—–ཨེ་མ་ཧོ།
ཀ་མ་ལ་ལྟར་ལྷག་བསམ་དཀར་བའི་ཁ་བའི་གངས་ལྷ་མེ་ཏོག་ཉིད།།
ག་བུར་དབང་པོའི་བཞིན་རིས་མཛེས་པར་ང་ཡི་རྒྱལ་བའི་དབང་པོ་ལ།།
ཅ་དག་དབྱིན་ཡུལ་རྒྱལ་སྤྱིའི་མགྲོན་དུ་ཆ་ལུགས་ཟློས་གར་དཔལ་དུ་ཤར།།
ཉ་གང་སྟོང་གི་གཟི་དབར་འབར་ཞིང་ཇ་ཆང་མཆོད་སྤྲིན་ཀུན་ནས་མཛེས།།
ཏ་ལའི་བླ་མའི་མཛད་པ་ཐ་དག་འཛམ་གླིང་འཛིན་མའི་རྒྱན་ཏུ་བཀྲ།།
ད་ལྟའི་དུས་རབས་ཉེར་གཅིག་འདྲེན་པའི་ན་མོ་རྒྱལ་བའི་བསྟན་པར་ཤིས།།
པ་མེས་གངས་ཅན་བོད་ནས་མཆེད་པའི་ཕ་བཟང་བུ་གཅེས་ཀུན་ཏུ་བདེ།།
བ་གླང་སྤྱོད་ཀྱི་དབྱིན་གླིང་དགེ་བར་མ་ལུས་དགའ་སྟོན་ཚེས་འདི་ལེགས།།
ཙ་ན་མཆིས་རུང་རྒྱང་ནས་མཇལ་ཡང་ཚ་གྲང་སེལ་བའི་སྨན་མཆོག་བཞིན།།
ཛ་ཡའི་བསྟན་འཛིན་རྒྱ་མཚོ་གོས་ཅན་ཝ་ལེར་མཇལ་བར་སྐལ་བ་བཟང་།།
ཞྭ་རིགས་སྣ་ཚོགས་དབུ་ལ་མཛེས་ཞིང་ཟ་འདྲེ་རྒྱལ་འགོང་འདུལ་བའི་གཉེན།།
འ་ཅག་བསྟན་སྲིད་སྤེལ་བའི་མགོན་པོ་ཡ་མཚན་ཞི་བདེའི་དེད་དཔོ་ན་རྒྱལ།།
ར་བ་གངས་ཅན་ཚེ་བསོད་བརྟས་པའི་ལ་རྒྱའི་བདག་པོ་གེ་སར་རྗེ།།
ཤ་རུས་གདུང་རྒྱུད་གཅིག་ལས་མཆེད་པའི་ས་ཐོབ་སེམས་དཔའ་ཆེན་པོ་ཉིད།།
ཧ་ཅང་དཀའ་སྤྱད་གཞན་དོན་འཕྲིན་ལས་ཨ་ལ་ལ་ཧོ་ཀུན་གསལ་གདལ།།
ཐུགས་བསྐྱེད་ནམ་ཡང་ཞིམ་པ་མེད་པའི་སྙིགས་དུས་འདྲེན་པའི་རྒྱལ་བ་མཆོག།
ྒགསང་གསུམ་ཡོན་ཏན་ཡར་ངོའི་ཟླ་བཞིན་གོང་ནས་གོང་འཕེལ་བཀྲ་ཤིས་ཤོག།
ཅེས་པ་རབ་གནས་ཤིང་ལུག་སྣྲོན་ཟླའི་དཀར་ཕྱོགས་རྒྱལ་བ་གསུམ་པར་རྒྱལ་བའི་དབང་པོ་མཇལ་བའི་རྒྱལ་སྟོན་སྐབས་སུ་ཤྲྰི་ཨེ་མ་ཧོས་དབྱིན་ཡུལ་འབུམ་ཐང་ནས་གང་ཤར་གསོལ་བར་འདེབས་པར་དགེའོ།། །།
དགེའོ་དགེའོ་རབ་ཏུ་དགེ མཛད་ཕྲིན་སྐུ་ཚེ་རྟག་བརྟན་ཤོག
མཁན་ཆེན་བླ་མའི་ངོ་དེབ་ལས
༡ རྒྱལ་བ་རིན་པོ་ཆེ།
ཨེ་མ་ཧོ། །
ཨེ་ཝྃ་རིག་པའི་རྟེན་འབྱུང་རྒྱལ་བའི་ལམ། །
ཇི་བཞིན་མངོན་གཟིགས་འགྲོ་ལ་སྟོན་མཁས་པ། །
འཛམ་གླིང་ཞི་བདེའི་འདྲེན་པ་རྒྱལ་བའི་སྲས། །
བསྟན་འཛིན་རྒྱ་མཚོའི་བཞེད་དོན་ལྷུན་གྲུབ་ཤོག །