བསོད་ནམས་ནོར་བུ། རྣམ་གྲོལ་གླིང་།
དེ་རིང་གནམ་ལོ་གསར་པའི་ཉི་མ་གནམ་ནས་ཤར་བ་དང་སྐབས་བསྟུན། གོང་ས་མཆོག་གི་སྐུ་མདུན་ནས་སྒྲོལ་དཀར་ཡིད་བཞིན་འཁོར་ལོའི་ཚེ་དབང་ཐོབ་པས་ 2016 ལོའི་བྱ་བ་ཀུན་གྱི་རྟེན་འབྲེལ་ཐོག་མ་འདི་ནས་འགྲིག་པར་བྱས། ནངས་མོ་གྲོགས་པོའི་ཁ་པར་གྱི་དྲིལ་བརྡས་ང་རང་གློ་བུར་མལ་གྱི་གཉིད་མཐུག་ལས་བསླང་། ཡར་ལངས་ནས་ཁྲུས་སྟབས་བདེ་ཞིག་བྱས་ཏེ་ཕྱི་ལ་ཐོན་དུས། ད་དུང་སྔ་དྲགས་མེད་ན་འཕྱི་མེད་པ་ཤེས་པས་སེམས་པ་ལྷོད་ལ་བབ། ཞོགས་པའི་གནམ་གཤིས་ནི་ནམ་རྒྱུན་ལ་བལྟས་ན་དེ་ཙམ་དྭངས་རྒྱུ་མེད་པ་མ་ཟད་ཅུང་འཐིབས་ཏེ་ཧ་ལམ་ཆར་པ་ཞིག་འབབ་མི་ཡོང་ངམ་སྙམ་པ་ལྟ་བུ་འདུག
རླུང་རྟ་རྒྱུག་པ་ཞིག་ལ་ལམ་བར་དགེ་སྐོས་སྣུམ་འཁོར་ནང་འཛུལ་རྒྱུ་རག་སྟེ་ལམ་ཁའི་ཐལ་བ་འགམ་མ་དགོས་ཙམ་བྱུང་ཡང་། ལམ་ཕྱེད་ནས་སྣུམ་འཁོར་དང་སྦག་སྦག ད་དུང་ཨོ་ཊོ་བཅས་ཀྱི་ཟང་ཟིང་ཧ་ཅང་ཆེ་བས་ལམ་ཁ་འགགས་ནས་ཐ་མ་རྐང་པ་རྒྱག་སྟེ་མ་འགྲོ་རང་འགྲོ་ཐུག་བྱུང་།
བཀྲ་ཤིས་ལྷུན་པོ་གསུང་ཆོས་ར་བའི་སྒོར་འབྱོར་དུས་ལམ་རིམ་འཛིན་བྱང་སོགས་གང་ཡང་བསྟན་རྒྱུ་མེད་པར། ཉེན་རྟོག་པ་དང་སྒོ་སྲུང་བའི་དཀྱིལ་མ་ནས་ཡ་ང་བག་ཚ་མེད་པ་ཤར་རེར་འཛུལ་ཏེ་ལྷ་ཁང་ཕྱི་ལོགས་གསུང་ཆོས་ར་བའི་དཀྱིལ་མ་ཞིག་ལ་སྡོད་ས་བདམས་ནས་བསྡད་པས། གཉིད་ལ་མ་ཤོར་ན་མདུན་ངོས་བརྙན་འཕྲིན་ནང་ནས་༧གོང་ས་མཆོག་གི་གསེར་ཞལ་ཉི་མ་ལྡེ་ལྡེ་བྱེད་ཆོག་གི་འདུག་པས་དེ་རིང་ངོ་མ་ཡོང་གོ་ཆོད་སོང་སྙམ།
གསུང་ཆོས་ར་བ་ནི་ཕྱོགས་བཞི་མཚམས་བརྒྱད་ཚང་མ་སྣ་ལྔའི་དར་གྱི་ཡོལ་བ་བྱས་ཤིང་། དར་གྱི་ཀ་བ། དར་གྱི་ལྡ་ལྡི། དར་གྱི་བླ་བྲེ་བཅས་ངོས་དང་ཟུར་གང་ལ་བལྟས་ཀྱང་གཅིག་ལས་གཅིག་མཛེས་དང་། འདི་ལས་དེ་ཡག་གི་རྒྱན་ཆས་ཡོངས་སུ་སྤུད་པར་བྱས་འདུག་པས་རྒྱ་གར་བའི་ལག་རྩལ་ལ་ཡིད་སྨོན་ཤོར་ཏེ། ངོ་མ་བལྟས་ཤིང་བལྟས་ཤིང་བདག་གིས་ནི་གླིང་ཚང་གི་གླིང་གུར་མཐོང་བ་ཀུན་སྨོན་ཟེར་བའི་ཆོན་ཐག་དང་ཀ་བ་སོགས་གང་ཡང་མི་དགོས་པའི་སྤྲུལ་པའི་རས་གུར་གཡེར་པོ་ཅན་དེ། གལ་སྲིད་ངོ་མ་ད་ལྟ་ཡོད་པའི་དབང་དུ་བཏང་ན་འདི་འདྲ་ཞིག་ལས་ཅི་ཡང་ཡོད་རྒྱུ་མ་རེད་སྙམ་བཞིན་བསམ་གཞིག་བྱས།
