གཅན་འོད་འབར།
དུས་ཚིགས་ཀྱི་གཙང་བོ་བཞུད་སྟངས་ལས་རི་ལུང་གི་ཁ་དོག་འགྱུར་སོང།
ཉིན་མཚན་གྱི་ལྷག་རླུང་ལྡང་ཚུལ་ལས་མི་ཚོགས་ཀྱི་ལུས་སེམས་རྒས་སོང་།
འོན་ཀྱང་། འདི་ཚོས་ཁྱོད་ལ་འགྲེལ་བཤད་ཡང་དག་ཅིག་རྒྱག་མ་ཐུབ་ལ།
གསལ་བཤད་བདེན་པ་ཅིག་དེ་བས་ཀྱང་བྱེད་མ་ནུས།
ཡོད་ཡོད་འདྲ་བའི་ཁྱོད།
ཡང་སྙིང་ཅི་ཞིག་ཡིན།
ཡང་སྙིང་གང་ན་ཡོད།
ཡོད་ཡོད་འདྲ་བའི་ཁ་སང་དང་དེ་རིང།
མེད་མེད་འདྲ་བའི་སང་ཉིན་དང་གནང་ཉིན་ལས།
ཁྱོད་ཀྱི་ཁ་དོག་ཐག་གིས་མ་ཆོད་ལ།
ཁྱོད་ཀྱི་ངོ་བོ་ཡང་རྟོགས་པས་མ་ངེས་པས།
མེད་མེད་ལྟ་བུའི་ཁྱོད།
ཡང་སྙིང་ཅི་ཞིག་ཡིན།
ཡང་སྙིང་གང་དུ་ཡོད།
མགོ་རྔ་གང་དུ་ཡོད་མེད་མི་ཤེས་ལ།
འགྱུར་བག་ཇི་འདྲ་སྐྱེན་མིན་ཡང་མི་རྟོགས་པའི་ཁྱོད།
མིག་གིས་མ་མཐོང་ལ་ལག་པས་ཀྱང་མ་ཟིན་པས།
ཡོད་མེད་གང་གིས་སྟོང་བའི་ཁྱོད།
ཡང་སྙིང་ཅི་ཞིག་ཡིན།
ཡང་སྙིང་གང་དུ་ཡོད།
འགྱུར་བཞིན་པ་ཁྱོད་ཡིན་ན་ང་ཡིན།
རྒ་བཞིན་པ་ང་ཡིན་ནམ། ཡང་ན་ཁྱོད་ཡིན།
མཚན་ཉིད་རིག་པའི་སྐད་ཆ་འདྲ་བ་རྐྱང་བཤད་བསྡད་ནས་ཅང་གིས་མ་གོ་བ་ཡིན་ནམ། མཚན་འདེབས་མཁན་མི་འདུག ད་དུང་ཀློག་མཁན་ཀྱང་མེད་པ་ཆེས་ཡིན་རེ།
ཀློག་མཁན་ཡོད། གོ་བ་འདྲ་ཕྲ་པ་ཕྲན་པུ་ཡོད་ས་རེད། བོད་ནང་ན་ཡོད་ན་ཁག་མེད་ཀི། བོད་ཕྱི་ན་ཡོད་ན་འདི་གབ་ཚིག་འམ་ཁེད་གི་ཚུལ་འདྲ་བོ་འདྲ་འདུག། དེ་བཞིན་དུ་གོ་བ་ཞིག་ལང་ན་འགྲིག་ཚོད་རེད་པ་ཨ། ཨ་་་་་་་མ་རེད་ནེ།
ཆོས་ཀུན་སྐྱེ་འཇིགས་གསལ་བ་ལ།
གཅིག་གི་སྐྱོ་རོགས་གཅིག་གིས་བྱེད།
སྐྱེ་བའི་གྲོགས་ལ་འཇིགས་པས་སྙེག
ཡོད་པའི་གྲོགས་ལ་མེད་པས་འདེད།
གྲོགས་ཀྱི་གྲོགས་ལ་འཁེར་རྐྱང་སྙེག
འཁེར་རྐྱང་མ་ནུས་གྲོགས་ཀྱིས་འཇོམས།
ཆོས་རྣམས་ཐམས་ཅད་འདི་ལྟར་ཏེ།
འཚོལ་དང་བཙལ་བས་དོན་མེད་གྱུར།
