དོལ་སྨྱོན།
སྙིང་སྡུག་མཚམས་གཅོད་སྒྲོལ་མ་རྒྱང་ལ་བཞུད་ཐལ།།
གྲངས་མེད་རི་ལུང་མང་པོས་བར་མཚམས་བཅད་ཐལ།།
དྲན་པའི་ཟུག་རྔུས་སེམས་ལ་རྨ་ཁ་བཟོས་ཐལ།།
སྐྱོ་བའི་མིག་ཆུས་མཁུར་ཚོས་མཆི་མས་བརླན་ཐལ།།
ལྷོ་བགྲོད་སྤྲིན་པ་དཀར་པོ་སེམས་ཀྱི་སྐྱོ་རོགས།།
ནུབ་ཁའི་མཚམས་སྤྲིན་དམར་པོ་ཡིད་ཀྱི་བརྟེན་ས།།
རྒྱང་བཞུད་ཁྲུང་ཁྲུང་དཀར་མོ་སེམས་ཀྱི་མཛའ་བོ།།
རླུང་གིས་བསྐྱོད་པའི་སྟོན་ལོ་ཡིད་ཀྱི་གཟུགས་རིས།།
སྙིང་གི་གསོས་སུ་སྨིན་པའི་དུང་ཟླ་དཀར་མོ།།
དུས་ཀྱི་རྐུན་པོས་རི་རབ་རྒྱབ་ལ་ཁྱེར་ཐལ།།
སྐྱོ་བ་གཟུགས་སུ་སྨིན་པའི་ཁེར་སྐྱེས་པདྨ།།
མུན་ནག་ལྡུམ་རྭ་འདི་རུ་འཚོ་འདོད་མི་འདུག།
མི་གཞི་གསེར་ལ་བདོ་བ་གསེར་གྱི་ལྷ་མོ།།
རྣམ་པ་ལྷ་ལ་འགྲན་པ་ལྷ་ཡི་སྲས་མོ།།
སྤྱོད་པ་ཀླུ་ལས་ལྷག་ལ་ཀླུ་ཡི་བུ་མོ།།
ཁྱོད་ཀྱི་ཡོད་ཚད་ང་ཡི་སེམས་ཀྱི་རྒྱན་ཡིན།།
དྲན་པའི་གདུང་བ་འདི་ལ་བཟོད་ཐབས་མི་འདུག།
བཞུར་བའི་མིག་ཆུ་འདི་ལ་འགོག་ཐབས་མི་འདུག།
འཁྱོར་བའི་གོམ་འགྲོས་འདི་ལ་བཅོས་ཐབས་མི་འདུག།
ཤོར་བའི་དབུགས་རིང་འདི་ལ་བསྒྱུར་ཐབས་མི་འདུག།
སེམས་ཀྱི་བརྟེན་ས་ལ་ལུང་རྒྱབ་ལ་འཆས་ཐལ།།
ཡིད་ཀྱི་འཚོ་ས་ཐག་རིང་རྒྱང་ལ་བཞུད་ཐལ།།
ང་ཡི་ཡོད་ཚད་མིག་ཆུའི་ཀློང་དུ་བྱིངས་ཐལ།།
ཟློག་མེད་དུས་ཀྱི་ཆད་པ་འདི་ལྟར་ཕོག་ཐལ།།