དེ་རིང་ཨ་རིའི་མང་གཙོ་དབུཊ་ལྒང་སྟེང་ན་ཡོད།

བཞག་ལྡོམ་ལྗང་ལོ། 
 
ཨ་རི་ཞེས་བའི་མངའ་སྡེ་སྤྱི་མཐུན་རྒྱལ་ཁབ་དེ་ནི་སྤྱི་ལོ་༡༧༧༦ལོའི་ཟླ་བ་༧་ཚེས་༤་ལ་དབྱིན་ཇིའི་འོག་ནས་རང་བཙན་རྩ་ཚིག་བསྒྲགས་པ་ནས་དེ་རིང་བར་ལོ་ངོ་༢༤༤ སོང་ཡོད་ལ། ལོ་ངོ་དེ་རྣམས་ཀྱི་རིང་ལ་དབུས་གཞུང་ལས་དམངས་གཙོ་བ་ཡང་། དམངས་ལས་མང་བ་གཙོ་བོ་བཟུང་སྟེ་མང་གཙོའི་ལམ་ལུགས་སུ་སོང་ཡོད་པ་ཡང་། མང་གཙོའི་ལམ་ལུགས་ལ་བརྟེན་ནས་མི་མང་ལ་སྨྲ་བརྗོད་རང་དབང་ཡང་། གསར་འགོད་རང་དབང་། སེམས་ཀྱི་དད་མོས་རང་དབང་། ཆབ་སྲིད་འོས་བསྡུ་རང་དབང་སོགས་ཀྱི་ཐོབ་ཐང་ཐུན་མོང་གིས་ལོངས་སྤྱོད་ཡུལ་བྱས་ཤིང། ཐུན་མོང་ལ་བདག་པའི་རང་དབང་ལ་བརྟེན་ནས། མི་མང་གིས་འོས་ཤོག་ལམ་ནས་ས་གནས་སྲིད་གཞུང་དང་དབུས་གཞུང་འདེམས་ཀྱི་ཡོད་ཅིང་། མི་དམངས་ཀྱི་གཞུང་དེ་ཡང་སྒེར་བདག་ལ་མི་འགྲོ་བའི་ཆེད་དུ། གྲོས་ཚོགས་སམ་ཁྲིམས་བཟོ་ལྷན་ཁང་ཡང་། ཆེས་མཐོ་ཁྲིམས་ཁང། སྲིད་འཛིན་ཁང་གསུམ་པོར་ཆ་སྙོམས་ཀྱི་ཁྲིམས་ཀྱི་དབང་ཚད་ཡོད་པ་ཡང་། ཕན་ཚུན་གཅིག་གིས་གཅིག་ལ་ལྟ་རྟོག་དང་སྟངས་འཛིན་བྱེད་ཀྱི་ཡོད་པ་རེད། 

ཁྲིམས་འོག་གི་མང་གཙོ་ལམ་ལུགས་ལ་བརྟེན་ནས། ཨ་རི་བ་ལོ་ན་ཆུང་བའི་རྒྱལ་ཁབ་ཞིག་ཡིན་ཡང་། འཇིག་རྟེན་འདིའི་སྟེང་ན་བསམ་བློའི་རང་དབང་ཡང་། གསར་གཏོད་རང་དབང་། ཆབ་སྲིད་ཀྱི་འདུ་འཛོམས་སོགས་ཀྱི་རང་དབང་བོར་བའི་མི་བུ་དག་ལ་མཚོན་ན། ཨ་རི་ནི་རང་དབང་གི་མཁའ་དབུགས་གཙང་མ་རྔུབ་ས་ཞིག་ཡང་། རྣམ་དཔྱོད་ཀྱི་ཤོག་རྩལ་ངོམས་ས་ཞིག་རེད། ལྷག་པར་ཤེས་ཡོན་ཡོད་མེད་ཡང་། རྣམ་དཔྱོད་ཡོད་མེད་ལ་མ་ལྟོས་བར། ལེ་ལོ་ཅན་གྱི་མི་བུ་ཞིག་མིན་ན་ཕུགས་འདུན་གང་ཞིག་ཡོད་ཀྱང་གོ་སྐབས་ཡོད་པའི་ཡུལ་ཞིག་རེད་ལ། རྒྱུ་མཚན་དེ་རྣམས་ལ་བརྟེན་ནས་ཨ་རི་བ་འཇིག་རྟེན་འདིར་སྟོབས་ཆེན་ཡང་། འབྱོར་བ་ལྡན་པའི་རྒྱལ་ཁབ་ཞིག་ཆགས་པ་རེད་མོད།

