ནས་འཛམ་གླིང་ཐོག་སྤྱི་སྒེར་གྱི་གནས་ཚུལ་འདྲ་མིན་མང་པོ་ཞིག་འབྱུང་གི་ཡོད་པའི་དཔེ་མཚོན་ནི། ཉེ་བའི་ལོ་རབས་ནང་ཨ་མི་རི་ཀས་ས་སྣུམ་ལ་དམིགས་ཏེ་དབྱི་རག་ཐོག་དྲག་པོའི་དམག་ཆེན་ཕབ་པ་དང་། ས་འོག་གི་གཏེར་ཁའི་ཆེད་ཉི་ཧོང་དང་རྒྱ་ནག་སོགས་ཞི་བདེ་རྒྱ་མཚོའི་ནང་གི་གླིང་ཕྲན་བདག་དབང་ཐད་སྟག་གཟིག་བཞིན་ཕན་ཚུན་ངར་གྱིན་ཡོད་པ་རེད།
ང་ཚོ་བོད་པ་ཕལ་མོ་ཆེས་བོད་ཡུལ་གྱི་འཁོར་ཡུག་གི་གནས་བབ་དང་གཏེར་ཁ་སོགས་ཅི་ཡང་ཤེས་ཀྱི་མེད་ལ། གལ་ཏེ་ཤེས་ནའང་འགུལ་སྐྱོད་བྱེད་པའི་རང་དབང་དང་ནུས་པ་རྩ་བ་ནས་ཡོད་པ་མ་རེད། གཅིག་ཤེས་པ་དང་ཡོད་པ་ནི་རྩྭ་ས་རྩོད་གླེང་དང་དབྱར་རྩྭ་དགུན་འབུའི་ཆེད་ཙམ་ཡིན། འདི་དག་གི་འཁྲུགས་ལོང་ཐད་མཐོ་བླ་ཆེ་དཔོན་པོ་ནས་དམའ་སྤྲང་པོ་ཉམ་ཆུང་ཡན་གྱི་ཁ་ལག་བདེ་བ་ཚོས་མ་བཤད་པ་དང་མ་བྲིས་པ་ཞིག་མེད་ནའང་དོན་ཕན་མ་བྱུང་བ་ནི་གཉིས་ཕན་གྱི་ཐབས་ལམ་དབེན་པའི་ཁ་ཏ་ཙམ་ཡིན་པས་རེད།
རྒྱུ་མཚན་དེས་ན་ང་ཚོས་གཉིས་ཕན་གྱི་ཐབས་ལམ་ཞིག་འཚོལ་དགོས་པ་སྟེ། དཔེར་ན། དབྱར་རྩྭ་དགུན་འབུའི་ཆེད་འཁྲུགས་ལོང་མི་འབྱུང་བའི་ཐབས་ལམ་འབུ་ས་བཟང་ངན་ལ་དཔགས་པའི་རྐོ་ཁྲལ་རང་གཞན་ཤར་བསྐྱོད་ཡོང་བའི་འོས་འཚམ་ཞིག་གཏན་ཁེལ་བྱུང་བ་ཡིན་ན་གདོད་སྡེ་ཤོག་འཁྲུགས་ལོང་མེད་པ་ཡོང་གི་རེད། གཞན་དུ་མི་རིགས་དང་ལ་རྒྱ་མཐུན་འབྲེལ་སོགས་ཇི་ཙམ་བཤད་ནའང་ཕན་ཐོགས་མེད་པ་ནི་འདས་པའི་གནས་ཚུལ་གྱིས་གསལ་སྟོན་བྱས་ཡོད།
