དེབ་གསར་འགྲེམས་བརྡ།

རྣམ་དཔྱོད་ཀྱི་འཇུག་པ་ཡངས་པའི་རྒྱ་ཆེའི་བོད་ཡིག་ཀློག་པ་པོ་རྣམ་པ་ལགས།

ངེད་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་རིག་གནས་སྐབས་བཅུ་དགུ་པའི་འཛིན་གྲྭའི་མཐར་ཕྱིན་ཆེད་དེབ་ཏུ། <<བོད་ཀྱི་ལོ་རྒྱུས་དཔྱད་རྩོམ་བདམས་བསྒྲིགས་>>ཞེས་པ་བོད་ཕྱི་ནང་གཉིས་ཀྱི་གྲགས་ཅན་དཔྱད་རྩོམ་བརྒྱ་དང་བཅུ་བཞི་ཙམ་བཏུས་པའི་དེབ་གཟུགས་སྟོད་ཆ་དང་སྨད་ཆ་གཉིས་ལས་གྲུབ་པ་ཞིག་ཁྱེད་ཀློག་པ་པོ་ཚོའི་སྤྱན་ལམ་དུ་ཐོན་ཡོད། དེབ་འདིར་བོད་ཕྱི་ནང་གཉིས་ཀྱི་དུས་དེབ་དང་ལོ་དེབ་མི་འདྲ་བ་ཁག་བཅུ་བཞི་ལྷག་དང་། ཆེད་བསྒྲིགས་དང་ལོ་རྒྱུས་དེབ་ཐེར་ཁག་བཅུ་ཙམ་བཅས་ལས། བོད་ཀྱི་གདོད་མའི་དུས་སྐབས་ནས་དགའ་ལྡན་ཕོ་བྲང་གི་དུས་མཇུག་བར་གྱི་བོད་ཀྱི་ལོ་རྒྱུས་ཀྱི་དུས་སྐབས་སོ་སོ་དང་འབྲེལ་བའི་དཔྱད་རྩོམ་གྲགས་ཅན་དག་བཏུས་ཡོད།

དེ་ཡང་བོད་ཕྱི་ནང་གཉིས་ནས་བོད་རིག་པ་སྤྱི་དང་སྒོས་སུ་བོད་ཀྱི་ལོ་རྒྱུས་ཉམས་ཞིབ་ཀྱི་ཚ་རླབས་ལྟ་བུ་ཞིག་འཕྱུར་བཞིན་པའི་སྐབས་འདིར། ཡུལ་དུས་སོགས་རྒྱུ་རྐྱེན་དུ་མས་ང་ཚོ་བཙན་བྱོལ་ནས་དཔྱད་གཞིའི་རྒྱུ་ཆ་འཚོལ་སྡུད་ཀྱི་ཐད་ནས་དཀའ་ངལ་མི་ཉུང་བ་ཞིག་འཕྲད་ཀྱིན་ཡོད་པར་བརྟེན། དེ་དག་གི་བར་སྟོང་སྐོང་བའམ་བོད་ཀྱི་རིག་གཞུང་ལ་ཞབས་འདེགས་ཅུང་ཙམ་སྒྲུབ་ཐུབ་པའི་ལྷག་བསམ་གཙང་མ་ཞིག་གིས། ངེད་འཛིན་གྲྭའི་སློབ་མ་ཐུན་མོང་ནས་ལོ་ངོ་གཅིག་ལྷག་གི་སློབ་ཞོར་གྱི་དུས་ཚོད་སྤྱད་དེ་མ་དཔེ་འཚོལ་སྡུད་དང་གློག་ཀླད་དུ་ཡི་གེ་བཏགས་པ། ཞུ་དག་སོགས་ཀྱི་ཐད་དུ་དཀའ་སྤྱད་འབད་འབུངས་དུ་མ་ཞིག་ལས་གྲུབ་ཡིན་པས་ཁྱེད་ཀློག་པ་པོ་རྣམས་ཀྱིས་རྒྱབ་སྐྱོར་དང་ཐུགས་ཁུར་གང་མང་གནང་བའི་རེ་སྐུལ་ཞུ་བ་ལགས་སོ། །
(གསལ་བཤད། དཔེ་དེབ་འདི་ཉིད་ལོ་སྔོན་མའི་ཕྱི་ཟླ་བརྒྱད་པའི་ནང་དུ་དཔར་སྐྲུན་དང་དབུ་འབྱེད་མཛད་སྒོ་སོགས་གྲུབ་ཟིན་ཀྱང་། ནད་ཡམས་ཀྱི་དབང་གིས་ད་བར་ཕྱོགས་སོ་སོར་འགྲེམས་སྤེལ་བྱ་མ་ཐུབ།)

ཞེས་རྩོམ་སྒྲིག་པས།

འབྲེལ་གཏུགས་བྱ་ཡུལ།

རྒྱ་གར་དྷ་རམ་ས་ལ། ཟླ་བ་ལྷ་མོ། ཁ་པར་ཨང་། 70187 96244
རྒྱ་གར་ལྷོ་ཕྱོགས། བློ་བཟང་ཐུབ་བསྟན། ཁ་པར་ཨང་།8626985643
རྒྱ་གར་དྷེ་ར་དྷུན། བློ་བཟང་དོན་གྲུབ། ཁ་པར་ཨང་། 7018804064
བལ་ཡུལ། བཀྲ་ཤིས་བསམ་གཏན། ཁ་པར་ཨང་། 9886051359