ཡོད་ཡོད་འཚམས་ནས་མེད་པར་འགྱུར།
མེད་མེད་འཚམས་ནས་གློ་བུར་ཡོད།
འདི་འདྲའི་ཆོས་ཀྱི་ཁྱད་ཆོས་དེ།
སྟོན་པའི་གསུང་ལས་གཞན་ནས་མིན།
འདེད་འདེད་འདེད་ནས་ཅི་ཞིག་ཐོབ།
རྩོད་རྩོད་རྩོད་ནས་ཅི་ཞིག་རྙེད།
རེ་རེ་རེ་ནས་གང་ཐོབ་པ།
གཅིག་གཅིག་གཅིག་ནས་གསུང་བར་འཚལ།
ཨ་རིའི་སྙན་ངག་ཨེ་ལི་ཀྲིས། ༼T.H. Eliot༽
བཞི་ཚོམ་ཟེར་བའི་སྙན་ངག་ནང་།
ང་ཚོས་འཚོལ་འཚོལ་འཚོལ་བའི་མཐར།
ཐོག་མའི་མེད་ས་དེ་ལ་སླེབས།
མི་ལ་རས་པའི་གསུང་ལས་ནི།
འདི་འདྲའི་ལྟད་མོ་མང་པོ་གསུངས།
མཁས་པའི་གཙུག་རྒྱན་ཙོང་བ་བས།
ཐམས་ཅད་བློ་ཡི་འཆོ་འཁྲུལ་གསུངས།
དེ་ལྟར་འཚོལ་བར་སྤངས་ནས་ནི།
རང་གར་འཇོག་ལ་སྒྱུ་མར་ལྟོས།
ཀུན་ལ་ཆགས་སྡང་སྤངས་ནས་གཟིགས།
དེ་འདྲ་དེ་འདྲའི་བློ་ལས་ནི།
ལྟད་མོ་ཡོད་ལ་གྲོགས་བཟང་བ།
བདེན་པར་གཟིགས་སམ་གྲོགས་པོ་ལགས།
བློ་ལ་ཐད་དམ་བློ་རིག་ཅན།
འོ་རྒྱལ་མེད་པ་ང་ཡི་གྲོགས།
ཁ་བརྡའི་དཀྱིལ་ནས་ཁྱེད་དང་མཇལ།
བུ་མོ་བཟང་པོ་མཇལ་བ་ལེགས།
དེ་བས་རིག་མ་ཤེས་རབ་མ།
ཐབས་ཤེས་ཟུང་འཇུག་ནུ་མའི་ངོས།
བདེ་བའི་འཚོམ་བུ་འཛིན་པ་ལེགས།
འོན་ཀྱང་བདེན་པར་འདུག་བསམ་ན།
ཆགས་པ་དྲག་པོ་འཕེལ་བར་འགྱུར།
བདག་དང་བདག་གིས་མ་གྲུབ་པས།
ཉིན་ཞིག་གདུང་བས་མནར་བར་གྱུར།
སྒྱུ་མར་གཟིགས་དང་བློ་ལྡན་པ།
གཅན་ཚ་གཞོན་ནུའི་བློར་མི་གནོད།
རང་བཞིན་མ་གྲུབ་དོན་རྟོགས་དང་།
སྐྱིད་པའི་ཉིན་མ་རྟག་ཏུ་ཡོད།
ཧ་། ཧ། ཝེ་སི་ཀི་དམ་བི་ཕྱེད་ཀའི་སྙན་ངག་ཡིན། ད་དུང་ཕྱེད་ཀ་བཏུང་ནས་འབྲི།
གོང་གི་དྲ་གྲོགས་རྣམ་པས་རང་ཉིད་ཀྱི་བསམ་འཆར་བརྗོད་པར་བཀའ་དྲིན་ཆེ།་ལྷག་ཏུ་ཟུར་གནས་ལགས་ནས་ཞབས་མཆན་ཡིད་འགུལ་ཐེབས་པ་ཞིག་བྲིས་གནང་བར་དེ་ལས་ཀྱང་ཐུགས་རྗེ་ཆེ་ཞུ་རྒྱུ་ཡིན། ཡང་ཡང་ཕེབས་ནས་ལྟ་ཚུལ་བརྗོད་པར་དགའ་བསུ་ཞུ།