ཞེན་ཆགས་ཀྱི་མཚོ་རླབས་ཀྱིས།།
མི་ལུས་ཀྱི་གཡོ་གྲུ་བཤིག།
ཞེན་བྲལ་གྱི་འཁྲི་ཤིང་གིས།།
ཐར་བ་ལ་ཟམ་ཆེན་བཙུགས།།
ཁོང་ཁྲོ་ཡི་མེ་དཔུང་གིས།།
བསྐལ་སྟོང་གི་དགེ་འབྲས་བསྲེགས།།
བཟོད་བསྲན་གྱི་གོ་ཆ་ཡིས།།
ཕྲ་མ་ཡི་མདུང་སོ་བསྟོར།།
གཏི་མུག་གི་ལྕཊ་སྒྲོག་གིས།།
བླང་དོར་གྱི་དཔྱོད་ཤེས་བསྡོམས།།
ཤེས་རབ་ཀྱི་འོད་དཀར་གྱིས།།
མ་རིག་པའི་མུན་པ་བསལ།།
ང་རྒྱལ་གྱི་སེར་ར་ཡིས།།
ཡོན་ཏན་གྱི་སྙེ་མ་བཅོམ།།
དམན་འཛིན་གྱི་གསེར་བཙོ་ཡིས།།
རིན་ཆེན་གྱི་འོད་མདངས་འཕྲོས།།
ཕྲག་དོག་གི་ཁྱི་གུ་ཡིས།།
གཞན་ལྡན་གྱི་ཕུན་ཚོགས་བརྐུས།།
ཡི་རང་གི་ཞིང་ས་ཡིས།།
ལེཊ་འབྲས་ཀྱི་མེ་ཏོག་སྐྱེས།།
བྱམས་བྲལ་གྱི་དུག་སྦྲུག་གིས།།
ཆེས་གཅེས་ཀྱི་ཚེ་སྲོག་བཅད།།
བྱམས་བརྩེ་ཡི་སྦྲང་ཆར་གྱིས།།
འགྲོ་ཀུན་ལ་དཔྱིད་དཔལ་བསྐྲུན།།
རང་ཉིད་ཀྱི་རང་མདངས་དངོས།།
བརླག་བྱེད་ཀྱི་དུག་ལྔ་དགྲ།།
ཕྱིན་དྲུག་གི་ལྟ་སྤྱོད་ཀྱིས།།
མྱུར་བར་ཉིད་གཞོམ་པར་སྨོན།།
ཕྱི་ལོ་ ༢༠༡༣ ཟླ་བ་ ༣ ཚེས་ ༡༨ བླ་རུང་གི་ཚེ་སྒྲུབ་ཉིན་དང་པོའི
དུག་ལྔས།
གཏི་མུག་གཉིད་ཀྱིས་རྨོངས་པར་བྱེད། །
ཆགས་པའི་ལྕགས་ཐག་སྒྲོག་པར་བྱེད། །
སྡང་པས་རང་ཉིད་མ་སྐྱིད་བྱེད། །
ང་རྒྱལ་ཁེངས་པས་བླུན་པར་བྱེད། །
ཕྲག་དོག་རང་ཉམས་གུ་དོག་བྱེད། །
མཚང་རྟོལ་གྱིས།
ཐོས་པས་གཏི་མུག་མུན་བསལ་གྱིས། །
སྐྱོན་བལྟས་ཆགས་པས་མ་གོས་གྱིས། །
བྱམས་པས་ཞེ་སྡང་མགོ་གནོན་གྱིས། །
དམན་སས་ཡོན་ཏན་ཀུན་སྣོད་གྱིས། །
གཞན་ཐོབ་ཡོན་ཏན་རྗེས་རང་གྱིས། །
གཏི་མུག་གི་ཕག་རྒོད་མཆོངས་ནས།།
འཇིག་རྟེན་གྱི་ས་གཞི་བསྒྲིབས་སོང་།།
ཤེས་རབ་ཀྱི་འོད་དཀར་ཡོད་ན།།
དྭངས་གསལ་གྱི་ས་ཆེན་སྐྲུན་རོགས།།
ཞེ་སྡང་གི་སྦྲུལ་ཆེན་འཁྱུགས་ནས།།
འགྲོ་དྲུག་གི་བདེ་དགའ་དཀྲོགས་སོང་།།
སྙིང་རྗེ་ཡི་མཐུ་རྩལ་ཡོད་ན།།
བདེ་སྐྱིད་ཀྱི་དཔལ་ཡོན་སྐྲུན་རོགས།།
འདོད་ཆགས་ཀྱི་བྱ་ནག་རྔམས་ནས།།
གཞན་སེམས་ཀྱི་དྲི་མ་ཡལ་སོང་།།
ཆོག་ཤེས་ཀྱི་ཉམས་ལེན་ཡོད་ན།།
བདག་གཞན་གྱི་བཏང་སྙོམས་སྐྲུན་རོགས།།