འོན་ཀྱང། དེ་རིང་ཨ་རི་ནི་གོ་ས་ཁོ་ན་ལ་རྔམ་མཁན་ཡང་། ཕྱོགས་རིས་ཅན།  སྐབས་འཚོལ་བ། སྲིད་དབང་སྒེར་སྤྱོད་པས། ཁྱི་སྤྱང་ལག་འབྲེལ་བྱས་ནས། མང་གཙོའི་ཁྲིམས་ལུགས་བཞིན། མི་བུ་ཉུང་བ་ལས་མང་བའི་མངོན་འདོད་ལ་གུས་ཞབས་ཡང་། ཁྲིམས་ལུགས་ལ་གུས་ཞབས་བྱེད་པའི་ཚབ་དུ། རང་ལྟ་མཆོག་འཛིན་ཡང་། གཞི་མེད་འཆལ་གཏམ་ལ་བརྟེན་ནས་སྤྱི་ཚོགས་སུ་ཟ་ངེ་ཟིང་ངེ་བཟོས་བ་ཡང་། མི་མང་མགོ་བོ་རྨོངས་བ་བྱས་ནས་ཨ་རིའི་ཡང་དག་པའི་མང་གཙོ་དེ་ཉིད་འཇིག་ལ་ཉེ་བའི་དབུགས་ལྒང་སྟེང་ལ་འདེད་ཅི་ཐུབ་བྱེད་་ཀྱི་ཡོད་པ་རེད། 


དཔེར་ན། ༡༽ དེ་རིང་གི་སྲིད་འཛིན་ཀྱིས་ཁོའི་རྫུན་རྐུབ་བརྟོལ་བའི་གསར་འགྱུར་ཡོད་ཚད་ལ་དམངས་ཚོགས་ཀྱི་དགྲ་བོ་དང་རྫུན་མ་འབོད་པ་ཡང་། ཁོ་དང་ལྟ་བ་མི་མཐུན་མཁན་ལ་སྤྱི་ཚོགས་རིང་ལུགས་དང་དམར་ཕྱོགས་པ་སོགས་གནས་ལུགས་སུ་འགལ་པའི་མིང་འདྲ་མིན་འདོགས་ཀྱིན་ཡོད་པ་རེད། ད་ལོ་ཨ་རིའི་འོ་བསྡུ་སྐབས་མི་འབོར་གྱི་ཆ་ནས་ཡང་། Electoral college གཉིས་ལས་ཁོ་ཕམ་པ་ཆུ་ཤེལ་ཅི་བཞིན་འཇིག་རྟེན་པ་ཡོད་ཚད་ཀྱི་མིག་ལམ་ན་གསལ་བོ་ཡིན་ཡང་། ཁྲེལ་གཞུང་བོར་བའི་ཁོ་བོས། ནམ་རྒྱུན་ཀྱི་ངན་གོམས་བཞིན་བླུན་པོས་ཨུ་ཚུགས་བྱས་ནས་ངོས་ལེན་བྱེད་ཀྱི་མེད་པ་མ་ཟད། ཁོས་གཡོ་སྒྱུ་ལ་བརྟེན་ནས་བརྙན་འཕྲིན་ལམ་ཀྱི་གར་བ་Rudy ཡང་། ད་ལྟ་ཨ་རིའི་རྒྱལ་ཡོངས་ཉེན་རྟོག་ཁང་(FBI)གིས་ལྐོག་ཟའི་ཞིབ་འཇུག་འོག་ན་ཡོད་པ་ཡང་། ༢༠༡༥ ལོར་ཁྲིམས་འགལ་བྱས་བར་བཙོན་དུ་མི་འགྲོ་ཆེད་ཨ་སྒོར་$35,000 ཁྲིམས་ཁང་ལ་གཏའ་མ་བཞག་མཁན། ཨ་རིའི་མངའ་སྡེ་Texas་ནས་ཡིན་པ་Ken Paxton་སོགས་ཀྱིས་སྣེ་ཁྲིད་དེ། སྤྱི་མཐུན་ཚོགས་པའི་གྲོས་འཐུས་༡༢༦ ཙམ་གྱིས་དེ་ཟུང་གི་གཏམ་འཆལ་ལ་རྒྱབ་སྐྱོར་བྱས་ནས་ཁྲིམས་ཁང་མཐོ་དམའ་སོགས་སུ་འོས་བསྡུ་རྫུན་བཟོ་བྱས་ཚུལ་སྐོར་གྱོད་གཏུགས་གྲངས་ལས་འདས་བ་བྱས་ཀྱང། འཆལ་གཏམ་ནི་ཁུངས་མེད་རང་ཡིན་པས་ཁྲིམས་ཁང་ཡོད་ཚད་ཀྱིས་ཁས་ལེན་བྱས་ཐབས་བྲལ་བ་རེད། Ken Paxton་ལ་མཚོན་ན་ཁྲོ་ཐུང་ལ་རྒྱབ་སྐྱོར་བྱེད་པ་ནི་ཁོའི་ནག་ཉེས་ཁྲིམས་འོག་ནས་ཐར་ཐབས་འཚོལ་བ་ཁོ་ན་དེ་ཡིན་ལ། Rudy ཡང་དེ་བཞིན་ནག་སྣ་ཚོགས་འོག་ན་ཡོད་པ་རེད།  https://www.supremecourt.gov/orders/courtorders/121120zr_p860.pdf
