ནམ་མཁའ།
ང་རང་ལས་ཀའི་བར་གསེང་ནས་དྲ་ཐོག་ཏུ་འགྲུལ་བཞུད་བྱས་ཏེ། སྲིད་སྐྱོང་འོས་མི་དང་སྤྱི་འཐུས་འོས་མི་ཚོར་རྒྱུས་ལོན་ཅུང་ཟད་རེ་བྱས་པ་ཡིན། སྐབས་སྔོན་མའི་སྲིད་སྐྱོང་འོས་བསྡུ་དང་བསྡུར་ནས་བཤད་ན། ཆོལ་ཁའི་འཐེན་འཁྱེར་གྱི་མཁྲིས་ནད་ཕོག་མཁན་ཉུང་རུ་ཕྱིན་པའི་ཚོར་སྣང་བྱུང་། གནས་ཚུལ་འདི་ནི་ང་རང་ཉིད་ལ་མཚོན་ནས་བཤད་ན། དགོས་འོས་བའི་གནས་ཚུལ་ཞིག་རེད་ཅེས་བཤད་ཆོག ཡིན་ན་ཡང་། ད་རུང་རེ་ཟུང་གིས་མུ་མཐུད་ནས་བཙན་བྱོལ་སྤྱི་ཚོགས་དཀྲུགས་ཨེ་ཐུབ་ལ་འབད་བརྩོན་བྱེད་ཀྱི་འདུག་མོད། འོན་ཀྱང་དེ་ཚོའི་གྲལ་ནི་ཁོ་རང་ཚོའི་ལས་ཀ་ཡིན་པའི་ངོས་འཛིན་བྱེད་ཆོག་པ་ཞིག་རེད་སྙམ།
གང་ལྟར་ཡང་། དྲ་ལམ་འགྲུལ་བཞུད་འདིའི་བརྒྱུད་རིམ་ནས་མཐོང་བའི་སྤྱི་འཐུས་འོས་མི་བཞེངས་མཁན་ནི། སྐྱ་སེར་གཉིས་ཀ་གྲོག་མ་དམར་ནག་གི་ཚང་བརྡོལ་བ་ལྟ་བུ་ཞིག་རེད་ཅེས་བཤད་ན་མི་འགྲིག་པ་ཨེ་ཡོད་སྙམ། ཡིན་ན་ཡང་། ཕྱོགས་གཅིག་ནས་བཤད་ན། དགའ་འོས་པ་ཞིག་རེད་ཅེས་བཤད་པའི་ཡུལ་དུ་གྱུར་འདུག ཡང་ཕྱོགས་ངོས་གཞན་ཞིག་ནས་བཤད་ན། དམིགས་ཡུལ་དང་འཆར་གཞི་སོགས་ཅི་ཡང་མེད་པར་བོད་སྐད་ཤེས་པ་ཙམ་གྱིས་སྤྱི་འཐུས་དང་སྲིད་སྐྱོང་དུ་ལངས་པ་ནི། མི་དམངས་ཀྱིས་སྤྲད་པའི་གོ་གནས་དེ་རིན་ཐང་ཆུང་བུར་བཏང་བ་ལྟ་བུ་ཞིག་ཏུ་གྱུར་འདུག་པས། ཕྲན་གྱིས་རྒྱུན་ཏུ་སྤྱི་འཐུས་དང་སྲིད་སྐྱོང་འོས་མི་ཚོའི་དམིགས་ཡུལ་དང་འཆར་གཞི་ག་འདྲ་ཡོད་མེད་ལ་ཐོག་མར་བལྟ་གི་ཡོད་པ་ལྟར ། ཕྲན་གྱིས་དྲ་ལམ་བརྒྱུད་རིམ་ནས་མཐོང་བའི་ཆོལ་ཁ་གསུམ་གྱི་སྤྱི་འཐུས་མི་ཚོའི་ནང་ན། དམིགས་ཡུལ་དང་འཆར་གཞི་ཡོད་མཁན་གོང་དུ་བཀོད་ཟིན་པའི་བུ་མོ་འདི་ལས་གཞན་གཅིག་ཀྱང་མཐོང་མ་སོང་། ཁོ་རང་ཚོའི་སྤྱི་འཐུས་ཀྱི་ཁྱབ་བསྒྲགས་སྟབས་བདེ་ཞིག་རེད། མིང་དང་ཕ་ཡུལ་ཤེས་ཚད་ཙམ་ཡིག་ཕྲེང་འགའི་ནང་བསྡུས་ཏེ་བྲིས་ནས་ཁྱབ་བསྒྲགས་བྱེད་ཀྱི་འདུག་པས། ང་རང་ཉིད་ཀྱི་མཐོང་སྣང་ལ་འཆར་གཞི་དང་དམིགས་ཡུལ་ཅི་ཡང་མེད་པའི་སྤྱི་འཐུས་འོས་མི་ཁོག་སྟོང་ཅན་དག་ཏུ་མཐོང་སོང་སྟབས། འདིའི་སྐོར་ནས་བསམ་ཚུལ་འགའ་བཤད་རྒྱུ་ཡིན།
ང་ཚོས་ཤེས་གསལ་ལྟར། འཛམ་གླིང་གི་དམངས་གཙོའི་རྒྱལ་ཁབ་ཀྱི་གྲོས་ཚོགས་འཐུས་མི་བཞེངས་མཁན་ཞིག་ཡིན་ཚེ། ཁོ་རང་གིས་ས་གནས་གང་ཞིག་ལ་ཆད་སྐྱོན་དང་དཀའ་ངལ་གང་ཞིག་ཡོད་པ་རྣམས་ལ་དམིགས་ཏེ་འཆར་གཞི་དང་དམིགས་ཡུལ་བཤད་ནས་ད་གཟོད་ཁྱབ་བསྒྲགས་བྱས་ཤིང་། མི་དམངས་ཚོས་ཀྱང་ཁོ་རང་གི་དམིགས་ཡུལ་དང་འཆར་གཞི་སོགས་ལ་བལྟས་ཏེ་འོས་འཕེན་གྱི་ཡོད། ཡིན་ན་ཡང་། ང་ཚོའི་བཙན་བྱོལ་གཞུང་གི་སྤྱི་འཐུས་སུ་བཞེངས་མཁན་ཚོས། རང་གི་མིང་དང་སྡོད་གནས་ཙམ་གྱི་གནས་ཚུལ་ཡིག་ཕྲེང་གཉིས་གསུམ་ཞིག་གི་ནང་དུ་བསྡུས་པ་ལས། དམིགས་ཡུལ་དང་འཆར་གཞི་ཅི་ཡང་མེད་པར་ཁྱབ་བསྒྲགས་བྱས་ཤིང་། འོས་ཤོག་འཕེན་མཁན་གྱི་བཙན་བྱོལ་བོད་མི་ཚོས་ཀྱང་། དམིགས་ཡུལ་དང་འཆར་གཞི་སོགས་ཡོད་མེད་ལ་ཅི་ཡང་མི་བལྟ་བར། རང་གི་ལུང་ཚན་གྱི་ཞེན་ཁོག་ཁོ་ན་བྱས་ཏེ་མིག་ལོང་པ་ལྟར་ལོང་འདེམས་བྱས་ཀྱི་ཡོད།
ང་ཚོའི་བཙན་བྱོལ་སྤྱི་ཚོགས་ཀྱིས་སྤྱི་འཐུས་འོས་འཕེན་མཁན་ཚོས་བྱེད་སྟངས་འདི་ནི། བོད་མི་རིགས་ཀྱི་སྤྱིའི་བདེ་སྡུག་མ་བསམ་པར་ལུང་ཚན་དང་འབྲེལ་འདྲིས་ཡོད་མེད་ལ་བལྟས་ཏེ་འོས་འཕེན་གྱི་ཡོད་པས། གནས་སྟངས་འདི་འདྲ་ཞིག་གི་འོག་ནས་བོད་མི་རིགས་འཆི་གསོན་བར་ན་ཡོད་པ་ལ་སྲོག་ཤིང་སྟེར་མི་ནུས་ཞིང་། ང་ཚོ་འགྱེལ་ས་ནས་ཡར་ལངས་མི་ཐུབ་པ་གསལ་བོར་མཚོན་ཐུབ་ཀྱི་འདུག་ལ། ང་ཚོ་ཆ་ཚང་གིས་མཁྱེན་གསལ་ལྟར། གྲོས་ཚོགས་ར་བའི་ནང་དུ་ཆོལ་ཁའི་འཐེན་ཁྱེར་གྱི་ཚིག་མཚོན་འདེབས་རེ་བྱེད་པ་ལས། བོད་མི་རིགས་ཀྱི་བདེ་སྡུག་ཅི་ལྟར་སེལ་དགོས་མིན་ལ་གླེང་སློང་ཤིན་ཏུ་ཉུང་། ལྷག་པར་དུ་གདན་ས་ཁག་དང་སོ་སོའི་དགོན་སྡེ་ཁག་ནས་ནང་ཆོས་སློབ་གཉེར་གྱི་ཁུངས་མ་འཁྱོལ་ཞིང་།སློབ་གཉེར་ཕྱོགས་ནས་རང་གི་ཆོས་གྲོགས་རྣམས་ཀྱི་རྗེས་མ་ཟིན་པའི་ཆོས་བརྒྱུད་ཁག་གི་འཐུས་མི་དང་། དེ་མིན་ཆོལ་ཁའི་འཐུས་མིར་སླེབས་པའི་སེར་མོ་འདི་ཚོས། བཙན་བྱོལ་སྤྱི་ཚོགས་ཀྱི་གྲོས་ཚོགས་ར་བའི་ནང་དུ། ཁོ་རང་ཚོའི་ལུས་ལ་གྱོན་པའི་སྟོན་པའི་མནབས་བཟའ་ཡང་གཏིང་བརྗེད་དུ་གྱུར་ཏེ། ཉེ་རིང་ཆགས་སྡང་གི་མེ་ལྕེ་ཡིས་གྲོས་ཚོགས་ར་བ་དང་བཙན་བྱོལ་སྤྱི་ཚོགས་མེ་བསྲེགས་ནས། གཏི་མུག་གི་དུད་སྤྲིན་དགུང་ལ་འཕྱུར་ཏུ་འཇུག་གི་ཡོད་པས། འཐུས་མི་ཁོག་སྟོག་ཅན་གྱི་ས་འབུ་གྲོག་མ་དམར་པོ་བཞིན་ཁྱུ་དང་ཁྱུ་བཞིན་འགྲོ་མཁན་འདི་ཚོའི་གྲལ་ལ་གོ་སྐབས་མ་སྤྲད་ན་ལེགས་པར་སྙམ། གང་ལྟར་ཡང་། བཀའ་ཤག་ཁོག་སྟོང་ཅན་དང་སྤྱི་འཐུས་ཁོག་སྟོང་ཅན་འདི་ཚོའི་མཇུག་གང་མགྱོགས་རྫོགས་པར་ང་ཚོས་འབད་བརྩོན་བྱེད་རན་འདུག 5 /12/2020ལོར་ཡོ་རུབ་ནས་བྲིས།
འདས་པའི་སྲིད་སྐྱོང་དང་སྤྱི་འཐུས་ཀྱི་སྐོར་ལ།
་
་་་་་་་་་་་་་ གྲོས་ཚོགས་ར་བའི་ནང་དུ་ཆོལ་ཁའི་འཐེན་ཁྱེར་གྱི་ཚིག་མཚོན་འདེབས་རེ་བྱེད་པ་ལས། བོད་མི་རིགས་ཀྱི་བདེ་སྡུག་ཅི་ལྟར་སེལ་དགོས་མིན་ལ་གླེང་སློང་ཤིན་ཏུ་ཉུང་། ་་་་་་་་་་་་་
་་་་་་་་་་་་་ གང་ལྟར་ཡང་། བཀའ་ཤག་ཁོག་སྟོང་ཅན་དང་སྤྱི་འཐུས་ཁོག་སྟོང་ཅན་འདི་ཚོའི་མཇུག་གང་མགྱོགས་རྫོགས་པར་ང་ཚོས་འབད་བརྩོན་བྱེད་རན་འདུག 5 /12/2020ལོར་ཡོ་རུབ་ནས་བྲིས། ་་་་་་་་་་་་་་་
་
ནམ་མཁས།