དེ་རིང་བལ་ཡུལ་ནང་གི་ལས་འགུལ་དང་བོད་མི་འཛིན་བཟུང་།

རྐྱང་ཕྲུག་ནས།

སྤྱི་ཟླ་༣་ཚེས་༡༠ཉིན་གྱི་སྔ་དྲོ་བལ་ཡུལ་ནང་གནས་སྡོད་བོད་མི་ཁག་ཅིག་འདུ་འཛོམས་ཀྱིས་སུམ་ཅུའི་དུས་དྲན་ཐེངས་༥༣པ་དེ་སྲུང་རྩི་བྱས་སོང་། སྐབས་དེར་བལ་ཡུལ་བོད་མིའི་དངས་བླངས་སྤྱི་ཁྱབ་འབྲེལ་མཐུད་པ་འཕྲིས་ལས་བླ་མ་ཡང་ཕེབས་འདུག ཚོགས་ཐོག་དེར་བཀའ་ཁྲི་བློ་བཟང་སེངྒེའི་གསུང་འཕྲིན་མང་ཚོགས་ལ་སྒྲོག་སྦྱང་གནང་བ་དང་། སུམ་ཅུའི་དྲན་གླུ་དང་མི་མང་ལངས་གླུ། བོད་ཀྱི་རྒྱལ་གླུ་དང་བལ་ཡུལ་གྱི་རྒྱལ་གླུ། ཚད་མེད་ཡོན་ཏན་བཅས་རྔ་རོལ་དང་དབྱངས་རྟའི་ལམ་ནས་སྐྱོར་སོང་། དེ་རྗེས་བསང་གསོལ་བཅས་བྱས་ཏེ། མཛད་སྒོ་མཇུག་སྒྲིལ་ཡོད་ནའང་། སྐབས་དེར་མཆོད་རྟེན་བྱ་རུང་ཁ་ཤོར་གྱི་སྐོར་ལམ་གཡས་གཡོན་གང་སར་བལ་ཡུལ་གྱི་དྲག་ཆས་སྤྲས་པའི་ཉེན་རྟོག་པ་གང་མང་ཞིག་འགྲེམ་འཇོག་བྱས་འདུག ཕར་བལྟས་ཚོད་ལ་གཡུལ་ས་ལྟ་བུ་ཞིག་མིན་ནམ་སྙམ་པའི་ཚོར་སྣང་སྐྱེས། ཁོང་ཚོས་གང་བྱུང་བོད་མི་ལམ་འགྲོ་བ་དེ་ཚོ་ཡང་འཇུ་བཟུང་བྱེད་རྒྱུའི་མགོ་བརྩམས་ཀྱིན་འདུག སྐབས་དེ་དུས་ཁོ་བོས་དངོས་སུ་མཐོང་བ་ལ་ཉེན་རྟོག་པ་ཚོས་བསམ་གཏན་གླིང་གི་སྒོ་འགྲམ་དེ་ག་རང་ནས་ཤེལ་དཀར་ཆོས་སྡེ་དགོན་པ་ནས་ཡིན་པའི་གྲྭ་པ་གཉིས་ལ་དོན་མེད་འཛིོན་བཟུང་བྱེད་རྩིས་བྱས་ཏེ་དགེ་འདུན་པ་དེ་གཉིས་ལ་ཉེན་རྟོག་པས་འཐམ་སོང་། འོན་ཀྱང་མང་ཚོགས་ཀྱིས་ཚུར་འཕྲོག་ཐུབ་པ་བྱུང་སོང་། དེ་ནས་རིམ་པས་དགོན་པའི་རྒྱ་སྒོ་ཉེན་རྟོག་པས་བཀག་ནས་བོད་མི་རྣམས་རིམ་པས་ཕྱི་ལ་བཏང་བྱུང་། དེ་རྗེས་མཆོད་རྟེན་སྐོར་ལམ་ནས་དོན་མེད་བོད་མི་འཇམ་དཔལ་དང་ཨ་ཡེ་ཟེར་པ་གཉིས་ཀྱང་འཛིན་བཟུང་བྱས་འདུག མཛད་སྒོ་དེ་གྲོལ་བའི་རྗེས་སུ་ཉིན་རྒྱབ་ཚོུད་༢ཙམ་ལ་འཇོ་ཁེལ་ས་གནས་དང་བྷོ་དྷ་བཅས་ནས་ཡིན་པའི་མི་མང་ཁ་ཤས་ཤིག་གིས་དང་བླངས་ཐོག་ནས་རྒྱ་མིའི་གཞུང་ཚབ་མཐོང་མཆེན་ཞུ་སའི་སྒོར་ཞི་བའི་སྐད་འབོད་བྱས་འདུག རིམ་པས་ཉེན་རྟོག་པས་ཁོང་ཚོ་བོད་མི་༦འཛིན་བཟུང་བཙན་ཁྲིད་བྱས་འདུག་ཀྱང་། ལས་འགུལ་དེའི་སྔོན་ཙམ་ལ་ལམ་བར་ནས་རྒྱ་མིའི་གཞུང་ཚབ་ཀྱི་ཕྱོགས་སུ་སྐྱོད་བཞིན་པའི་བོད་རིགས་བུད་མེད་གསུམ་ཡང་འཛིན་བཟུང་བྱས་འདུག ཁྱོན་བསྡོམས་དེ་རིང་བལ་ཡུལ་ནང་གི་ཉེན་རྟོག་པས་བོད་མི་༡༡འཛིན་བཟུང་བྱས་འདུག ད་ལྟའི་ཆར་ཁོང་ཚོ་བཙོན་ཁང་གང་དུ་ཡོད་པ་དང་གནས་སྟངས་ག་འདྲ་བྱུང་ཡོད་མེད་གང་ཡང་ཤེས་རྟོགས་མ་བྱུང་།