Texas Attorney General Ken Paxton facing FBI investigation, AP report says | The Texas Tribune
Paxton Surrenders in Securities Fraud Indictment | The Texas Tribune

༢༽ དོན་དངོས་སུ་ཨ་རིའི་འོས་བསྡུའི་སྐབས་མི་མང་གིས་འོས་ཤོག་རྫུན་འཕེན་བྱ་ཐབས་མེད་པ་ལྟ་བུ་ཡིན། རྒྱུ་མཚན་ནི། མངའ་སྡེ་སོ་སོའི་ཁྲིམས་སམ་འགྲོ་ལུགས་ལྟར་འོས་བསྡུ་ལས་ཁངས་ནས་འོས་ཐོབ་ཡོད་པར་ཐོ་འགོད་བྱ་དགོས་ཤིང། འོས་བསྡུ་སྐབས་བདེན་དཔང་ངམ་རང་ཉིད་ངོ་སྤྲོད་ལག་ཁྱེར་ཡང་སྟོན་དགོས་ཤིང། དེ་འོས་ཐོ་དང་བསྡུར་ནས་བདེན་མིན་རྟག་དཔྱད་ཀྱང་བྱེད་ཀྱི་ཡོད། ད་དུང་འོས་འཕེན་སྐབས་སྤྱི་མཐུན་དང་མང་གཙོ། བར་གནས་ཚོགས་པ་སོགས་ཀྱིས་ཆ་མཉམ་ངང་ཕྱོཊ་ཡོངས་ནས་ལྟ་རྟོག་ནན་མོ་བྱེད་ཀྱི་ཡོད། གཞན་ཤི་ཟིན་པའི་མིའི་མིང་བེད་སྤྱོད་བྱས་ནས་འོས་འཕེན་སྐད་ཟེར་བ་ནི་རྫུན་གཏམ་ཁོ་ན་ཡིན། མི་ལ་སྐྱེས་སྐར་ལག་ཁྱེར་(birth certificate) དགོས་པ་བཞིན། ཨ་རི་ནས་མི་ཤི་བའི་རྗེས་འདས་བོ་དེར་ངེས་བར་(death certificate)དགོས་ཀྱི་ཡོད། གསོན་པོ་ཞིག་གིས་འདས་བོ་death certificate འཁྱེར་ནས་འོས་འཕེན་ཟེར་བ་ནི་གད་མོ་ཤོར་བྱེད་མ་ཡིན་ནམ། གལ་སྲིད་གང་ཟག་ཞིག་གིས་འོས་རྫུན་བྱེད་པའི་དབང་བཏང་ན་འང་། དབུས་གཞུང་དང་ས་གནས་སྲིད་གཞུང་ཡོད་ཚད་ནས་ཁྲིམས་འགལ་ཡིན་པ་མ་ཟད། དབུས་གཞུང་དང་ས་གནས་སོ་སོའི་ཁྲིམས་དང་སྟུན་པའི་དངུལ་གྱི་ཉེས་ཆད་དང་རྒྱུན་རིང་བཙོན་དུ་ཁྲིད་ཀྱི་རེད། 
