ཆང་སྐྱེས།
དེ་ཡང་མདོ་དབུས་མཐོ་སྒང་གི་མདོ་སྨད་མཚོ་མོ་ཁྲི་ཤོར་རྒྱལ་མོའི་ལྷོ་འགྲམ་དང་རི་བོ་ཉི་ཟླ་ཉག་གའི་ནུབ་ཕྱོགས། གཙང་ཆབ་རྨ་ཆུ་སྔོན་མོའི་བྱང་ཕྱོགས། ཀྱེ་ཕུར་རྫ་རི་སྨུག་པོའི་ཤར་ཕྱོགས། རི་བོ་བློན་པོ་གསེར་ཆེན་གྱི་ཞབས་དྲུང་ན་མར་ཁུ་བཞིན་འཁྱིལ་ཞིང་འོ་ཞོ་ལྟར་ཆགས་པའི་དུམ་པ་སྡེ་བའི་རྒྱབ་རིའི་སྒང་ན་བརྗིད་ཉམས་ལྡན་པའི་ལབ་ཙེ་ཞིག་བརྩིགས་ཡོད་པ་དེའི་མིང་ལ་དུམ་པ་ལབ་ཙེ་ཞེས་འབོད་ལ།ལབ་ཙེ་འདིའི་སྟེང་ན་གནས་བའི་གནས་བདག་ནི་དུམ་པ་རྒྱལ་པོ་ཞེས་གྲགས་པའི་མི་བུ་དཔའ་ངར་ཅན་ཞིག་ཡོད་པ་དེ་ཉིད་ཡིན་སྐད་དང་དེའི་འཁོར་ཏུ་རྒྱལ་པོ་རང་ཉིད་ཀྱི་བུ་མེ་སྟག་དགྲ་འཇོམས་དང་བློན་པོ་ཤན་པ་མེ་སྟག་གཉིས་ཡོད་པར་བཤད།
སྡེ་པའི་ལོ་ལོན་རྣམས་ཀྱིས་བཤད་པའི་ངག་སྒྲུང་དང་ཆབ་འགག་ལོ་རྒྱུས་སོགས་སུ་བཀོད་པ་ལྟར་ན་སྤྱི་ལོ་༡༧༢༥ལོའི་དམག་འཁྲུག(སོག་པོ་བློ་བཟང་བསྟན་འཛིན་གྱིས་གོང་མ་ཁཱང་ཞི་ལ་ངོ་ལོག་བྱས་ཏེ་ཟིང་འཁྲུག་ལངས་པ་དེ་མིན་ནམ་བསམ་བྱུང་)གི་སྐབས་སུ་དུམ་པ་མཁར་ཞེས་གྲགས་པའི་མཁར་ཆེན་པོ་དེའི་ནང་དུ་བཞུགས་པའི་རྒྱལ་པོ་དང་རྒྱལ་བུ་གཙོ་བྱས་པའི་མི་སྐོར་ཞིག་མདའ་མདུང་གྲི་གསུམ་སོགས་རྣོ་མངར་ཅན་གྱི་མཚོན་ཆའི་ཁ་ནས་ཚེ་ལས་འདས་པར་བརྟེན་སྡེ་འབངས་རྣམས་འདུག་མ་བཟོད་པར་ཕྱོགས་ཕྱོགས་སུ་ཁ་ཐོར་དགུ་ཐོར་ཏུ་སོང་སྐད ། དེ་ནས་ལོ་ངོ་གང་མང་ཞིག་གི་རིང་ལ་ཡུལ་གྲོང་འདི་ཉིད་མི་མེད་ལུང་སྟོང་དུ་གྱུར། སྐབས་དེར་ཚེ་ལས་འདས་པའི་རྒྱལ་བློན་དང་འབངས་མི་ཚོ་ལས་རྒྱལ་པོ་དང་རྒྱལ་བུ་ད་དུང་བློན་པོ་ཞིག་སྟེ་མི་དབང་ཆེན་པོ་འདི་གསུམ་གྱི་རྣམ་ཤེས་བརྗིད་ཉམས་ལྡན་པའི་ཕོ་བྲང་དང་ཡིད་དུ་འོང་བའི་ཡུལ་ལྗོངས་སོགས་ལ་ཞེ་ཆགས་ཏེ་གཞན་དུ་མ་གཡེང་བར་ཡུལ་དེར་གནས་པར་གྲགས། དེ་ནས་ལོ་ཟླ་གང་མང་ཞིག་འདས་རྗེས