ཚངས་སར་འཕྲིན་ལས།
ཁ་བྱང་དང་འབྲེལ་བའི་དྲི་བ་འདི་ནི་བདག་གི་སེམས་སུ་ཡང་ཡང་ཤར་མྱོང་བའི་དྲི་བ་ཞིག་དང་སེམས་འཚབ་ཅིག་ཡིན་པར་མ་ཟད་འདི་དང་འབྲེལ་བའི་བསམ་ཚུལ་ཞིག་ཀྱང་དབང་མེད་འབྲི་འདོད་སྐྱེས། སྤྱིར་འགྲོ་བ་མི་སུ་འདྲ་ཞིག་ཡིན་ཡང་རང་རང་ལ་བསམ་གཞིགས་ཀྱི་ནུས་པ་རེ་དང་། རང་རང་ལ་ཤེས་རྟོགས་ཀྱི་ནུས་པ་རེ་ཡོད་པར་སྨོས་མེད་ཡིན་ཡང་དེ་མངོན་འགྱུར་ཐུབ་མིན་ནི་རང་ཉིད་ཀྱིས་འདུ་ཤེས་ཚོད་འཛིན་ཐུབ་མིན་ལ་རག་ལས་པ་ཞིག་ཡིན།
དཔེར་ན་རྒྱ་ནག་གི་ཉེ་རབས་མཁས་པ་ཀྲོའུ་ཀུའོ་ཕིང་ནས་’’མི་ནི་རིག་རྟོག་གི་སྲོག་ཆགས་ཤིག་ཡིན་པའི་ཆ་ནས་སོ་སོར་ཀླད་པ་རེ་ཡོད་པ་མ་ཟད་ཡོད་ཚད་ལ་ཤེས་རབ་དང་ལྡན་པའི་ཤེས་རྟོགས་ཀྱི་ནུས་པ་ཡོད། མི་ནི་གཟུགས་འདས་ཀྱི་སྲོག་ཆགས་ཤིག་ཡིན་ཆ་ནས་སོ་སོར་བླ་སྲོག་རེ་མངའ་བ་མ་ཟད་ཐམས་ཅད་གསོན་དགོས་ཤིང་གསོན་པ་དེ་ཡང་དོན་སྙིང་ལྡན་པ་ཞིག་ཏུ་བྱེད་འདོད་ཡོད། འདི་ནི་འགྲོ་བ་མི་ལ་མ་གཞི་ནས་ཡོད་པའི་ཐུན་མོང་གི་མི་གཤིས་ཤིག་ཡིན་”ཟེར་བ་ལྟར་ང་ཚོ་ཚང་མས་གསོན་ལམ་འདོད་པ་དང་གསོན་པ་དེའང་གཟི་བརྗིད་དང་དོན་སྙིང་ཅན་ཞིག་མི་འདོད་མཁན་མེད་དུས་རང་ཉིད་ལ་དབང་བའི་གཉུག་གཤིས་ཀྱིས་མི་ཚེའི་ལས་དོན་མངོན་གྱུར་བྱེད་དགོས་པ་སྒེར་བདག་གི་འགན་འཁྲི་ཞིག་རེད། འགན་འཁྲི་དེའི་ནུས་པ་སྐྱེད་སྲིང་དང་ཁ་ཕྱོགས་གཙོར་སྟོན་ལ་དགེ་རྒན་གྱི་སློབ་གསོ་དང་ཁོར་ཡུག་གི་གནས་སྟངས་ལ་རག་ལས་ཀྱི་འབྲེལ་བ་ཡོད་མོད། ཚུལ་བཞིན་གསོ་སྐྱོང་དང་འཚར་ལོངས་ཇི་བཞིན་བྱུང་མིན་ནི་རང་གི་འདུ་ཤེས་འཁྱེར་ཕྱོགས་ཀྱིས་ཁ་བསྒྱུར་བ་དེ་རེད།
སྤྱིར་ང་ཚོ་ཚང་མ་མི་ཞིག་ཡིན་པའི་ཆ་ནས་མི་ཡི་འཚོ་བ་རོལ་དགོས་ལ། དེ་དང་འབྲེལ་བའི་འཚོ་གནས་ཀྱི་ཉེན་ཁའི་གཡང་ས་ནས་སྐྱོབས་ཐབས་བྱེད་དགོས་ཀྱི་འགན་འཁྲི་ཡང་མི་རང་ཉིད་ལ་ཡོད། དེ་བས་ང་ཚོ་ཤི་མ་གསོན་དུ་ལུས་བསྡད་པའི་ཉེན་ཁའི་གཡང་ས་ནས་འབུད་དེ་དུས་རབས་ཀྱི་མདུན་དུ་བསྐྱོད་དགོས་པ་ལས་ད་དུང་ཆེས་རྒྱང་རིང་གིས་ལྐོག་གྱུར་འཇིག་རྟེན་ཞིག་ལ་འགྲེལ་བཤད་སྙིང་རྗེ་མོ་རེ་བརྒྱབ་སྟེ་རིག་གཞུང་གི་མ་ལག་ཅིག་ཡོད་པར་འུད་སྒྲོག་བྱེད་ཀྱིན་གསར་གཏོད་སྣ་གཅིག་ཀྱང་མཁོ་འདོན་མི་བྱེད་པར་བློ་ཡིད་ཚིམ་སྟེ་བསྡད་ན་དངོས་ཡོད་འཚོ་བའི་ཁྲོད་ཀྱི་ད