༧གོང་ས་མཆོག་ཁྲི་ལ་འཁོད་རྗེས་གྲྭ་གཞོན་ཤ་དར་ཁྲག་དར་ཚོའི་འཕག་མཆོང་དང་འདུར་རྒྱུག་གིས་ཇའི་ཁོག་ལྡིར་རེ་ཆོས་ཞུ་བའི་མིག་སྔུན་ལ་བརྐྱང་ཡོང་བས། ཨ་ཕོ་རང་ལ་བཞེས་ཕོར་ཡོད་ན་ཇ་མི་རག་པའི་སེམས་ཁྲལ་གཏན་ནས་མི་དགོས། ཚེ་དབང་མ་གནང་སྔོན་༧ གོང་ས་མཆོག་གི་བཀའ་སློབ་བསྩལ་ཞིང་། བཀའ་སློབ་ཀྱི་ནང་དོན་ནི་འགྲོ་བ་མིའི་ལྷན་སྐྱེས་ཀྱི་སེམས་ཁམས་ནི། བྱམས་བརྩེ་དང་གཞན་ཕན་ཡིན་པ་ལས། ཞེ་སྡང་དང་ང་རྒྱལ་གྱིས་གྲུབ་པ་ཞིག་མིན་པས། ད་ནས་ང་ཚོའི་འཛམ་གླིང་ཞི་བདེ་ཡོང་བ་ལ་རེ་བ་ཡོད་རེད་ཅེས་དང་། དུས་རབས་ཉི་ཤུ་པའི་མིས་རྙོག་གྲ་བཟོས་པ་རྣམས་ཉེར་གཅིག་པའི་མིས་མེད་པ་བཟོས་ཏེ་འཛམ་གླིང་ཞི་བདེ་ཡོང་ཐབས་ལ་འབད་བརྩོན་བྱེད་དགོས་ལ། ང་ཚོ་ནི་མི་གྲངས་དུང་ཕྱུར་བདུན་ཅུ་ལྷག་གིས་གྲུབ་པའི་ཁྱིམ་ཚང་ཆེན་མོ་ཞིག་རེད་ཅེས་གསུངས་སོང་། ང་ལ་མཚོན་ན། འཇིག་རྟེན་འདི་ན་༧གོང་ས་མཆོག་གི་བཀའ་སློབ་ནི་ཅི་ཙམ་ཉན་ཡང་དེ་ཙམ་ངོམ་རྒྱུ་མེད་པའི་འཆི་གསོས་ཀྱི་བདུད་རྩི་གཅིག་པུ་དེ་ཡིན་པས། གལ་སྲིད་ཚེ་དབང་མ་ཐོབ་ན་ཡང་བཀའ་སློབ་ཉན་རྒྱུ་གཅིག་པུས་འགྲིག་གི་ཡོད་པ་ག་ལ་བཤད་དགོས།
ཚེ་དབང་བསྐུར་རྗེས་ཚོགས་པ་དང་སྐྱིད་སྡུག་སོ་སོ་ནས་བརྟན་བཞུགས་བསྟར་འབུལ་ཞུ་སྐབས། ཁོང་གིས་འགའ་རེའི་ཨ་མཆོག་རྩེ་ནས་འཛིན་ཏེ་བཞད་མོ་བཞད་པ་དང་། དེ་བཞིན་རྒས་འཁོགས་འགའ་རེའི་ཐོད་པ་ལ་ཐོད་པ་གཏུག་བཞིན་སྨོན་ལམ་རྒྱག་པ། མཚམས་རེར་གཞས་སྣ་འཁྲབ་སྟོན་གྱི་སྤོ་བོའི་ངག་ལ་དཔྲལ་མདུད་རྒྱག་བཞིན་ཉན་པ། ལན་རེར་ཆོས་ཞུ་བ་ཕྱོགས་ཡོངས་ལ་ཞིབ་གཟིགས་ངང་ཐལ་མོ་སྦྱར་བཞིན་གསོལ་སྨོན་གནང་བའི་རྣམ་འགྱུར་བཅས་ནི། ཅི་འདྲའི་མཐོང་ན་དང་བ་འདྲེན་པའི་མ་བཅོས་མཚན་དཔེའི་སྐུ་ཡི་མཛེས་སྡུག་ཅིག་རེད་ཨང་།
1/ 1/ 2016/
འབད་བརྩོན་རི་རབས་ཙམ་ཞིག་བྱས་པ་ལས་།
བསོད་ནམས་མེ་རྩག་ཙམ་ཞིག་བསགས་ན་དགའ་།
ཕོ་ཁྱོད་ཀྱི་ལས་ཡག་པོ་བསགས་བདུག་གོ་།
བསོད་ནམས་ནོར་བུས་ཡག་མོ་ཞིག་བྲིས་གདའ།། ངོ་མ་མི་ཁྱོད་བསོད་ནམས་ཅན་ཅིག་རེད་འདུག ལམ་བར་ལ་དགེ་སྐོས་ཀྱི་སྣུམ་འཁོར་ནང་དུ་འཛུལ་རྒྱུ་བྱུང་བ། རྒྱལ་སྒོར་འཛིན་བྱང་མེད་པར་ནང་དུ་འགྲོ་ཐུབ་པ། ནང་དུ་སྡོད་ས་ལེགས་པའི་གྲལ་དུ་སླེབས་ཐུབ་པ།། བཀའ་སློབ་ཀྱི་སྙིང་བསྡུས་རྣ་བས་ཐོས་ཤིང་སེམས་ལ་བཞག་ཐུབ་པ།། ཐ་མར་རང་ལ་རང་གིས་དགའ་ཞིང་སྤྲོ་བ་འཕེལ་བའི་ངེས་ཤེས་རྙེད་པ། མི་ཁྱེད་བསོད་ནམས་ཅན་ཅིག་རེད་འདུག