གཉིས་ཕན་གྱི་ཐབས་ལམ་ཡང་ང་ཚོ་བོད་པ་ནང་ཁུལ་གྱིས་མི་རིགས་ཀྱི་ལ་རྒྱ་གཞི་ལ་བཞག་ནས་འཚོལ་དགོས་པ་ལས་གཞན་གོང་རིམ་དག་ནི་བར་འདུམ་གྱི་ཕྱོགས་ལ་བསམ་སྦྱོར་ཡག་པོ་ཞིག་ནམ་ཡང་གནང་མི་སྲིད་པ་ནི་དུམ་བུར་བགོས་ནས་དབང་སྒྱུར་བྱ་བ་ཞེས་པའི་ཀླུང་རྟའི་ཐོག་སོང་བ་ཡིན་པ་ང་ཚོས་ཤེས་པར་བྱའོ། །
རྒན་སྐྱོ་བྲག་ལགས་ཀྱི་གསུང་ལ་མངོན་པར་བསྟོད་འོས་པ་ཞིག་རེད་སྙམ། གང་ལ་ཞེ་ན་རྩའམ་ས་རྒྱའི་ཁ་གྲངས་ཀྱི་རྩོད་པ་ནི་དུས་བཞིའི་ཡོ་ལངས་སམ་རྒྱུན་གཏན་གྱི་ཞོགས་དགོང་ནངས་འདོན་ལྟ་བུ་ཡིནའང། དབྱར་རྩ་དགུན་འབུའི་གསོད་བརྡུང་གི་བཞུར་རྒྱུན་ནི་གཏན་དུ་མ་ཡིན་པར་དཔྱིད་ཟླ་གསུམ་པའི་ཟླ་སྨད་ནས་དབྱར་ཟླ་བཞི་པའི་རིང་སོགས་ཡིན་མོད། འོན་ཀྱང་དེང་དུས་ཁྱོན་ཡོངས་ནས་དྲག་དོར་ཞི་བའི་རྡོག་སྒྲ་སྒྲིག་བཞིན་་སྔ་མའི་དཔའ་བོ་དག་སྙིང་མེད་དང། སྔ་མའི་སྡར་མ་དག་དེང་སྤྱི་ཚོགས་ཁྲོད་དཔའ་བོ་འགྱུར་བའི་སྒང་ཡིན་སྟབས་བོད་ཡུལ་དག་ལ་ཡང་དེ་ལྡར་ཡིན་པ་ལ་བསྙོན་རིན་མེད་པར་བརྩིས་ན་ཆེས་ཕུ་ནུ་ནང་དམེ་ཡོང་མི་སྲིད་པ་ཡིན་རྒྱུ་རེད། གཞན་སྔ་མ་ལྟར་དུ་བསམ་ན་དབྱར་རྩ་དགུན་འབུའི་སྐབས་འདིར་ཕལ་ཆེར་སྤུ་ཟླ་བསད་པའི་འཆི་ཁྲག་གམ་ཡང་ན་བརྡུང་པའི་གསོན་ཁྲག་གཉིས་གང་རུང་ས་ལ་འཐོར་ངེས་པ་ལྟ་བུ་སོང་ཙང་སྔ་མའི་ཀླ་ཀློའི་བྱེད་སྤྱོད་ལ་བཞེད་རྔམ་སྐྱེས་དྲགས་པའི་རྐྱེན་གྱིས་ད་ལོར་འབུ་རྐོ་སྐབས་འཁྲུགས་རྩོད་མི་ཡོང་བའི་སྨོན་པ་ལག་སོར་སྙིང་ཁར་སྦྱར་ཏེ་རྒྱང་རིང་འདི་ནས་འབུལ་བཞིན་ཡོད། ི
དབྱར་རྩྭ་དགུན་འབུ་ནད་ཀྱི་གཉེན་པོ་རེད། །
དབྱར་རྩྭ་བག་མེད་སྤྱད་ན་འཆི་བར་འགྱུར། །
དགུན་འབུ་མང་དག་བསད་ན་སྡིག་པར་འགྱུར། །
དེ་བས་དཔལ་འབྱོར་སྡུ་རུབ་གཞན་དུ་འཚོལ། །