་གནས་འདི་རུ་སླར་ཡང་ཕྱོགས་གཞན་ནས་ཡོང་བའི་མི་མང་པོ་འདུ་འཛོམས་ཀྱིས་སྡེ་བ་ཆགས་པའི་སྐབས་སུ་གནས་འདིར་ཞེ་ཆགས་པའི་རྒྱལ་བློན་འདི་དག་གིས་བར་ཆད་ཡང་ཡང་བྱས་ཏེ་མི་ལ་ན་ཚ་དང་ཕྱུགས་ལ་གོད་ཁ། ལོ་ཏོག་ལ་སད་སེར་སོགས་ཀྱིས་བཅོམ་པ་དང་སྒོས་སུ་བསྟུད་མར་ལོ་འགའི་རིང་ལ་ལོ་རེར་ལོ་ན་གཞོན་ཞིང་གཤིས་རྒྱུད་ཡག་པ། བློ་གྲོས་ལྡན་ལ་ལྷག་བསམ་གྱིས་ཕྱུག་པའི་བུ་རབ་འགའི་ཚེ་སྲོག་ལ་གནོད་པ་བྱས་པའི་རྐྱེན་གྱིས་སྡེ་བའི་དཔོན་པོ་དང་ལོ་ལོན་རྒན་པ་རྣམས་ཀྱིས་ཡང་ཡང་བློ་བསྡུར་དང་གྲོས་མོལ་ཐེངས་མང་བྱས་མཐར་བཀྲ་མི་ཤིས་པའི་རྐྱེན་ངན་འདི་བཟློག་ཐབས་སུ་སྤྲུལ་བའི་ཡང་སྲིད་བླ་མ་བླ་ཆེན་ཞིག་གདན་ཞུ་ཞུས་དགོས་པར་ཚང་མས་དགོངས་ཚུལ་གཅིག་མཐུན་ལྟར་ཐག་གཅོད་བྱས་ཏེ་ཐར་ཤུལ་སྤྲུལ་སྐུ་རིན་པོ་ཆེ་དང་ཞྭ་དམར་པའི་སྤྲུལ་སྐུ་རིན་པོ་ཆེ་སོགས་སྔ་གཞུག་ཏུ་གདན་འདྲེན་ཞུས་ཀྱང་སུས་ཀྱང་རྒྱུ་མཚན་གང་ཡིན་གསལ་བོར་མ་གསུངས། རྗེས་སུ་རྗེ་ཞབས་དཀར་སྤྲུལསྐུ་རིན་པོ་ཆེ་གདན་འདྲེན་ཞུས་མོད། འོན་ཀྱང་སྤྲུལ་སྐུ་རིན་པོ་ཆེ་ཁོང་ཉིད་སྡེ་བའི་ནང་དུ་མ་བྱོན་པར་སྡེ་མི་རྣམས་ཀྱིས་དུམ་པ་ཆུང་བ་ཞེས་འབོད་པའི་ལུང་བའི་མཐིལ་དུ་ཇ་ཐབབཟུང་སྟེ་ཕེབས་བསུ་རྒྱ་ཆེར་བྱས། སྡེ་མི་རྣམས་ཀྱིས་སྤྲུལ་སྐུ་མཆོག་ལ་སྡེ་བའི་ནང་དུ་ཅི་ཕྱིར་མི་བྱོན་པའི་རྒྱུ་མཚན་བཀའ་འདྲི་གནང་བ་ལ་སྤྲུལ་སྐུ་མཆོག་གིས་གསུངས་དོན་ང་སྡེ་བའི་ནང་དུ་སོང་ཡང་ཁྱོད་ཚོར་གྲོགས་བྱེད་ཐུབ་ཀྱིས་མི་འདུག ཁྱོད་ཚོས་ལབ་ཙེ་ཞིག་བརྩིགས་ན་བཟང་པ་དང་ ཕྱིས་སུ་ལས་མཐུན་གྱི་བླ་མ་སྤྲུལ་སྐུ་ཞིག་ཕེབས་ངེས་རེད།