ེང་རབས་གསར་པའི་འཇིག་རྟེན་འདི་ཇི་ལྟར་ལོངས་སྤྱོད་ཐུབ། འུ་ཚང་གི་མི་རིགས་འདི་ལོ་རྒྱུས་ཀྱི་བདེན་དཔང་རིང་བའི་མི་རིགས་ཤིག་ཡིན་མོད་ལོ་རྒྱུས་ནི་བྲག་སྐོས་བཞིན་མི་ཡུལ་དུ་འོད་ལམ་ལམ་དུ་འཚེར་བའི་དན་རྟགས་ཤིག་ཡིན་པ་ལས་དེ་རིང་གི་འཚོ་གནས་དང་འབྱུང་འགྱུར་གྱི་གནད་དོན་དཀའ་ཁག་སེལ་བར་དེ་ཙམ་རམ་འདེགས་བྱེད་མི་ནུས། ད་ནི་ང་ཚོར་གདམ་ཀ་གཞན་མེད་པར་མ་ཟད་ངེས་པར་སྒྲུབ་དགོས་ཀྱི་ལས་ནི་དུས་ཀྱི་གོམ་འགྲོས་ཀྱི་རྗེས་སུ་སྙེགས་རྒྱུ་དེ་རེད།
ངས་བསམ་གཞིགས་ཀྱི་ཁ་ཕྱོགས་ནང་དུ་གཏད་དེ་འུ་ཚང་གི་ན་གཞོན་ཚོའི་ད་ལྟའི་ཁ་ཕྱོགས་དང་འབྱུང་འགྱུར་གྱི་ཕུགས་འདུན་ལ་འཚོལ་ཞིབ་རེ་བྱས་ཚེ་མ་འོངས་མི་རིགས་འདི་ཅི་འདྲའི་ཉེན་ཁའི་ཕྱོགས་སུ་ལྷུང་མི་ཡོང་ངམ་སྙམ་པའི་སེམས་འཁྲལ་ཞིག་རྟག་ཏུ་བྱེད་བཞིན་ཡོད། རྒྱུ་མཚན་ཅི་ཕྱིར་ཞེ་ན། མ་འོངས་བོད་རྒྱལ་ཁབ་ཟེར་བའི་མིང་དོན་མཚུངས་བའི་མི་རིགས་ཤིག་གོ་ལའི་ཐོག་གསོན་གནས་ཐུབ་མིན་ནི་དེང་རབས་ན་གཞོན་གསར་པ་དག་རག་ལས་པ་ཞིག་རེད། ན་གཞོན་ཚོས་མེས་པོའི་ཤུལ་བཞག་གི་རིགས་གནས་རྣམས་རྗེས་ལུས་དང་རྙིང་ཞེན་ཟེར་ནས་དུས་རབས་ཀྱི་དགོས་མཁོ་སྐོང་མི་ནུས་ཚུལ་གྱི་དགག་པ་དང་ངན་ཁག་འགེལ་ཅི་ཐུབ་བྱེད། ཡང་དེང་རབས་ཀྱི་དགོས་མཁོ་དང་འཚམ་པའི་ཚན་རིག་གི་ཤེས་བྱ་སོགས་རྟོག་གཞིགས་གསར་པའི་འདུ་ཤེས་ཡོ་ལངས་ཀྱི་རྗེས་མ་ཟིན་པར་དངོས་ཡོད་འཚོ་གནས་ཀྱི་མདུན་དུ་གཉོམ་ཆུང་ནུས་མེད་ཀྱི་རང་མཚང་ངོམ་བཞིན་པའི་ངང་ཚུལ་འདི་མཐོང་ཚེ་ད་གཟོད་ང་ལ་སེམས་འཚབ་འདི་འདྲ་ཞིག་ངང་གིས་ཡོང་བཞིན་འདུག གལ་སྲིད་མི་རབས་གསར་པ་ཚོས་སྔར་ཡོད་རིག་གནས་སྟེང་དུ་དེང་རབས་རིག་གནས་གསར་པའི་ནུས་པ་མཁོ་འདོན་བྱེད་མ་ཐུབ་ཚེ་ད་གཟོད་འུ་ཚོ་ཕམ་རྒྱུ་ཉག་གཅིག་ལས་ཅི་ཡང་མེད་པས་གལ་གནད་ཆེ་བའི་གནས་བབ་འདི་གཞུང་སྒེར་ཚང་མས་ཤེས་དགོས་པ་ཞིག་རེད། ༢༠༡༢ ཟླ་ ༥ པའི་ཚེས་ ༢༠ ཉིན།
ཡག་པོ་བྲིས་ཤག་ལོ།