དོ་ནུབ་ཀྱི་མུན་པ།

བུད་མེད་རྩོམ་པ་པོ་གཟུངས་ཕྱུག་སྐྱིད། རྡ་ས།

དོ་ནུབ། ནམ་མཁའ་ནམ་མཁར་མི་མཐོང་བའི་དོ་ནུབ

ས་ཆེན་གྱི་དུངས་པ་གཉིད་བཞིན་པའི་དོ་ནུབ

གྲང་རླུང་ངུ་ངག་གིས་བཞུར་བཞིན་པའི་དོ་ནུབ

ངའི་མཐོང་སྣང་གི་སྐར་ཕྲན་རེ་རེ་སུ་ཞིག་གི་མིག་ཆུའི་ཕྲེང་རྒྱུན་ཡིན་ནམ

རླུང་བུ་ཤུར་ཤུར་དུ་ལྡང་ཞིང།

ཆུ་མོ་ངུ་ངག་གིས་བཞུར་བའི་དོ་ནུབ

མུན་པ སུ་ཞིག་གིས་ཆེད་དུ་ང་ཚོར་འཐེན་པའི་ཡོལ་རས་ཡིན

བསམ་གཞིགས་ཀྱིས་རུས་རྐང་མེ་རུ་སྦར་བཞིན་པའི་དོ་ནུབ

མྱ་ངན་གྱི་སྟོན་ལོ་རླུང་གིས་འཁུར་བཞིན་པའི་དོ་ནུབ

ང་ཚོ།

སུ་ཞིག་གི་སྡུག་རྩུབ་ཀྱིས་རྨེག་མེད་བཟོ་བཞིན་པའི་དབུགས་རྒྱུན་ལྷག་མ་དེ་མིན་ནམ

མུན་ནག་གི་གཏིང་རིམ་ནས་ཁྲག་མདོག་གིས་བཞུར་བའི་ཚེ་སྲོག་རེ་རེ

སའི་གོ་ལའི་སྤྱི་གཙུག་ནས་འོད་དུ་འཚེར་དུས

ང་ཚོས་ཀྱང་དུས་རབས་ཀྱི་འཕུར་བསྐྱོད་ཁྲོད་ནས

མུན་ནག་གི་རུལ་སུངས་རྔུབ་ནས་ཅི་ཞིག་བྱེད

ད་ནི་རང་གི་བླ་སྲོག་ལ་རང་ཉིད་ཀྱིས་བྱི་དོར་བྱེད་དགོས

ད་ནི་རང་གི་རྣམ་ཤེས་ལ་རང་ཉིད་ཀྱིས་སྲོག་དབུགས་སྩོལ་དགོས

དོ་ནུབ་ང་ཚོས། ནག་འཐོམ་མེར་གནས་པའི་མུན་པ་འདི་ཧར་གྱིས་བཀོག་ཐུབ་ན

ད་དུང་སུ་ཞིག་གི་དྭངས་གཙང་གིས་སྦར་བའི་མར་མེ་རྐང་བུ་གང

རྒྱང་ཐག་རིང་བའི་ཨ་མ་དང་མིང་སྲིང་ཚོའི་ཆེད་མཐོ་རུ་འདེགས་ཐུབ་ན

དེ་ནི་སུ་ཞིག་གི་སྐྱ་ཧྲུལ་ཧྲུལ་གྱི་གདོང་རིས་ལ་མཁོ་བའི་ལྗང་མདོག་གི་ལྷན་པ་ཡིན་སྲིད

དོ་ནུབ། མུན་པ་ནག་པོ་གཡོ་ཟོལ་གྱིས་བཞུར་བའི་དོ་ནུབ

དབྱངས་རྟ་རེ་རེ་མྱ་ངན་གྱིས་སྦག་པའི་དོ་ནུབ

ང་ཚོ་རང་ཉིད་ཀྱི་ཉག་ཕྲ་བའི་དུར་ས་ནས་མཐོ་རུ་འགྲེང་ཡོད

དཀར་གཙང་གཙང་གི་རྒྱབ་རི་དེའི་ཆེད་དུ

དྲོད་ལམ་ལམ་གྱི་མར་མེ་དེའི་ཆེད་དུ

ང་ཚོ་ད་དུང་རང་ཉིད་ཀྱི་མངའ་ཐང་ལ་ཁེན་ནས་ཐག་རིང་དུ་བཞུད་ཆོག

༢༠༠༩ ༣ ༢༣ཉིན་རྡ་རམ་ས་ལ་ནས་བྲིས།