ཀོ་ལི་གྷ་གཞུང་པ་ཚེ་དབང་བསོད་ནམས།
ཀ་ར་གུ་རམ་ཕྲུ་གུར་སྤྲད།།
ཁ་ཟས་ཞིམ་པོ་ཕྲུ་གུར་སྤྲད།།
ག་རེ་དགོས་ནའང་ཕྲུ་གུར་སྤྲད།།
ང་ཚོའི་ཕྲུ་གུ་འཕྲོ་རླག་བཏང་།།
ཅ་ལག་འཐོན་གསར་མགོ་བོ་འཁོར།།
ཆ་རྐྱེན་བཟང་ནས་སློབ་སྦྱོང་མེད།།
ཇ་ཆང་མང་ནས་སྐྱིད་པོ་བཏང་།།
ཉ་ཤ་ཕག་ཤར་སྤྱང་ལྟར་བརྔམས།།
ཏ་ལའི་བླ་མས་བཀའ་དྲིན་འོག།
ཐ་དབུས་ཚང་མར་སློབ་གྲ་བཙུགས།།
ད་སྐབས་སློབ་སྦྱོང་མ་བྱས་ན།།
ན་གསོ་རྒས་ནས་འགྱོད་ན་ཕྱི།།
པ་ཕ་ཨ་མ་བཀའ་དྲིན་ཆེ།།
ཕ་མ་འཛོམས་པ་ཚེ་སྟོད་རེད།།
བ་ཕྱུགས་བཞིན་དུ་མ་ཉལ་ཨ།།
མ་བཟང་ཇི་བཞིན་སྔ་ལང་རྒྱོབ།།
ཙ་བ་བོད་ཡིག་སྲ་བརྟན་བཟོས།།
ཚ་གྲང་བཟོད་བསྲན་ཆེ་ཙམ་དགོས།།
མཛའ་བརྩེ་ལྡན་པའི་སློབ་ཕྲུག་ཚོ།།
ཝ་སྤྱང་བཞིན་དུ་མ་འཁྱམས་ཨ།།
ཞ་མོ་འཐོམ་ཞ་མ་གྱོན་ཨ།།
ཟ་ཐུང་རྒྱས་སྤྲོས་མ་བྱེད་ཞིག།
འ་འུར་ཆེ་བས་བོད་ཡིག་ཉམས།།
ཡ་ཚན་ཆེ་བའི་སྐད་ཡིག་གཞན།།
ར་མ་ལུགས་ཀྱི་སྐད་ཡིག་སྦྱང་།།
ལ་རྒྱ་ཡོད་ན་བོད་ཡིག་སྦྱོང་།།
ཤ་ཚ་ཡོད་ན་བོད་ཡིག་སློབ།།
ས་ཆ་གང་དུ་བསྡད་ཡོད་ཀྱང་།།
ཧ་ཅང་རིག་པ་མ་གྲིམ་ན།།
ཨ་ཁ་ཟེར་དུས་ཚར་པ་རེད།།
རང་སྦྱོང་ཟབ་སྦྱོང་མིང་མང་ཡང་།།
དོན་དུ་རང་གི་རིག་པ་གྲིམ།།
གཞན་བསྟེན་བསམ་བློ་མ་མང་ཨ།།
རང་ཁ་རང་གསོ་མགོ་བོ་མཐོ།།
ཤེས་ཡོན་སྲིད་བྱུས་གང་ཡིན་ཀྱང་།།
རང་གི་མ་སྦྱང་འཐུད་ཤོར་བཏང་།།
བོད་ཡིག་འཐུད་ཤོར་མང་བ་འདི།།
སྦྱང་མཁན་མེད་པའི་ལན་པ་རེད།།
དབྱིན་ཡིག་ཆག་ཀྱོག་བེད་སྤྱོད་མང་།།
ལྟོ་གོས་འཚོལ་བའི་ལག་ཆ་རེད།།
བོད་ཡིག་བེད་སྤྱོད་ཉུང་བ་དང་།།
སྙན་སུམ་སྡེབས་སྦྱོར་དཀའ་བ་བཅས།།
བོད་ཡིག་སྦྱང་བརྩོན་དེ་བས་ཉུང་།།