ཁྱོད་ཚོས་དེའི་སྐབས་སུ་ལབ་ཙེ་བརྩིགས་ན་ཤིན་ཏུ་བཟང་ཞེས་བཀའ་མོལ་གནང་། ཡིན་ན་ཡང་ངས་ཁྱོད་ཚོར་ས་རྟགས་ཤིག་བརྒྱབ་ཆོག་ཅེས་ས་རྟགས་གོང་ཞོལ་གཉིས་ནས་བརྒྱབ། དེའི་རྗེས་ཙམ་ལ་ཏིང་ཀྱཱ་སྤྲུལ་སྐུ་རིན་པོ་ཆེ་གདན་འདྲེན་ཞུས་ནས་ཁོང་གིས་གནས་བདག་རྒྱལ་པོ་འཁོར་དང་བཅས་པ་ཟབ་མོ་ནགས་ཟེར་བའི་ཕྱོགས་སུ་ཁ་བསྐོར་བར་གྲགས། ཡིན་ན་ཡང་ལོ་ཤས་ཀྱི་རྗེས་སུ་སླར་ཡང་བཀྲ་མི་ཤིས་པའི་དོན་དག་སྣ་ཚོགས་བསྟུད་མར་བྱུང་བར་བརྟེན་ཡབ་རྗེ་མཁན་ཆེན་རྡོ་རྗེ་འཆང་སྐུ་ཕྲེང་གསུམ་པ་རྗེ་བཙུན་འཇམ་དབྱངས་འཇིགས་མེད་ཐུབ་བསྟན་ཆོས་འབྱོར་རྒྱ་མཚོ་མཆོག་གདན་འདྲེན་ཞུས་པ་དང་ཁོང་གིས་ཀྱང་ལབ་ཙེ་ཞིག་བརྩིགས་དགོས་པར་གསུངས་ནས་སྐུ་དངོས་ཀྱི་སྡེ་མི་རྣམས་དང་ལྷན་དུ་ལབ་ཙེ་བརྩིགས། ངོ་མཚར་བ་ཞིག་ལ་ལབ་ཙེ་བརྩིགས་སའི་རྒྱབ་རིའི་སྒང་དེར་རྗེ་ཞབས་དཀར་བས་ལུང་བའི་མཐིལ་ན་ས་རྟགས་རྒྱག་བྱེད་ཀྱི་རྡོ་དཀར་པོ་དེ་མངོན་ཐོན་བྱུང་། དེ་ནས་ལབ་ཙེ་བརྩིགས་ཏེ་ལེགས་འགྲུབ་བྱུང་རྗེས་ཡབ་རྗེ་རིན་པོ་ཆེས་ལྷ་བར་ལྷ་འབེབ་ཏུ་བཅུག་པས་ན་དུམ་པ་སྡེ་བའི་ས་གནས་འདིའི་གནས་བདག་ནི་རྒྱལ་པོ་དང་རྒྱལ་བུ་བློན་པོ་གསུམ་ཡོད་པ་མཁྱེན་རྟོགས་བྱུང་། དེར་ཡབ་རྗེ་རིན་པོ་ཆེས་དེ་གསུམ་གྱི་མགོ་ཐོག་ལ་བུམ་པ་བཞག་པ་དང་ལྕེ་ཐོག་ཏུ་བདུད་རྩི་བླུགས་ཏེ་བྱིན་གྱིས་བརླབས་ཤིང་རྒྱལ་པོ་ལ་རྒྱལ་ཚབ་དམ་པ་དང་རྒྱལ་བུ་ལ་མེ་སྟག་དགྲ་འཇོམས་ བློན་པོ་ལ་ཤན་པ་མེ་སྟག་ཅེས་མིང་འདོགས་མཛད་དེ་གྲོགས་སུ་བཀུག སྐབས་དེར་དུམ་པ་སྡེ་བ་ན་བཞུགས་པའི་ཨ་མཆོད་ཅིག་ཡོད་པ་དེའི་རྨི་ལམ་དུ་གཟུགས་སྟོབས་ཆེ་ལ་བོད་ལྭ་གྱོན་ཞིང་བཅིབས་རྟ་སྔོ་ནག་བཅིབས་པའི་མི་ཞིག་གིས་ཁོ་རང་ལྟད་མོ་བལྟ་རུ་ཁྲིད་ཟེར་ནས་དུམ་པ་ལབ་ཙེའི་མདུན་དུ་ཁྲིད་པ་ན་ལབ་ཙེ་ནི་རིམ་པ་གསུམ་ཅན་གྱི་བརྗིད་ཉམས་ལྡན་པའི་ཕོ་བྲང་ཞིག་ཡིན་པ་རྨིས། དེར་བརྟེན་མི་རྣམས་ཀྱི་ཁྲོད་དུ་ཡབ་རྗེ་མཆོག་གིས་དུམ་པའི་ལབ་ཙེ་འདི་ཉིད་ཕྱི་ནང་རིམ་པ་གསུམ་ཅན་གྱི་ཕོ་བྲང་ཞིག་ཏུ་བྱིན་གྱིས་བརླབས་པར་གྲགས། ་དེ་རྗེས་ནས་ཡབ་རྗེ་རིན་པོ་ཆེའི་སྐུ་དྲུང་ནས་ལྷ་བས་གནས་བདག་རྒྱལ་ཚབ་དམ་པ་འབེབ་དུས་རྒྱལ་ཚབ་དམ་པས་ང་ཤམ་པ་ལར་སྐྱེས་པར་ཤོག་ཅེས་ཡང་ཡང་གསོལ་བ་བཏབ་པས་ཤམ་པ་ལ་ནས་སྐྱེས་པར་གྲགས། དེ་ནས་ལོ་རེའི་ལོ་གསར་གྱི་སྐབས་སུ་ས་ཕྱོགས་འདིའི་གཞི་བདག་རྣམས་ཡབ་རྗེ་རིན་པོ་ཆེའི་སྐུ་དྲུང་དུ་ཚོགས་ཤིང་ལྷ་བ་བརྒྱུད་ནས་ཡབ་རྗེ་མཆོག་ལ་འདོད་དོན་གསོལ་བའི་སྲོལ་ཅིག་ཡོད་པར་བཤད་པ་དང་། ལོ་ཞིག་མེ་སྟག་དགྲ་འཇོམས་ཕེབས་ནས་ཡབ་རྗེ་རིན་པོ་ཆེ་མཆོག་ལ་ཞུ་དོན། ཡབ་རྒྱལ་ཚབ་དམ་པ་མཆོག་ནི་གྲོངས་ཤན་པ་མེ་སྟག་ནི་ཕོ་བྲང་ལ་ཆགས་ནས་དུམ་པ་སྡེ་བར་ཕེབས་འདོད་མི་འདུག་ང་མེ་སྟག་དགྲ་འཇོམས་གཅིག་པུས་དུམ་པ་སྡེ་བའི་དོན་དག་ཆ་ཚང་བསྒྲུབ་ཐུབ་ཀྱིས་མི་འདུག་ཅེས་མིག་ཆུ་དང་བཅས་ཞུས་པ་ལ་ཡབ་རྗེ་རིན་པོ་ཆེ་མཆོག་གིས་ཁོ་རང་རྒྱལ་ཚབ་དམ་པའི་ཚབ་ཏུ་བྱིན་གྱིས་བརླབས་པར་གསུངས། དེ་ནས་སྤྱི་ལོ་༡༩༥༩ལོར་དུས་འགྱུར་གྱིས་དབང་གིས་དུམ་པ་ལབ་ཙེ་འདི་ཉིད་འཇིག་སྟེ་མིང་གི་ལྷག་མ་ཙམ་དུ་གྱུར། སྤྱི་ལོ་༡༩༨༠ལོའི་ཧོར་ཟླ་༦་ཚེས་༡ཉིན་ལབ་ཙེ་འདི་ཉིད་སླར་ཡང་ཉམས་གསོ་བྱས་ཏེ་བསྟད། སྤྱི་ལོ་༡༩༩༥ལོར་སྤྱི་སེམས་ཆེ་ཞིང་ཆོས་ལ་དད་པའི་སྡེ་བའི་རྒད་པོ་དཔལ་ལྡན་དང་འཕགས་མོ་སོགས་ཀྱིས་བཀོད་སྒྲིག་དང་འགོ་འཛིན་བྱས་ཏེ་ལབ་ཙེ་གཞི་ཁྱོན་ཆེ་ཞིང་བརྗིད་ཉམས་ལྡན་པ་ཞིག་ཏུ་ཉམས་གསོ་རྒྱ་ཆེར་བསྐྱེད་པས་ལབ་ཙེ་འདི་ཉིད་ཆབ་འགག་ཡུལ་གྱི་ལབ་ཙེ་ཆེ་གྲས་ཤིག་ཏུ་གྱུར་བ་རེད།
ཀྱེ་ཕུར་གྱི་བྱང་ཕྱོགས
བཀའ་དྲིན་ཆེ། དམངས་སོལ་འདིའི་རིགས་གང་ཐུབ་ཅི་ནུས་ཀྱིས་ཡིག་ངོར་མ་ཕབ་ཚེ་དུས་ཐུང་ནང་ཉམས་ནས་མེད་པར་འགྱུར་རྒྱུ་རེད། དེ་རིང་ས་ཆབ་འགག་ཡུལ་གྱི་དུམ་པ་ལབ་ཙེ་ཡི་ལོ་རྒྱུས་དང་ཆགས་འཇིག་ཤེས་སོང་། བཀའ་དྲིན་ཆེ།
ཧ་ཅང་ཡག་པོ་འདུག