ཚེ་རིང་།
—–མི་ཚེའི་གླུ་དབྱངས།
<< དཔྱིད >>
བྱས་བསགས་ལས་ཀྱི་ས་བོན་མཁའ་ལས་ལྷུང་།།
སྲོག་འཛིན་གསེར་གྱི་ལྗང་མྱུག་ས་ལ་སྨིན།།
ལང་ཚོའི་སྐྱེ་མཆེད་རྒྱང་ནས་རྫོགས་པའི་བརྡར།།
མི་ཚེའི་དབུ་ཁྱུད་ཀྱག་ཀྱོག་ལམ་དུ་བྲིས།།
<< དབྱར >>
སྐྱོ་སྡུག་ཆར་བ་ཟིམ་ཟིམ་འབབ་པའི་ཁྲོད།།
རེ་བའི་འཇའ་མཚོན་དྲན་པའི་མཁའ་ལ་ཤར།།
ཁ་དོག་སྣ་ལྔས་ཁོར་ཡུག་བརྒྱན་པའི་དུས།།
སྨུག་པ་སྟུག་པོ་ང་ཡི་སེམས་ལ་འཐིབ།།
<< སྟོན >>
སྟོན་མཚན་བཅོ་ལྔའི་ཟླ་བ་དགོད་པའི་འཛུམ།།
དུངས་པའི་མིག་ལ་ཐེངས་གཅིག་བབས་པ་འདིས།།
ཁྲག་ཁྲིག་དཔག་ཚད་ཞིང་ན་ལུས་པའི་ཞལ།།
དྲན་པའི་མཁའ་ལ་ཤར་བ་ལན་གཅིག་མིན།།
<< དགུན >>
ཁ་བའི་མེ་ཏོག་གྲང་ངར་རླུང་གིས་གཏོར།།
རི་སྐྱེས་སྲོག་ཆག་མི་མངོན་མཚང་དུ་ཡལ།།
ལང་ཚོའི་གླུ་སྐད་རིམ་གྱིས་འཇགས་པའི་དུས།།
ད་ནི་མི་ཚེའི་ཚིགས་མལ་མཐའ་རུ་སླེབས།།