ད་དུང་དྲྭ་སྟེང་ནས་འོས་རྫུན་ཟེར་བའི་སྐོར་ལ་ཁྲོ་ཐུང་ཉིད་ཀྱི་གྲོགས་པོ་དང་ཁོའི་འོས་བསྡུ་སོགས་ཀྱི་སྐོར་ལ་སློབ་སྟོན་པ་ Chris Christie ཡང་། ཨ་རིའི་ཆེས་མཐོ་ཉེན་རྟོག་འགན་འཛིན་Barr་གཉིས་ཀྱིས་བདེན་དཔང་མི་འདུག་ཟེར་ཡོད། ཨ་རིའི་དྲྭ་རྒྱའི་འགན་འཛིན་ Christopher Krebs་གྱིས་དྲྭ་སྟེང་ནས་འོས་བསྡུ་ཧ་ཅང་བདེ་ལེགས་ངང་བྱུང་ཡོད་ཟེར་ཡོད། བདེན་པ་བཤད་པ་ལ་བརྟེན་ནས་མི་དེ་གཉིས་ཀྱི་ལས་དཀའ་ཤོར་སོང་བ་རེད། 
Voter ID Requirements | USAGov
Voter Identification Requirements | Voter ID Laws
https://www.fbi.gov/scams-and-safety/common-scams-and-crimes/election-crimes-and-security
༣༽ ཁ་རྒྱུན་ལ། གང་དུ་ཤ་རུལ་ཡོད་ན་དེ་ལ་སྐྱག་སྦྲང་འཁོར་ཟེར་བ་ལྟར། ཁྲོ་ཐུང་ནི་ཨ་རིའི་སྲིད་འཛིན་ཡོད་ཚད་ལས་དབུས་གཞུང་ཡང་། ས་གནས་གཞུང་གཉིས་ཀྱིས་ནག་ཉེས་སྣ་ཚོགས་འོག་དོགས་གཞི་ཅན་ཡང་། དེ་རྣམས་སུ་ཞིབ་འཇུག་བྱེད་བཞིན་པའི་སྲིད་འཛིན་གཅིག་པོ་དེ་ཡིན་ཞིང། ཁོའི་དཀྱིལ་འཁོར་ནང་གི་མི་མང་ཆེ་བ་ཁྲིམས་འོག་གི་ཉེས་ཅན་པ་དག་དག་ཡིན་པ་ཡང་། རེ་འགའ་ད་ལྟ་ཁྲིམས་ཁང་ནང་ན་ཡོད་པ་ཡང་། ལ་ལས་ནག་ཉེས་ཁས་ལེན་བྱས་བ་ཡང་། ཡང་ཁ་ཤས་ཁྲོ་ཐུང་རང་གི་ནག་ཉེས་སྦ་གསང་ཆེད་སྲིད་འཛིན་ཀྱི་གོ་ས་ལོག་སྤྱོད་བྱས་ནས་བཙོན་དུ་འགྲོ་མི་དགོས་བ་བྱས་ཡོད། དེ་ལྟ་བུ་རུལ་དྲི་ཁ་བའི་མི་ཞིག་གིས་ཉིད་ཀྱི་ནག་ཉེས་བྱས་བ་མ་ལུས་བ་ཁྲིམས་མཐུན་ཡང་། སེམས་སུ་གང་དྲན་པ་ཡང་། ཁ་ནས་གང་བཤད་པ་བདེན་པ་ཡིན་ཚུལ་ཡང་། དམངས་ཚོགས་ཀྱིས་ཁྲིམས་མཐུན་ཡང་། མང་གཙོའི་ལམ་ནས་ཁོ་བོ་ཕོ་བྲང་དཀར་བོ་ནས་རྒྱང་ཕུད་བྱས་བ་ཁྲིམས་འགལ་དང་རྫུན་མ་རེད་ཟེར་པའི་ཀུ་ཅོ་ལ། མི་མང་གིས་བརྟག་དཔྱད་བྱེད་པའི་ཚབ་དུ་མགོ་འཐོམས་པ་ནི། མང་གཙོ་སྟེ་མི་བརྟན་པའི་དབུགས་ལྒང་སྟེང་ནས་འཇིག་པའི་སྔ་ལྟས་ཡིན་པ་ཡང་། དུས་ནམ་ཞིག་ལ་མང་གཙོ་འཇིག་པ་ཡིན་ན་དུས་དེ་ནས་བོད་ཀྱི་ལས་དབང་ལ་དྲོད་ལམ་ལམ་གྱི་ཉི་ཉོད་ཤར་བའི་ཚབ་དུ། དེ་བས་ཀྱང་གྲང་ངར་ལྡན་བའི་ནམ་ཟླ་རིང་མོ་ཞིག་ཡོང་སྲིད་ཀྱི་རེད།
https://www.reuters.com/article/us-usa-trump-bannon-associates-factbox-idUSKBN25G1YU