ལྷམ་ཀོག་གིས་
གནམ་ས་རལ་བའི་དྲག་རླུང་གི་གདུག་རྩུབ་ནི་གཟེངས་རིང་བའི་སྒྱོགས་རྡེལ་བཞིན་གང་ས་ནས་ཕབ་འོང་དུས། གཅེས་པའི་ལུས་ལ་འཇམ་མཉེན་གྱི་རེག་བྱ་ཡར་ལྡན་དུ་རྫོགས་པའི་སྣང་སྲིད་ཞབས་ཀྱིས་བཅགས་པའི་མགར་ཁྲི་འབྲིང་གི་རིགས་ཀྱི་སྲས་པོ་དང་སྲས་མོ་དག་ཉི་མ་ནུབ་ལ་བཞུད་པ་ལྟར་དུ་གྱུར་མོད།འོན་ཀྱང་ཁོ་ཚོ་ནི་བྱ་ལམ་རྗེས་མེད་ཀྱི་ཚུལ་ལས་རིང་དུ་འགོངས་ཤིང༌། མཐོན་པོའི་གནམ་དང་ཡངས་པའི་ས་གཞི་ཆེན་མོ་འདིས་ཐེག་པར་དཀའ་བའི་གསེར་གྱི་རི་རྒྱལ་ལྷུན་པོ་རེ་རེ་ཡིན་པ་སྨྲ་བསམ་བརྗོད་མེད་ཀྱི་ཕུག་ན་ཉི་ལྟར་འཚེར་ཞིང་ཟླ་ལྟར་གསལ་བ་དེ་ཀོ་ལགས།འོན་ཀྱང་རྔམ་གནག་པའི་མཚན་མོ་ཞིག་གི་མུན་པ་གདོང་ཁེབ་ལྟར་ནམ་ཡང་འབྲལ་མེད་དུ་གནས་པས་མངོན་སུམ་དོད་པའི་དགོད་ཆོག་པ་ཞིག་དང༌།ངུ་ཆོག་པ་ཞིག་ལར་ནས་མིན་མོད། རུས་པའི་མུ་ཏིག་ལ་གངས་རིའི་འཁྲབ་རྨོག་གི་གཟི་བརྗིད་མངོན་ཞིང༌། སོང་བའི་ཞབས་རྗེས་ལ་གླང་ཆེན་བརྒྱ་ཡི་ཡ་ལད་ཀྱི་གསང་བ་རྫོགས་འདུག་པའི་ཚད་མའི་ལོ་རྒྱུས་ནི།རྡོ་རུ་མ་བརྐོས་ཀྱང་སེམས་སུ་འཁྱིལ་ཅིང༌། ཅོང་ལ་མ་བླུགས་ཀྱང་སྙིང་ལ་གསལ་འོང་བས། ང་ཚོའི་ཕྱི་རབས་པའི་ཤ་ཡི་ནང་ན་རུས་པ་མེད་ཅིང་རུས་པའི་ནང་ན་རྐང་མེད་རུང་བརྗེད་ག་ལ་སྲིད།སྣང་སྲིད་འཁོར་འདས་ཀྱི་བདག་པོ་རི་རབ་བཞིན་དུ་བརྟན་ཅིང༌། རྒྱ་མཚོ་ལྟར་དུ་མི་འཁྲིགས་པའི་ངང་དུ་འཚོ་ཞིང་གཞེས་པས་འུ་ཅག་གིས་རི་བོའི་རྩེ་ནས་ཉི་འོད་དང་གངས་རིའི་གསེབ་ནས་སེང་གེ་མཐོང་ངེས་ཡིན་ནོ།།